নহিমিয় 5 - Chakma Bibleনাদামানুচ্চুনোরে সাহায্য গরানা 1 পরেন্দি মানুচ্চুনে আর তারার্ মোগ্কুনে তারার্ তাগোয়্যে যিহূদী ভেইয়ূনোর্ বিরুদ্ধে অমকদ রঅ ছারা ধুরিলাক্। 2 কয়েকজনে কদন্, “আমি আমা ঝি-পূঅগুন্দোই মান্জ্যন্দি ভালোক্কুন্; খেইনে বাঁজি থেবাত্তে আমার্ অমকদ ভাদঅ্ দরকার্।” 3 অন্যগুনে কদন্, “খানার্ অভাবে ধান্ পেবাত্তে আমা ভূইয়ানি, আংগুর ক্ষেত্তানি আর ঘরানি বন্ধক রাগা পরের্।” 4 আরঅ অন্যগুনে কলাক্, “রাজারে খাজানা দিবাত্তে ভূইয়ানি আর আংগুর ক্ষেত্তানি বন্ধক রাগেইনে আমাত্তুন্ টেঙা নেযা পোজ্যে। 5 যুনিয়ো আমি এক্ জাদর্ মানুচ্ আর আমা ঝি-পূঅগুনে তারার্ ঝি-পূঅগুনো ধোক্কেন্ তো আমা ঝি-পূঅগুনোরে চাগর্ বানা পোজ্যে, আর আমা ঝি-গুনোর্ ভিদিরে কয়েকজনে আগেত্তুন্ ধুরি চাগর্ ওই যেইয়োন্। ইক্কিনে আমাত্তুন্ কনঅ্ খেমতা নেই, কিত্যে আমার ভূইয়ানি আর আংগুর ক্ষেত্তানি অন্যর্ ওই যেইয়্যে।” 6 তারার্ কানাকুদি আর এ নালিশছানি শুনিনে মুই অমকদ রাগ্ তুলিলুঙ্। 7 মুই তারার্ কধানি মনে মনে ভাবি চেলুঙ্ আর সে পরেন্দি মুরুব্বী মানুচ্চুনোরে আর নেতাগুনোরে দুষ্ ধুরিনে কলুঙ্, “তুমি তমার্ নিজো দেজর্ মানুচ্চুনোর্ ইত্তুন্ সুদ আদায় গোজ্য।” সেনত্তেই মুই তারার্ বিচের্ গুরিবাত্তে দাঙর্ এক্কো মিটিং ডাগিলুঙ্। 8 মুই কলুঙ্, “অযিহূদীগুনোর্ ইদু আমার্ যিদুক্কুন্ ভেই বেজা যেইয়োন্ যিদ্দুর্ সম্ভব্ তারারে আমি ছাড়িনে আন্যেই। আর ইক্কিনে তুমি তমা ভেইয়ূনোরে বিজিবাত্তে বাধ্য গোজ্য, যিয়েনর কারনে আমাত্তুন্ আরঅ তারারে কিনি নেযা পুরিবো।” এ কধাগান শুনিনে তারা জুরো গুরিনে থেলাক্, কিত্যে জোব্ দেদে ধোক্কেন্ তারা কনকিজু তোগেইনে ন-পেলাক্। 9 মুই আরঅ্ কলুঙ্, “তুমি যিয়েনি গোজ্য সিয়েনি ঠিগ্ নয়। অযিহূদী শত্রুগুনে যেনে আমারে ঘিনেই ন-পারন্ সেনত্তেই আমাত্তুন্ গোজেনরে দোরেইনে চলানা কি আমার্ উজিত্ নয়? 10 মানুচ্চুনোর ইত্তুন্ মর্, মর্ ভেইয়ূনোর্ আর মর্ কামগুরিয়্যেগুনোর্অ টেঙা আর ধান পেবার্ আঘে। মাত্তর্ এজঅ, আমি ইগুন্ বেক্কুন্ মাফ্ গুরি দিই। 11 ইক্কিনে তুমি তারার্ ভূইয়ানি, আংগুর ক্ষেত্তানি, জলপাইয়োর্ বাগানানি আর ঘরানি তারারে ফিরেই দুয়ো, আর টেঙা, ধান, নূয়ো আংগুর-রস আর তেলত্তেই শতকরা যে সুদ্তুন তুমি নেযেয়ো সিয়েনঅ তারারে ফিরেই দুয়ো।” 12 এ কধাগান শুনিনে তারা কলাক্, “আমি বেক্কানি ফিরেই দিবোং। আমি তারাত্তুন্ আর কিচ্ছু দাবি ন-গুরিবোং। তুই যিয়েনি কলে আমি সিয়েনি গুরিবোং।” সে পরেন্দি মুই ধর্মগুরুগুনোরে ডাগিনে পাদেলুঙ্ আর মুরুব্বীগুনোরে আর নেতাগুনোরে দিইনে শমক্ খাবেলঙ্ যেনে তারা তারার্ শমক্ অনুসারে কাম্ গরন্। 13 মঅ পোজাক্কানর্ মুজুঙোন্দিগান্ মুই ঝাড়িনে কলুঙ্, “যিগুনে এ সমক্কান্ রোক্ষ্যে ন-গুরিবাক্ গোজেনে তারারে পত্তিজনরে তারার্ ঘরানি আর সোম্বোত্তিত্তুন্ এধোক্কেন্ গুরিনে ঝাড়ি ফেলেব। এবাবোত্যে মানুচ্চুনোরে এধোক্কেন্ গুরিনে ঝাড়ি ফেলা অবঅ আর তারার্ বেক্কানি শেজ্ গরা অবঅ।” এ কধানি শুনিনে বেক্ মানুচ্চুনে কলাক্, “আমেন,” আর তারা লগেপ্রভুর বাঈনী গুরিলাক্। মুরুব্বী মানুচ্চুনে তারার্ শমক্ অনুসারে কাম্ গুরিলাক্। 14 অর্তক্ষস্ত রাজার রাজাগিরর্ কুড়ি বজরত্ যেক্কে মুই যিহূদা দেজত্ মানুচ্চুনোর্ শাজন্গুরিয়্যে নিয়োগ্ ওইয়োং, সেক্কেত্তুন্ ধুরি তার্ রাজাগিরির্ বত্রিশ বজর্ সং, অত্তাৎ সে বার বজর ধুরিনে মুই বা মর্ ভেইয়ূনে শাজন্গুরিয়্যেবোর পাইদে হেবার্ জিনিজছানি গুজি ন-লোই। 15 মাত্তর্ মঅ আগেন্দি যিদুক্কুন্ শাজন্গুরিয়্যে এলাক্ তারা মানুচ্চুনোর্ উগুরে অমকদ গুয়োর্ বুদি চাপি দুয়োন্ আর হানা-দানা আর আংগুর-রস বাদেয়ো তারাত্তুন্ পাচশঅ কুড়ি গ্রাম রূবো নিদাক্। তারার্ চাগর্-বাগরুনেয়ো মানুচ্চুনোর্ উগুরে চেলা চোদেদাক্। মাত্তর্ গোজেনর উগুরে ভোক্তিপূর্ণ দর্ থানাই মুই সেধোক্কেন্ কাম্ ন-গরঙ্, 16 বরং মুই এ দেবালর্ কামত্ নিজোরে লাগেদুঙ্। মর্ বেক্ চাররুনেয়ো কাম্ গুরিবাত্তে সিদু এগত্তর্ অদাক্। আমি কনজনে কনঅ ভূই ন-কিনিই। 17 ইগুনে বাদেয়ো যিহূদী আর দাঙর্ পোজিশনর্ কামগুরিয়্যেগুনো ভিদিরেত্তুন্ দেড়শঅ্জন আর কায়-কুরে জাত্তুনোর ভিদিরেত্তুন্ যিগুনে আমা ইদু এদাক্ তারা মঅ লগে হানা-দানা গুরিদাক্। 18 পত্তি দিন এক্কো বলদ্গোরু, ছবুয়ো বেঈ লোইয়্যে ভেড়া আর কয়েক্কো পেখ্ মত্তেই রানা অদঅ, আর পত্তি দশ দিন পরেন্দি বোস্তোমান্ গুরিনে নানান্ বাবোত্যে আংগুর-রস মরে দিয়্যে অদঅ। মাত্তর্ মুই কনদিনঅ শাজন্গুরিয়্যেগুনোর্ পাইদে হানা জিনিসছানি দাবি ন-গরঙ্, কিত্যে এ দাবিগানি মানুচ্চুনো উগুরে অমকদ দাঙর্ বুদি ধোক্কেন্ এলঅ। 19 ও মর্ গোজেন্, এ মানুচ্চুনোত্তে মুই যেদক্কানি কাম্ গোজ্যং সিয়েনিত্তেই তুই মর্ ভালেদি গুরিবাত্তে পুরি ন-পেলেচ্। |
Copyright © 2021 Bangladesh Bible Society
Bangladesh Bible Society