নহিমিয় 13 - Chakma Bibleনহিমিয়োর শেজ্ কামান 1 পরেন্দি যেক্কে মানুচ্চুনোর ইদু মোশির বোইবো পড়া অলঅ সেক্কে সিদু দেগা গেলঅ লেগা আগেদে, কনঅ অম্মোনীয় বা মোয়াবীয় গোজেনর মানুচ্চুনোর্ সমাজত্ কনদিনঅ মিজেই ন-পারিবো। 2 ইয়েনর্ কারনান্ অলদে, মোশির সময়োত্ তারা হানা আর পানি লোইনে ইস্রায়েলীয়গুনোর্ ইদু ন-যান্ বরং তারা তারার্ অভিশাব্পানি দিবাত্তে বিলিয়মরে ভাড়া গোজ্যন্। মাত্তর্ আমা গোজেনে সে অভিশাবর্ বদলে আশিদ্বাদ গোজ্যে। 3 মানুচ্চুনে রীদি-সুদোমর্ এ কধানি শুনিনে বিদেশীগুনোর বংশধরুনোরে ইস্রায়েলীয়গুনোর্ সমাজত্তুন্ বাদ দি দিলাক্। 4-5 এ আগেন্দি ধর্মগুরু ইলিয়াশীব, যিবেরে আমা গোজেনর ঘরঅ ভান্ডাল্-ঘরর্ ভারান্ দিয়্যে ওইয়্যে, তে টোবিয়রে এক্কান্ দাঙর্ গুদি দিলো, কিয়া টোবিয় অলদে তার্ কুদুম্মো। সে গুদিবোর্ আগেন্দি সোজ্য-উৎসর্বর জিনিস, আগর্বাট্টি আর উবোসনা-ঘরর্ জিনিসছানি রাগা অদঅ। ইয়েনিবাদেয়ো সিদু লেবীয়, গান্গেইয়্যে আর চুগিদারুনোত্তে উগুম্-গোজ্যে সোজ্যর্, নূয়ো আংগুর-রসর আর তেলর্ দশমাংশ রাগা অদঅ আর ধর্মগুরুগুনোরে যিয়েনি দিয়্যে অদঅ সিয়েনিয়ো রাগা অদঅ। 6 মাত্তর্ ইয়েনি যেক্কে অর্ সেক্কে মুই যিরূশালেমত্ ন-এলুঙ্, কিত্যে বাবিলোর রাজা অর্তক্ষস্তর্ বত্রিশ বজর্ রাজাগিরির্ সময়োত্ মুই রাজার্ ইদু ফিরি যেইয়োং। ইয়েনর্ কয়েকদিন পরেন্দি মুই রাজার্ অনুমতি নেযেইনে যিরূশালেমত্ ফিরি এলুঙ্। 7 গোজেনর ঘরত্ টোবিয়রে এক্কো গুদি দিইনে ইলিয়াশীব যে ভান্ন্যেই কামানি গোজ্যে মুই যিরূশালেমত্ ফিরি এইনে সে পৌইদ্যেনে শুনিলুঙ্। 8 সেক্কে মুই অমকদ কাঙেলেত্যে পেইনে টোবিয়রে বেক্ জিনিস্ছানি সে গুদিবোত্তুন্ মেলা মারিনে ফেলেই দিলুঙ্। 9 সে পরেন্দি মঅ উগুমে সে ঘরানি সিজি গরা অলঅ আর মুই গোজেনর ঘরর্ পযাপিরানি, সোজ্য-উৎসর্বর পযাপিরানি আর আগর্বাট্টি্পানি আরঅ সিদু আনিনে রাগেলুঙ্। 10 মুই ইয়েন হবর্ পেলুঙ্, গানগেইয়্যেগুনোর্ আর অন্য লেবীয়গুনোর্ পাওনা ভাগ্কানি দিয়্যে ন-অয় বিলিনে তারা তারার্ সেবা-কামানি ছাড়িনে নিজোর্ নিজোর্ ক্ষেত্-খামারত্ ফিরি গেলাক্। 11 সেক্কে মুই দাঙর্ পোজিশনর্ কাম্গুরিয়্যেগুনোরে গেইল্ দিইনে পুযোর্ গুরিলুঙ্, “গোজেনর্ ঘরর্ কামত্তে যিয়েনি দরকার্ সিয়েনি দেদে কিত্তেই এলাফেলা ওইয়্যে?” সে পরেন্দি মুই সেই বেক্ লেবীয়গুনোরে ডাগিনে এগত্তর্ গুরিনে তারার্ নিজো নিজো পোজিশনত্ অদে অদে রাগেলুঙ্। 12 সে পরেন্দি যিহূদার বেক্ মানুচ্চুনে তারার্ ধানর্, নূয়ো আংগুর-রসর আর তেলর্ দশমাংশগুন্ ভান্ডাল-ঘরত্ আনিলাক্। 13 ধর্মগুরু শেলিমিয়, ধর্ম-মাস্টর্ সাদোক আর পদায় নাঙে এক্কো লেবীয়রে মুই ভান্ডাল্-ঘরর্ ভারান্ দিলুঙ্ আর সক্কুরোর্ পূঅ, অত্তাৎ মত্তনিয়োর নাদিন্ হাননরে তারার্ এজাল্দিয়্যে ইজেবে নেযেলুঙ্। বেক্কুনে এ মানুচ্চুনোরে বিশ্বেজি মনে গুরিদাক্। তারা উগুরে তারার্ গুট্টি-ভেইয়ূনোর্ ভাগ্কুন ভাগ্ গুরি দেনার্ ভারান্ দিয়্যে অলঅ। 14 ও মর্ গোজেন্, এ কামানিত্তে মরে ইদোত্ রাগেচ্। মঅ গোজেনর্ ঘরান্ আর সে ঘরর্ সেবা-কামত্তে মুই বিশ্বেজ্ গুরিনে যিয়েনি গোজ্যং সিয়েনি ফুজি ফেলেই ন-দিজ্। 15 সে অক্তত্ মুই দেগিলুঙ্ যিহূদার মানুচ্চুনে জিরেবার্ দিন্নোত্ আংগুর-মারেদে কাম্ গোজ্যন্ আর খেত্খেত্তি আনদন্ আর সেই খেত্খেত্তিগানি, আংগুর-রসছানি, আংগুর, ডোমোর্ আর অন্য নানান্ বাবোত্যে বুধি তারা গাধা উগুরে তুলি দুয়োন্। ইয়েনিবাদেয়ো তারা জিরেবার্ দিন্নোত্ সিয়েনি যিরূশালেমত্ আন্যন্। সেনত্তেই জিরেবার্ দিনোত্ হানা জিনিস বিজিবার্ পৌইদ্যেনে মুই তারারে উজিয়ার্ গুরিলুঙ্। 16 যিরূশালেমত্ বজত্তিগুরিয়্যে সোরর মানুচ্চুনে মাছ আর বিজিবার্ অন্য বেক্ জিনিসছানি আনিনে জিরেবার্ দিন্নোত্ যিরূশালেমত্ যিহূদার মানুচ্চুনোর্ ইদু বিজি দিলাক্। 17 মুই সেক্কে যিহূদার মুরুব্বীগুনোরে গেইল্ দিইনে কলুঙ্, “তুমি ইয়েন্ কি গরর্? তুমি দঅ এ অন্যেই কামানি গুরিনে জিরেবার্ দিন্নোর্ সুদ্ধো-সাংগগান্ বর্বাত্ গোজ্য। 18 তমা পূরোণিমানুচ্চুনে কি সে একই কামানি ন-গরন্, যিয়েনর্ কারনে আমা গোজেনে আমা উগুরে আর এ শঅরান উগুরে এ দজাগান্ ঘোদেয়্যে? আর ইক্কিনে তুমি জিরেবার্ দিন্নোর্ সুদ্ধো-সাংগগান্ বর্বাদ্ গুরিনে ইস্রায়েলীয়গুনো উগুরে গোজেনর আরঅ অহুজিগান্ বাড়েই তুল্য।” 19 মুই এ উগুমান্ দিলুঙ্, জিরেবার্ দিন্নোত্ পত্তমে যেক্কে যিরূশালেমর গেট্টুনো উগুরে সাজোন্যে ছাবা লামি এবঅ সেক্কে যেনে গেট্টুন্ বানা অয় আর জিরেবার্ দিন্নো থুম্ ন-অনা সং সিবে বানি রাগা অয়। জিরেবার্ দিন্নো যেনে কনঅ বুধি ভিদিরে আনা ন-অয় সিবে চেবাত্তে মুই মর্ নিজোর্ কয়েক্কো কাম্গুরিয়্যেরে গেট্টুনোত্ নেযেলুঙ্। 20 সেক্কে বেবসায়ীগুনে আর যিগুনে নানান্ বাবোত্যে বিজি দুয়োন্ তারা দ্বিএক বার্ যিরূশালেমর বারেন্দি রেত্তুন্ কাদেলাক্। 21 মাত্তর্ মুই তারারে উজিয়ার্ গুরি দিইনে কলুঙ্, “তুমি দেবাল ইদু কিত্তেই রেত্ কাদর্? তুমি যুনি আরঅ এ কামান্ গরঅ সালে মুই তমা বিরুদ্ধে বেবস্থা নেযেম্।” সেক্কেত্তুন্ ধুরি তারা আর জিরেবার্ দিন্নোত্ ন এদাক্। 22 সে পরেন্দি মুই লেবীয়গুনোরে উগুম্ দিলুঙ্ যেনে তারা নিজোরে সিজি গুরিনে জিরেবার্ দিন্নোত্ সুদ্ধো-সাংগ রাগেবাত্তে যেইনে গেট্টুনোত্ চুগি দুয়োন্। ও মর্ গোজেন, ইয়েনত্তেয়ো তুই মরে মনত্ রাগেজ্ আর তর্ অমকদ কোচ্পানা অনুসারে মরে দোয়্যে গর্। 23 সে অক্তত্ মুই ইয়েন দেগিলুঙ্, যিহূদার কনঅ কনঅ মানুচ্ অস্দোদ, অম্মোন আর মোয়াবর ঝিগুনোরে লোইয়োন্। 24 তারা ভিদিরে কয়েক্কো ঝি-পুঅ্ অস্দোদর বা অন্য জাদর্ ভাষান্দি কধা কন্। তারা যিহূদার্ ভাষায় কধা কোই ন-জানিদাক্। 25 মুই তারারে গেইল্ দিলুঙ্ আর কলুঙ্ তারা উগুরে যেনে অভিশাব্ লামি এজে। তারার্ কয়েক্কো মান্জ্যরে মুই মারিলুঙ্ আর চুলানি উগুরে ফেলেলুঙ্। গোজেনর নাঙে মুই তারারে দিইনে এ শমক্কান্ গোরেলুঙ্, তারা বিদেশী পূঅগুনোর্ লগে তারার্ ঝিগুনোরে বুয়ো ন-দিবাক্ আর নিজে বা তারার্ পূঅগুনে বিদেশী মিলেগুনোরে ন-লবাক্। 26 সে পরেন্দি মুই তারারে কলুঙ্, “ইস্রায়েলর রাজা শলোমনে এ বাবোত্যে মোগ্ লোইনে পাপ গোজ্যে। অন্য কনঅ জাদ ভিদিরে তা ধোক্কেন্ রাজা কনজন ন-এলাক্ আর গোজেনে তারে কোচ্পেদঅ আহ্ তারে পুরো ইস্রায়েলীয়গুনো উগুরে রাজা বানেয়্যে, মাত্তর্ তো তে বিদেশী মিলেগুনোর্ কারনে পাপ গোজ্যে। 27 ইক্কিনে আমাত্তুন্ কি এ কধানি শুনো পুরিবো, তুমিয়ো এ অমকদ পাজি কামানি গোজ্য, অত্তাৎ বিদেশী মিলেগুনোরে লোইনে আমা গোজেন উগুরে অবিশ্বেজি ওইয়ো?” 28 আজল্ ধর্মগুরু ইলিয়াশীবোর্ পূঅ যিহোয়াদার এক্কো পূঅ হোরোণীয় সন্বল্লটর ঝিবোরে লোইয়্যে। সেনত্তেই মুই সে পূঅবোরে মর্ কায়-কুরেত্তুন্ ধাবেই দিলুং। 29 ও মর্ গোজেন, ইগুনোর্ কধানি মনত্ রাগেচ্, কিত্যে ইগুনে ধর্মগুরুগুনোর্ পোজিশনানি অপবিত্র গোজ্যন্ আর ধর্মগুরু আর লেবীয়গুনোর্ কামর্ চুক্তিবো ভাঙোন্। 30 এধোক্কেন্ গুরিনে মুই বেক্কুনো ভিদিরেত্তুন্ বিদেশীয় বেক্কানি দূর্ গুরি দিলুঙ্। পরেন্দি ধর্মগুরু আর লেবীয়গুনোর কাম্ অনুসারে তারার্ পত্তিজনর্ কামানি ভাগ্ গুরি দিলুঙ্। 31 ইয়েনিবাদেয়ো ঠিগ্ মজিম্ তক্তা আর পত্তমে তুল্যে ফসল আনিবাত্তে মুই বেবস্থা গুরিলুঙ্। ও মর্ গোজেন, মরে ভালেদি গুরিবাত্তে মরে মনত্ রাগেচ্। |
Copyright © 2021 Bangladesh Bible Society
Bangladesh Bible Society