নহূম 1 - Chakma Bible

নীনবী উগুরে লগেপ্রভুর রাগ

¹ নীনবী পৌইদ্যেনে লগেপ্রভুর কধা। ইল্‌কোশ আদামর নহূমে যে দর্শনান্ পেইয়্যে সিয়েন ইয়েনত্ লেগা আঘে।

² লগেপ্রভু এমন গোজেন যিবে তার পাওনা ভোক্তি চায় আর কামফল দে; লগেপ্রভু হেনা সুজে আর তে রাগে গুল্ ওইয়্যে। লগেপ্রভু তা বিপক্ষগুনো উগুরে হেনা সুজে আর তা শত্রুগুনোত্তে তা রাগ্‌‌কান জমা রাগায়।

³ লগেপ্রভু সহজে বেজার্ ন-অয় আর তে খেমতান্দি দাঙর্; দুষীরে তে সাজা ন-দিইনে ইরি ন-দে। তা পথ্‌‌‌তান তুট্ট্যেবোইয়্যের্ আর ঝড় ভিদিরে থায়, আর মেঘ্‌‌‌কান অলঅ তার টেঙর্ ধূল্যে।

⁴ তে সাগরানরে ধমক্ দিইনে শুগেই ফেলায়; বেক্ গাঙানিরে তে পানি নেইয়্যে গুরি দে। বাশন আর কর্মিলান্ শুগেই যায় আর লেবাননর্ বেক ফুলুন্ শুগেই যান।

⁵ দাঙর্ দাঙর্ মুড়োগুন তা মুজুঙোত্ গির্‌‌‌‌গিরান আর চিগোন চিগোন মুড়োগুন গলি যান। তে আজিল্ অলে পিত্‌‌‌‌থিমীগান আর সিয়েন ভিদিরে বজত্তিগুরিয়্যেগুন বেক্কুনে গির্‌‌‌‌গিরান।

⁶ তার্ বেজার্ অনা মুজুঙোত্ কন্না টিগিই থেই পারে? কন্না সোজ্য গুরি পারে তার্ দর্‌গরেপারা রাগ্‌কান? তা রাগ্‌কান আগুনো ধোক্ক্যেন জ্বলে; তা মুজুঙোত্ দাঙর্ দাঙর্ শিলুন্ কট্টা কট্টা ওই যান।

⁷ লগেপ্রভু মংগলময়, দুঘোত্ জিরেবার জাগা। যিগুনে তাইদু আশ্রয় নেযান্ তে তারারে দেগাশুনো গরে।

⁸ মাত্তর্ তে ডুবেই দিয়্যে বান পানিলোই নীনবী শঅরান্ এক্কুবারে শেজ্ গুরিবো; তার্ বিপক্ষগুনোরে তে আন্ধারত্ লোড়েব।

⁹ ও নীনবী মানুচ্চুন, লগেপ্রভুর বিরুদ্ধে তুমি যে কুজুরোমী গুরিদা সাৎ সিয়েন তে বিফল গুরি দিবো; তুমি কাররে আর্ দুঘ্ দি ন-পারিবা।

¹⁰ তুমি মাদি ফেগঅ ভিদিরে দলামজা ওই যেবা আর মদ হেইনে মাত্তল্ অবা; তুমি নাড়া ধোক্ক্যেন পুড়ি যেবা।

¹¹ তমা ভিদিরেত্তুন্ এমন এক্কো নিগিলি এজের্ যে লগেপ্রভু বিরুদ্ধে কুজুরোমি গরের্ আর ভান্ন্যেই সল্লা দের্।

¹² লগেপ্রভু কত্তে, “ও যিহূদা, যুনিয়ো আসিরিয়গুনে বলেদি ঠিগ্ আগন্ আর জনেদি বেশ্ তো তারারে মারে ফেলা অবঅ। মুই তরে দুঘ্ দৈং ঠিগ, মাত্তর্ আর্ দুঘ্ ন-দিম।

¹³ ইক্কিনে মুই তঅ কানাত্তুন্ তারার্ জুঙোলান্ ভাঙি দিম আর তঅ বান্যেগান্ ছিনি ফেলেম্।”

¹⁴ ও নীনবী শঅরান, লগেপ্রভু তঅ পৌইদ্যেনে কত্তে, “তঅ নাঙান্ রোক্ষ্যে গুরিবাত্তে তইধু কনঅ মানুচ্ ন-থেবাক্। তঅ দেব-দেবেদাগুনোর্ মন্দিরোত্ যিদুক্কুন আরুগ্ আর মূত্তি আগন্ সিগুন মুই ভস্ত গুরি ফেলেম। তুই অপদাত্ত বিলি মুই তঅ গোরান্ যুক্কোল্ গুরিম।”

¹⁵ যে মানুচ্চো গম্ হবর্ আনে আর শান্তি ফগদাং গরে, উই চাহ্, মুড়ো-মুড়ি উগুরে তা টেঙানি। ও যিহূদা, তর্ পরব্‌‌পুন পালা আর মান্যেগানি বেক্কানি ছিড়ে। পাজিগুনে আর্ তরে আক্রমণ ন-গুরিবাক্; তারারে এক্কুবারে ভস্ত গুরি ফেলা অবঅ।