মার্ক 16 - Chakma Bible

মরণ উগুরে জিদেনা

¹ জিরেবার্ দিন্নো পার্ ওই যানার্ পরেদি মগ্‌দলীনী মরিয়মে, যাকোব মা মরিয়ম আর শালোমী যীশুর কিয়্যেগানত্ গুলি দিবাত্তে তুম্বাজ্ মলম কিনি আনিলাক্।

² সাপ্তার্ পত্তম্ দিনোত্ বেন্ন্যে মাদান্, বেলান্ উদোনার লগে লগে তারা গোরান ইধু গেলাক্।

³ সে অক্তত্ তারা একজন আরেকজনরে পুযোর্ গুরিলাক্, “গোরান মুয়োনত্তুন্ কন্না সেই পাত্তর্‌বো সোরেই দিবো?”

⁴ মাত্তর্ তারা রিনি চেইনে দেগিলাক্, পাত্তর্‌বো লারা ওইয়্যে। সে পাত্তর্‌বো অমকদ দাঙর্ এলঅ।

⁵ সেনত্যে তারা গোরানত্ সোমেলাক্, সিয়েনত্ তারা দেগিলাক্ ধুব্ কাবড়-উজ্যে এক্কো গাবুর্ মানুচ্ ডেনেদি বুয়োই আঘে। সেনত্যে তারা অমকদ আমক্ অলাক্।

⁶ সে গাবুজ্যেবো কলঅ, “আমক্ ন-ওইয়ো। মুই হবর্ পাং তুমি নাসরত আদামর্ যীশুরে তগর্, যিবেরে ক্রুশোত্ দিয়্যে ওইয়্যে। তে দঅ ইয়েনত্ নেই, তে জেদা ওই উঠ্যে। চগি, ইয়েনই সেই জাগায়ান্ যিয়েনত্ তে পড়ি এলঅ।

⁷ ইক্কুনি তুমি যেইনে তা শিচ্চ্যগুনোরে আর পিতররে এ কধাগান্ কঅ, তে তমার্ আগে আগে গালীলোত্ যার্। তে যেবাবোত্যেগুরি কোইয়্যে সেবাবোত্যেগুরি তুমি তারে সিধু দেগিবা।”

⁸ সেই মিলেগুনে কিচ্চু বুঝি ন-পারিনে গির্‌গিরেদে গির্‌গিরেদে গোর গাঢতোত্তুন্ নিগিলি এলাক্ আর সিয়েনত্তুন্ ধেই গেলাক্। তারা এদক্ দোরেয়োন্ যে, কাররে কিচ্চু ন-কলাক্।

প্রভু যীশু শিচ্চ্যগুনোরে দেগা দিলো

⁹ সাপ্তার্ পত্তম দিনোত্ বেন্যে মাদান্ যীশু মরাত্তুন্ জেদা ওই উদিলো। পরেদি তে মগ্‌দলীনী মরিয়মরে পত্তমে দেগা দিলো। এ মরিয়ম ভিদিরেত্তুন্ তে সাত্তো ভুদ্ ধাবেই দিয়্যে।

¹⁰ যীশুরে দেগানার্ পরেদি মরিয়মে যেইনে যিগুনে যীশু লগে থেদাক্ তারা ইধু হবর্ দিলো। সে সময়োত্ তারা মনত্ দুঘে কানদন্।

¹¹ যীশু জেদা ওইয়্যে আর মরিয়মে তারে দেখ্যে, এ কধাগান্ শুনিনে তারা বিশ্বেজ্ ন-গুরিলাক্।

¹² ইয়েনর্ পরেদি তার্ দ্বিজন্ শিচ্চ্য যেক্কে আঢি আঢি আদাম ইন্দি যাদন্ সেক্কে যীশু অন্য বাবোত্যে চেয়ারায় তারারে দেগা দিলো।

¹³ তারা ফিরি যেইনে বাদ্‌বাগি বেক্কুনোরে সে হবরান্ দিলাক্, মাত্তর্ তারার্ কধানিয়ো অন্য শিচ্চ্যগুনে বিশ্বেজ্ ন-গুরিলাক্।

¹⁴ ইয়েনর্ পরেদি যীশু তার্ এগারজন শিচ্চ্য ইধু দেগা দিলো। সেক্কে তারা হানা খাদন্। বিশ্বেজর্ অভাব আর মনানি দরমর বিলি তে তারারে গেইল্ দিলো, কিয়া তে মরণত্তুন্ জেদা ওই উদোনার্ পরেদি যিগুনে তারে দেখ্যন্ সিগুনোর্ কধানি তারা বিশ্বেজ্ ন-গরন্।

¹⁵ যীশু সে শিচ্চ্যগুনোরে কলঅ, “তুমি পিত্‌থিমীর বেক্ জাগাইধু যঅ আর বেক্ মানুচ্চুনো ইধু গোজেনর্ দিয়্যে গম্ হবরান্ ফগদাং গরঅ।

¹⁶ যে কেঅ বিশ্বেজ্ গরে আর অবগাহন্ লয় তেয়ই পাপত্তুন্ উদ্ধোর্ পেবঅ; মাত্তর্ যে বিশ্বেজ্ ন-গরে গোজেনে তারে দুষি বিলি ঠিগ্ গুরিনে সাজা দিবো।

¹⁷ যিগুনে বিশ্বেজ্ গরন্ তারা ইধু এ চিহ্নোগান্ দেগা যেবঅ-মঅ নাঙে তারা ভুদ্ ধাবেবাক্, তারা নুয়ো নুয়ো ভাষায় কধা কবাক্,

¹⁸ তারা আঢ উগুরে সাপ তুলি ধুরিবাক্, যুনি তারা অমকদ বিষাক্ত কিজু খান্ সালে তারার্ কনঅ ক্ষতি ন-অবঅ, আর তারা পীড়েল্যেগুনো কিয়্যেত্ আঢ্ দিলে পীড়েল্যেগুনে গম্ অবাক্।”

প্রভু যীশু স্বর্গত্ গেলঅ

¹⁹ শিচ্চ্যগুনো মুজুঙোত্ এই বেক্ কধানি কনার্ পরেদি প্রভু যীশুরে স্বর্গত্ তুলি নেযা অলঅ। সিধু তে গোজেনর্ ডেনেদি বুজিলো।

²⁰ পরেদি শিচ্চ্যগুনে যেইনে বেক্ জাগাইধু ফগদাং গরা ধুরিলাক্। প্রভু তারার্ মাধ্যমে তারা সমারে কাম্ গরা ধুরিলো আর তারারে আমক্ কাম্ গুরিবার খেমতা দিইনে প্রমান্ গুরিলো যে, তারা যিয়েনি ফগদাং গত্তন্ সিয়েনি সত্য।