মথি লেখ্যে গম্ হবর্ 6 - Chakma Bible

দান গরানা পৌইদ্যেনে শিক্ষ্যে

¹ উজিয়ার্, মান্‌জ্যরে দেগেবাত্তে ধর্মকাম্ ন-গোজ্য; যুনি গরঅ সালে তমা স্বর্গর্ বাবাত্তুন্ কনঅ বক্‌শিজ্ ন-পেবা।

² ইয়েনত্তে যেক্কে তুই নাঢা মানুচ্চুনোরে কিজু দুয়োচ্ সেক্কে ভন্ডগুনো ধোক্ক্যেন্ ন-গুরিচ্। তারা দঅ মান্‌জ্যর্ বাঈনী পেবাত্তে সমাজ-ঘরত্ আর পধে পধে ঢাক্-ঢুল্ বাজেইনে ভিক্ষ্যে দুয়োন্। মুই তমারে ঘেচ্চেকগুরি কঙর্, তারা তারার্ বক্‌শিজ্ পেইয়োন।

³ মাত্তর্ তুই যেক্কে নাঢা মানুচ্চুনোরে কিজু দুয়োচ্ সেক্কে তঅ ডেন্ আঢ্‌তানে কি গোজ্যে সিয়েন্ তঅ বাঙ্ আঢ্‌তানরে জানিবাত্তে ন-দিচ্,

⁴ যেন তর্ দান গরানাগান্ গুমুরোত্ অয়। সেক্কে তঅ বাপ্পো, যিবে গুমুরোত্ বেক্কানি দেগে, তেয়ই তরে বক্‌শিজ্ দিবো।

তবনা পৌইদ্যেনে শিক্ষ্যে

⁵ তুমি যেক্কে তবনা গরঅ সেক্কে ভন্ডগুনো ধোক্ক্যেন্ ন-গোজ্য, কিয়া তারা মান্‌জ্য ইধু নিজোরে দেগেবাত্তে সমাজ-ঘরত্ আর পদ মুয়োত্ থিয়্যেইনে তবনা গত্তে গম্ পান্। মুই তমারে ঘেচ্চেকগুরি কঙর্, তারা তারার্ বক্‌শিজ্ পেইয়োন।

⁶ মাত্তর্ তুই যেক্কে তবনা গরচ্ সেক্কে ঘর ভিদিরে যেইনে দোরান্ বানিবে আর তঅ বাপ্পো, যিবেরে দেগা ন-গেলেয়ো মুজুঙোত্ আঘে, তাইধু তবনা গর্। তঅ বাপ্পো, যিবে গুমুরোত্ বেক্কানি দেগে, তেয়ই তরে বক্‌শিজ্ দিবো।

⁷ যেক্কে তুমি তবনা গরঅ সেক্কে অযিহূদীগুনো ধোক্ক্যেন্ অত্ত নেইয়্যে কধা বার্ বার্ ন-কোয়্য। অযিহূদীগুনে মনে গরন, বেশ্ কধা কলে গোজেনে তারার্ তবনাগানি শুনে।

⁸ তারা ধোক্ক্যেন্ ন-গোজ্য, কিয়া তমা বাপ্পো ইধু চেবার্ আগেদি তে হবর্ পাই তমার্ কি দরকার।

⁹ ইয়েনত্তে তুমি এবাবোত্যেগুরি তবনা গরঅ: ও আমার স্বর্গর্ বাবা, তঅ নাঙান্ পবিত্র বিলিনে মানা ওক্।

¹⁰ তঅ রেজ্যগান্ এজোক্। তঅ আওজ্‌চান যেবাবোত্যে স্বর্গত্ সেধোক্ক্যেন্ পিত্‌থিমীত্অ পূরোণ ওক্।

¹¹ যে হানাগান্ আমার্ দরকার সিয়েন্ এচ্চ্যে আমারে দে।

¹² যিগুনে আমা উগুরে অন্যেয় গরন্, আমি যেধোক্ক্যেন্ তারারে খেমা গোজ্যেই সেধোক্ক্যেন্ তুইয়ো আমার বেক্ অন্যেয়ানি খেমা গর্।

¹³ আমারে তুই পোরোক্ষ্যেত্ পড়িবাত্তে ন-দিস্, মাত্তর্ শদান আঢত্তুন্ রোক্ষ্যে গর্।

¹⁴ তুমি যুনি অন্যগুনো দুষ্‌চানি খেমা গরঅ সালে তমা সর্গর্ বাপ্পো তমারেয়ো খেমা গুরিবো।

¹⁵ মাত্তর্ তুমি যুনি অন্যগুনোরে খেমা ন-গরঅ সালে তমা বাপ্পো তমারেয়ো খেমা ন-গুরিবো।

উবোস্ থানা পৌইদ্যেনে শিক্ষ্যে

¹⁶ তুমি যেক্কে উবোস্ থাগঅ সেক্কে ফক্করুনো ধোক্ক্যেন্ মুয়োন্ কালা গুরি ন-রাগেয়ো। তারা যে উবোস্ থাদন্ সিয়েন মান্‌জ্যরে দেগেবাত্তে তারা মাঢাবোত্ আর মুয়োনত্ ছেই গুলিনে বেড়ান্। মুই তমারে ঘেচ্চেকগুরি কঙর্, তারা তারার্ বক্‌শিজ্‌চানি পেইয়োন।

¹⁷ মাত্তর্ তুই যেক্কে উবোস্ থাচ্ সেক্কে মাঢাত্ তেল দিচ্ আর মুয়োন্ দোচ্,

¹⁸ যেনে অন্যগুনে হবর্ ন-পান্ যে, তুই উবোস্ আগচ্। সালে তঅ বাপ্পো, যিবেরে দেগা ন-গেলেয়ো মুজুঙোত্ আঘে, বানা তেয়ই সিয়েনি দেগিবো। তঅ বাপ্পো, যিবে গুমুরোত্ বেক্কানি দেগে, তেয়ই তরে বক্‌শিজ্ দিবো।

জীংকানির বেগত্তুন্ দরকার পৌইদ্যেনে শিক্ষ্যে

¹⁹ এ পিত্‌থিমীত্ তুমি নিজোত্তে ধন-সম্পদ ন-থুবেয়ো। ইধু জাঙারে ধরে আর পুগে বর্‍বাত্ লাগান আর চুরে বেড়্ কাবিনে চুর্ গরন।‍ ‍

²⁰ মাত্তর্ স্বর্গত্ জাঙারেয়ো ন-ধরে, পুগে বর্‍বাত্অ ন-গরে আর চুরে বেড়্ কাবিনে চুর্‌অ ন-গরন্। সেনত্তে স্বর্গত্ নিজোত্তে ধন থুবেই রাগঅ,

²¹ কিয়া তঅ ধন যিদু থেবঅ তঅ মনান্অ সিধু থেবঅ।

²² চোগ্ অলদে কিয়্যেগানর্ চেরাগ। সেনত্তে তঅ চোগ্‌কুন যুনি গম্ অয় সালে তর্ বেক কিয়্যেগান পহ্‌রে পরিপূরোণ অবঅ।

²³ মাত্তর্ তঅ চোগ্‌কুন যুনি বজং অয় সালে তর্ বেক্ কিয়্যেগান আন্ধার্ অবঅ। তঅ ভিদিরে যে পহ্‌‌রান আঘে সিয়েন্ যুনি আজলে আন্ধার্ অয় সালে সে আন্ধারান্ কি সাংগাধিক্!

²⁴ কনজনে দ্বিবে গিরোজরে সেবা গুরি ন-পারে, কিয়া তে একজনরে ঘিনেব আর অন্যজনরে কোচ্‌পেব। তে একজন উগুরে মনযোগ দিবো আর অন্যজনরে ঈচ্ গুরিবো। গোজেন আর ধন-সোম্বোত্তিরে এ দ্বিয়েনর্ সেবা তুমি একসমারে গুরি ন-পারঅ।

²⁵ ইয়েনত্তে মুই তমারে কঙর্, কি হেবা বিলি বাঁজি থানা পৌইদ্যেনে বা কি উরিবে বিলি কিয়্যেগান পৌইদ্যেনে চিন্তে ন-গোজ্য। পরাণান্ বানা হানা-দানা বেপার নয়, আর কিয়্যেগান বানা কাবড়-চুগোড়র্ বেপার নয়।

²⁶ আগাজ পেক্কুনো ইন্দি রিনি চঅ; তারা বীজি ন-ফেলান্, ন-কাবন্, গোলাঘরত্অ ন-থুবোন্, আর তো তমা স্বর্গর বাপ্পো তারারে হাবেই থায়। তুমি কি তারাত্তুন্অ বেশ্ আরঅ দামী নয়?

²⁷ তমা ভিদিরে কন্না চিদে-চজ্জা গুরিনে নিজো আয়ুগান এক ঘন্টা বাড়েই পারে?

²⁸ কাবড়-চুগোড়ত্তে কিত্তে চিন্তে গরঅ? মাদ ফুলুনোর্ কধা ভাবি চঅ সিগুন্ কেধোক্ক্যেন্ গুরি দাঙর্ অন্। তারা কাম্‌অ ন-গরন্, সুদোয়ো ন-কাবন্।

²⁹ মাত্তর্ মুই তমারে কঙর্, শলোমন রাজা এদক্ সয়-সাগোজ্যে ভিদিরে থেইনেয়ো ইগুনোর্ এক্কো ধোক্ক্যেন্অ তে নিজোরে সাজেই ন-পারে।

³⁰ মাদ যে ঘাস্‌চানি এচ্চ্যে আঘে আর কেল্যে চুলোত্ ফেলেই দিয়্যে অবঅ, সিয়েনি যেক্কে গোজেনে এবাবোত্যেগুরি সাজায় সেক্কে ও কম্ বিশ্বেজ্ গুরিয়্যেগুন, তে যে তমারে ঘেচ্চেকগুরি সাজেব সিয়েনত্ কনঅ সন্দেহ নেই।

³¹ ইয়েনত্তে কি হেবা বা কি উরিবা বিলি চিদে ন-গোজ্য। অযিহূদীগুনে ইয়েনি পৌইদ্যেনে চিদে গরন্;

³² সিয়েনি বাদেয়ো তমা স্বর্গর্ বাপ্পো দঅ হবর্ পায়, এই বেক্ জিনিস্‌চানি তমার্ দরকার আঘে।

³³ মাত্তর্ তুমি পত্তমে গোজেন রেজ্য পৌইদ্যেনে আর তা আওজ্ মজিম চলিবাত্তে মনান্ দুয়ো। সালে সেই বেক্ জিনিস্‌চানিয়ো তুমি পেবা। কেল্যেত্যে চিদে ন-গোজ্য;

³⁴ কেল্যের্ চিন্তেগান কেল্যে উগুরে ছাড়ি দুয়ো। দিনো দুঘ্‌কান্ দিনোত্তে যগাজ্যে।