মথি লেখ্যে গম্ হবর্ 17 - Chakma Bible

প্রভু যীশুর পোত্‌পোত্যে চেঙারা

¹ ইয়েনর্ ছদিন পরে যীশু বানা পিতর, যাকোব আর যাকোবর্ ভেই যোহনরে সমারে নিইনে এক্কো অজল্ মুড়োত্ গেলঅ।

^2-3 তারা দেগিলাক্ যীশুর চেয়ারাগান্ বুদুলি গেলঅ। তা মুয়োন্ বেলান ধোক্ক্যেন্ জ্বোল্‌জোল্যে আর তা কাবড়ান্ অমকদ ধুব্ ওই গেলঅ। সে পরেদি তারা তিনজন শিচ্চ্যই মোশি আর এলিয় যীশু লগে কধা কধে দেগিলাক্।‍

⁴ সেক্কে পিতর যীশুরে কলঅ, “প্রভু, গম্ ওইয়্যে দঅ, আমি ইয়োত্ আগিই। তুই যুনি চাজ্ সালে মুই ইয়েনত্ তিনেন্ তাম্বুল ঘর বানেম্, এক্কান তর্, এক্কান মোশির আর এক্কান এলিয়ত্তে।”

⁵ পিতরে যেক্কে কধা কর্ সেক্কে এক্কান্ পোত্‌পোত্যে মেঘে তারারে নাঢি ফেলেল। সেই মেঘ্‌কানত্তুন্ এ কধাগান্ শুনো গেলঅ, “ইবেই মর্ কোচ্‌পেইয়্যে পুয়ো, ইবে উগুরে মুই অমকদ হুজি। তুমি ইবে কধা শুনো।”

⁶ এ কধাগান্ শুনিনে শিচ্চ্যগুনে অমকদ দোরেইনে মাদিত্ মাঢা নিগিরি পড়িলাক্।

⁷ সেক্কে যীশু এইনে তারারে ধুরিনে কলঅ, “উদো, ন-দোরেয়ো।”

⁸ সেক্কে তারা উগুরেদি রিনি চেইনে বানা যীশু বাদে আর কাররে ন-দেগিলাক্।

⁹ যেক্কে তারা সেই মুড়োবোত্তুন্ লামি এত্তন্ সেক্কে যীশু তারারে এ উগুমান দিলো, “তুমি যিয়েন্ দেগিলে, মান্‌জ্যপুয়োবো মরণত্তুন্ জেঈ ন-উদোনা সং সিয়েন কাররে ন-কোইয়ো।”

¹⁰ সে পরেদি শিচ্চ্যগুনে যিশুরে পুযোর্ গুরিলাক্, “সালে ধর্ম-মাষ্টরুনে কিত্তে কন্ যে, পত্তমে এলিয়র এযানা দরকার্?”

¹¹ যীশু তারারে জোব্ দিলো, “ঘেচ্চেকগুরি এলিয় পত্তমে এবঅ আর বেক্কানি আগঅ অবস্থায় ফিরেই আনিবো।

¹² মাত্তর্ মুই তমারে কঙর্, এলিয় লুম্মেগি আর মান্‌জ্যে তারে চিনি ন-পারন্। মানুচ্চুনে তা উগুরে যিয়েন আওজ্ সিয়েনই বেবহার গোজ্যন্। এবাবোত্যেগুরি মান্‌জ্য পুয়োবোরেয়ো মানুচ্চুনো আঢত্ দুঘ্ ভুগো পড়িবো।”

¹³ সেক্কে শিচ্চ্যগুনে বুঝি পারিলাক্ যে, তে তারা ইধু বাপ্তিস্মদিয়্যে যোহন পৌইদ্যেনে কর্।

ভুদে পেয়্যে পুয়োবো গম্ অলঅ

¹⁴ যীশু আর তা শিচ্চ্যগুনে যেক্কে মানুচ্চুনো ইধু ফিরি এলাক্ সেক্কে এক্কো মানুচ্ এইনে যীশু মুজুঙোত্ আঢু পাড়িনে বোইনে কলঅ,

¹⁵ “প্রভু, মঅ পুয়োবো উগুরে দোয়্যে গর্! তে কেরেঙা রুগে অমকদ দুঘ্ পার্। প্রায়ই তে আগুনোত্ আর পানিত্ পড়ি যায়।

¹⁶ মুই তারে তঅ শিচ্চ্যগুনো ইধু আন্যং মাত্তর্ তারা তারে গম্ গুরি ন-পারন্।”

¹⁷ জোবত্ যীশু কলঅ, “অবিশ্বেজি আর পাজি মানুচ্চুন! আর কয়দিন মুই তমা লগে লগে থেম্? কয়দিন তমারে সোজ্য গুরিম? পুয়োবোরে ইয়েনত্ মইধু আনঅ।”

¹⁸ যীশু সেই ভুদ্‌‌তোরে ধমক্ দেনার পরেদি তে পুয়োবো ভিদিরেত্তুন্ নিগিলি গেলঅ, আর পুয়োবো সেক্কেনে গম্ অলঅ।

¹⁹ ইয়েনর্ পরেদি শিচ্চ্যগুনে আন্দলে আন্দলে যীশু ইধু এইনে কলাক্, “আমি কিত্তে সেই ভুদ্‌‌তোরে ধাবেই ন-পারিলোং?”

²⁰ যীশু তারারে কলঅ, তমার কম্ বিশ্বেজর কারনে ন-পারিলা। মুই তমারে ঘেচ্চেকগুরি কঙর্, যুনি এক্কো সোজ্য বীজি ধোক্ক্যেন্ বিশ্বেজ্অ তমার্ থেদঅ সালে তুমি এ মুড়োবোরে কধা, ইয়োত্তুন সুরিনে উবোত্ যাহ্, আর সেক্কে সিবে সুরি যেবঅ। তমার পক্ষে কিচ্চু আগাত্যে ন-অবঅ।

²¹ তবনা আর উবোস্ বাদে এবাবোত্যে ভুদোরে নিগিলে দি ন-পারে।

²² যেক্কে গালীলোত্ বেক শিচ্চ্যগুনে এগত্তর্ ওইয়োন, যীশু তারারে কলঅ, “মান্‌জ্য পুয়োবোরে মান্‌জ্য আঢত্ ধুরি দিয়্যে অবঅ।

²³ মানুচ্চুনে তারে মারে ফেলেবাক্, আর তিন দিনোত্ তে মরণত্তুন্ জেঈ উদিবো।” এ কধাগান্দোই শিচ্চ্যগুনে অমকদ দুঘ্ পেলাক্।

উবোসনা-ঘরর্ খাজানা

²⁴ যেরেদি যীশু আর তা শিচ্চ্যগুনে যেক্কে কফরনাহূমোত্ গেলাক্ সেক্কে উবোসনা-ঘরর্ খাজানা-তুলিয়্যেগুনে পিতর ইধু এইনে কলাক্, “তমা মাষ্টর্‌বো কি উবোসনা-ঘরর্ খাজানা নঅ-দে?”

²⁵ পিতরে কলঅ, “অয়, দে।” ইয়েনর্ পরেদি পিতরে ঘরত্ এইনে কিজু কবার্ আগেদি যীশু তারে কলঅ, “শিমোন, তর্ কি মনে অয়? এই পিত্‌থিমীর্ রাজাগুনে কাত্তুন্ কর্‌ বা খাজানা তুলোন্? নিজো দেজর্ মানুচ্চুনোত্তুন্, না বিদেশীগুনোত্তুন্?”

²⁶ পিতরে কলঅ, “বিদেশীগুনোত্তুন্।” সেক্কে যীশু তারে কলঅ, “সালে দঅ নিজো দেজ মানুচ্চুনে রেহাই পেইয়োন।

²⁷ মাত্তর্ আমা বেবহারে খাজানা-তুলিয়্যেগুনে যেন অগমান্ ন-পান্ ইয়েনত্তে তুই সাগরত্ যেইনে বুড়্‌শি ফেলা, আর পত্তমে যে মাছ্‌‌চো উদিবো সিবের্ মুয়োন্ খুলিলে এক্কো রূবোর্ দীনার্ পেবে। সিবে লোইনে তর্ আর মর্ খাজানাগুন্ দি আয়।”