আবিলেচ্ 4 - Chakma Bible

ইস্রায়েলীয়গুনোর দুঃখো

¹ হায়! সোনাগানে কিবাবোত্যেগুরি তা জোল্‌জোল্যেগান আরেয়্যে, খাটি সোনা বুদুলি যেইয়্যে। পত্তি দফদা পদথ্ ছিদি রোইয়্যেদে মংগা মংগা পাত্তরুন্।

² সিয়োনর পুয়োগুন্ একদিন সোনা ধোক্ক্যেন মূল্যবান এলাক্; তারারে ইক্কিনে মনে গরা অয় কুমোরর্ বানেয়্যে মাদি পিলে ধোক্ক্যেন্।

³ শিয়েলুনেয়ো নিজো ছঅগুনোরে বুগো দুধ হাবান্, মাত্তর্ মঅ মানুচ্চুন ধূল্যেচর-চাগালার্ উট পেক্কুনো ধোক্ক্যেন্ চিৎনপুজ্যে ওইয়োন্।

⁴ দুধো তিরেজে চিগোন্ চিজিগুনোর্ জিলানি তাল্লোত্ বাজি যার্; ঝি-পুয়োগুনে রুটি চাদন্, মাত্তর্ কনজনে সিয়েনি ন-দেদন্।

⁵ যিগুনে একদিন গম্ গম্ হানা হেদাক্ তারা ইক্কিনে অভাবত্ পধে পধে রোইয়োন। যিগুনে মংগা বিগুনো রঙর্ কাবড়্ উরিনে মানুচ্ ওইয়োন তারা ইক্কিনে ছেইয়ো কুড়োত্ পড়ি আগন্।

⁶ যে সদোমানরে মুহূত্তো ভিদিরে উল্ল্যে ফেলা ওইয়্যে, যিবে বিরুদ্ধে কনঅ মান্‌জ্যর্ আঢ্ ন-উদে, সেই সদোমর্ পাপত্তুন্‌অ বেশ্ মঅ মানুচ্চুনোর অন্যেয়ান বেশ্।

⁷ তারার্ বেঈ লোইয়্যে নেতাগুনে এলাক্ তুষারত্তুন্‌অ বেশ্ জোল্‌জোল্যে, দুধোত্তুন্‌অ বেশ্ ধুব্ এলাক্; তারার্ কিয়্যেগানি প্রবাল পাত্তরত্তুন্‌অ বেশ্ রাঙা এলঅ আর চেঙেরা এলদে নীলকান্তমণি ধোক্ক্যেন্।

⁸ মাত্তর্ তারা ইক্কিনে কালিত্তুন্‌অ বেশ্ কালা ওইয়োন্; পদথ্ তারারে চিনে ন-যায়। তারার্ চামানি আড় উগুরে বাস্যেগোই; সিয়েনি তক্তা ধোক্ক্যেন্ শুগেই যেইয়্যে।

⁹ ভাদরাদে মরানাত্তুন্ বরং যুদ্ধোত্ মরানা গম্; মঅ মানুচ্চুনে খেদর্ শোজ্যর্ অভাবে পেট্‌পরায় কেঙেদা ওই যাদন্।

¹⁰ দোয়্যেলু মিলেগুনে নিজো আঢে তারার্ পুয়ো-ছাগুনোরে হানা রানি দেদন্। মঅ মানুচ্চুনোর্ ভস্ত অবার্ সময় তারার্ পুয়ো-ছাগুন তারার্ হানা ওইয়োন্।

¹¹ লগেপ্রভু তার্ অমকদ অহুজিগানরে পুরোপুরি নিগিলেয়্যে; তার্ অমকদ রাগ্‌কান তে ঢালি দিয়্যে। তে সিয়োনত্ আগুন জ্বালেয়্যে; সেক্কে তার্ খুদোগুন সং জ্বালেই দিয়্যে;

¹² রাজাগুনে বা জগদর্ কনঅ মান্‌জ্যে বিশ্বেজ্ ন-গুরিদাক্ যে, যিরূশালেমর গেদোদি কনঅ শত্রু বা বিপক্ষ সোমেই পারন্।

¹³ এ ঘটনাগান ঘোট্যেদে তা ভাববাদীগুনোর্ পাপত্তে, তা ধর্মগুরুগুনোর্ অন্যেয়ত্তে, কিত্তেই সিয়োদোই তারা গম্ মানুচ্চুনোর্ লো জোরেদাক্।

¹⁴ সেনত্তে তারা কান্ মানুচ্চুনো ধোক্ক্যেন পধে পধে বিজিরে বিজিরে বেড়েয়োন্; তারা এদক্ লোলোই ফি-বলা ওইয়োন্ যে, কনজনে তারার্ কাবড়ানি ধুরিবাত্তে ন-চান।

¹⁵ মান্‌জ্যে যগার্ পারিনেই তারারে কদন্, “সরি যঅ, তুমি ফি-বলা। সরি যঅ, সরি যঅ, আমারে ন-ধোজ্য।” তারা ধেই যেইনে ঘুরি বেড়েয়োন্; অন্য জাদ মানুচ্চুনে কধন্, “তারা ইধু আর থেই ন-পারিবাক্।”

¹⁶ লগেপ্রভু নিজে তারারে ছিদি দিয়্যে; তে তারা উগুরে আর মনযোগ্ ন-দে। মান্‌জ্যে ধর্মগুরুগুনোরে সর্মান ন-দেগান্, দোয়্যে ন-গরন্ বুড়ো নেতাগুনোরে।

¹⁷ তো সাহায্যত্তে মিজে গুরি রিনি চেই চেই আমা চোগ্‌কুন চিবে চিবে ওইয়োন্; আমি আমিঝে এমন এক্কো জাদ ইন্দি চেই এলং যে জাদ্‌তো আমারে রোক্ষ্যে গুরি ন-পারিদো।

¹⁸ মান্‌জ্যে আমাত্তেই হাফ্ দি থেদাক্, সেনত্তে আমি আমা মেলা জাগানিত্ আঢি ন-পারিদোং। আমা শেজ কাল কায়-কুরে এলঅ, আমা দিনুন্ ফুরেই যেইয়্যে, কিত্যে আমার শেজ সময়ান্ লুম্মেগি।

¹⁹ আমারে যিগুনে লোড়েদাক্ তারা আগাজ ঈগল পেগোত্তুন্‌অ বেশ্ জোরে যেদাক্; তারা মুড়োই মুড়োই আমারে লোড়েদাক্ আর ধূল্যেচর-চাগালাত্ হাফ্ দি থেদাক্ আমাত্তে।

²⁰ যিবে লগেপ্রভুর বেঈ লোইয়্যে, যিবে আমার জিংকানির বোইয়্যের্, তে তারার ফালত্ ধরা পোজ্যে; মাত্তর্ আমি মনে গোজ্যেদে তা ছাবাত্ জাদ্‌তুনো ভিদিরে আমি বজত্তি গুরিবোং।

²¹ ঊষ দেজত্ বজত্তি গুরিয়্যে ও ইদোম-ঝিবো, তুই ফুত্তি গর্, হুজি অ; মাত্তর্ তরেয়ো সেই গলচ্‌সো দিয়্যে অবঅ; তুই মাত্তল্ আর লাংটা-বাংটা অবে।

²² ও সিয়োন-ঝিবো, তঅ সাজাগান শেজ্ অবঅ; তে তরে আর্ বন্দীদজাত্ ফেলেই ন-রাগেব; মাত্তর্ ও ইদোম্-ঝিবো, তে তর্ অন্যেয়র সাজা দিবো আর তঅ পাপ্‌পানি ফগদাং গুরিবো।