যিহোশূয় 8 - Chakma Bibleঅয় শঅরর্ ভস্ত অনা 1 সে পরেন্দি লগেপ্রভু যিহোশূয়রে কলঅ, “তুই ন-দোরেচ্ আর আজা ন-আরেচ্। তর্ বেক্ সৈন্যদলুন্ নিইনে তুই অয় শঅরান আরঅ আক্রমণ গুরিবাত্তে যাহ্। অয় শঅরর্ রাজা, তা মানুচ্চুন্, তা শঅরান্ আর দেজচান মুই তঅ আদত্ তুলি দুয়োং। 2 যিরীহো শঅরান্ আর তা রাজাবো উগুরে তুই যিয়েনি গোজ্যচ্ অয় শঅর আর সেই রাজাবো উগুয়ো সিয়েনই গুরিবে। মাত্তর্ সিদুগোর্ লুদেয়্যে পযাবিরেনি আর এ্যমান পালুন্ তুমি নিজোত্তে নেযেই পারিবা। শঅরর্ পিজেন্দি তুই একদল সৈন্য লুগেই রাগেবে।” 3-4 সেক্কে অয় শঅরান্ আক্রমণ গুরিবাত্তে যিহোশূয় ত্রিশ আজার বীর যোদ্ধা বেঈ নেযেইনে নিগিলি এলঅ। তে রেদোত্ তারারে এ উগুমান দিলো, “তুমি শুনো, তমা ভিদিরেত্তুন কিজু সৈন্য তুমি শঅরর্ পিজেন্দি লুগেই রাগেবা। শঅরত্তুন বেশ্ দূরোত্ ন-যেবা। তুমি বেক্কুনে যুক্কোল্ থেবা। 5 মুই মঅ লগে মানুচ্চুন লোইনে শঅরন্দি উজেই যেম্। তারা যেক্কে আগঅ ধোক্ক্যেন্ আমা লগে যুদ্ধো গুরিবাত্তে নিগিলি এবাক্ সেক্কে আমি তারা মুজুঙেত্তুন ধেই যেবং। 6 তারা আমা পিজেন্দি লোড়েবাক্, কবাক্, ‘তারা আগঅ ধোক্ক্যেন্ আমা কায়-কুরেত্তুন ধেই যাদন্।’ এধোক্ক্যেনগুরি আমি শঅরত্তুন তারারে দূরোত্ নেযেম্। আমি যেক্কে তারা কায়-কুরেত্তুন ধেই যেবং, 7 সেক্কে তুমি সে গুমুরো জাগানত্তুন্ উদি যেইনে শঅরান গজক্ গুরি নেযেবা। তমা গোজেন লগেপ্রভু সিয়েন তমা আদত্ তুলি দিবো। 8 তুমি শঅরান গজক্ গুরি নেযেইনে সিয়েনত্ আগুন লাগেই দিবা। লগেপ্রভু যিয়েন উগুম গোজ্যে তুমি সিয়েনই গুরিবা। তমা উগুরে ইয়েন মর্ উগুম্।” 9 ইয়েন পরেন্দি যিহোশূয় তারারে পাধেই দিলো। তারা যেইনে অয় শঅরর্ পোজিমেন্দি এক্কান্ জাগাত্ লুগি থেলাক্। জাগায়ান্ এলদে বৈথেল আর অয়র সংমোধ্যে। মাত্তর্ যিহোশূয় সে রেত্তো বাদবাগী সৈন্যগুনো সমারে কাদেল। 10 তার কেল্যেবেন্যে যিহোশূয় তার সৈন্যগুনোরে এগত্তর্ গুরিলো। সে পরেন্দি তে আর ইস্রায়েলীয় নেতাগুনে তারার আগে আগে অয়র শঅর ইন্দি উজেই গেলাক্। 11 যিহোশূয় সমারে সৈন্যগুনে বেক্কুনে উজেই গেলাক্ আর শঅরর্ কায়-কুরে যেইনে শঅরর্ মুজুঙেন্দি আজিল্ অলাক্। অয় শঅরর্ উত্তরেন্দি তারা তাম্বুল ফেলেলাক্। শঅর আর তারার তাম্বুলানির সংমোধ্যে এলদে আখোর কিজিঙান্। 12 যিহোশূয় প্রায় পাচ্ আজার সৈন্য শঅরর্ পোজিমেন্দি বৈথেল আর অয়র সংমোধ্যে এক্কান জাগাত্ লুগেই রাগেল। 13 এধোক্ক্যেনগুরি ইস্রায়েলীয়গুনে তারার সৈন্যগুনোরে যুদ্ধোত্তে যুক্কোল্ গুরি রাগেল-যিগুনে তাম্বুলোত্ থেবাক্ তারারে রাগেল অয় শঅরর্ উত্তরেন্দি আর যিগুনে লুগি থেবাক্ তারারে রাগেল শঅরর্ পোজিমেন্দি। সে রেদোত্ যিহোশূয় কিজিঙোত্ এলঅ। 14 ইস্রায়েলীয়গুনোরে দেগিনে অয়র রাজা তারা সমারে যুদ্ধো গুরিবাত্তে বেন্যেমাদান্ যাদিমাদি উদিনে বেক্ মানুচ্চুনোরে নিইনে শঅরত্তুন্ নিগিলিনে অরাবা সংজাগান ইদু এক্কান ঠিগগোজ্যে জাগাত্ গেলাক্। মাত্তর্ তে হবর্ ন-পেদঅ, শঅরর্ পিজেন্দি তা বিরুদ্ধে একদল সৈন্য লুগিই আগন্। 15 যিহোশূয় আর বেক্ ইস্রায়েলীয়গুনে তারা মুজুঙেত্তুন ধেই যেবার্ ভান্ গুরিনে ধূল্যেচরর্ চাগালার্ পদেন্দি আদি গেলাক্। 16 সেক্কে ইস্রায়েলীয়গুনোরে লোড়েবাত্তে অয়র বেক্ মানুচ্চুনোরে ডাগা অলঅ। তারা যিহোশূয়র পিজে পিজে লোড়েলাক্ আর এবাবোত্যেগুরি শঅরত্তুন তারারে দূরোত্ নেযা অলঅ। 17 ইস্রায়েলীয়গুনোর পিজেন্দি ন-যান্ এধোক্ক্যেন এক্কো মরদ মানুচ্অ অয় বা বৈথেলত্ ন থেলাক্। তারা শঅরর্ গেট্টুন্ খুলো রাগেইনে ইস্রায়েলীয়গুনোর পিজে পিজে গেলাক্। 18 সেক্কে লগেপ্রভু যিহোশূয়রে কলঅ, “তঅ আদ সেই তলোয়ারান্ অয় শঅরন্দি বাবেইনে ধর্, কিত্যে তঅ আদত্ মুই শঅরান তুলি দিম্।” যিহোশূয় সেক্কে তা তলোয়ারান্ অয় শঅরন্দি বাবেইনে ধুরিলো; 19 লগে লগে লুগি থেইয়্যে সে সৈন্যগুনে তারার জাগানত্তুন্ যাদিমাদি উদিনে শঅরর্ ইন্দি ধাবা গেলাক্। তারা সিয়েনত্ চোমেইনে সিয়েন গজক্ গুরি নেযেলাক্ আর কানক্কণ্ ভিদিরে শঅরত্ আগুন ধোরেই দিলাক্। 20 অয়র মানুচ্চুনে পিজেন্দি ফিরিনে দেগিলাক্ তারার শঅরত্তুন ধূমো উগুরেন্দি উদের্; মাত্তর তারার্ আর কনঅ কিত্তেন্দি ধেই যানা সম্ভব ন-অলঅ, কিত্যে যে ইস্রায়েলীয়গুনে ধূল্যেচরর্ চাগালান্দি ধেই যাদন্ তারা এ ভিদিরে তারা বিরুদ্ধে ঘুরিনে থিয়্যেয়োন্। 21 যিহোশূয় আর বেক্ ইস্রায়েলীয়গুনে যেক্কে দেগিলাক্, তারার্ লুগি থেইয়্যে সৈন্যগুনে শঅরান গজক্ গুরি নেযেয়োন্ আর শঅরত্তুন ধূমো উদের্ সেক্কে তারা অয় শঅরর্ মানুচ্চুনোরে আক্রমণ গুরিলাক্। 22 লুগি থেইয়্যে সৈন্যগুনেয়ো অয়র মানুচ্চুনোরে আক্রমণ গুরিবাত্তে শঅরত্তুন নিগিলি এলাক্। সেক্কে অয়র মানুচ্চুনে দ্বিবে ইস্রায়েলীয় দলর সংমোধ্যে ঘিরে পড়িলাক্। ইস্রায়েলীয়গুনে তারারে বেক্কুনোরে মারে ফেলেলাক্, কাররে বাজেই ন-রাগেলাক্ বা যেবাত্তেয়ো ন-দিলাক্। 23 মাত্তর্ অয় শঅরর্ রাজাবোরে তারা জেদা অবস্থায় ধুরিনে যিহোশূয় ইদু নেযেলাক্। 24 যে খলাবোত্, অত্তাৎ যে ধূল্যেচরর্-চাগালাত্ অয় শঅরর্ মানুচ্চুনে ইস্রায়েলীয়গুনোরে লোড়েইনে নেযেয়োন্ সিদু অয়র মানুচ্চুনোরে বেক্কুনোরে মারে ফেলানার পরেন্দি বেক্ ইস্রায়েলীয়গুনে অয় শঅরত্ ফিরি এলাক্ আর শঅর ভিদিরে যিগুনে এলাক্ তারা তারারেয়ো মারে ফেলেলাক্। 25 সেদিন্যে অয় শঅরর্ বেক্ মানুচ্চুনে, অত্তাৎ বার আজার মিলে-মরদ মুরি গেলাক্। 26 অয় শঅরত্ যিগুনে এলাক্ তারা বেক্কুনে শেজ্ ওই ন-যানা সং যিহোশূয় তলোয়ারান্দোই আত্তান্ বাবেই রাগেল। 27 লগেপ্রভু যিহোশূয়রে যেধোক্ক্যেনগুরি উগুম দিয়্যে সেধোক্ক্যেনগুরি ইস্রায়েলীয়গুনে সে শঅরর্ এ্যমানর পালুন্ আর লুদেয়্যে পযাবিরেনি নিজোত্তেই নেযেলাক্। 28 এধোক্ক্যেনগুরি যিহোশূয় অয় শঅরান্ পুড়ি দিইনে সিয়েনরে উমরত্তে এক্কান ভস্তর্ কুড়্ বানেই রাগেল; এজঅ সিয়েন্ এক্কান পোড়া জাগা ওই আঘে। 29 তে অয় শঅরর্ রাজাবোরে মারে ফেলেইনে সাজোন্যে সং গাজত্ টাঙেই রাগেল। সাজোন্যে অক্তত্ তে তার কিয়্যেগান্ গাজত্তুন লামেইনে শঅরর্ গেদোত্ চমিবার পথ্তানত্ ফেলে দিবাত্তে উগুম্ দিলো। মানুচ্চুনে তা উগুরে পাত্তর দিইনে এক্কো দাঙর্ কুড়্ গুরি রাগেলাক্। সিবে এজঅ আঘে। লগেপ্রভুর সুদোমর্ কধা পড়ি শুনোনা 30-31 ইয়েনর্ পরেন্দি ইস্রায়েলীয়গুনো ইদু দিয়্যে লগেপ্রভুর চাগরবো মোশির উগুম মজিম যিহোশূয় এবল মুড়োবো উগুরে ইস্রায়েলীয়গুনোর গোজেন লগেপ্রভুর নাঙে এক্কো পূজো বানেল। মোশির রীদি-সুদোমর্ বোইবোত্ যেধোক্ক্যেন লেগা আঘে সে মজিম তে সিয়েন বানেল। পূজোবো বানাদে কনঅ পাত্তর্ কাবি নেযা ন-অয় আর সিবে উগুরে কনঅ লুয়োর যন্ত্রপাতিয়ো বেবহার গরা ন-অয়। সে পূজোবো উগুরে ইস্রায়েলীয়গুনে লগেপ্রভুর নাঙে পুজ্যে আর উদোলোলি-উৎসর্বর অনুষ্ঠান গুরিলাক্। 32 এবল মুড়োবো উগুরে ইসায়েলীয়গুনো মুজুঙোত্ যিহোশূয় পাত্তর উগুরে মোশির লেখ্যে রীদি-সুুদোমানি ফটোকপি গুরিলো। 33 ইস্রায়েলীয়গুনে আর তারা লগে বজত্তি গুরিয়্যে অন্য জাদর্ মানুচ্চুনে, তারার বুড়ো নেতাগুনে, কামগুরিয়েগুনে আরঅ বিচেরগুরিয়েগুনে, অত্তাৎ ইস্রায়েলীয় সমাজর বেক্ মানুচ্চুনে লগেপ্রভুর সাক্ষ্য-সুন্দুগোর দ্বিকিত্তেন্দি থিয়্যেই এলাক্; তারা সুন্দুক্কো বোইয়্যে লেবীয় ধর্মগুরুগুনো মুজুঙোত্ এলাক্। তারাত্তুন্ অদ্দেক্ মানুচ্ থিয়্যেলাক্ গরিষীম মুড়োবোর মুজুঙোত্ আর অদ্দেক মানুচ্ থিয়্যেলাক্ এবল মুড়োবোর মুজুঙোত্। লগেপ্রভুর চাগর্ মোশি এ কধানি আগে কোইয়্যে যেক্কে তে ইস্রায়েলীয়গুনো উগুরে আশিদ্বাদ গুরিবার উগুম দিয়্যে। 34 সে পরেন্দি যিহোশূয় রীদি-সুদোমর্ বোইবোত্ যেদক্কানি বর্ আর অভিশাবর কধা লেগা এলঅ সিয়েনি অদে অদে পোড়ে শুনেল। 35 মোশি এ পৌইদ্যেনে যেদক্কানি উগুম দিয়্যে তার এক্কো শব্দয়ো বাদ ন-দিইনে যিহোশূয় পুরো ইস্রায়েল সমাজরে সিয়েন পোড়েই শুনেল। এ সমাজ ভিদিরে মিলে, পূঅ-ঝি আর তারা ভিদিরে বজত্তি গোজ্যে অন্য জাদর্ মানুচ্চুনেয়ো এলাক্। |
Copyright © 2021 Bangladesh Bible Society
Bangladesh Bible Society