যিহোশূয় 3 - Chakma Bibleযর্দন গাঙান্ পার্ অনা 1 যিহোশূয় বেন্যেপোত্যে ঘুমোত্তুন্ উদিনে বেক্ ইস্রায়েলীয়গুনো লগে শিটীমত্তুন যাহ্ ধুরিনে যর্দন গাঙানর্ ইদু গেলঅ। গাঙান্ পার্ ন-অনা সং তারা সিয়েনত্ রলাক্। 2-3 তিন দিন পরেন্দি নেতাগুনে তাম্বুলর্ বেক জাগানিত্ যেইনে মানুচ্চুনোরে এ উগুমান দিলাক্, “যেক্কে তুমি তমার গোজেন লগেপ্রভুর সাক্ষ্য-সুন্দুক্কো লেবীয় ধর্মগুরুগুনোরে বুয়োই নেযেবাত্তে দেগিবা সেক্কে তুমি তমার জাগায়ান ছাড়িনে সিবে পিজে পিজে যাহ্ ধুরিবা। 4 সেক্কে তুমি বুঝি পারিবা তমাত্তুন কন্ পদেন্দি যাহ্ পুরিবো, কিত্যে তুমি ইয়েনর আগেন্দি কনদিনঅ এ পথ্তানন্দি ন-যঅ। মাত্তর্ তুমি সাক্ষ্য-সুন্দুগো ইত্তুন্ প্রায় দ্বিআজার আত্ দুরোত্ থেবা, তাইদু ন-যেবা।” 5 ইয়েনর্ পরেন্দি যিহোশূয় মানুচ্চুনোরে কলঅ, “তুমি নিজোরে সিজি গুরি নেযঅ, কিত্যে এযেত্যেকেল্যে লগেপ্রভু তমা ভিদিরে ভালক্কানি আমক্ কাম্ গুরিবো।” 6 পরেন্দি তে ধর্মগুরুগুনোরে কলঅ, “তুমি সাক্ষ্য-সুন্দুক্কো তুলি নেযেইনে মানুচ্চুনোর আগে আগে গাঙান্ পার্ ওই যঅ।” সেনত্তেই তারা সাক্ষ্য-সুন্দুক্কো তুলি নেযেইনে মানুচ্চুনোর আগে আগে যাহ্ ধুরিলাক্। 7 সেক্কে লগেপ্রভু যিহোশূয়রে কলঅ, “এচ্চ্যেত্তুন ধুরি বেক্ ইস্রায়েলীয়গুনোর চোগোত্ মুই তঅ সর্মানান্ বাড়েবাত্তে আরাম্ভ গুরিম্, যেনে তারা বুঝি পারন্, মুই যেধোক্ক্যেন গুরি মোশি লগে এলুং সেধোক্ক্যেন তঅ লগেয়ো আগঙ্। 8 তুই সাক্ষ্য-সুন্দুক্কো বুয়োই নেযেয়্যে ধর্মগুরুগুনোরে কোইদে যেনে তারা যর্দন গাঙর্ দুযিত্ লুমিনে উজেই যেইনে পানি সংমোধ্যে থিয়্যেই থান্।” 9 যিহোশূয় ইস্রায়েলীয়গুনোরে কলঅ, “তুমি ইদু এজঅ আর তমা গোজেন লগেপ্রভু যিয়েনি কোইয়্যে সিয়েনি শুনো। 10 জেদা গোজেনে যে তমা ভিদিরে আঘে আর তেয়ই যে কনানীয়, হিত্তীয়, হিব্বীয়, পরিষীয়, গির্গাষীয়, ইমোরীয় আর যিবূষীয়গুনোরে হামাক্কায় তমা মুজুঙেত্তুন্ ধাবেই দিবো সিয়েন তুমি এধোক্ক্যেনগুরি বুঝি পারিবা। 11 যিবে গোদা পিত্থিমীগানর গিরোজ্ তার সাক্ষ্য-সুন্দুক্কো তমা আগে আগে যর্দন গাঙান ভিদিরে যেবঅ। 12 ইক্কিনে তুমি ইস্রায়েলীয় বারবো গুট্টির বেক্কুনোত্তুন একজন গুরিনে বারজন মানুচ্ বেঈ নেযঅ। 13 তুমি দেগিবা পুরো পিত্থিমীগানর গিরোজ্ লগেপ্রভুর সাক্ষ্য-সুন্দুক বোইয়্যে ধর্মগুরুগুনে যেইনে যর্দনর পানিত্ টেঙ্ দিবাক্ এমনে তা উগুরেত্তুন বেঈ যেইয়্যে গঙার্ পানি থামেই যেবঅ আর সে পানিগান অজল্ ওইনে থিয়্যেই যেবঅ।” 14 মানুচ্চুনে যর্দন গাঙান্ পার্ অবাত্তে যেক্কে তাম্বুলান তুলিলাক্ সেক্কে সাক্ষ্য-সুন্দুক বোইয়্যে ধর্মগুরুগুনে তারার্ আগে আগে যাহ্ ধুরিলাক্। 15-16 ফসল কাবিবার পুরো সময়ানত্ সচরাচর্ যর্দন গাঙর্ দ্বিপারানি পানিয়ে ভাঝি যেদঅ। মাত্তর্ সাক্ষ্য-সুন্দুক বোইয়্যে ধর্মগুরগুনে যর্দন ইদু লুমোনার পরেন্দি তারা পানিত্ টেঙ্ দিলাক্ এমনে উগুরেত্তুন বেঈ এচ্চ্যে গঙার্ পানিগান থামেল। সে পানিগান ভালোদ্ দূরোত্ সর্তন শঅরর্ কায়-কুরে আদম আদামর ইদু অজল্ ওইনে ফুলি উদিলো; আর সেক্কে যে পানিগান অরাবার সাগর ইন্দি, অত্তাৎ নুন সাগরর্ ইন্দি বেঈ যার্ সিয়েন্ এক্কুবারে বন্ধ ওই গেলঅ। সেক্কে ইস্রায়েলীয়গুনে যিরীহো শঅরর্ ঠিগ্ উই পারন্দিত্তুন্ গাঙান্ পার্ অলাক্। 17 যেদক্ষণ সং বেক ইস্রায়েলীয়নে যর্দন গাঙান্ পার্ ন-অলাক্ সেদক্ষণ সং লগেপ্রভুর সাক্ষ্য-সুন্দুক বোইয়্যে ধর্মগুরুগুনে যর্দন গাঙত্ শুগুনো মাদি উগুরে থিয়্যেই রলাক; আর পুরো জাদ্তোই শুগুনো মাদি উগুরেন্দি পার্ ওই গেলাক্। |
Copyright © 2021 Bangladesh Bible Society
Bangladesh Bible Society