ইয়োব 6 - Chakma Bible1 সেক্কে গোজেনে ইয়োবরে কলঅ, 2 মর্ অমকদ পিড়েগান্ যুনি মাবা যেদঅ, মর্ বেক্ দুর্দ্দজাগান যুনি পাল্লাত্ তুলো অদঅ, 3 সালে সিয়েন্ হামাক্কাই সাগর পাড় বালুকণাত্তুন্ বেশ্ মাবন্দি বেশ্ অদঅ; সেনত্তে মঅ কধাবাত্তাত্ কনঅ শেজ্ নেই। 4 বেগত্তুন্ খেমতাবলা গোজেনর সেল্লো মইদু ফুট্যে, মঅ পরাণানে সিবের্ বিষছান্ খার্; গোজেনর দর্গরেপারা কামানিয়ে মঅ বিরুদ্ধে সুর্ বুদিনে থিয়্যেইয়্যে। 5 ঘাস পেলে কি ঝার্বো গাধাগুনে রঅ ছাড়ন্, বা খুড়ো পেলে কি গোরুগুনে ডগরন্? 6 চুয়োত্ নেইয়্যে হানা কি নুন্ ছাড়া হা যায়, বা বদাবোর্ তেন্তেনিত্ কি কনঅ চুয়োত্ আঘে? 7 মুই সিয়েন্ হেবাত্তে ন-চাঙ্; সিয়েন্ হেলে মুই অসুগ্ ওম্। 8 আহ্, মঅ কোজোলিগান্ যেনে রোক্ষ্যে অয়, গোজেনে যেনে মঅ আজাগান্ পূরোণ গরে, 9 মরে যেনে তে কট্টা কট্টা গুরি ফেলায় আর আত্তান বাবেইনে মরে মারে ফেলায়! 10 সালে মর্ এ সান্তনাগান্ থেবঅ, অমকদ যন্ত্রণার্ ভিদিরেয়ো মর্ এই হুজিগান্ থেবঅ, সেই সুদ্ধো-সাংগ মানুচ্চোর কধাগান্ মুই অস্বীগের্ ন-গরং। 11 বাজ্জেই থেবাত্তে মর্ কনঅ বল্ নেই, আজা গুরিবাত্যে মর্ এন্ কিজু নেইদে যে, মুই ধৈজ্য ধুরিনে থেম্। 12 মঅ বলান্ কি পাত্তর ধোক্ক্যেন্? মঅ কিয়্যেগান্ কি পিদোল ধোক্ক্যেন্? 13 নিজোরে এজাল্ দিবার্ বলান্ মত্তুন্ নেই; মত্তুন্ দঅ মর্ বেক্কানি দূর্ গরা ওইয়্যে। 14 আমক্ ওইয়্যে মানুচ্চো যুনিয়ো বা বেগত্তুন্ বোলী গোজেনরে ভোক্তি গরানা ছাড়ি দে, তো তা সমাজ্যেগুনোর্ উজিত্ তা উগুরে বিশ্বেজ্ থানা। 15 মাত্তর্ মঅ সমাজ্যেগুনো উগুরে দঅ বিশ্বেজ্ গরা ন-যায়; তারা এন্ গঙার ধোক্ক্যেন্ যিয়েন্ পেরায় বন্ধ ওই যায়, আরঅ মাঝে মধ্যে ডাগেত্তুন্ ঠিলি উদোন্। 16 বরফ আর তুষার গলিনে সেই গঙারান্ কুলুক্ ওইনে দরমর ওই উদে, 17 আরঅ গরম কাল্যে সে গোঙারান্ শুগেই যায় আর তা পথ্তানত্তুন্ লুগি-যায়। 18 সে পধেন্দি আঢি যেইয়্যে ধূল্যেচরর্ দলুনে পানি তগাদে তগাদে ফিরি যান্, আর তারা ধূল্যেচরত্ শেজ্ ওই যান্। 19 টেমার ধূল্যেচরর্ দলুনে পানি তগান্, শিবার বেবসাগুরিয়্যেগুনে আজালোই চেই থান্। 20 তারা ঘেচ্চ্যেকগুরি এলাক্ বিলিনে দুঘ্ পান্; সিদু এইনে তারা নিরাশ্ অন্। 21 তুমিয়ো সেধোক্ক্যেন্ মরে কনঅ বল্ দিই ন-পারঅ; মর্ দর্গরেপারা দজাগান্ দেগিনে তুমি দোরেয়ো। 22 মুই কি কনদিন্অ কোইয়োং, মরে কিজু দুয়ো, তমা ধনত্তুন্ মরে বক্শিজ্ দুয়ো, 23 শত্রুর্ আঢত্তুন্ মরে রোক্ষ্যে গরঅ, দাম্ দিইনে চিৎনপুজ্যেগুনোর্ মুয়োত্তুন্ মরে উদ্ধোর্ গরঅ? 24 মরে শিক্ষ্যে দুয়ো, মুই জুরো গুরি থেম্; কুদু মঅ ভুলান্ সিয়েন্ মরে দেগেই দুয়ো। 25 আজল্ কধা কেধোক্ক্যেন্ দরমর, মাত্তর্ তমা তর্কত্ কনঅ লাভ নেই। 26 মঅ কধাত্ কি তুমি দুজ্ ধুরিবাত্তে চর্? তুমি দঅ মন্মরা ওইয়্যে মান্জ্যর কধানি বোইয়্যের ধোক্ক্যেন্ মনে গরর্। 27 তুমি মা-বাপ্ নেইয়্যে গুনোরে চাম্বা চেইনে থাগঅ আর সমাজ্যেবোরে বিজি দিবাত্তে চঅ। 28 মাত্তর্ ইক্কিনে দোয়্যে গুরিনে তুমি মইন্দি চঅ, মুই তমা মুজুঙোত্ মিজে কধা ন-কোম্। 29 তুমি নরম্ অ, অন্যেয় ন-গোজ্য; আরঅ ভাবি চঅ, কিত্তেই মুই এজঅ সং গম্ আগং। 30 মঅ মুয়োনত্ কি কনঅ অন্যেয় আঘে? মুই কি সত্য-মিজে ন-বুজোং? |
Copyright © 2021 Bangladesh Bible Society
Bangladesh Bible Society