ইয়োব 5 - Chakma Bible1 তুই ডাগি চাহ্, কন্না তরে জোব্ দিবো? তুই কন্ স্বর্গদূতো ইদু সাহায্য চেবে? 2 হাঙেলেত্যে জ্ঞাননেইয়্যে মানুচ্চুনোরে শেজ্ গুরি দে আর ইংসে-নিন্দে বেদমা মানুচ্চুনোরে মারে ফেলায়। 3 অজ্ঞানী মানুচ্চুনোরে মুই ভালেদি অদে দেগিলুং আর সেক্কেয়ই তা ঘরানরে অভিশাব্ বিলিনে ফগদাঙ্ গুরিলুং। 4 তা পূঅগুনে গমেডালে ন-থান; বিচের জাগানত্ তারা বেক্কানি আরান্, তারার্ রোক্ষ্যেগুরিয়্যে কনজন ন-থেবাক্। 5 পেট্ পুজ্যে মানুচ্চুনে তা ধানুন্ হেই ফেলাদন্, এন্ কি, কাদা ঘিজ্যে ভিদিরেত্তুন্অ তারা সিয়েন্ তুলি নেযান্; নাদা মানুচ্চুনে তা ধন-সম্পদত্তে ভারী উচ্চোমি অন্। 6 মাদিত্তুন্ দুঘ্কান্ উদি ন-এজে, বা ভূয়োত্তুন্ দুঘ্কান্ ন-উদিবো। 7 যেধোক্ক্যেন্ সত্য যে আগুনো ঝিলান্ উগুরেন্দি উদে, সেধোক্ক্যেন্ সত্য, মান্জ্যে দুঘ্ পেবাত্তে জর্মান। 8 মাত্তর্ মুই অলে গোজেনর সাহায্য চেদুঙ্, তাইদু মঅ মামলাগান্ তুলি ধুরিদুং। 9 তে এবাবোত্যে মহৎ কাম্ গরে যিবের্ গভীনান্ মাবা ন-যায়; তে এন্ আমক্ অবার্ কাম্ গরে যিয়েনি গুণিনে থুম্ গরা ন-যায়। 10 তে পিত্থিমীত ঝড়্ দান গরে আর ভূইয়ো উগুরে পানি পাধেই দে। 11 নাদা মানুচ্চুনোরে তে অজলত্ তুলে; যিগুনে আবিলেচ্ হান্ তারারে তে গমেডালে রাগায়। 12 ধূর্ত মানুচ্চুনোর সল্লাগানি তে ফোলেইয নঅ দে, সেনত্তে তারা কনঅ ভালেদি গুরি ন-পারন্। 13 তে জ্ঞানীগুনোরে তারার্ চালাগ ভিদিরে ধরে, আর ছলনাগুরিয়্যেগুনোর ফন্দিগানি নঅ ফলে। 14 দিনোত্ তারা উগুরে আন্ধার্ লামি এজে; দিবুজ্যে তারা রেদো ধোক্ক্যেন্ বিজিরে বিজিরে বেড়ায়। 15 তে ধারেয়্যে জিলোর্ আধত্তুন্ নাদামানুচ্চুনোরে বাঁজায়; বোলিগুনোর্ মুদোত্তুন্ তারারে রোক্ষ্যে গরে। 16 সেনত্তে অসহায় মানুচ্চুনে আজালোই বুক্কো বানন্, আর অবিচের্ বন্ধ ওই যায়। 17 বর্ পেইয়্যে সেই মানুচ্চো, যিবেরে গোজেনে বুদুলি ফেলায়। সেনত্তেই গোজেনর শাজনানরে ঈচ্ ন-গোজ্য, 18 কিত্তেই তে ঘা গুরি দে, আরঅ বানিয়ো দে; তে আঘাত্ গরে, আরঅ তা আত্তানে সিয়েন্ গম্ গরে। 19 ছগান্ দযাত্তুন্ তে তরে রোক্ষ্যে গুরিবো, সাত্তান দযার্ সময় তমার্ কনঅ খেতি ন-অবঅ। 20 ভাদ রাদর্ অক্তত্ তে তরে মরণত্তুন্ রোক্ষ্যে গুরিবো, আর যুদ্ধোর্ সময় রোক্ষ্যে গুরিবো তলোয়ারর্ আঘাদত্তুন্। 21 জিলোর্ আঘাদত্তুন্ তে তরে রোক্ষ্যে গুরিবো; দযা এলে তুই ন-দোরেবে। 22 ভস্ত আর ভাদ রাদর্ সময় তুই আজিবে; ঝার্বো এ্যমানুনোরে তুই ন-দোরেবে। 23 তঅ ভূইয়োত্ কনঅ পাত্তর্ ন-থেবঅ; ঝার্বো এ্যমানুনে তরে আক্রমণ ন-গুরিবাক্। 24 তুই হবর্ পেবে, তঅ তাম্বুলান্ কিচ্চু ন অবঅ; তঅ সোম্বোত্তিগানর্ ইজেব্ নেযেলে দেগিবে তর্ কিচ্ছু ন-আরাজ্। 25 তুই হবর্ পেবে, তর্ ভালোক্কুন্ ঝি-পূঅ অবাক্ আর তঅ গুট্টিগুন মাদঅ ঘাজঅ ধোক্ক্যেন্ বোউত্ অবাক্। 26 যেধোক্কেন্ গুরিনে অক্ত মজিম্ ফসল তুলো অয় সেধোক্কেন্ গুরিনে দীর্ঘ আয়ু পেইনে তুই গোর্ পেবে। 27 আমি জোগা চেইনে দেখ্যেইদে, ইয়েনি বেক্কানি সত্য; সেনত্তে তুই শুন্ আর নিজো জিংকানিত্ সিয়েন্ কামত্ লাগা। |
Copyright © 2021 Bangladesh Bible Society
Bangladesh Bible Society