ইয়োব 42 - Chakma Bible

¹ ইয়োবে সেক্কে জোবত্ লগেপ্রভুরে কলঅ,

² “মুই হবর্ পাং তুই বেক্কানি গুরি পারচ্; তর্ কনঅ সল্লা গরানাগান্ বাদ ন-যায়।

³ তুই পুযোর্ গোজ্যচ্ছে, ‘ইবে কন্না, যে ন-বুঝিনে মঅ উদ্দেশ্যগানরে ভিদিরে ভিদিরে রাগায়?’ এ কধাগান ঠিগ্ যে, মুই যিয়েন ন-বুঝোং সে পৌইদ্যেনে কধা কোইয়োং; সিয়েন এদক্ আমক্ অবার্ যে, মর্ বুঝোনার বারেদি।

⁴ তুই কোইয়োচ্ছে, ‘ইক্কিনে শুন, মুই কধা কোম্; মুই তরে প্রশ্ন পুযোর্ গুরিম আর তুই মরে জোব্ দিবে।’

⁵ আগেদি মঅ কানানে তঅ পৌইদ্যেনে শুন্যে, মাত্তর্ ইক্কিনে মঅ চোখকুনে তরে দেগিলাক্।

⁶ সেনত্তে মুই যিয়েনি কোইয়োং সিয়েনি ইক্কিনে ফিরেই নেযাঙর্, আর ধূল্যে আর ছেইয়ো ভিদিরে বোইনে আবিলেচ্ গরঙর্।”

শেজ্ কধা

⁷ ইয়োবরে এ কধানি কনার্ পরেদি লগেপ্রভু তৈমনীয় ইলীফসরে কলঅ, “মঅ চাগর্‌বো ইয়োবে যেধোক্ক্যেন কোইয়্যে তুই আর তর্ সমাজ্যেগুনে সেধোক্ক্যেন গুরিনে মঅ পৌইদ্যেনে ঠিগ্ কধা ন-কন; সেনত্তে তমা উগুরে মর্ রাগর্ আগুনান্ জুলি উঠ্যে।

⁸ সেনত্তে ইক্কিনে সাত্তো বলদ আর সাত্তো ভেড়া লোইনে মর্ চাগর্ ইয়োব ইদু যাহ্ আর নিজোত্তে পূজ্যে-উৎসর্বর অনুষ্ঠানান গর্। মর্ চাগর ইয়োবে তমাত্তে তবনা গুরিবো আর মুই সিয়েন মানি লোম, তমার্ বেদমা কাম মজিম্ ফল ন-দিম। মর্ চাগর ইয়োবে যেধোক্ক্যেন মঅ পৌইদ্যেনে ঠিগ্ কধা কোইয়্যে তুমি সেধোক্ক্যেন ন-কঅ।”

⁹ সেক্কেনে তৈমনীয় ইলীফসে, শূহীয় বিলদদে আর নামাথীয় সোফরে লগেপ্রভুর কধামজিম কাম গুরিলাক্, আর লগেপ্রভু ইয়োবর তবনাগান গুজি ললঅ।

¹⁰ ইয়োবে তা সমাজ্যেগুনোত্তে তবনা গরানার পরেদি লগেপ্রভু আরঅ তা অবস্থাগান ফিরেল আর তারে বেক্কানি আগত্তুন দ্বিগুণ বেশ্ দিলো।

¹¹ তার ভেই আর বোনুনে আর যিগুনে তারে আগে চিনিদাক্ তারা বেক্কুনে এইনে তা ঘরত্ তা সমারে হানা-বিনে গুরিলাক্। লগেপ্রভু তা উগুরে যে দুঃকানি আন্যে সিয়েনিত্তে তারা তারে বুঝেলাক্। তারা পত্তিজনে তারে এককট্টা রুবো আর সোনার এক্কান কান দুল্ দিলাক্।

¹² লগেপ্রভু ইয়োব জিংকানির পত্তম অবস্থাত্তুন পরেদি অবস্থাগান আরঅ দোল্ গুরি দিলো। তার চৌদ্দো আজার ভেড়া, ছঅ আজার উট, এক আজার জোড়া দামারা গোরু আর এক আজার গাধা অলাক্।

¹³ তা ঘরত্ সাত্তো পুয়ো আর তিন্নো মিলের্ জর্ম অলঅ।

¹⁴ তা দাঙর্ ঝিবোর্ নাঙান্ অলঅ যিমীমা, মধ্যম ঝিবোর্ নাঙান কৎসীয়া আর চিগোন ঝিবোর্ নাঙান কেরণ-হপ্পুক।

¹⁵ ইয়োবর ঝিগুনো ধোক্ক্যেন দোল্ দেজ ভিদিরে আর্ কনঅ জাগাত্ তোগেইনে পাহ্ ন-যেদঅ। তারা বাপ্পো তারার ভেইয়ুনো সমারে তারারেয়ো সোম্বোত্তি ভাগ দিলো।

¹⁶ ইয়েনর পরেদি ইয়োবে আরঅ একশঅ চোল্লিশ বজর বাঁজি এলঅ। তে তার্ ঝি-পুয়োগুনোর আর তা নাদিনুনোর চের্ পুরুষ সং দেখ্যে।

¹⁷ এধোক্ক্যেন গুরি ইয়োবে বুড়ো ওইনে বোউত্ দিন বাজানার পরেদি মুরি গেলঅ।