ইয়োব 4 - Chakma Bibleইলীফসর পত্তম কধা 1 এ কধাগান শুনিনে তৈমনীয় ইলীফসে জোবত্ কলঅ, 2 কনজনে যুনি তমা সমারে কধা কন্ সালে কি তুই লবাধোজ্যে পেবে? মাত্তর্ কন্না কধা ন-কোইনে জুরো গুরি থেই পারে? 3 ভাবি চাহ্, কয় জনরে তুই কদক্ সল্লা দুয়োচ্ আর বল্পোজ্যে আঢ্তানরে দরমর গোজ্যচ্। 4 যিগুনে জীংকানির-পদথ্ উজোত্ খেইয়োন্ তমা কধানি তারারে এজাল্ দিয়্যে; তারার্ বল্পোজ্যে আঢুগুন্ তুই দরমর গোজ্যস্। 5 মাত্তর্ ইক্কিনে তর্ নিজো উগুরে দুঘ্ এচ্ছ্যে আর তুই আমক্ ওইয়োজ্; দুঘ্কানে তরে আঘাত্ গোজ্যে আর তুই নিরাশ্ ওইয়োজ্। 6 তুই যে গোজেনরে ভোক্তি গুরিনে দরাজ্ সেক্কে কি তুই আশ্বাজ্ ন-পাজ? তুই যে নিদ্দুযি সিয়েন্ কি তর্ আজা নয়? 7 ইক্কিনে ভাবি চাহ্, নিদ্দুযি ওইনে কন্না কক্কে ভস্ত ওইয়্যে? গম্ মানুচ্চুনে কন্না কুদু শেজ্ ওইয়্যে? 8 মুই দেখ্যং যিগুনে বজঙর্ চাজ্ গরন্ আর দুঘোর্ বীজ্ ফেলান্ তারা সেধোক্ক্যেন্ কাবন্। 9 গোজেনর বঅ নিজেজে তারা ভস্ত ওই যাদন্ আর শেজ্ ওই যাদন্ তা রাগর্ কধালোই। 10 সিংহগুনে গুজুরোন্ আর গো গো রঅ গরন্, তো সেই চিৎনেইয়্যে সিংহগুনোর দাত্তুন ভাঙি যান্। 11 শিগের্ ন-পেলে সিংহগুনে মুরি যান্, আর সিংহীর ছঅগুনে ইন্দি-উন্দি ছিদি পড়ন্। 12 এক্কান্ কধা মইদু জুরো গুরিনে এলঅ, তা ফিস্ ফিস্ রবুয়ো মঅ কানত্ গেলঅ। 13 রেদোত্ মান্জ্যে যেক্কেনে অঘোর্ গুরিনে ঘুমোন্ সেক্কেনে স্ববন্ দেগিনে মুই সিলিবিলি অলুং; 14 দর্ আর গির্গিরেনি মরে ধুরিলো, মর্ বেক্ আড়ুন্ গির্গিরে উদিলাক্। 15 এক্কান্ আত্মা মঅ মুজুঙোদি গেলগোই, আর মঅ কিয়্যের্ কেশ্চানি উবো ওই উদিলো। 16 সেই আত্মাগানে থামেল, মাত্তর্ সিয়েন্ যে কেন্জান্ সিয়েন্ মুই বুঝি ন-পারিলুঙ্। মঅ চোগো মুজুঙোত্ এক্কান্ কিজু এলঅ, খুব্ লাড়ে গুরিনে মুই এ রবো শুনিলুঙ্, 17 কনঅ মানুচ্ কি গোজেনর চোগেন্দি নিদ্দুযি ওই পারে? তারে বানেয়্যেবোর্ চোগেন্দি কি তে খাটি ওই পারে? 18 গোজেনে যুনি তা চাগর্বোরেয়ো বিশ্বেজ্ ন-গরে আর ভুলোত্তেই তা স্বর্গদূত্তুনোরে দুযি গরে, 19 মাত্তর্ যিগুনে মাত্যে ঘরত্ বজত্তি গরন্, যিগুনোর গড়াগান্ অলদে ধূল্যেগান, যিগুনোরে পুগো ধোক্ক্যেন্ এনেবাদে মারে ফেলা যায়, তারা গোজেনর চোগেন্দি আরঅ কত্তমান যে বেশ্ দুযি অবাক্! 20 বেন্যেমাদানত্তুন্ ধুরি সাজোন্যেমাদান ভিদিরেদি তারা ভস্ত অন্, চোগোর্ আন্দলে তারা উমরত্তে ভস্ত ওই যান্। 21 তারার বেক্কানি তাম্বুলো ধোক্ক্যেন্ তুলি ফেলা অয়, আর তারা জ্ঞাননেইয়্যে অবস্থায় মুরি যান। |
Copyright © 2021 Bangladesh Bible Society
Bangladesh Bible Society