ইয়োব 3 - Chakma Bibleইয়োবর আবিলেচ্ হানা 1-2 সে পরেদি ইয়োবে কধা কনা আরাম্ভ গুরিনে তা জর্মর দিন্নোরে অভিশাব দিইনে কলঅ, 3 মঅ জর্মর দিন্নো ভস্ত ওই যোক্, সেই রেত্তো ভস্ত ওই যোক্, যেক্কে কুয়ো অলঅ, পূঅ ওইয়্যে। 4 সেই দিন্নো আন্ধার্ ওই যোক্; উগুরেত্তুন্ গোজেনে যেনে সেই দিন্নোর হবর্ ন-লয়; সিবে উগুরে কনঅ পহর্ ন-পোড়োক্। 5 আন্ধারানে আর ঘুর্ঘুজ্যে ছাবাই সে দিন্নোরে গজক্ গুরি নেযোক্; মেঘ্কানে তারে ঢাগি ফেলোক্, আর ঘুর্ঘুজ্যে আন্ধারে তারে অমকদ দর্বুগ্ লাগোক্। 6 ঘুর্ঘুজ্যে আন্ধারে সেই রেত্তোরে ধোরোক্; বজর দিনুনো ভিদিরে সিবেরে গোণা ন-ওক্, কনঅ মাস ভিদিরেয়ো সিবে ন-থোক্। 7 সে রেত্তো ভাজ্ ওক্, কনঅ রঙ্গ-ফুত্তির্ গান তা ভিদিরে শুনো ন-যোক্। 8 যিগুনে দিনুন্ বজং অবাত্তে মন্ত্র কন্ আর লিবিয়াথনরে জাগেই পারন্ তারা সেই দিন্নোরে অভিশাব দেদোক্। 9 তার্ বেন্যেপোত্যে বেক্ তারাগুন্ আন্ধার্ ওই যোক্; তে পহ্রানত্তে মিজে মিজে বুয়োই থোক্; তে যেনে বেন্যেপোত্যের্ পত্তম্ পহ্রান চেই ন-পায়, 10 কিত্তে তে মঅ মাবোর্ পেদঅ দোরান্ বানি ন-দে, মরে দুঘোত্তুন্ দূরোত্ ন-রাগায়। 11 মুই কিত্তে পেদত্ থাগদে ন-মরং? কিত্তেই বা পেদত্তুন্ পড়িনে ন-মরং? 12 মাবোর্ করত্ কিত্তে মরে গুজি লোইয়্যে? কিত্তেই বা তা বুগো দুধতান্ তে মরে দিয়্যে? 13 সিয়েন্ ন-অলে দঅ মুই ইক্কিনে সুগে-শান্দিয়্যে পড়ি থেই পারিদুঙ্, মুই ঘুরিদুঙ্ আর জিরেন্ পেদুঙ্। 14 মুই সেই রাজাগুনো সমারে আর সে মন্ত্রীগুনো সমারে থেদুঙ্ যিগুনে একদিন নিজোত্তে বিল্ডিং বানেয়োন যিয়েনি এচ্ছ্যে ভস্ত ওইনে পড়ি আঘে। 15 মুই সে শাজন্গুরিয়্যেগুনো সমারে থেদুঙ্ যিগুনোর বোউত্ সনা এলঅ, যিগুনে রুবোলোই ঘরানি ভোরেই রাগেদাক্। 16 যে চিজিবো দিনো পহ্র ন-দেগে, কিত্তেই পেদত্ মুরি-যেইয়্যে সেই চিজিবো ধোক্ক্যেন্ মরে মাদি ভিদিরে লুগেই রাগা ন-অলঅ? 17 সিদু দঅ শদান মানুচ্চুনে ভেজাল্ ন-গরন্, আর বল্পোজ্যে মানুচ্চুনে জিরেন্ পান্। 18 বন্দীগুনে বেক্কুনে সিদু আরাম গরন্; অত্যেচার্ গুরিয়্যেগুনোর্ রঅ ছাড়ানা আর সিদু শুনো ন-যায়। 19 চিগোন্ আর দাঙর্ বেক্কুনে সিদু আগন্, আর চাগরুনে সিদু গিরোজ আঢত্তুন্ মুক্ত। 20 “যিগুনে দুগে আগন্, কিত্তেই তারারে পহ্র দেগিবাত্তে দিয়্যে অয় আর তিদে পরাণানরে দিয়্যে অয় জিংকানি? 21 তারা মরণান চান মাত্তর্ সিয়েন্ ন-পান, যুনিয়ো তারা মানেগত্তুন্ বেশ্ গুরিনে সিয়েনরে তগান্। 22 তারা গোরত্ লুমি পারিলে হুজি অন্, আর সিয়েনত্তে তারা অমকদ ফুত্তি গরন্। 23 যে মানুচ্চোর্ পথ্তান্ তা ইদু গুমোর্, যিবেরে গোজেনে আক্সোই রাগেয়্যে, কিত্তে সেই মানুচ্চোরে জিংকানি দিয়্যে অয়? 24 মঅ বঅনিজেচ্ছো মর্ হানা ওইয়্যে, আর মর্ গির্গিরেনিগান পানি ধোক্ক্যেন্ ঢালি পোজ্যে। 25 মুই যিয়েন্ দোরেয়োং সিয়েনই মঅ উগুরে এইনে পোজ্যে; যিয়েন অবঅ বিলিনে মর্ অমকদ দর্ লাক্ক্যে সিয়েনই মঅ উগুরে ঘোট্যে। 26 মর্ সুগ্-শান্দি নেই, ঠিগ্ ঠিগানা নেই, কনঅ জিরেন্ নেই, আগেদে বানা দুঘ্।” |
Copyright © 2021 Bangladesh Bible Society
Bangladesh Bible Society