ইয়োব 17 - Chakma Bible1 মঅ মনান্ ভাঙি যেইয়্যে, মঅ আয়ুগান থুম্ ওই এজের্, মত্তেই গোরানে বাজ্জেই আঘে। 2 ঠাট্টা-তামাজা গুরিয়্যেগুনে হামাক্কাই মঅ চেরোকিত্তে আগন্; তারার্ উল্লোমি মনভাব্পান্ মুই দেগঙর্। 3 ও গোজেন, যে জামিন তুই চাজ্ মঅ পক্ষেদি সে জামিনান্ তুই ওজ্; কন্না আর মর্ ওইনে জামিন অবঅ? 4 তুই তারার্ বুঝিবার মনান্ বন্ধ গুরি দুয়োজ্, সেনত্তে তুই তারারে জিদিবাত্তে ন-দিবে। 5 লাভ আজায় যুনি কনজনে তা সমাজ্যেগুনোরে দুষি গরে সালে তা পূঅগুনে দুঘ্ ভোগ্ গুরিবাক্। 6 গোজেনে মরে বেক্কুনোত্তুন্ ঘিনাইদে ধোক্ক্যেন্ গোজ্যে, যিবের্ মুয়োনত্ বেক্কুনে সেফ্ ফেলেই দুয়োন্ তা ধোক্ক্যেন্ গোজ্যন্। 7 মঅ চোগ্কুন দুঘে আন্ধার্ ওই এজের্; মর্ পুরো কিয়্যেগান্ ছাবা ধোক্ক্যেন্ ওইয়্যে। 8 ইয়েন্দোই গম্ মানুচ্চুনে ভারী আমক্ অবাক্, আর নিদ্দুযিগুনে গোজেন উগুরে ভোক্তি নেইয়্যেগুনোর বিরুদ্ধে জাগি উদিবাক্; 9 মাত্তর্ খাটি মানুচ্চুনে তারার্ পধেদি উজেই যেবাক্, আর যিগুনো আঢ্তানি সিজি তারা দিনে দিনে বোলি অবাক্। 10 “ঠিগ্ আঘে, তুমি বেক্কুনে এইনে আরঅ চেট্ট্যা গরঅ। মুই তমা ভিদিরে কাররে জ্ঞানী ন-দেগং। 11 মর্ আয়ুগান পেরায় থুম্ ওইয়্যে, মর্ বেক্ সল্লাগানি বিফল্ ওইয়্যে, মর্ মনর্ আওজ্ছানিয়ো বর্বাত্ ওই যেইয়্যে। 12 এ মানুচ্চুনে রেত্তোরে দিন বানান্ আর আন্ধার ভিদিরে কন্দে, ‘পহর্ এজের্’। 13 যুনি মর্ ঘর ইজেবে মুই মরণর জাগায়ানরে আজা গরং, আন্ধার ভিদিরে যুনি মর্ বিচ্ছোনান্ পাদং, 14 মরণর জাগায়ানরে যুনি কং, ‘তুই মঅ বাপ্পো,’ আর পুক্কোরে কঙে, ‘মঅ মাবো’ বা ‘মঅ বোন্নো,’ 15 সালে মর্ আজাগান কুদু? আর মর্ আজাগানর পরিপুরোনান্ কন্না দেগিবো? 16 সেই আজাগান মরণ জাগায়ানর্ দোরান সং লামি ন-যেবঅ; মঅ লগে সিয়েন্ ধূল্যেলোই ন-মিজেব।” |
Copyright © 2021 Bangladesh Bible Society
Bangladesh Bible Society