ইয়োব 13 - Chakma Bible1 মুই ইয়েনি নিজো চোগেদি দেখ্যং আর নিজো কানে শুনিনে সিয়েনি বুচ্ছোং। 2 তুমি যিয়েন্ হবর্ পঅ মুইয়ো সিয়েন্ হবর্ পাং; মুই তমাত্তুন্ বেশ্ তলেদি নয়। 3 মাত্তর্ মুই বেগত্তুন্ খেমতাবলা গোজেন লগে কধা কবাত্তে চাং, গোজেন সমারে মঅ পৌইদ্যেনে তর্ক গুরিবাত্তে চাং। 4 তুমি দঅ বেক্কানি মিজে গুরিনে লিবি দুয়োর্; তুমি বেক্কুন অপদাত্ত ডাক্তর। 5 আহ্, তুমি বেক্কুন যুনি জুরো গুরি থেদা! তমাত্তে সিয়েনই অদঅ বুদ্ধিমানর্ কাম্। 6 ইক্কিনে তুমি মঅ যুক্তিগান্ শুনো; মঅ তর্কর্ কধালোই কান্ দুয়ো। 7 গোজেনর পক্ষ ওইনে কি তুমি অন্যেই কধা কবা? তার্ ওইনে কি ছলনার্ কধা কবা? 8 তা পক্ষ ওইনে কি একচোখ্যে গুরিবা? গোজেনর্ ওইনে কি তর্ক গুরিবা? 9 তে যুনি তমারে পোরোক্ষ্যে গরে সালে কি তমার্ গম্ অবঅ? মান্জ্যরে যেধোক্ক্যেন্ গুরিনে ঠগা যায় সেধোক্ক্যেন্ গুরিনে কি তুমি তারেয়ো ঠোগেবা? 10 তুমি যুনি ভিদিরে ভিদিরে একচোখ্যেমি গরঅ সালে হামাক্কাই তে তমারে গেইল্ দিবো। 11 তার মহিমাগান্ কি তমার্ দর্বুক ন-লাগে? তার্ দর্গরেপারাগান্ দেগিনে কি তুমি ন-দরঅ? 12 তমা সুদোমর্ কধানি যেনে কধা সুরোর্ ছেইয়ো কুর ধোক্ক্যেন; তমা তর্কর্ কধানি মাদি ধোক্ক্যেন্ নরম। 13 তুমি জুরো গুরি থাগঅ, মরে কধা কবাত্তে দুয়ো; সে পরেদি মর্ যিয়েন্ অবার্ সিয়েনই ওক্। 14 কিত্তে মুই নিজোরে দযাত্ ফেলেম্ আর মঅ পরাণানরে আধত্ রাগেম্? 15 তে যুনি মরে মারেয়ো ফেলায় তো তা উগুরে মুই আজা রাগেম্; মুই হামাক্কাই তা মুজুঙোত্ মঅ পক্ষেদি কধা কোম্। 16 সিয়েনই অবঅ মর্ রোক্ষ্যের্ পথ্তান, কিয়া কনঅ শদান মানুচ্ তা মুজুঙোত্ এই ন-পারিবো। 17 মঅ কধানি মন্ দি শুন; মুই যিয়েন্ কঙর্ সিয়েন্ তমা কানত্ যোক্। 18 মর্ পক্ষে যিয়েন্ কবার্ সিয়েন্ মুই ইক্কিনে ঠিগ্ গোজ্যং, সেনত্তে মুই হবর্ পাং, মুই নিদ্দুযি বিলিনে ফগদাঙ্ ওম্। 19 কনজনে কি মঅ বিরুদ্ধে আবিত্তি জানেই পারন্? পারিলে মুই অলর্ গুরি মুরি যেম্। 20-21 ও গোজেন, মরে বানা এ দ্বিয়েন্ জিনিস দে; মঅ উগুরেত্তুন্ তঅ আঢ্তান দূরোত্ সোরেই নেযা, আর্ তর্ দর্গরেপারা কাম্বোই মরে আর দর্ ন-দেগেচ্; সালে মুই তত্তুন্ নিজোরে ন-লুগেম্। 22 সে পরেন্দি তুই মরে ডাগিচ্, মুই জোব্ দিম্, বা মরে কধা কবাত্তে দে আর তুই তা জোব্পান দিজ্। 23 কঅ, মর্ অন্যেই আর পাব্পান কি? মর্ দুজ্ছান্ আর পাব্পান মরে দেগেই দে। 24 কিত্তেই তুই মুয়োন্ লুগেই রাগেয়োচ্ আর মরে শত্রু বিলিনে মনে গরর্? 25 যে পাদাগান্ বোইয়্যেরত্ উড়ে তারে কি তুই দর্ দেগেবে? শুগুনো তুষোর্ পিজেন্দি কি তুই লোড়েবে? 26 তুই দঅ মর্ বিরুদ্ধে তিদে কধা লেখ্যচ্, মর্ গাবুজ্যের্ পাবর্ ফল মরে ভুগোর্। 27 তুই মঅ টেঙত্ দুড়িলোই বান্যচ্; মর্ বেক্ পথ্তানি উগুরে তুই কড়া নজর্ রাগেয়োজ্ আর মর্ টেঙ কুজ্ বারানা ঠিগ্ গুরি দুয়োজ্। 28 মানুচ্ দঅ পঁচা জিনিজো ধোক্ক্যেন্ বর্বাত্ ওই যার্ আর পুগে কামেরেয়্যে কাবড় ধোক্ক্যেন্ অর্। |
Copyright © 2021 Bangladesh Bible Society
Bangladesh Bible Society