যোহন 5 - Chakma Bible

আর এক্কো পিড়েল্ল্যে গম্ অলঅ

¹ এ বেক্‌ ঘটনাগানির্ পরেদি যীশু যিরূশালেমত্ গেলঅ, কিয়া সেক্কে যিহূদীগুনোর্ এক্কো পরব্ এলঅ।

² যিরূশালেম ভেড়া-গেদো কায়কুরে এক্কো পোর্ আঘে; সিয়েনত্ পাচ্চান্ ছাল্-দিয়্যে জাগা আঘে। ইব্রীয় কধাদি পোর্‌বো নাঙান্ বৈথেস্‌দা।

³ সেই বেক্‌ জাগায়ানিত্ সয়-সাগোজ্যে পিড়েল্ল্যে পড়ি থেদাক্। কানা, লেং, এমন্‌ কি যিগুনোর কিয়্যেগানি এক্কুবারে শুগেই যেইয়্যে সেবাবোত্যে মানুচ্‌অ তারা ভিদিরে এলাক্।

⁴ এক্কো স্বর্গদূতে অক্‌ত অক্‌ত সে পোর্‌‌বোত্ লামিনে পানি এলোনি-ফেলোনি গুরিদো, আর সে পরেদি যে পৌইল্যা পানিত্ লামিদো তার্ যে কনঅ পিড়ে গম্ ওই যেদঅ। সেনত্তে বেক্‌ পিড়েল্ল্যেগুনে পানি লুরিবোদে আজায় সিধু পড়ি থেদাক্।

⁵ আটত্রিশ বজর্ ধুরিনে পীড়েত্ ভুগের্ সেবাবোত্যে এক্কো মানুচ্অ সিয়েনত্ এলঅ।

⁶ ভালোক্ দিন ধুরিনে তে এবাবোত্যেগুরি পড়ি আঘে কোই পারিনে যীশু তারে পুযোর্ গুরিলো, “তর্ কি গম্ অবার্ আওজ্ আঘে?”

⁷ পিড়েল্ল্যেবো জোব্ দিলো, “মর্ এমন্‌ কনজন নেই যে, পানিগান্ লুড়ি উদোনার্ লগে লগে মরে পোর্‌বোত্ লামেই দে। মুই যাদে ন-যাদে আর এক্কো মঅ আগেদি লামেগোই।”

⁸ যীশু তারে কলঅ, “উঠ্, তঅ পাদিবো তুলিনে আঢি বেড়া।”

⁹ সেক্কেনে সেই মানুচ্চো গম্ ওই গেলঅ আর তা বিচ্ছোনান্ তুলিনে আঢা ধুরিলো। সেই দিন্নো এলঅ জিরেবার্ দিন্নো।

¹⁰ ইয়েনত্তে যে মানুচ্চোরে গম্ গরা ওইয়্যে তারে যিহূদী নেতাগুনে কলাক্, “এচ্চ্যে জিরেবার্ দিন্; ধর্মর্ সুদোম্ মজিম্ পাদিবো তুলি লনা তর্ উজিত্ নয়।”

¹¹ সেক্কে তে সেই নেতাগুনোরে কলঅ, “মাত্তর্ যে মরে গম্ গোজ্যে তেয়ই মরে কোইয়্যেদে, ‘তঅ বিচ্ছোনান্ তুলি লোইনে আঢি বেড়া।’ ”

¹² তারা সেই মানুচ্চোরে পুযোর্ গুরিলাক্, “কন্না সেই মানুচ্চো, যে তরে কোইয়্যে, ‘তঅ বিচ্ছোনান্ তুলিনে আঢি বেড়া?’ ”

¹³ মাত্তর্ যে মানুচ্চো গম্ ওইয়্যে তে কোই ন-পারিদো তে কন্না, কিয়া সে জাগানত্ সয়-সাগোজ্যে মানুচ্‌ ঘেজাঘেস্যে ওইয়োন বিলি যীশু সিয়েনত্তুন্ গেলগোই।

¹⁴ ইয়েন পরেদি যীশু সে মানুচ্চোরে উবোসনা-ঘরত্ দেগিনে কলঅ, “চাহ্, তুই গম্ ওইয়োচ্। পাপ জিংকানি আর ন-কাদেচ্, যেন তর্ আর ক্ষতি ন-অয়।”

¹⁵ সেক্কে সে মানুচ্চো যেইনে যিহূদী নেতাগুনোরে কলঅ, তারে যে গম্ গোজ্যে, তে যীশু।

পুয়োবোর্ অধিকার্

¹⁶ জিরেবার্ দিনোত্ যীশু এ বেক্‌ কামানি গোজ্যে বিলি যিহূদী নেতাগুনে তারে মারে ফেলেবাত্তে চেষ্টা গুরিলাক্।

¹⁷ সেক্কে তে সেই নেতাগুনোরে কলঅ, “ম বাপ্পো নিত্য কাম গরের্ আর মুইয়ো গরঙর্।”

¹⁸ যীশুর এ কধানত্যে যিহূদী নেতাগুনে তারে মারে ফেলেবাত্যে ফন্দি গরা ধুরিলাক্, কিয়া তে যে বানা জিরেবার্ দিনুনোর সুদোম্ ভাঙে সিয়েন্ নয়, গোজেনরে নিজোর্ বাপ্ বিলি ডাগিনে নিজোরে গোজেন সং অ গোজ্যে।

¹⁹ সেক্কে যীশু সেই নেতাগুনোরে কলঅ, মুই ঘেচ্চ্যেক্‌গুরি তমারে কঙর্, পুয়োবো নিজোত্তুন্ কিচ্চু গুরি ন-পারে। বাবরে যিয়েন্ গত্তে দেগে বানা সিয়েনই গুরি পারে, কিয়া বাবে যিয়েন্ গরে পুয়োবোয়ো সিয়েন্ গরে।

²⁰ বাবে পুয়োবোরে কোচ্‌পায় আর তে নিজে যিয়েনি গরে বেক্কানি পুয়োবোরে দেগায়। তে ইয়েনিত্তুন্ আরঅ দাঙর্ দাঙর্ কাম পুয়োবোরে দেগেব, যেন পুয়োবোরে সেই বেক্‌ কামানি গত্তে দেগিনে তুমি আমক্ অ।

²¹ বাপ্পো যেবাবোত্যেগুরি মরাগুনোরে জিংকানি দিইনে তুলে ঠিগ্ সেবাবোত্যেগুরি পুয়োবোয়ো যিবেরে আয়োচ্ গরে তারে জিংকানি দে।

²² বাবে কারঅ বিচের্ ন-গরে, মাত্তর্ বেক্‌ বিচেরর্ ভারান্ পুয়োবোরে দিয়্যে,

²³ যেন বাবরে যেবাবোত্যেগুরি বেক্কুনে সর্মান গরন্ সেবাবোত্যেগুরি পুয়োবোরেয়ো সর্মান গরন্। পুয়োবোরে যে সর্মান ন-গরে, যে তারে দিপাধেয়্যে সেই বাপ্পোরেয়ো তে সর্মান ন-গরে।

²⁴ মুই তমারে ঘেচ্চ্যেক্‌গুরি কঙর্, মঅ কধা যে শুনে আর মরে যে দিপাধেয়্যে তারে বিশ্বেজ্ গরে তার্ উমর্‌অ জিংকানি আঘে। তারে দুষি বিলিনে ঠিগ্ গরা ন-অবঅ; তে দঅ মরণত্তুন্ জিংকানিত্ পার্ ওই যেয়্যে।

²⁵ মুই তমারে ঘেচ্চ্যেক্‌গুরি কঙর্, এন্ অক্ত এজের্, বরং ইক্কিনে এচ্চ্যে, যেক্কে মরাগুনে গোজেন পুয়োবোর্ কধা রঅ শুনিবাক্ আর যিগুনে শুনিবাক্ সিগুনে জেদা অবাক্।

²⁶ ইয়েনর্ কারনান্ অলঅ, বাপ্পো নিজে যেবাবোত্যেগুরি জিংকানির্ অধিকারী সেবাবোত্যেগুরি তে পুয়োবোরেয়ো জিংকানির্ অধিকারী অবাত্তে দিয়্যে।

²⁷ বাবে পুয়োবোরে মান্‌জ্যর্ বিচের গুরিবার্ খেমতা দিয়্যে, কিয়া তে মান্‌জ্যপুয়ো।

²⁸ এ কধাগান্ শুনিনে আমক্ ন-অবা, কিয়া এন্ অক্ত এজের্, যিগুনে গোরত্ আঘন্ সিগুনে বেক্কুনে মান্‌জ্যপুয়োবোর্ কধা রঅ শুনিনে নিগিলি এবাক্।

²⁹ যিগুনে গম্ কাম গোজ্যন্ সিগুনে জিংকানি পেবাত্যে উদিবাক্, আর যিগুনে অন্যেয় কাম্ গুরিনে সময় কাদেয়োন্ সিগুনে সাজা পেবাত্যে উদিবাক্।

³⁰ মুই নিজোত্তুন্ কিচ্চু গুরি ন-পারং; যেবাবোত্যে শুনোং সেবাবোত্যে বিচের্ গরং। মুই গমেডালে বিচের্ গরং, কিয়া মুই মঅ আওজ্ মজিম্ কাম্ গুরিবাত্তে ন-চাং মাত্তর্ যে মরে পাধেয়্যে তা আওজ্ মজিম্ কাম্ গুরিবাত্তে চাং।

প্রভু যীশু পৌইদ্যেনে সাক্ষ্য

³¹ মুই যুনি মঅ নিজোত্যে সাক্ষ্য দুয়োং সালে মর্ সেই সাক্ষ্যগান্ সত্য নয়।

³² অন্য একজন আঘে যিবে মঅ পৌইদ্যেনে সাক্ষ্য দের্, আর মুই কোই পারং মঅ পৌইদ্যেনে তে যে সাক্ষ্যগান্ দে সিয়েন্ সত্য।

³³ তুমি যোহন ইধু পুযোর্ গুরিনে পাধেয়ো, আর তে সত্যর্ পক্ষে সাক্ষ্য দিয়্যে।

³⁴ খালিক্ মুই মান্‌জ্যর্ সাক্ষ্য উগুরে নির্ভর্ ন-গরং, মাত্তর্ যেন তুমি পাপত্তুন্ উদ্ধোর্ পঅ সেনত্তে এ বেক্‌ কধাগানি কঙর্।

³⁵ যোহনে এলদে সেই জোল্-জোল্যে চেরাক্কো যিবে জ্বলিনে পহ্‌র দের্; তুমি খানক্‌কনত্যে তার্ সেই পহ্‌রত্ হুজী গুরিবাত্তে রাজী ওইয়ো।

³⁶ মাত্তর্ যোহন সাক্ষ্যত্তুন্অ বেশ্ দাঙর্ সাক্ষ্য মর্ আঘে, কিয়া বাপ্পো মরে যে কামানি গুরিবাত্যে দিয়্যে সিয়েনি মুই গরঙর্। আর সিয়েনি মঅ পৌইদ্যেনে এ সাক্ষ্যগান্ দের্ যে, বাবা মরে পাধেয়্যে।

³⁷ সে বাপ্পো, যে মরে পাধেয়্যে, তে নিজে মঅ পৌইদ্যেনে সাক্ষ্য দিয়্যে। তুমি কনদিন্অ তা রবুয়ো ন-শুনো, চেঙেরায়ো ন-দেগঅ।

³⁸ সিয়েন বাদে তা কধানি তমা মনত্ ন-থায়, কিয়া তে যিবেরে দিপাধেয়্যে তা উগুরে তুমি বিশ্বেজ্ ন-গরঅ।

³⁹ তুমি পবিত্র বোইবো ভারী মনযোগ্ দিইনে পড়অ, কিয়া তুমি মনে গরঅ সিবেলোই উমর্‌অ জিংকানি পেবা। মাত্তর্ সে বোইবো দঅ মত্যেই সাক্ষ্য দে;

⁴⁰ তো তুমি জিংকানি পেবাত্যে মইধু এবাত্তে ন-চঅ।

⁴¹ “মুই মান্‌জ্যর্ বাঈনী পেবাত্তে চেট্ট্যা ন-গরং,

⁴² মাত্তর্ মুই তমারে হবর্ পাং। মুই হবর্ পাং তমা মনানিত্ গোজেন ইন্দি কোচ্‌পানা নেই।

⁴³ মুই মর্ বাবা নাঙে এচ্চ্যং আর তুমি মরে মানি ন-লর্; মাত্তর্ অন্য কেঅ যুনি তা নিজো নাঙে এজে তারে তুমি মানি লবা।

⁴⁴ তুমি একজন অন্যজনত্তুন্ বাঈনী পেবার্ আজা গরঅ, মাত্তর্ যে বাঈনীগান্ বানা গোজেনত্তুন্ পাহ্-যায় সিয়েনর্ চেট্ট্যায়ো ন-গরঅ। ইয়েনর্ পরেদি তুমি কিবাবোত্যেগুরি বিশ্বেজ্ গুরি পারঅ?

⁴⁵ মনে ন-গোজ্য যে, বাবা ইধু মুই তমারে দুষি গুরিম্; মাত্তর্ যে মোশি উগুরে তুমি আজা গুরি আগঅ সেই মোশিই তমারে দুষি গরের্।

⁴⁶ যুনি তুমি মোশিরে বিশ্বেজ্ গত্তা সালে মরেয়ো বিশ্বেজ্ গত্তা, কিয়া মোশি দঅ মঅ পৌইদেনে লেক্ক্যে।

⁴⁷ মাত্তর্ যেক্কে তা লেঘাগান্ তুমি বিশ্বেজ্ ন-গরঅ সেক্কে কিবাবোত্যেগুরি মঅ কধালোই বিশ্বেজ্ গুরিবা?”