যিরমিয় 46 - Chakma Bible

নানান্ জাদ পৌইদ্যেনে আগাম্ কধা

¹ ভাববাদী যিরমিয় ইধু নানান্ জাদ পৌইদ্যেনে লগেপ্রভুর কধা।

মিসর পৌইদ্যেনে

² যোশিয়র পুয়ো যিহূদার রাজা যিহোয়াকীমর রাজাগিরির চের্ বজরত্ বাবিলর রাজা নবূখদ্‌নিৎসরে ইউফ্রেটিস গাঙর্ ইধু কর্কমীশত্ মিসরর রাজা ফরৌণ নখোরে যে সৈন্যদলুনোরে ওদেই দিয়্যে লগেপ্রভু তারা পৌইদ্যেনে কোইয়্যে,

³ তমা চিগোন্ আর দাঙর্ ঢালানি ঠিগ্‌‍‍‍ঠাগ গুরিনে যুদ্ধো গুরিবাত্তে নিগিলো।

⁴ ঘোড়াগুনোরে সাজেইনে সিগুনো উগুরে চড়। মাঢা রোক্ষ্যে গুরিবার তোক্ক্যেগুন মাঢাত্ দিইনে জাগানত্ যেইনে থিয়্যেয়ো। তমা যাদিগুন চোগ্‌‍‍‍‍চোখ্যে গুরি নেযঅ। যুদ্ধোর্ পোজাক্ উরো।

⁵ মুই কিত্তে ইয়েনি দেগঙর্? তারা দোরেয়োন, তারা পিজেদি যেইয়োন, তারার যোদ্ধাগুন উদিই যেইয়োন। তারা পিজেদি ন-চেইনে যাদিমাদি ধেই যাদন, আর চেরোকিত্তে অমকদ দর্।

⁶ যিগুনে যাদিমাদি ধাবা দি পারন তারায়ো ধেইযেই ন-পাত্তন্; খেমতাবলা গুনেয়ো ধেইযেই ন-পাত্তন্। উত্তোরেদি ইউফ্রেটিস নাঙ ইধু তারা উজোত্ হেইনে পড়ি যেয়োন।

⁷ সিবে কন্না যে, নীল গাঙ ধোক্ক্যেন গুরি, গাঙর্ ফুলি উঠ্যে পানি ধোক্ক্যেন গুরি উদি এজের্?

⁸ নীল গাঙ ধোক্ক্যেন গুরি, গাঙর্ ফুলি উঠ্যে পানি ধোক্ক্যেন গুরি মিসরান উদি এজের্। তে কোইয়্যেদে, মুই ফুলি উদিনে পিত্‌‍‍‍‍‍থিমীগানরে ঢাগি ফেলেম; মুই শঅরানরে আর তারার মানুচ্চুনোরে ভস্ত গুরিম।

⁹ ও বেক্ ঘোড়াগুন, তুমি আক্রমণ গরঅ। ও রথ চালেয়্যেগুন্, ঢাল-বোইয়্যে কূশ আর পুটর মানুচ্চুন্, ধনুবলা লূদীয়গুন, তুমি উজেই যঅ।

¹⁰ মাত্তর্ সেই দিনুন অলঅ বেগত্তুন্ খেমতাবলা প্রভু লগেপ্রভুর দিন। সে দিন্নো অলঅ তা শত্রুগুনো উগুরে হেনা সুজিবার দিন। তলোয়ারর ঈল্ ন-অনা সং, তা লো-গানর্ তিরেস্ ন-পানা সং গ্রাস গরা ধুরিবো; কিত্তে উত্তোরেদি দেজত্, ইউফ্রেটিস গাঙ পাড়ত্ বেগত্তুন্ খেমতাবলা প্রভু লগেপ্রভু উৎসর্বর অনুষ্ঠান গুরিবো।

¹¹ “ও গাবুজ্যে মিলে মিসর, তুই গিলিয়দত্ উদিনে পীড়ে মলম আন। মাত্তর্ মিজে মিজে তুই দারু বাড়েই দুয়োর্; তর্ গম অবার্ কনঅ আজা নেই।

¹² জাদ্‌তুনে তঅ লাজানা পৌইদ্যেনে শুনিবাক্; তঅ কানানিলোই পিত্‌থিমীগান ভর্‌পুণোং অবঅ। এক যোদ্ধা অন্য আর একজন উগুরে উজোত্ হেইনে দিজনে একসমারে পড়িবাক্।”

¹³ বাবিল রাজা নবূখদ্‌নিৎসরে যে মিসরান আক্রমণ গুরিবাত্তে এবঅ সে হবরান লগেপ্রভু ভাববাদী যিরমিয়রে কোইয়্যে।

¹⁴ সেই হবরান অলঅ, “তুমি মিসরত্ ফগদাং গরঅ, মিগ্‌দোলত্ ফগদাং গরঅ, নোফ আর তফন্‌হেষত্ ফগদাং গুরিনে কঅ, ‘তুমি জাগা নিইনে থিয়্যেয়ো আর যুক্কোল্ অ, কিত্তে তলোয়ারানে তমা চেরোকিত্তে গজক্ গুরিবো।’

¹⁵ তমা যোদ্ধাগুনে কিত্তে উদিই যেবাক্? তারা থিয়্যেই ন-পারিবাক্, কিত্তে লগেপ্রভু তারারে ঠিলিনে তলে ফেলেব।

¹⁶ তারা বার্ বার্ উজোত্ হেবাক্; তারা একজনে আর একজন উগুরে পড়িবাক্। তারা কবাক্, ‘উদো, আঢঅ আমি অত্যেচারিগুনো তলোয়ারত্তুন্ দূরোত্ যেইনে আমা নিজো মানুচ্চুনো ইধু আর নিজো দেজত্ ফিরি যেই।’

¹⁷ সিদুগো মানুচ্চুনে কন্, ‘মিসর রাজা ফরৌণে এক্কো জোরে বাজেয়্যে ঘন্টা ধোক্ক্যেন; তে জু-বো আরেয়্যে।’ ”

¹⁸ যিবে নাঙান্ বেগত্তুন্ খেমতাবলা লগেপ্রভু সেই রাজাবো ফগদাং গোজ্যে, মঅ জিংকানিগানর্ নাঙে কঙর্, এমন এক্কো এবঅ যিবে মুড়োগুনো ভিদিরে তাবোর ধোক্ক্যেন, সাগর ইধু কর্মিল ধোক্ক্যেন।

¹⁹ ও মিসর মানুচ্চুন, তুমি বন্দী ওইনে দূরোত্ যেবাত্তে তমা পযাপিরানি যুক্কোল্ গরঅ, কিত্তে নোফত্ মানুচ্ নেই, পড়ি থেইয়্যে ভূইয়ানি আর ভস্ত ওইয়্যে জাগায়ানি পড়ি থেবঅ।

²⁰ “মিসরান যেন এক্কান দোল্ মাদাম্ গোরু, মাত্তর্ উত্তোরেত্তুন্ তা বিরুদ্ধে এক্কো ডাঁশ-মাছি এজের্।

²¹ মিসরর্ বেতনবলা সৈন্যগুন পক্তা মক্তা গোরু ধোক্ক্যেন্। তারায়ো ফিরিনে একসমারে ধেবাক্; তারা থির্ থেইনে যুদ্ধো ন-গুরিবাক্, কিত্তে তারা উগুরে ভস্ত অবার্ দিন এজের্, তারার সাজা পেবার সময় এচ্চ্যে।

²² শত্রু সৈন্যগুন যেক্কে উজেই এবাক্ সেক্কে মিসরীয়গুনে সাপ ধোক্ক্যেন খস্ খস্ রঅ গুরিনে ধেই যেবাক্; গাজ্‌‌কাবিয়্যেগুনো ধোক্ক্যেন গুরি শত্রুগুনে কুড়োল্লোই মিসর বিরুদ্ধে এবাক্।

²³ মিসর ঝাড়ানি গভিন্ অলেয়ো তারা সিয়েনি কাবি ফেলেবাক্। তারা পুগ্-যুগত্তুনঅ সোংখ্যেদি বেশ্; তারারে গুণো ন-যায়।

²⁴ মিসর মানুচ্চুনোরে লাজত্ ফেলা অবঅ আর উত্তোরেদি মানুচ্চুনো আঢত্ তারারে তুলি দিয়া অবঅ।”

²⁵ ইস্রায়েলর গোজেন বেগত্তুন্ খেমতাবলা লগেপ্রভু কোইয়্যেদে, “মুই নো শঅরর্ দেবেদা আমোনরে, ফরৌণ আর মিসররে, তার দেব-দেবেদা আর রাজাগুনোরে আর যিগুনে ফরৌণ উগুরে বিশ্বেজ্ গরন তারারে বেক্কুনোরে সাজা দিম।

²⁶ যিগুনে তারারে মারে ফেলেবাত্তে চান সে বাবিল রাজা নবূখদ্‌নিৎসরে আর তা সৈন্যদলুনোর্ আঢত্ মুই তারারে তুলি দিম। মাত্তর্ পরেদি মিসরত্ আরঅ আগ ধোক্ক্যেন মানুচ্ বজত্তি গুরিবাক্। মুই লগেপ্রভু এ কধাগান কঙর্।”

²⁷ “ও মর্ চাগর যাকোব, ন-দোরেচ্; ও ইস্রায়েল, আজা নেইয়্যে ন-ওচ্। মুই দূর্ দেজত্তুন্, বন্দী থেইয়্যে দেজত্তুন্ তরে আর তঅ বংশধরুনোরে ঘেচ্চেকগুরি উদ্ধোর্ গুরিম। যাকোবে আরঅ সুগে-শান্দিয়্যে আর গমেডালে থেবঅ, কনজনে তারে দর্ ন-দেগেবাক্।

²⁸ ও মর্ চাগর্ যাকোব, ন-দোরেচ্, কিত্তে মুই তঅ সমারে সমারে আগং। যিদুক্কুন জাদ ভিদিরে মুই তরে ছিদি দুয়োং সে বেক্ জাদ্‌‌‍তুনোরে যুনিয়ো মুই এক্কুবারে ভস্ত গুরি দিম তো তরে মুই পুরোপুরি গুরি ভস্ত ন-গুরিম। মাত্তর্ এক্কুবারে সাজা ন-দিনেয়ো মুই তরে ন-ছাড়িম, মাত্তর্ ন্যায়বিচের্‌‌‍‍লোই মুই তরে শাজন্ গুরিম।”