যিরমিয় 39 - Chakma Bible

যিরূশালেম গজক্ গুরিবার ঘটনা

¹ যিরূশালেমান এবাবোত্যেগুরি গজক্ গরা ওইয়্যে। যিহূদার রাজা সিদিকিয়র রাজাগিরির নঅ বজরর্ দশ মাজত্ বাবিল রাজা নবূখদ্‌নিৎসরে তার বেক্ সৈন্যদলুন্দোই যিরূশালেমান বিরুদ্ধে এইনে শঅরান ঘিরি রাগেল।

² সিদিকিয় রাজাগিরির এগার বজরর্ চের্ মাজর্ নঅ দিনোত্ শঅরর্ দেবাল এক্কান জাগা ভাঙি ফেলা অলঅ।

³ সেক্কে বাবিল রাজার বেক্ রাজার চাগরুনে, অত্তাৎ নের্গল-শরেৎসর, সমগরনবো, শর্সখীম নাঙে এক্কো চাগর সদ্দার্, নের্গল-শরেৎসর নাঙে দাঙর্ পোজিশনর্ এক্কো রাজার চাগরে আর বাবিল রাজার অন্য চাগরুনে এইনে সংমোধ্যে গেদোত্ বজিলাক্।

⁴ যিহূদার রাজা সিদিকিয় আর তার বেক্ সৈন্যগুনে তারারে দেগিনে ধেই গেলাক্; তারা রেদো অক্তত্ রাজার বাগান পথ্‌তান ধুরিনে দি দেবাল গেদো ইন্দি শঅরান ছাড়িনে অরাবা ইন্দি গেলাক্।

⁵ মাত্তর্ বাবিলীয় সৈন্যগুনে তারা পিজেদি লোড়েইনে যিরীহোর সংজাগানত্ সিদিকিয়রে ধুরি ফেলেল। তারা তারে ধুরিনে হমাৎ দেজর্ রিব্‌লাদত বাবিল রাজা নবূখদ্‌নিৎসর ইধু নেযেলাক্। নবূখদ্‌নিৎসরে তার সাজার উগুম্ দিলো।

⁶ বাবিলর্ রাজা রিব্‌লাদত্ সিদিকিয়র চোগো মুজুঙোত্ তা পুয়োগুনোরে মারে ফেলেল আর যিহূদার বেক্ রাজার চাগরুনোরে মারে ফেলেল।

⁷ সে পরেদি তে সিদিকিয়র চোগ্‌কুন্ তুলি ফেলেইনে তারে বাবিলোত্ নেযেবাত্তে পিদল শিগোল্লোই বানিলাক্।

⁸ বাবিলীয়গুনে রাজঘরত্ আর মান্‌জ্য ঘরত্ আগুন বাজেই দিলাক্ আর যিরূশালেমর দেবালানি ভাঙি ফেলেলাক্।

⁹ সে অক্তত্ যিগুনে শঅরত্ থেলাক্, যিগুনে বাবিলর্ তপ্পে যেইয়োন আর দেজর্ বাদ্‌বাগি মানুচ্চুনোরে বাবিল রাজার চুগিদারুনোর সেনাপতি নবূষরদনে বন্দী গুরিনে বাবিলত্ নেযেল।

¹⁰ মাত্তর্ চুগিদারুনোর সেনাপতি নবূষরদনে জাগাজোমি নেইয়্যে কিজু নাঢা মান্‌জ্যরে যিহূদা দেজত্ থোই গেলঅ; সে অক্তত্ তে তারার আংগুর খেত্তান আর ভূইয়ানি দি গেলঅ।

¹¹ বাবিলর রাজা নবূখদ্‌নিৎসরে যিরমিয় পৌইদ্যেনে রাজার চুগিদারুনোর সেনাপতি নবূষরদনরে এ উগুমান দিলো,

¹² “তারে নিইনে তার দেগাশুনো গুরিবা; তার কনঅ খেতি ন-গুরিবা বরং তে যিয়েনি কবঅ সিয়েনি গুরিবা।”

^13-14 সেনত্তে চুগিদারুনোর সেনাপতি নবূষরদনে, নবূশস্‌বন নাঙে এক্কো চাগর সদ্দার, নের্গল-শরেৎসর নাঙে এক্কো দাঙর্ পোজিশনর চাগর্ আর বাবিল রাজার অন্য বেক্ দাঙর্ পোজিশনর চাগরুনে মানুচ্ পাধেইনে চুগিদারুনোর উদোনত্তুন্ যিরমিয়রে নিগিলেই আনিলাক্। যিরমিয়রে তা ঘরত্ নেযেবাত্তে তারা অহীকামর পুয়ো গদলিয় আঢত্ দিলাক্; অহীকামে এলঅ শাফনর পুয়ো। যিরমিয় তা নিজো মানুচ্চুনো ভিদিরে রলঅ।

¹⁵ যিরমিয় যেক্কে চুগিদারুনো উদোনত্ বন্ধী এলঅ সেক্কে লগেপ্রভুর এই কধাগান তাইধু ফগদাং ওইয়্যে,

¹⁶ “কূশীয় এবদ-মেলক ইধু যেইনে কঅ, ইস্রায়েলর গোজেন বেগত্তুন্ খেমতাবলা লগেপ্রভু কোইয়্যেদে, ‘ভালেদিলোই নয় বরং অমংগল দিইনে মুই এ শঅর বিরুদ্ধে মর্ কধানি ফোলেবাত্তে যাঙর্। সে অক্তত্ তঅ চোগো মুজুঙোত্ সিয়েন পূরেই দিম,

¹⁷ মাত্তর্ মুই তরে উদ্ধোর্ গুরিম। যিগুনোরে তুই দরাচ্ তারা আঢত্ তরে দিয়্যে ন-অবঅ।

¹⁸ মুই হামাক্কায় তরে রোক্ষ্যে গুরিম; তরে মারে ফেলা ন-অবঅ, বরং তুই কনবাবদে তঅ পরাণান্ রোক্ষ্যে গুরিবে, কিত্তে তুই মঅ উগুরে বিশ্বেজ্ গোজ্যস্। মুই লগেপ্রভু এ কধাগান কঙর্।’ ”