যিরমিয় 34 - Chakma Bible

রাজা সিদিকিয়ত্তে লগেপ্রভুর আগাম্ কধা

^1-2 বাবিলর রাজা নবূখদ্‌নিৎসর, তার বেক্ সৈন্যদলুন আর তা অধীনোত্ বেক্ রেজ্যগানি আর জাদর্ মানুচ্চুনে যেক্কে যিরূশালেত্ আর তার কায়-কুরে শঅরানির বিরুদ্ধে যুদ্ধো গোজ্যন্ সেক্কে ইস্রায়েলর গোজেন লগেপ্রভু যিরমিয়রে কলঅ যেন তে যিহূদার রাজা সিদিকিয় ইধু যেইনে কয়, মুই লগেপ্রভু এ কধাগান কঙর্, মুই এ শঅরান বাবিলো রাজার আঢত্ তুলি দিবাত্তে যাঙর্ আর তে ইয়েন পড়ি দিবঅ।

³ তুই তা আঢত্তুন্ রেহাই ন-পেবে; তরে ঘেচ্চেকগুরি ধুরিনে তা আঢত্ দিয়্যে অবঅ। তুই নিজো চোগেদি বাবিলো রাজারে দেগিবে; তে তর্ মুয়োমি ওইনে তঅ সমারে কধা কবঅ, আর তুই বাবিলোত্ যেবে।

⁴ “ও যিহূদার রাজা সিদিকিয়, তো তুই মঅ কধাগান শুন। তঅ পৌইদ্যেনে মুই কঙর্, তুই তলোয়ারর আঘাতে মুরি ন-যেবে;

⁵ তুই সুগে-শান্দিয়্যে মুরি যেবে। তর্ পুরোণি মানুচ্, অত্তাৎ তঅ আগেদি যিদুক্কুন রাজা এলাক্ তারারে সর্মান দেগেবাত্তে যেবাবোত্যে আগুন জ্বালা ওইয়্যে মান্‌জ্যে তঅ সর্মানত্তেয়ো সেবাবোত্যে আগুন জ্বালেবাক্ আর ‘হায় গিরোজ! ’ কোইনে দুঘ কধা কবাক্। মুই লগেপ্রভু নিজে এ কধাগান কঙর্‌।”

⁶ সেক্কে ভাববাদী যিরমিয় যিরূশালেমত্ যিহূদার রাজা সিদিকিয়রে সে বেক্ কধানি কলঅ।

⁷ সে অক্তত্ বাবিল রাজার সৈন্যগুনে যিরূশালেমত্, লাখীশোত আর অসেকার বিরুদ্ধে যুদ্ধো গোজ্যন্, কিত্তে যিহূদা দেজ ভিদিরে বানা এ দেবাল্-ঘিজ্যে শঅরানি গজক্ গুরি নিবাত্তে তারার বাগি এলঅ।

চাগরুনোর উদ্ধোর্

⁸ পরেদি লগেপ্রভু আরঅ যিরমিয় লগে কধা কলঅ। ইয়েন আগেদি রাজা সিদিকিয় যিরূশালেমর বেক্ মানুচ্চুনোরে সমারে চাগরুনোর উদ্ধোর্ কধাগান ফগদাং গরানার পৌইদ্যেনে সুদোমান থির্ গোজ্যে।

⁹ সেই সুদোমান অলঅ, পত্তিজনে তার ইব্রীয় চাগর্ বা চাগরানীবোরে উদ্ধোর্ গুরি দিবো; কনঅ যিহূদী ভেইয়োরে কনজনে চাগর্ ইজেবে রাগেই ন-পারিবো।

¹⁰ সেনত্তে বেক্ রাজার চাগরুনে আর মানুচ্চুনে এ সুদোমান মানিনে তারার চাগর্ আর চাগরানিগুনোরে উদ্ধোর্ গুরি দিবাত্তে রাজী অলাক্ আর তারারে আর চাগর্ গুরি ন-রাগেবাক্ বিলিনে ঠিগ্ গুরিলাক্। সেক্কে তারা তারার চাগরুনোরে উদ্ধোর্ গুরি দিলাক্।

¹¹ মাত্তর্ পরেদি তারা মনান্ বুদুলি ফেলেলাক্ আর যিদুক্কুন চাগর্ আর চাগরানীরে তারা উদ্ধোর্ গুরিলাক্ তারারে ফিরেই আনিনে আরঅ চাগর্ বানেলাক্।

¹² ইয়েনত্তে লগেপ্রভু যিরমিয়রে কোইয়্যেদে,

¹³ মুই ইস্রায়েলর গোজেন লগেপ্রভু কঙর্, মুই যেক্কে তমা পুরোণি মানুচ্চুনোরে মিসরত্তুন, চাগর্ কাদানা দেজত্তুন্ নিগিলেই আন্যং সেক্কে তারাত্তে এ সুদোমান থির্ গুরিনে কোইয়োং,

¹⁴ যুনি কনঅ ইব্রীয় ভেই নিজোরে তমা ইধু বিজি দুয়োন্ সালেন্ সাত্ বজরত্ তুমি তারে উদ্ধোর্ গুরিবা। ছঅ বজর্ তে তমার্ চাগর্ কাদিলে পরেদি তমাত্তুন্ তারে ইরি দিয়্যে পড়িবো। মাত্তর্ তমা পুরোণি মানুচ্চুনে মঅ কধানি ন-শুনোন্, মঅ কধানি মনযোগ ন-দুয়োন্।

¹⁵ কয়েকদিন অলঅ তুমি মনান ফিরেইনে মঅ চোগেদি যিয়েন ঠিগ্ সিয়েনই গোজ্যন্, অত্তাৎ তুমি পত্তিজনে তমা ইব্রীয় ভেইয়ুনোরে উদ্ধোর্ ফগদাং গোজ্য। এমন কি, মঅ ঘরত্ মঅ মুজুঙোত্ তুমি মঅ সুদোমান মানিবা বিলিনে রাজি ওইয়ো।

¹⁶ মাত্তর্ ইক্কিনে তুমি ঘুরি যেইয়ো আর মরে অসর্মান গোজ্য; তুমি যিদুক্কুন চাগর্ আর চাগরানিরে তারার আওজ্ মজিম যেবাত্তে উদ্ধোর্ গুরি দুয়ো তুমি পত্তিজনে তারারে আরঅ ফিরেই আনিনে চাগর্-চাগরানি বানেয়ো।

¹⁷ সেনত্তে মুই কঙর্, তুমি মর্ বাধ্য ন-অ, কিত্তে তমা জাদ্ ভেইয়ুনোত্তে তুমি উদ্ধোর্ অনা ফগদাং ন-গরঅ। সেনত্তে মুই ইক্কিনে তমাত্তে উদ্ধোর্ অনা ফগদাং গরঙর্; সেই উদ্ধোরান্ অলঅ যুদ্ধো, ভানা আর ভাদরাদর্ আঢত্ পড়িবার উদ্ধোর্। মুই তমা অবস্থাগানি এবাবোত্যে গুরিম যিয়েন দেগিনে পিত্‌‍থিমীর বেক্ রেজ্যর মানুচ্চুনে দরে কিয়্যে জাগেরে উদিবাক্।‍

^18-19 যিহূদা আর যিরূশালেমর নেতাগুন, রাজার চাগরুন, ধর্মগুরুগুন আর দেজর্ বেক মানুচ্চুন দ্বিকট্টা গোজ্যে গোরু ছবোর সংমোধ্যেদি আঢিনে মঅ সুদোমান্ পালেবা বিলিনে এগেম্ গোজ্য, মাত্তর্ তারা মঅ সুদোমান ভাঙ্যন্ আর সেই এগেমান্ ন-পালান্।

²⁰ সেনত্তে যিগুনে তারারে মারে ফেলেবাত্তে চান সে শত্রুগুনো আঢত্ মুই তারারে তুলি দিম। তারার মরাকিয়্যেনি অবঅ আগাজর্ পেগ্‌কুনোর আর ঝার্‌‍‍‍বো য়েমানুনোর হানা। ‍

²¹ “যে শত্রুগুনে যিহূদার রাজা সিদিকিয় আর তার চাগরুনোরে মারে ফেলেবাত্তে চায় মুই সে শত্রুগুনো আঢত্ তারারে তুলি দিম। বাবিল রাজার যে সৈন্যদলুন তমা কায়-কুরেত্তুন্ যেয়োন্দোই মুই তারা আঢত্ তমারে তুলি দিম।

²² মুই তারারে উগুম দিইনে এ শঅরত্ ফিরেই আনিম। তারা এ শঅর বিরুদ্ধে যুদ্ধো গুরিবাক্ আর সিয়েন গজক্ গুরিনে পুড়ি দিবাক্। মুই যিহূদার শঅরানিরে ভস্ত গুরিনে মানুচ্ নেইয়্যে গুরিম।”