যিরমিয় 32 - Chakma Bible

যিরমিয় এক্কান ভূই কিনিলো

¹ যিহূদার রাজা সিদিকিয়র রাজাগিরির দশ বজরত্, অত্তাৎ নবূখদ্‌নিৎসরর রাজাগিরির্ আদার বজরত্ লগেপ্রভুর কধানি যিরমিয় ইধু ফগদাং ওইয়্যে।

² বাবিলোত্ রাজার সৈন্যদলুনে সেক্কে যিরূশালেমান ঘিজ্যন্ আর যিরমিয় যিহূদার রাজঘরর্ চুগিদারুনো উদোনত্ বন্দী এলাক্। তে সিয়েনত্ এলঅ,

³ কিত্তে যিহূদার রাজা সিদিকিয় এ কধাগান কোইনে তারে বন্দী গোজ্যে, তুই এ কধাগান কোইনে আগামকধা গোজ্যস্, লগেপ্রভু কোইয়্যেদে, “মুই এ শঅরানরে বাবিলো রাজা আঢত্ তুলি দিবাত্তে যাঙর্ আর তে সিয়েন গজক্ গুরিবো।

⁴ যিহূদার রাজা সিদিকিয় বাবিলো রাজা আঢত্তুন্ রেহাই ন-পেবঅ বরং তারার রাজার আঢত্ তারে ঘেচ্চেকগুরি তুলি দিয়্যে অবঅ। বাবিলো রাজার মুয়োমি ওইনে তে কধা কবঅ আর নিজো চোগেদি তারে দেগিবো।

⁵ বাবিলোর রাজা সিদিকিয়রে বাবিলোত্ নেযেবে আর যেদক্কন সং মুই তাইন্দি মনযোগ ন-দিম্ সেদক্ ভিলোন সং তে সিদু থেবঅ। সেনত্তে বাবিলীয়গুনো সমারে যুদ্ধো গুরিলেয়ো তুমি ফোলেই ন-পারিবা। ”

⁶ সে সময়োত্ যিরমিয় কোইয়্যেদে, লগেপ্রভু মরে কোইয়্যেদে,

⁷ মঅ কাক্কা শল্লুমর পুয়ো হনমেলে মইধু এইনে কবদে, অনাথোতদ মর্ যে ভূইয়ান আঘে তুই সিয়েন কিনি ফেলা, কিত্তে কুদুম্মো ইজেবে সিয়েন কিনিবার অধিকারান্ তর্।

⁸ সেক্কে লগেপ্রভুর উগুম মজিম মঅ কাক্কার পুয়ো হনমেলে চুগিদারুনোর উদোনত্ মইধু এইনে কলঅ, বিন্যামীন বামর্ অনাথোদে মর্ যে ভূইয়ান আঘে সিয়েন তুই কিন্। ইয়েন উদ্ধোর্ গুরিবার আর গজক্ গুরিবার অধিকার যেক্কে তর্ সেক্কে তুয়ই সিয়েন নিজোত্তে কিন্। মুই হবর্ পেদুং ইয়েন লগেপ্রভুর কধা;

⁹ সেনত্তে মঅ কাক্কাবোর পুয়ো হনমেল ইধু মুই অনাথোদর্ সেই ভূইয়ান কিনিলুং আর একশঅ সাদাশি গ্রাম রূবো মুই তারে মাবিনে দিলুং।

¹⁰ মুই দলিলোত্ সই দিলুং, সীলমহ্‌র মারিলুং আর সাক্ষী রাগেলুং আর পাল্লালোই সেই রূবোগান মাবি দিলুং।‌

¹¹ মুই দ্বিয়েন দলিল নিলুং-সুদোম আর শত্ত লেঘা সীলমহর্ গোজ্যে এক্কান আর সীলমহর্ ন-গোজ্যে আর এক্কান।

¹² সে পরেদি মুই মঅ কাক্কার্ পুয়ো হনমেলর মুজুঙোত্ আর যে সাক্ষীগুনে দলিলোত্ সই গোজ্যন্ তারার আর চুগিদারুনোর উদোনত্ বোস্যে বেক যিহূদীগুনো মুজুঙোত্ সেই দলিলান নেরিয়র পুয়ো বারূকরে দিলুং। এই নেরিয় মহসেয়র পুয়ো।

^13-14 তারা মুজুঙোত্ মুই ইস্রায়েলর গোজেন বেগত্তুন্ খেমতাবলা লগেপ্রভুর এ উগুমান বারূকরে দিলুং, তুই সীলমহর্ গোজ্যে আর সীলমহর্ ন-গোজ্যে ভূই কিন্যে দ্বিয়েন দলিল লোইনে এক্কো মাদি পিলেত্ রাগা যেনে সিয়েনি ভালোক্ দিন ঠিগি থায়,

¹⁵ কিত্তে এ দেজত্ ঘর-বাড়ি, জাগা-জোমিন আর আংগুর খেত্ আরঅ বেজা-কিনে চলিবো। মুই ইস্রায়েলর গোজেন বেগত্তুন্ খেমতাবলা লগেপ্রভু এ কধাগান কঙর্।

¹⁶ “ভূই কিন্যে দলিলান্ নেরিয়র পুয়ো বারূকরে দেনার পরেদি মুই লগেপ্রভু ইধু এ তবনাগান গুরিলুং,

¹⁷ ‘ও প্রভু লগেপ্রভু, তুই তর্ দাঙর্ বল্লোই আর খেমতাবলা আঢ্‌তোই দেবাবো আর পিত্‌‌‌থিমীগান বানেয়োচ্। তঅ তপ্পে অাগাত্যে বিলিনে কিচ্চু নেই।

¹⁸ তুই আজার্ আজার্ জনরে তর্ অমকদ কোচ্‌‌‌‌পানা দেগেই থাচ্ আর বাব্‌‌পুনোর পাপর্ সাজাগানি তুই তারার্ পরেদি তারার পুয়োগুনোরে দি থাচ্। ও দাঙর্ আর খেমতাবলা গোজেন, তঅ নাঙান বেগত্তুন্ খেমতাবলা লগেপ্রভু;

¹⁹ তর্ উদ্দশ্যগান দাঙর্ আর তর্ বেক কামানি খেমতাবলা। মান্‌‌জ্যর বেক চালচলনর্ ইন্দি তঅ চোগ্‌‌‌‌কুন খুলো রাগেয়োচ্; তুই পত্তিজনরে তার চালচলনর্ আর কামর্ ফল দি থাচ্।

²⁰ তুই মিসর দেজত্ বোউত্ চিহ্নো দেগেয়োচ্ আর আমক্ আমক্ কাম্ গোজ্যস্ আর এজঅ সং ইস্রায়েল আর বেক্ মানুচ্চুনো ভিদিরে সিয়েনি গুরি এজর্, আর সিয়েনিলোই তুই সুনাঙ্ পেয়োচ্।

²¹ তুই চিহ্নো আর আমক্ আমক্ কাম দেগেইনে আর দরমর আহ্ খেমতাবলা আঢ্‌তানি বাবেইনে অমকদ দর্‌‌‌গরেপারা গুরি তঅ মানুচ্ ইস্রায়েলরে সিয়োত্তুন নিগিলেই আন্যচ্।

²² যে দেজত্ দুধ, মধু আর কনঅ কিজুর্ অভাব নেই সে দেজ্‌চান দিবার কধা তুই তারার পুরোণি মানুচ্চুনো ইধু শমক্ হেইয়োচ্ আর সিয়েন তারারে দুয়োচ্।‌

²³ তারা এইনে সিয়েন গজক্ গোজ্যন্, মাত্তর্ তারা তঅ কধা ন-শুনোন্ আর তর্ সুদোম্ মজিম ন-চলন্; তুই যিয়েনি গুরিবাত্তে তারারে উগুম দুয়োচ্ সিয়েনি কিচ্চু তারা ন-গরন। সেনত্তে এ দজানি তুই তারা উগুরে আন্যচ্।

²⁴ শঅরান্ নিবাত্তে কেধোক্ক্যেন গুরি দেবাল সমারে বাস্যেগুরি কুড়্ বানা অর্ সিয়েন তুই চাহ্। যুদ্ধো, ভাদরাত্ আর ভানা ভিদিরেদি শঅরান্ আক্রমণ গুরিয়্যে বাবিলীয়গুনো আঢত্ যেবঅ। তুই দঅ দেগর্, তুই যিয়েন কোইয়োচ্ সিয়েনই ওইয়্যে,

²⁵ মাত্তর্ ও প্রভু লগেপ্রভু, যুনিয়ো শঅরান বাবিলীয়গুনো আঢত্ যেবঅ তো তুই মরে কোইয়োচ্, মুই যেন রূবোলোই ভূইয়ান কিনোং আর সে কামর্ সাক্ষী রাগাং।’ ”

²⁶ পরেদি লগেপ্রভুর এ কধাগান যিরমিয় ইধু ফগদাং অলঅ,

²⁷ মুই লগেপ্রভু, বেক মানুচ্চুনোর গোজেন। কনঅ কিজু গরানা কি মঅ তপ্পে অাগাত্যে?

²⁸ সেনত্তে মুই এ শঅরানরে বাবিলীয়গুনো আর তারার রাজা নবূখদ্‌নিৎসরর আঢত্ তুলি দিবাত্তে যাঙর্। তে সিয়েন গজক্ গুরিবো।

²⁹ যে বাবিলীয়গুনে শঅরান্ আক্রমণ গোজ্যন্ তারা শঅরত্ চোমেইনে সিয়েনত্ আগুন বাজেই দিবাক্। যেদক্কানি ঘরর্ ছাল উগুরে মানুচ্চুনে বাল দেবেদার নাঙে আগর্‌বাট্টি জ্বালেয়োন আর অন্য দেবেদার নাঙে ঢাল্যে-উৎসর্বর অনুষ্ঠান গুরিনে মরে অহুজি গোজ্যন্ তারা সে ঘরানি সুমুত্তো শঅরান পুড়ি দিবাক্।

³⁰ ইস্রায়েল আর যিহূদার মানুচ্চুন চিগোনত্তুন্ ধুরি মঅ চোগেদি বানা ভান্ন্যেই কাম বাদে কিচ্চু ন-গরন; ঘেচ্চেকগুরি ইস্রায়েলর মানুচ্চুনে তারার আঢে বানেয়্যে জিনিস্‌‌চোই মরে বানা অহুজি গোজ্যন্।

³¹ যেদিন্যে এ শঅরান্ বানা ওইয়্যে সেদিন্যেত্তুন্ ধুরি এচ্চ্যে সং সিয়েন মর্ বেজার্ অনাগান্ আর রাগ্‌‌‍কান এমন্‌গুরি জাগেই দুয়ো, মঅ চোগো মুজুঙোত্তুন মুই সিয়েন সোরেই দিম্,‌‍

³² কিত্তে ইস্রায়েল অার যিহূদার মানুচ্চুন, তারার বেক্ রাজা আর রাজার কামগুরিয়্যেগুন, ধর্মগুরু আর ভাববাদীগুন আহ্ যিহূদা যিরূশালেমর মানুচ্চুনে তারার বেক্ ভান্ন্যেই কামানিলোই মরে অহুজি গোজ্যন্।

³³ তারা মঅ ইন্দিত্তুন পিঠ্‌তান ফিরেয়োন, মুয়োদি নয়; যুনিয়ো মুই বারে বারে তারারে শিক্ষ্যে দুয়োং তো তারা মঅ শাজনান্ ন-মানন, গুজিয়ো ন-লন। ‌‍

³⁴ মঅ ঘরত্ তারা তারার সাংগাদিক্ মূত্তিগুন বোজেইনে সিয়েন অসিজি গোজ্যন্।

³⁵ তারা মোলক দেবেদার নাঙে তারার ঝি-পুয়োগুনোরে উৎসর্ব গুরিবাত্তে বিন্-হিন্নোম কলগত্ বাল দেবেদার নাঙে পূজোর্ অজল্ জাগায়ান বানেয়োন। মুই কনদিন্‌অ সেই উগুমান ন-দুয়োং বা মর্ মনত্অ সিয়েন ন-চমে, তারা এবাবোত্যে দর্‌গরেপারা কামানি গুরিনে যিহূদারে দিইনে পাপ গোরেবাক্।

³⁶ তুমি এ শঅরানর পৌইদ্যেনে কত্তে, যুদ্ধো, ভাদরাত্ আর ভানা দিইনে ইয়েন বাবিল রাজার আঢত্ তুলি দিয়্যে ওইয়্যে; মাত্তর্ মুই ইস্রায়েলর গোজেন লগেপ্রভু কঙর্,

³⁷ মুই অমকদ বেজার্ আর জ্বোল্‌‌‍জোল্যে আর দর্‌গরেপারা রাগে মুই তারারে যেদক্কানি দেজত্ ধাবেই দুয়োং সিয়েনিত্তুন মুই হামাক্কায় তারারে এগত্তর্ গুরিম। মুই এ জাগাত্ তারারে ফিরেই আনিম আর গমেডালে বজত্তি গুরিবাত্তে দিম্।‌‍‍‍

³⁸ তারা মঅ মানুচ্ অবাক্ আর মুই তারার গোজেন ওম্।

³⁹ মুই তারারে এমন মন আর স্বভাব দিম যিগুনে বানা মইন্দি এগামনে এগাচিত্তে থেবাক্; সেক্কে তারা নিজোর আর তারার পরেদি তারার ঝি-পুয়োগুনোর ভালেদিত্তে নিত্য মরে ভোক্তি গুরিনে দোরেবাক্।

⁴⁰ মুই তারাত্তে এই জিংকানিবরর্ সুদোমান থিদেবর্ গুরিম, মুই তারার ভালেদি গরানা কনদিন্‌অ বন্ধ ন-গুরিম। মুই তারা মনত্ ভোক্তিবলা দর্ লাগেম্ যেনে তারা কনদিন্‌অ মত্তুন্ ফিরি ন-যান।

⁴¹ মুই হুজি মনে তারারে ভালেদি গুরিম আর মর্ বেক মনান্-পরানান্ দিইনে এ দেজত্ হামাক্কায় তারারে চারা ধোক্ক্যেন লাগেই দিম।

⁴² “মুই এ মানুচ্চুনো উগুরে যেবাবোত্যে এ দাঙর্ দযাগানি আন্যং সেবাবোত্যে তারা ইধু মর্ এগেম্ গোজ্যে বেক্ ভালেদিগানি মুই তারারে দান গুরিম।

⁴³ যে দেজ্‌‌চান পৌইদ্যেনে তুমি কধা, ‘ইয়েন এক্কান উগুজ্যে ভুই, ইয়েনত্ মানুচ্ বা য়েমান কিচ্চু নেই, কিত্তে ইয়েন বাবিলীয়গুনো আঢত্ তুলি দিয়্যে ওইয়্যে,’ সে দেজত্ আরঅ ভূই বেজা-কিনে অবঅ।

⁴⁴ বিন্যামীন চাগালাত্, যিরূশালেমর চেরোকিত্তে চাগালাত্, যিহূদার আর নেগেভর বেক্ আদামানি আর শঅরানি আর উজু-নিযো মুড়োমুড়ি চাগালার্ বেক আদামানিত্ অর শঅরানিত্ টেঙা দিইনে খেত্ কিনে অবঅ আর দলিলোত্ সই আর সীলমহ্‌‌‌র দিয়্যে অবঅ আর সাক্ষি রাগা অবঅ, কিত্তে মুই তারার অবস্থাগান ফিরেম। মুই লগেপ্রভু এ কধাগান কঙর্।”