যিরমিয় 23 - Chakma Bible

ন্যায়বলা চারা

¹ লগেপ্রভু কোইয়্যেদে, “অভিশাব্ পোড়োক সেই পালক্‌কুনোর, যিগুনে মর্ চড়িবার বামত্ ভেড়াগুনোরে ভস্ত গরদন্ আর ছিদি দেদন‍্।”

² সেনত্তে যে পালক্‌‍‌কুনে মঅ মানুচ্চুনোরে চড়ান সেই পালক্‌কুনো বিরুদ্ধে ইস্রায়েলর গোজেন লগেপ্রভু কোইয়্যেদে, “তুমি মর্ পালর্ ভেড়াগুনোরে ছিদি ফেল্য আর তারারে ধাবেই দুয়ো, তারারে কনঅ যত্তন্ ন-গরঅ; সেনত্তে তমা অন্যেয়ত্তে মুই তমারে সাজা দিম।‍‌

³ যেদক্কানি দেজত্ মুই মঅ পালর্ ভেড়াগুনোরে ধাবেই দুয়োং সিয়োত্তুন মুই নিজেই তারার বাদবাগিগুনোরে তারার বামত্ ফিরেই আনিম; সিয়েনত্ তারার বংশ বাড়িবাক্ আর সোংখ্যেদি বাড়িবাক্।

⁴ মুই তারা উগুরে এমন পালক্‌কুনোরে নেযেম যিগুনে তারারে দেগাশুনো গুরিবাক্; মর্ ভেড়াগুনে আর ন-দোরেবাক্ বা আগল্ পাগল্ ন-অবাক বা কনবো আযি ন-যেবাক্। মুই লগেপ্রভু এ কধাগান কঙর্‍।”

⁵ লগেপ্রভু কোইয়্যেদে, সে দিনুন এত্তন যেক্কে মুই দায়ূদোর বংশত্ এক্কো ন্যায়বলা চারারে তুলিম; তে রাজা ওইনে জ্ঞানর্ সমারে রাজাগিরি গুরিবো আর দেজত্ গম্ আর ন্যায় কাম গুরিবো।

⁶ তা সময়োত্ যিহূদা রোক্ষ্যে পেবঅ আর ইস্রায়েলে গমেডালে বজত্তি গুরি পারিবো। তারে লগেপ্রভু আমার উদ্ধোর্ গুরিয়্যে বিলিনে ডাকা অবঅ।

⁷ “সেনত্তে এমন দিন এজের্ যেক্কে মান্‌‍‍জ্যে আর ন-কবাক, ‘যিবে ইস্রায়েলীয়গুনোরে মিসর দেজত্তুন নিগিলেই আন্যে সেই জেদা লগেপ্রভুর নাঙে কঙর্,’

⁸ বরং তারা কবাক্, ‘যিবে ইস্রায়েলীয়গুনোরে উত্তর দেজত্ আর অন্য দেজত্ দূর গুরি দিয়্যে আর সিয়োত্তুন আন্যে সেই জেদা লগেপ্রভুর নাঙে কঙর্।’ সে পরেদি তারা নিজো দেজত্ বজত্তি গুরিবাক্।”

মিজে ভাববাদীগুনো পৌইদ্যেনে

⁹ যেরেদি ভাববাদীগুনো পৌইদ্যেনে লগেপ্রভুর কধানি শুনিনে মঅ মনান যেন ভিদিরে ভিদিরে ভাঙি পোজ্যে আর মর্ বেক আড়ুন গির্‌গিরেদন। লগেপ্রভু আর তার পবিত্র কধানিত্তে মুই মাত্তল ধোক্ক্যেন, আংগুর-রস হেইনে অমকদ মাত্তল ওইয়্যে মানজ্য ধোক্ক্যেন ওইয়োং।‍‍‍

¹⁰ দেজ্‌‍‍‍চান বেশ্যেগুন্দোই ভুরি যেইয়্যে, অভিশাবত্তে দেজ্‌‍‍‍‍‍চানে আবিলেচ্ গরের আর ধূল্যেচর-চাগালার চড়িবার বামান্ শুগেই যেইয়্যে। মানুচ্চুনে ভান্ন্যেই পথ্‌তান ধুরিনে চলদন আর তারার খেমতাগান অন্যেয়গুরিনে বেবহার গোজ্যন।

¹¹ লগেপ্রভু কোইয়্যেদে, ভাববাদী আর ধর্মগুরুগুনে গোজেন উগুরে ভোক্তিনেইয়্যে ওইয়োন; মঅ ঘরত্ সং মুই তারার পাজিগানি দেখ্যং।

¹² সেনত্তে তারার পথ্‌‍‍‍‍তান বিজোল্ অবঅ; আন্ধারত্ তারারে ধাবেই দিয়্যে অবঅ আর সিয়েনত্ তারা পড়িবাক্। তারার সাজা পেবার অক্তত্ মুই তারা উগুরে দযা আনিম।‍

¹³ শমরিয়ার ভাববাদীগুনো ভিদিরে মুই এ জঘন্য বেপারান দেখ্যং, তারা বাল দেবেদার নাঙে ভাববাদী ইজেবে কধা কোইনে মর্ মানুচ্ ইস্রায়েলীয়গুনোরে ভান্ন্যেই পধেদি নেযেয়োন।

¹⁴ ইয়েন বাদেয়ো যিরূশালেম ভাববাদীগুনো ভিদিরে এ দর্‌গরেপারা বেপারান দেখ্যং, তারা সিনেলী গরন আর মিজে জিংকানি কাদান্। তারা অন্যেয়গুরিয়্যেগুনোর আঢ্‌তানি এমন দরমর গরন যিয়েনত্তে কনজনে সে পাজিগানিত্তুন ন-ফিরোন। তারা বেক্কুনে মইধু সদোম আর ঘমোরা মানুচ্চুনো ধোক্ক্যেন।‍‍‍‍‍‍‍‍‍‍‍‍

¹⁵ “সেনত্তে মুই বেগত্তুন্ খেমতাবলা লগেপ্রভুর ভাববাদীগুনো পৌইদ্যেনে কঙর্, মুই তারারে তিদে হানা আর বিষবলা পানি হাবেম, কিত্তে যিরূশালেমর ভাববাদীগুনো ইত্তুন গোজেন উগুরে ভোক্তিনেইয়্যে বেক্ দেজ্‌চান ছিদি যেইয়্যে‍‍‍‍‍‍‍।”

¹⁶ বেগত্তুন খেমতাবলা লগেপ্রভু কোইয়্যেদে, “ভাববাদীগুনে যে কধা কদন সিয়েনি তুমি ন-শুন্য; তারা তমা মনত্ মিজে আশা জাগেয়োন। তারা লগেপ্রভুর মুয়োত্তুন শুনিনে কধা ন-কন বরং নিজোর মনেমনজক্কা দর্শনর কধা কন।

¹⁷ যিগুনে মরে ঈচ্ গরন তারা ইধু সেই ভাববাদীগুনে এ কধাগান কন, ‘লগেপ্রভু কোইয়্যেদে, তমার শান্তি অবঅ’; আর যিগুনে নিজোর মন একগেয়েমীলোই চলন তারা তারারে কন, ‘তমার কনঅ দযা ন-অবঅ।’

¹⁸ মাত্তর্ তারা ভিদিরেত্তুন কন্না মঅ কধানি শুনিবার আর বুঝিবাত্তে মঅ মুজুঙোত্ থিয়্যেইয়্যে? কন্না মঅ কধানি কান পাত্যে বা সিয়েনি মনযোগ দিয়্যে?

¹⁹ চঅ, মঅ রাগ্‌কান ঝড় ধোক্ক্যেন ফাদি পুরিবো আর পাজিগুনো মাঢা উগুরে ঘুরি ঘুরি পড়িবো টুত্যেবোইয়্যের ধোক্ক্যেন।

²⁰ মঅ রাগ্‌‌‌কান মঅ মনান নাঙে ভর্‌পুনং ন-অনা সং ফিরি ন-যেবঅ। তুমি আগামীদি সিয়েন গমেডালে বুঝি পারিবে।‌

²¹ এই ভাববাদীগুনোরে মুই ন-পাদাং, তো তারা আওজ্ গুরিনে তারার হবরান মানুচ্চুনোরে জানেয়োন; মুই তারারে কনঅ কধা ন-কং, তো তারা কধা কোইয়োন।

²² মাত্তর্ তারা যুনি মঅ মুজুঙোত্ থিয়্যেদাক, সালে মঅ মানুচ্চুনো ইধু তারা মঅ কধানি ফগদাং গুরিদাক্ আর ভান্ন্যেই পথ আর ভান্ন্যেই কামত্তুন্ তারারে ফিরেদাক্।”

²³ লগেপ্রভু কোইয়্যেদে, “মুই কি বানা কায়-কুরে গোজেন, দূরোর গোজেন নয়?

²⁴ কনজনে কি এমন গুমুরো জাগাত্ লুগেই পারে যিয়েনত্ মুই তারে ন-দেগং? মুই কি স্বর্গ আর পিত্‌‌‌‌থিমীর বেক্ জাগায়ানত্ ন-থাং‌?”

²⁵ যিদুক্কুন ভাববাদী মঅ নাঙে মিজে কধা কন তারা কধা মুই শুন্যং। তারা কন্দে, মুই এক্কান স্ববন দেখ্যং, এক্কান স্ববন দেখ্যং।

²⁶ আর কয়দিন এই ভাববাদীগুনে তারার মনর্ মিজেত্তুন মিজে কধা কবাক্?

²⁷ তারা মনে গরন যেবাবোত্যেগুরি তারার পুরোণি মানুচ্চুনে বাল দেবেদার পূজো গুরিনে মঅ নাঙান ভুলি যেইয়োন সেবাবোত্যে গুরিনে তারার যেদক্কানি স্ববনর কধা তারা বেক্কুনো কন্ সিয়েনিলোই তারা মঅ মানুচ্চুনোরে মঅ নাঙান ভুলেই দিবাক্।

²⁸ যে ভাববাদীবো স্ববন দেখ্যে তে তার স্ববনর্ কধা স্ববন ইজেবে কোক্, মাত্তর্ যে মঅ কধানি পেইয়্যে তে সিয়েন বিশ্বেজর্ লগে কোক্; কিত্তে শোজ্য ইধু খেড়র কনঅ দাম নেই।

²⁹ মঅ কধানি কি আগুনো ধোক্ক্যেন নয়? যে আদুরোবোলোই পাত্তর্‌বোরে কট্টা কট্টা গুরি মঅ কধানি কি সে আদুরোবো ধোক্ক্যেন নয়?‌

³⁰ “সেনত্তে যে ভাববাদীগুনে অন্যগুনোত্তুন্ মঅ কধানি চুর্ গরন মুই তারা বিরুদ্ধে।

³¹ অয়, মুই সেই ভাববাদিগুনো বিরুদ্ধে যিগুনে নিজো জিলান লারান আর ফগদাং গরন, ‘লগেপ্রভু কোইয়্যেদে।’

³² ঘেচ্চেকগুরি মুই সেই ভাববাদীগুনো বিরুদ্ধে যিগুনে মিজে স্ববনর্ কধা কন। তারা সিয়েনি কন্ আর তারার বাড়্‌বো গোজ্যে মিজে কধালোই মঅ মানুচ্চুনোরে ভান্ন্যেই পধেদি নেযান। মাত্তর্ মুই তারারে ন-পাদাং বা উগুমঅ ন-দুয়োং। তারা এ মানুচ্চুনোরে এ শোস্যবিজিয়ো উপকার গুরি ন-পারন। মুই লগেপ্রভু এ কধাগান কঙর্।”

ঠগ্ ভাববাদীগুন আর তারার মিজে কধানি

³³ লগেপ্রভু মরে কলঅ, এ মানুচ্চুনে বা কনঅ ভাববাদী বা ধর্মগুরু যেক্কে তরে পুযোর্ গুরিবো, লগেপ্রভুর কধানি কি? সেক্কে তুই তারারে কবে, লগেপ্রভু কোইয়্যেদে, তুমি মর্ বোঝা বুধি আর মুই তমারে ফেলেই দিম।

³⁴ যুনি কনঅ ভাববাদী বা ধর্মগুরু বা অন্য কনজনে দাবি গরন, লগেপ্রভুর কধাগান ইয়েন, মাত্তর্ মুই সেই মানুচ্চো আর তা গিরিবোরে সাজা দিম।

³⁵ “ও মর্ মানুচ্চুন, তুমি পত্তিজনে যেন তমা সমাজ্যে বা কুদুম্মোরে পুযোর্ গরঅ, ‘লগেপ্রভু কি জোব্ দিয়্যে?’ বা ‘লগেপ্রভু কি কোইয়্যে?’

³⁶ মাত্তর্ তুমি যেন আর কনদিন্‌অ ন-কঅ, ‘লগেপ্রভুর কধাগান ইয়েন,’ কিত্তে পত্তি মানুচ্ নিজোর কধানরে গোজেনর কধা বানায়। এবাবোত্যেগুরি তুমি জেদা গোজেনর, তমা বেগত্তুন খেমতাবলা লগেপ্রভুর কধানি বেঙা গরঅ।”

³⁷ সে পরেদি লগেপ্রভু মরে কলঅ, যেক্কে তারা ভিদিরে কনজনে ভাববাদী ইজেবে কধা কন তারে পুযোর্ গরঅ, তমা ইধু লগেপ্রভু কি জোব্ দিয়্যে? বা লগেপ্রভু কি কোইয়্যে?

³⁸ “ও মর্ মানুচ্চুন, যুনি তুমি মঅ কধানি অমান্য গুরিনে দাবি গরঅ, ‘লগপ্রভুর কধানি ইয়েন,’

³⁹ সালে মুই ঘেচ্চেকগুরি মঅ মুজুঙেত্তুন তমারে তুলি নিইনে মেলা মারি দিম আর যে শঅরান্ মুই তমারে আর তমা পুরোণিমানুচ্চুনোরে দুয়োং সেই শঅরানরেয়ো মঅ মুজুঙেত্তুন মেলা মারি দিম।

⁴⁰ মুই তমা উগুরে উমরত্তে অগমান আর লাজত্ ফেলেম যিয়েন মান্‌‌জ্যে ভুলি ন-যেবাক্।”