যিরমিয় 20 - Chakma Bible

যিরমিয় আর পশ্‌হূর

¹ যিরমিয় যেক্কে ভাববাদী ইজেবে এই বেক্ কধানি কোইয়্যে সেক্কে লগেপ্রভুর ঘরর্ আজল্ কামগুরিয়্যে ইম্মেরর পুয়ো ধর্মগুরু পশ্‌হূরে সে কধাগান শুনিলো।

² তে ভাববাদী যিরমিয়রে পিদিনে লগেপ্রভুর ঘর কুরে অজল্ জাগায়ানত্ বিন্যামীন-গেদো কুরে মোয়্যে কুদোবোত্ বানি রাগেল।

³ তার কেল্যে পশ্‌হূরে সেই বান্যেগানত্তুন্ যিরমিয়রে খুলি আনিলো। সেক্কে যিরমিয় তারে কলঅ, “লগেপ্রভুর দিয়্যে তঅ নাঙান পশ্‌হূর নয় বরং মাগোর-মিষাবীব (যিয়েনর্ ভেদ্‌তান্ ‘চেরোকিত্তে অমকদ দর্’),

⁴ কিত্তে লগেপ্রভু কোইয়্যেদে, ‘মুই তরে তর্ নিজোর আর তঅ সমাজ্যেগুনো ইধু অমকদ দর্‌গরেপারা গুরিম। তুই নিজো চোগেদি যুদ্ধোত্ শত্রুগুনো আঢত্ তারারে মুরি যেবাত্তে দেগিবে। বেক্ যিহূদাগুনোরে মুই বাবিলো রাজা আঢত্ তুলি দিম। তে তারাত্তুন ভালোক্কুনোরে বাবিলোত্ নেযেব আর বাদবাগি মানুচ্চুনোরে মারে ফেলেব।‌

⁵ মুই এ শঅরর্ বেক ধন-সোম্বোত্তিগানি, অত্তাৎ তারার খেদর্ শোজ্য আর মংগা মংগা জিনিস আর যিহূদার রাজাগুনোর বেক্ ধনভান্ডালুন্ তারার শত্রুগুনো আঢত্ তুলি দিম। তারা সিগুন লুদেইনে বাবিলোত্ নেযেবাক্।

⁶ আর ও পশ্‌হূর, তরে আর তঅ ঘরর বেক্কুনোরে বন্দী গুরি বাবিলোত্ নেযা অবঅ। সিদু তুই মুরিবে আর তরে গোর্ দিয়্যে অবঅ; তর্ যিদুক্কুন সমাজ্যে ইধু তুই ভাববাদী ইজেবে কধা কবার অক্তত্ মিজে কধা কোইয়োচ্ তারার বেক্কুনোর এক্কুই দযা অবঅ।’ ”

যিরমিয়র আবিত্তি

⁷ ও লগেপ্রভু, তুই মরে ভুলেয়োচ্ বিলিনে মর্ এ অবস্থা ওইয়্যে; তুই মত্তুন বেশ্ খেমতাবলা বিলিনে তুই জিত্যস্। মুই সারা দিন ঈচ্ গরা হেইয়্যে মানুচ্ ওইয়োং; বেক্কুনে মরে ঈচ্ গরন।

⁸ যেদকবার মুই কধা কং সেদকবার অমকদ খেতি গরানা আর ভস্ত অনার্ কধা রঅ ছাড়িনে ফগদাং গরং। সেনত্তে লগেপ্রভুর কধানিত্তে সারা দিন মত্তুন অগমান আর অমকদ ইংসে গরা অয়।

⁹ মাত্তর্ যুনি মুই কং, “মুই তা কধাগান কোই ন-দিম বা তা নাঙান ধুরিনে আর কিচ্চু ন-কোম্,” মাত্তর্ তা কধাগান মঅ মনত্ যেন জোল্‌‌জোল্যে আগুন ওইনে আড় ভিদিরে বন্ধ ওই থায়। মুই সিয়েন ভিদিরে রাগাদে রাগাদে বল্‌‌পোজ্যে ওই পড়ং; ঘেচ্চেকগুরি মুই আর সিয়েনি ভিদিরে রাগেই ন-পারং।‍‍‍

¹⁰ মঅ চেরোকিত্তেদি অমকদ দর্, কিত্তে মুই এ কধানি বোউত্ মানজ্যে চুবে চুবে গুরি কধে শুনোং, “তা নাঙে আবিত্তি গরঅ; আমি তা নাঙে আবিত্তি গুরিই।”‌‌‍‍ মর্ বেক সমাজ্যেগুনে ইয়েন কোইনে মুই বিজিদি যেবাত্তে বাজ্জেই আগন, “অয়ত আমি তারে ঠোগেই পারিবোং, আর সেক্কে আমি তা উগুরে জিদিবোং আর হেনা সুজিবোং।”

¹¹ মাত্তর্ লগেপ্রভু খেমতাবলা যোদ্ধা ধোক্ক্যেন মঅ লগে লগে আঘে, সেনত্তে মঅ অত্যেচারিগুনে উজোত্ হেবাক্ আর ন-জিদিবাক। তারা বিফল অবাক্ আর লাজত্ পড়িবাক; তারার অসর্মানান কনজনে ভুলি ন-যেবাক্।

¹² ও বেগত্তুন্ খেমতাবলা লগেপ্রভু, তুই দঅ গম্ মানুচ্চুনোরে যগা চাজ্ আর বেক্কুনোর মনানি আর মন কধানি হবর্ পাজ। মঅ শত্রুগুনো উগুরে তর্ হেনা সুজোনা মরে চেবাত্তে দে, কিত্তে মুই মঅ আবিত্তিগান তরে জানেয়োং।

¹³ তুমি লগেপ্রভুর নাঙে গীদ্ গঅ। লগেপ্রভুরে বাঈনী গরঅ। তে পাজিগুনোর আঢত্তুন্ অভাবীগুনোর পরাণানি উদ্ধোর গরে।

¹⁴ মুই যেদিন্ন্যে জোর্মেয়োং সেদিন্নো অভিশাব্ পোড়োক্। যেদিন্ন্যে মঅ মাবো মরে জর্ম দিয়্যে সেদিন্নো বর্ ন-পেইয়্যে ওক্।

¹⁵ “তর্ এক্কো পুয়ো ওইয়্যে,” এ হবরান দিইনে যে মঅ বাপ্‌‌পোরে হুজি গোজ্যে তে অভিশাব্ পোক্।

¹⁶ লগেপ্রভু মেয়্যে ন-গুরিনে যেদক্কানি শঅরর্ সর্বনাশ গোজ্যে সে মানুচ্চো সিগুনো ধোক্ক্যেন ওক্। তে বেন্যেমাদান্ কানাকুদির্ রঅ শুনোক্ আর দিবুজ্যে শুনোদোক্ দযার্ রঅ;

¹⁷ কিত্তে মা-পেদত্ থাগদে তে মরে মারে ন-ফেলায়। সেক্কে মঅ মাবো মর্ গোর্ অদঅ, আর তা পেট্‌তো জিংকানিবর্ দাঙর্ ওইনে থেদঅ।‌

¹⁸ কষ্ট আর দুঘ্ দেগিবাত্তে আর লাজে মঅ জিংকানিগান কাদেবাত্তে কিত্তে মুই পেদ ভিদিরেত্তুন্ নিগিলি এলুং?