যিরমিয় 15 - Chakma Bible

¹ সেক্কে লগেপ্রভু মরে কলঅ, “মোশি আর শমূয়েলেয়ো যুনি মঅ মুজুঙোত্ এইনে থিয়্যেই তো মঅ মনান এ মানুচ্চুনোত্তে নরম ন-অবঅ। মঅ মুজুঙোত্তুন তুই ইগুনোরে বিদেয় গর্; তারা যাদোক্কোই।

² আর যুনি তারা তরে পুযোর্ গরন, ‘আমার কি অবঅ?’ সালে তারারে কবে, ‘লগেপ্রভু এ কধাগান কোইয়্যেদে, মরণত্তে যিগুনে ঠিগ্ ওই আগন তারার মরণ অবঅ; তলোয়ারত্তে যিগুনে ঠিগ্ ওই আগন তারা যুদ্ধোত্ মুরি যেবাক্; ভাদরাদত্যে যিগুনে ঠিগ্ ওই আঘন্ তারা ভাদরাদত্যে মুরি যেবাক্; আর বন্দী অবাত্তে যিগুনে ঠিগ্ ওই আগন তারা বন্দী অবাক্।’ ”

³ লগেপ্রভু কোইয়্যেদে, মুই তারা বিরুদ্ধে চের্ বাবোত্যে ভস্তগুরিয়্যেরে পাধেই দিম। সিয়েনি অলঅ, মারে ফেলেবাত্তে তলোয়ার, টানি লোই যেবাত্তে কুগুর, হেই ফেলেবাত্তে আর ভস্ত গুরিবাত্তে আগাজর্ পেগ আর ঝার য়েমান।

⁴ যিহূদার রাজা হিষ্কিয়র পুয়ো মনঃশি যিরূশালেমত্ যিয়েনি গোজ্যে সিয়েনিত্তে মুই যে সাজা দিম্ সিয়েন দেগিনে পিত্‌থিমীর বেক রেজ্যর মানুচ্চুনে দোরেবাক্।‍

⁵ “ও যিরূশালেম, কন্না তঅ উগুরে দোয়্যে গুরিবো? কন্না তঅ উগুরে আবিলেচ্ গুরিবো? তুই কেজান আগচ্ সিয়েন পুযোর্ গুরিবাত্তে কন্না এবঅ?

⁶ মুই লগেপ্রভু কঙর্, তুই মরে ছাড়ি যেইয়োচ্, তুই উগুদো পধেদি যেইয়োচ্। সেনত্তে মুই তইন্দি আত্ বাবেইনে তরে ভস্ত গুরিম; মুই আর মেয়্যে গুরি ন-পারং।

⁷ দেজর শঅর-গেদো ইধু মুই কুলোত্ গুরিনে তঅ মানুচ্চুনোরে ঝারিম। মঅ মানুচ্চুনো উগুরে মুই পুয়ো-ছা মরানার দুঘ্ আনিম আর তারারে ভস্ত গুরিম, কিত্তে নিজো পথ্‌‍তানিত্তুন তারা ন-ফিরোন্।‍

⁸ তারার রানিমিলেগুন মুই সাগর বালুত্‌তুন্‌‍‍অ বেশ্ গুরিম। তুই দঅ যোদ্ধাগুনোর মা, তঅ মানুচ্চনো বিরুদ্ধে দ্বিবুজ্যে অক্তত্ মুই এক্কো ভস্তগুরিয়্যেরে আনিম; মুই তারা উগুরে আদিক্ক্যেনেগুরি পীড়ে আর দর্‌বুক আনিম।‍‍

⁹ সাত্‌‍তো পুয়ো-ছার্ মা বল্‌পোজ্যে ওইনে লাজে আর অগমান অবস্থায় শেজ্ নিজেস্ ফেলেবাক। সময় থাগদে তা জিংকানির বেলান ডুবি যেবঅ। যিগুনে বাঁজি থেবাক্ তারারেয়ো মুই শত্রুগুনোরে তলোয়ার মুজুঙোত্ দিম।‍‍‍ মুই লগেপ্রভু এ কধাগান কঙর্।”

¹⁰ হায়! হায়! মর্ মাবো, তুই কিত্তে মরে জর্ম দুয়োচ্, যিবে লগে গোদা দেজ্‌চানে কোল্-কোজ্যে আর লড়াই গরে? মুই উদোর্ ন-দুয়োং বা কনজনে মরে উদোর্‌‌‌অ ন-দুয়োন, তো বেক্কুনে মরে অভিশাব দুয়োন।

¹¹ লগেপ্রভু কলঅ, এক্কান ভালেদির আশায় মুই ঘেচ্চেকগুরি তরে রেহাই দিম। মুই এমন অবস্থা সৃষ্টি গুরিম যিয়েনত্তে দজা আর দুদ্দজার সময়োত্ তঅ শত্রুগুনে কামাক্কায় তইধু এইনে কোজোলি গুরিবাক্।‌‌

¹² “কনঅ মান্‌‌‌‌জ্যে কি উত্তোর্ দেজর লুয়ো বা পিদোল্ ভাঙি ফেলেই পারে?

¹³ ও যিহূদা, পুরো দেজ ভিদিরে তর্ বেক পাপ্পানিত্তে মুই তর্ ধন আর ধনভান্ডালর পযাপিরানি মাগানা লুদেয়্যে মাল্ ইজেবে দিম। ‌‌‌

¹⁴ যে দেজর্ কধা তুই হবর্ ন-পাজ সে দেজত্ মুই তরে তঅ শত্রুগুনোর চাগর্ বানেম, কিত্তে মঅ রাগর্ আগুনান জুলি উদিনে তঅ উগুরে জুলিবো।”

¹⁵ ও লগেপ্রভু, তুই দঅ বেক্কানি হবর্ পাজ্; সেনত্তে মঅ কধানি ইদোত্ তুল্ আর মঅ উগুরে মনযোগ দে। মঅ অত্যেচারীগুনো উগুরে তুয়ই হেনা সুজ্। তুই দঅ তারা উগুরে বোউত্ ধোজ্য ধুরি থাচ্, মাত্তর্ সেনত্তে তারা আঢত্ তুই মরে ভস্ত অবাত্তে ন-দিচ্; ইদোত্ তুলি চাহ্, মুই তত্তে কিবাবোত্যে ঈচ্ গরানা সোজ্য গোজ্যং।

¹⁶ তঅ কধানি ফগদাং অলে পরেদি মুই সিয়েনি মনত্ গুজি ললুং; সে কধানি এলদে হুজির্ আর মঅ মনর্ সুগ, কিত্তে ও বেগত্তুন্ খেমতাবলা গোজেন লগেপ্রভু, মুই দঅ তরই।

¹⁷ যিগুনে রঅ ছাড়িনে মদ হান্ মুই কনদিন্‌অ তারা দলত্ ন-বজং, তারা লগে কনদিন্‌অ ফুত্তি ন-গরং; তঅ আঢ্‌তান মঅ উগুরে এলঅ বিলিনে মুই গায়গায় বুয়োই থেদুং আর তুই মরে রাগে ভর্‌‌‌পুনং গোজ্যস্।

¹⁸ কিত্তে মর্ পীড়ের্ শেজ্ নেই, কিত্তে মঅ ঘাগান গম্ ন-অয়, কিত্তে সিয়েন সারা ন-যায়? তুই কি মইধু মিজে গঙার্ আর কানক্কন্ন্যে পয়নালা পানি ধোক্ক্যেন অবে?

¹⁹ সেক্কে লগেপ্রভু কলঅ, “তুই যুনি মনান্ ফিরাজ সালে মুই তরে আগ অবস্থাত্ ফিরেই আনিম যেনে তুই মরে সেবা গুরি পারচ্; যুনি তুই বাজে কধা ন-কোইনে মূল্যবান কধা কচ্ সালে তুই মর্ মুয়োন ওইনে কধা কবে। এ মানুচ্চুনে তন্দি ফিরোদোক্, মাত্তর্ তুই তারা ইন্দি ন-ফিরিবে।

²⁰ এ মানুচ্চুনো ইধু মুই তরে পিদোলর্ এক্কো দরমর দেবাল ধোক্ক্যেন গুরিম; তারা তঅ বিরুদ্ধে যুদ্ধো গুরিবাক মাত্তর্ তরে ওদেই দি ন-পারিবাক্, কিত্তে মুই লগেপ্রভু কঙর্, তরে উদ্ধোর গুরিবাত্তে আর বাজেবাত্তে মুই তঅ লগে লগে থেম্।

²¹ মুই তরে পাজিগুনোর আঢত্তুন রোক্ষ্যে গুরিম আর চিৎকলিজে নেইয়্যেগুনোর মুদোত্তুন উদ্ধোর্ গুরিম।”