বিচের গুরিয়্যেগুন 5 - Chakma Bible1 সেদিন্যে দবোরা আর অবীনোয়মর পূঅ বারকে এ গান্নো গেলাক্: 2 ইস্রায়েলর নেতাগুনে যুদ্ধোত্ মানুচ্চুনোরে পরিচালনা গোজ্যন্, আর মানুচ্চুনেয়ো নিজোর্ আওজে উজেই গেলাক্। লগেপ্রভুর বাঈনী ওক্ 3 ও রাজাগুন, তুমি শুনো; ও শাজন্ গুরিয়্যেগুন, তুমি শুনো; মুই লগেপ্রভুর নাঙে গান গেইম্, ইস্রায়েলর গোজেন লগেপ্রভুর নাঙে নাঙ্ গিনেদে-গান গেইম্। 4 ও লগেপ্রভু, তুই যেক্কে সেয়ীরত্তুন্ যাহ্ ধুরিলে, ইদোম দেজত্তুন্ নিগিলি গেলে, সেক্কে পিত্থিমীগান গির্গিরে উদিলো আর আগাজত্তুন্ মেঘ্কানে পানি ঢালি দিলো। 5 সেক্কে লগেপ্রভুর মুজুঙোত্ মোন্-মুড়োগুন্ গির্গিরে উদিলাক্, ইস্রায়েলর গোজেন লগেপ্রভুর মুজুঙোত্ সিনাই মুড়োবো গির্গিরে উদিলো। 6 অনাতর পূঅ শম্গর আর যায়েলর সময়োত্ উজু পথ্তান্ বাদ দিইনে আদিয়্যেগুনে ঘুরেইয়্যে পদেন্দি আদিদাক্। 7 সেক্কে ইস্রায়েলীয়গুনোর আদামত্ কনজনে বজত্তি ন-গুরিদাক্; যেদকদিন সং মুই দবোরা ইস্রায়েলীয়গুনোর মা গুনো-ধোক্কেন্ ন-অলুং, সেদকদিন সং তারার্ আদামানিত্ মানুচ্ ন-এলাক্। 8 তারা যেক্কে নূয়ো দেব-দেবেদার ইন্দি মনান্ দিলাক্ সেক্কে তারার্ শঅরর-গেদো দোরানত্ যুদ্ধো অলঅ। চোল্লিশ আজার ইস্রায়েলীয়োর আঢেত্ এক্কান আন্দল দিবারঅ ন-এলঅ, এক্কো সেলঅ ন-এলঅ। 9 মঅ মনান্ গেলগোই ইস্রায়েলর সেই মুরুব্বীগুনো ইদু যিগুনে নিজোর্ আওজে যুদ্ধো গুরিবাত্তে গেলাক্।; লগেপ্রভুর বাঈনী ওক্ 10 তুমি যিগুনে ধুব্ গাধীগুনো উগুরে চড়িনে আর কম্বলর গদি উগুরে বুজিনে পথ্তানন্দি যর্, তুমি এ বিষয়ানিলোই গান গঅ। 11 শুনো, পানি তুলেদে জাগায়ানত্ মানুচ্চুনে কুয়ো-কি গত্তন্; তারা ইস্রায়েল আদামর মানুচ্চুনোত্ত্যে লগেপ্রভুর উদ্ধোর-কামর কধানি কদন্। ইয়েনি শুনিনে লগেপ্রভুর মানুচ্চুনে শঅরর দোরানর্ কায়-কুরে গেলাক্। 12 জাগি উদ দবোরা, জাগি উদ জাগি উদ, জাগি উদ, গান গাহ্। ও অবীনোয়মর পূঅ বারক, উদ; যুদ্ধোত্ যিগুনে ধরা পোজ্যন তারারে নেযাহ্। 13 সে পরেন্দি বাঁজি থেইয়্যে মানুচ্চুনে মুরুব্বী গুজুরোর্ মানুচ্চুনো ইদু এলাক্; লগেপ্রভুর মানুচ্চুনে যুদ্ধো গুরিবাত্তে মইদু এলাক্। 14 কিজু মানুচ্ এলাক্ ইফ্রয়িমত্তুন্ যিয়েনত্ অমালেকীয়গুনে বজত্তি গুরিদাক্; তারা আজল্ বিন্যামীন-গুট্টির মানুচ্চুনোর পিজেন্দি। মাখীরত্তুন্ নেতাগুনে এলাক্, আর সবূলূনত্তুন্ শাজন্গুরিয়্যেগুনে এলাক্ লুদিক্ আঢত্ লোইনে। 15 ইষাখরর সেনাপতিগুনে দবোরার সমারে গেলাক্।; ইষাখরর মানুচ্চুনে ধাবা দিইনে তলে জাগায়ানিত লামি গেলাক্। বারকর পিজে পিজে। রূবেণর সৈন্যদলুনে দরমর গুরিনে মনান্ ঠিগ্ গুরিলাক্। 16 ও রূবেণর মানুচ্চুন, কিত্তে তুমি ভেড়া ছাগল ঘরর দ্বিয়েনর সংমধ্যে বোই এলা তুমি কি গরক্কুনোর বাঁশি শুনিবাত্তে চেইয়ো রূবেণর সৈন্যদলুনো ভিদিরে অমকদ কধালোই মিলেমিলি ন-অলঅ। 17 গিলিয়দর মানুচ্চুনে থেলাক্। যর্দনর উইকুলোত্। দান-গুট্টিগুনে কিত্তেই থেলাক্। জাহাজছানর্ ইদু আশের-গুট্টির মানুচ্চুনে বড়গাঙর পারত্ থেলাক্।; তারা জাহাজ ঘাদর্ কায়-কুরেই থেলাক্। 18 যুদ্ধোত্ সবূলূনোর মানুচ্চুনে জীংকানিরে বাঝি ধুরিলাক্; যুদ্ধোর মাদত্ অজল্ জাগায়ানিত্ নপ্তালির মানুচ্চুনেয়ো জীংকানিগানরে বাঝি ধুরিলাক্। 19 রাজাগুনে, কনানর রাজাগুনে এইনে যুদ্ধো গুরিলাক্; মগিদ্দোর পানির কায়-কুরে তানকত্ তারা যুদ্ধো গুরিলাক্, মাত্তর্ কনঅ্ রূবো তারা লুদেইনে নি ন-পারিলাক্। 20 আগাজত্তুন্ তারাগুনে যুদ্ধো গুরিলাক্, নিজোর নিজোর বান্যে পধত্তুন্ যুদ্ধো গুরিলাক্ সীষরার বিরুদ্ধে। 21 সে পূরোণ্কালর গাঙর্ পানিগানে, সে কীশোন গাঙর্ পানিগানে শত্রুগুনোরে ভাজেই নেযেল। ও মর্ মনান্, দর মর ওইনে উজেই যাহ্। 22 সে পরেন্দি মাদিগান গির্গিরেই উদিলো ঘোড়ার টুক্কুনোত্ ঘা ওইনে আর বোলীবন্দ ঘোড়াগুনে আদিলাক্ খট্-খটা-খট্ গুরিনে। 23 লগেপ্রভুর দূত্তো কলঅ, মেরোসরে অভিশাব দে, জদবদেগুরিনে অভিশাব দে সে জাগার মানুচ্চুনোরে; তারা কনজনে যুদ্ধোত্ লগেপ্রভু লগে ন-মিজেন্, ন-মিজেন্দোই বোলীবন্দগুনোর বিরুদ্ধে। 24 কেনীয় হেবরর মোক্ যায়েলে ভাগ্যত্ত্যা, ভাগ্যত্ত্যা তে মিলেগুনো ভিদিরেত্তুন্; তে তাম্বুলোত্ থেইয়্যে মিলেগুনো ভিদিরেত্তুন্ ভাগ্যত্ত্যা। 25 সীষরা পানি মাগিলে তে তারে আনি দিলো দুধ; দোল্ কদরালোই আনি দিলো ভোস্যে দুধ। 26 পরেন্দি তে আঢত্ নেযেল তাম্বুল বানিবার দুড়িগান্, আর ডেন্ আঢন্দি ধুরিলো কামারর্ মাত্তুল; তে সীষরারে আঘাত গুরিনে তা মাদাবো ফাদি দিলো আর কবালত্ বানি দিলো সে দুড়িগান্। 27 তা টেঙর্ কায়-কুরে সীষরা পড়িলো আর যিয়েনত্ পড়িলো সিয়েনত্ তে পড়ি রলঅ; তা টেঙানর্ কায়-কুরে যিয়েনত্ তে পোজ্যে সিয়োদোই তে মুরি গেলঅ। 28 সীষরার মাবো জানালান্দি চেইনে দেগিলো, কানাগুনোর পিজেন্দিত্তুন্ তে রঅ ছাড়িনে কলঅ, “তা রথ্তান এত্তে কিত্তেই এদক্ দেরী অর্ তা রথ্তানর চাক্কাগুনোর্ রঅগুন্ কিত্তেই এজঅ শুনো ন-যার্” 29 তার বুদ্ধিবলা সমাজ্যেগুনে ইয়েনর জোব্ দিলাক্; তেয়ো মনে মনে কুয়ো ধুরিলো, 30 “হামাক্কাই তারা লুদেয়্যে জিনিস পেইয়োন্ আর ভাগা-ভাগি গত্তন্ নিজো ভিদিরে; পত্তি মরদত্তেই এক্কো বা দ্বিবেদ্দরে মিলে আর সীষরাত্তে রাঙা কাবড়-চুগোর্, ফুল্বলা রাঙা কাবড়-চুগোর্, গত্তনাবোর্ চেরোকিত্তে দোল্ গুরিনে ফুল তুল্যে কাবড়-চুগোর- ইয়েনিই কি তারা লুদেনেই ন-পান” 31 ও লগেপ্রভু, তর্ শত্রুগুনে বেক্কুনে এধোক্কেন্ গুরিনে শেজ্ ওই যাদোক্; মাত্তর্ যিগুনে তরে কোচ্পান তারা যেনে বেলান ধোক্কেন্ পহ্র ওই উদোন্। ইয়েনর্ পরেন্দি দেজত্ চোল্লিশ বজর সং সুখ-শান্দি এলঅ। |
Copyright © 2021 Bangladesh Bible Society
Bangladesh Bible Society