বিচের গুরিয়্যেগুন 4 - Chakma Bibleদবোরা 1 এহূদে মুরিবার পরেন্দি ইস্রায়েলীয়গুনে আরঅ লগেপ্রভুর চোগেন্দি যিয়েনি ভাজ্ন্যেই সিয়েনি গরা ধুরিলাক্। 2 সেনত্তেই লগেপ্রভু যাবীন নাঙে এক্কো কনানীয় রাজার আঢত্ তারারে তুলি দিলো। যাবীনে হাৎসোরত্ থেইনে রাজাগিরি গুরিদো। তা সেনাপতিবোর নাঙান্ অলঅ সীষরা। তে হরোশৎ-হগোয়িম নাঙে এক্কান্ জাগাত্ থেদঅ। 3 যাবীনোর নয়শঅ লুয়োর রথ এলঅ আর তে কুড়ি বজর ধুরিনে ইস্রায়েলীয়গুনো উগুরে অমকদ অত্যেচার গুরি এজের্। সেনত্তেই ইস্রায়েলীয়গুনে লগেপ্রভু ইদু বল্ পেবাত্তে কানাকুদি গরা ধুরিলাক্। 4 সে সময়োত্ লপ্পীদোতর মোক্কো দবোরা এক্কো মিলে-ভাববাদী এলঅ। তেয়ই সেক্কে ইস্রায়েলীয়গুনোরে শাজন্ গুরিদো। 5 ইফ্রয়ীমোর মুড়োমুড়ি চাগালাত্ রামা আর বৈথেলর সংমোধ্যে এক্কান্ জাগাত্ দবোরা তা খাজোর গাজ্চুয়ো তলাত্ বুজিদো, আর ইস্রায়েলীয়গুনে নিজে কোল্-কোজ্যে বাজেইলে মীমাংসাত্তে তাইদু এদাক্। 6 তে নপ্তালি দেজর্ কেদশ শঅরত্তুন্ অবীনোয়মর পূঅ বারকরে ডাগিনে পাদেল আহ্ তারে কলঅ, “ইস্রায়েলীয়গুনোর গোজেন লগেপ্রভু তরে এ উগুমান দের্, ‘তুই নপ্তালি আর সবূলূন-গুট্টিত্তুন্ দশ আজার মানুচ্ সমারে নেযা আর তাবোর মুড়োবো ইন্দি তারারে নেযা। 7 মুই যাবীনোর সেনাপতি সীষরারে তার সৈন্যদল আর রথ সুদ্ধো কীশোন গাঙর্ ইদু নেযেম্ আর তোমা আঢত্ তারারে তুলি দিম্।’” 8 বারকে দবোরারে কলদে, “তুই যুনি মঅ লগে যাচ্ সালেই মুইয়ো যেম্, সিয়েন ন-অলে মুই ন-যেম্।” 9 দবোরা কলদে, ঠিগ্ আঘে, মুই তমা লগে যেম্, মাত্তর্ এ যুদ্ধোত্ জিদিবার বাঈনীগান্ তুই ন-পেবে, কিত্যে লগেপ্রভু এক্কো মিলে আঢত্ সীষরারে তুলি দিবো। এ কধাগান কোইনে দবোরা বারকর লগে কেদশত্ গেলঅ। 10 বারকে সিদু সবূলূন আর নপ্তালি-গুট্টির মানুচ্চুনোরে ডাগিলো। সেক্কে দশ আজার মানুচ্ তা সমারে গেলাক্। আর দবোরায়ো তা সমারে গেলঅ। 11 ইয়েনর্ আগেন্দি হেবর নাঙে এক্কো কেনীয় অন্য কেনীয়গুনোর, অত্তাৎ মোশির শোর্বো হোববর গুট্টিগুনোরে ছাড়িনে কেদশর ইদু সানন্নীমোর এলোন গাজর কায় কুরে তা তাম্বুলান ফেলেয়্যে। 12-13 যেক্কে সীষরা এ হবরান্ পেলঅ, অবীনোয়মর পূঅ বারকে তাবোর মুড়োবোত্ উঠ্যেগোই সেক্কে তে তার নয়শঅ লুয়োর রথ আর তার বেক্ মানুচ্চুনোরে এগত্তর্ গুরি নেযেইনে হরোশৎ-হগোয়িমত্তুন্ কীশোন গাঙর্ পারত্ গেলঅ। 14 সেক্কে দবোরা বারকরে কলদে, “তুই উজেই যাহ্, লগেপ্রভু এচ্ছ্যে সীষরারে তঅ আঢত্ তুলি দিলো। লগেপ্রভু দঅ তর্ আগে আগে যেইয়্যে।” সেক্কে বারকে তাবোর মুড়োবোত্তুন্ তলেন্দি লামিলো আর তা পিজে পিজে দশ আজার মানুচ্ গেলাক্। 15 বারকে যেক্কে আক্রমণ গুরিলো সেক্কে তা মুজুঙোত্ সীষরা আর তার্ বেক রথ্তানি আহ্ সৈন্যগুনোরে চিত্রিভংগ গুরি দিলো। সেক্কে সীষরা তার রথ্তান্ ফেলেইনে ধেই গেলঅ। 16 মাত্তর্ বারকে হরোশৎ-হগোয়িম সং তারার্ রথ্তানি আর সৈন্যদলর পিজেন্দি লোড়েই নেযেল। সীষরার বেক্ সৈন্যগুনোরে মারে ফেলেলাক্, একজনঅ বাগী ন-রলাক্। 17 সীষরা ধাবা ধেই যেইনে কেনীয় হেবরর মোক্কো যায়েলর তাম্বুলত্ যেইনে উদিলো, কিত্যে হাৎসোরর রাজা যাবীন আর কেনীয় হেবরর বংশগুনো ভিদিরে দাংগুত্ব এলঅ। 18 সীষরারে ডাগি আনিবাত্তে যায়েল তাম্বুলত্তুন্ নিগিলিনে তারে কলঅ, “ও মর্ প্রভু, আয়, ভিদিরে আয়; তুই ন-দোরেচ্।” সেনত্তেই সীষরা তা তাম্বুলানত্ চোমেল আর যায়েলে তারে কম্বললোই ঢাগি রাগেল। 19 সীষরা কলদে, “মর্ পানিখাচ্ গরের্, মরে এক্কানা পানি দে।” যায়েলে দুধ থবার্ চামর্ থৈল্যেবো খুলিনে তারে দুধ হেবাত্তে দিলো আর সে পরেন্দি আরঅ তারে নাঢি রাগেল। 20 পরেন্দি সীষরা তারে কলদে, “তুই তাম্বুলোর দোরানত্ ঠিয়্যেই থাক্। যুনি কনজনে এইনে পুজোর্ গরন্ ভিদিরে কন্না আঘে নাহি সালে তারে কবে, কনজন ‘নেই।’” 21 যেরেন্দি সীষরা অমকদ বল্পোজ্যে ওইনে সিদু ঘুমোত্ পড়িলো। এন্ সময়োত্ যায়েলে তাম্বুলোর এক্কো খুদো আর মাত্তুল্ নেযেল। সে পরেন্দি জুরো গুরিনে তাইদু যেইনে তা কবালানর এক ডাগেন্দি এন্গুরি খুদোবো ভোরেই দিলো, সিবে মাদি সং গেলঅ। সেক্কে সীষরা মুরি গেলঅ। 22 বারক সীষরারে থগাদে থগাদে সিদু যেইনে লুমিলো। সেক্কে যায়েলে তারে ডাগি আনিবাত্তে বারেন্দি নিগিলি এইনে কলঅ, “আয়, তুই যিবেরে থগর্ মুই তারে দেগেই দুয়োঙর্।” বারকে তা সমারে ভিদিরে যেইনে দেগিলো সীষরা মুড়িনে পড়ি আঘে আর তা কবালত্ তাম্বুলোর খুদোবো পুত্যে আঘে। 23 সেদিন্যে গোজেনে কনানীয় রাজা যাবীনরে ইস্রায়েলীয়গুনোর অধীনোত্ আনিলো। 24 তার বিরুদ্ধে ইস্রায়েলীয়গুনে দিন দিন আরঅ বোলী ওইনে উদো ধোজ্যন্ আর বেগঅ যেরেন্দি তারে শেজ্ গুরি ফেলেলাক্। |
Copyright © 2021 Bangladesh Bible Society
Bangladesh Bible Society