বিচের গুরিয়্যেগুন 10 - Chakma Bibleতোলয় 1 অবীমেলকর্ পরেন্দি তোলয় নাঙে ইষাখর-গুট্টির এক্কো মান্জ্যে ইস্রায়েলীয়গুনোরে রোক্ষ্যে গুরিবাত্তে এলঅ। তোলয়ে অলদে পূয়ার পূঅ আর দোদয়র নাদিন্। ইফ্রয়িমর মুড়ো-মুড়ি চাগালাত্ শামীরোত তে বজত্তি গুরিদো। 2 তে তেইশ বজর ইস্রায়েলীয়গুনোর শাজন্গুরিয়্যে এলঅ। সে পরেন্দি তে মুরি গেলঅ আর শামীরোত তারে গোর্ দিয়্যে অলঅ। যায়ীর 3 তোলয়র পরেন্দি গিলিয়দীয় চাগালাত্ যায়ীরে বেইশ বজর ইস্রায়েলীয়গুনোর শাজন্গুরিয়্যে এলঅ। 4 যায়ীরোর ত্রিশজন পূঅ এলাক্; তারা ত্রিশ্ছুয়ো গাধা উগুরে চড়িনে বেড়েদাক্। গিলিয়দর ত্রিশ্চান আদাম তারার আন্দারে এলঅ। এজঅ সে আদামানিরে হবোৎ-যায়ীর নাঙে কুয়ো অয়। 5 যায়ীরে মুরি যানার পরেন্দি তারে কামোনত্ গারা অলঅ। যিপ্তহ 6 সে পরেন্দি ইস্রায়েলীয়গুনে লগেপ্রভুর চোগোত্ যিয়েনি ভাজ্ন্যেই আরঅ সিয়েনি গরা ধুরিলাক্। তারা বাল দেবেদাগুনোরে আর অষ্টারোৎ দেবীগুনোর আহ্ অরামীয়, সীদোনীয়, মোয়াবীয়, অম্মোনীয় আর পলেষ্টীয়গুনোর দেব-দেবেদাগুনোরে পূজো গরা ধুরিলাক্। ইঙিরিনে ইস্রায়েলীয়গুনে লগেপ্রভুরে ছাড়ি গেলাক্ আর তারে সেবা ন-গুরিলাক্। 7 সেনত্তেই তে তারা উগুরে রাগে জুলি উদিলো আর পলেষ্টীয়, অম্মোনীয়গুনোর আঢত্ তারারে তুলি দিলো। 8 সেই বজরত্ তারা ইস্রায়েলীয়গুনোরে দুলিনে-বিযেই মারিলাক্। তারা যর্দনর পূগেন্দি ইমোরীয়গুনোর দেজত্ গিলিয়দত্ বজত্তিগুরিয়্যে ইস্রায়েলীয়গুনোরে আদার বজর সং দুখ্ লাগেয়োন। 9 যিহূদা, বিন্যামীন আর ইফ্রয়িম-গুট্টির মানুচ্চুনোর বিরুদ্ধে যুদ্ধো গুরিবাত্তে অম্মোনীয়গুনে যর্দন গাঙান্ পার ওই এলাক। সেক্কে ইস্রায়েলীয়গুনে অমহদ দুঘোত্ পড়িলাক্। 10 তারা লগেপ্রভুর ইদু কানাকুদি গুরিনে কলাক্, “আমা গোজেনরে ছাড়িনে বাল দেবেদাগুনোরে পূজো গুরিনে যদবদে আমি তঅ বিরুদ্ধে পাপ গোজ্যেই।” 11 জোবত্ লগেপ্রভু ইস্রায়েলীয়গুনোরে কলঅ, “মিসরীয়, ইমোরীয়, অম্মোনীয় আর পলেষ্টীয়গুনোর আঢত্তুন্ মুই কি তমারে উদ্ধোর ন-গরং? 12 যেক্কে সীদোনীয়, অমালেকীয় আর মায়োনীয়গুনোর অত্যাচারত্ তুমি বল্ পেবাত্তে মইদু কানাকুদি গোজ্য সেক্কে তারার আঢত্তুনঅ মুই তমারে উদ্ধোর গোজ্যং। 13 মাত্তর্ তুমি মরে ছাড়ি যেইনে দেবেদাগুনোরে পূজো গোজ্য, সেনত্তেই আর মুই তমারে উদ্ধোর গুরি ন-পারিম্। 14 যে দেব-দেবেদাগুনোরে তুমি বেই লোইয়ো তারার ইদু যেইনে কা ন গোই। দযার্ সময়োত্ তারা তমারে উদ্ধোর গুরিবাক্।” 15 মাত্তর্ ইস্রায়েলীয়গুনে লগেপ্রভুরে কলাক্, “আমি পাপ গোজ্যেই। তর্ যিয়েনি গম্ মনে গরচ্ আমা উগুরে সিয়েনোই গর্, মাত্তর্ দোয়্যে গুরিনে এবেরা তুই আমারে রোক্ষ্যে গর্।” 16 ইয়েনর্ পরেন্দি তারা ভিদিরে অন্য জাদ্তুনোর যিদুক্কুন দেব-দেবেদা এলাক্ সিগুনোরে দূর্ গুরি দিইনে তারা লগেপ্রভুরে সেবা গরা ধুরিলাক্। ইস্রায়েলীয়গুনোর দুঃখানি দেগিনেই লগেপ্রভুর মনত্ বুক্ ধিবেদিপ্যে অলঅ। 17 সে পরেন্দি যুদ্ধোত্ যেবাত্তে অম্মোনীয়গুনোর ডাক পড়িলো আর সেক্কে তারা যেইনে গিলিয়দত্ তাম্বুলান ফেলেলাক্। ইয়েনত্ ইস্রায়েলীয়গুনেয়ো এগত্তর্ ওইনে মিস্পাতদ যেইনে তারার তাম্বুলান ফেলেলাক্। 18 গিলিয়দর নেতাগুনে একজন আরেকজনরে কলাক্, “যে মানুচ্চো অম্মোনীয়গুনোরে পত্তমে আক্রমণ গুরিবো তেয়ই গিলিয়দর আদাম্মেগুনোর নেতাবো অবঅ।” |
Copyright © 2021 Bangladesh Bible Society
Bangladesh Bible Society