যিশাইয় 8 - Chakma Bible

আসিরিয়া দেজ্‌ছান লগেপ্রভুর আত্যের্

¹ লগেপ্রভু মরে কলঅ, “তুই এক্কান দাঙর্ আরুগ্ লোইনে সিয়েন উগুরে সাধারন মান্‌জ্যর্ আঢ লেগা ইজেবে এ কধাগান লেগ্, মহের-শালল-হাশ-বস (যিয়েনর ভেদ্‌তান্ ‘যাদিমাদি লুদোনা, যাদিমাদি গজক্ গুরি নেযানা’)।

² মুই ধর্মগুরু ঊরিয় আর যিবেরিখিয়র পুয়ো সখরিয়রে মর্ বিশ্বেজি সাক্ষি ইজেবে নেযেম্।”

³ পরেদি মুই মঅ মোক্কো সমারে, যিবে মিলে ভাববাদী এলঅ, তা সমারে থেলুং আর তে পিদিলী ওইনে এক্কো পুয়োর্ জর্ম দিলো। সেক্কে লগেপ্রভু মরে কলঅ, “সিবে নাঙান্ রাগা মহের-শালল-হাস-বস।

⁴ পুয়োবো ‘মা’ বা ‘বাবা’ কবার্ আগেদি দামেস্কর ধন-সোম্বোত্তিগানি আর শমরিয়ার লুদেয়্যে মালানি আসিরিয়ার রাজাবো নেযেব।”

⁵ লগেপ্রভু আরঅ মরে কলঅ,

⁶ এ মানুচ্চুনে শিলোহর্ ইন্দি লারে গুরি বেঈ যেইয়্যে পানিগান বাদ্ দিইনে রৎসীন আর রমলিয় পুয়োবোরে নিইনে ফুত্তি গোজ্যন্।

⁷ সেনত্তে প্রভু ইউফ্রেটিস গাঙানরে জদবদে বান পানি ধোক্ক্যেন্ সয়সাগজ্যে গুরি আসিরিয়ার রাজারে তারার্ বিরুদ্ধে খুব যাদিমাদি আনিবো। সে পানিগানে গাঙানির্ বেক ছড়াগানি আর কাজাকুরেদি জদবদে বেঈ যেবঅ,

⁸ আর সিয়েন যিহূদা দেজ ভিদিরে জোড়ে এইনে পুরিবো আর উদুরে উদিনে গত্তনা সং বাড়িবো। ও ইম্মানূয়েল, আসিরিয়ার রাজা তা মেল্যে ডুয়োগানিলোই তঅ পুরো দেজ্‌ছান নাঢি ফেলেব।

⁹ “ও জাদ্‌তুন্, তুমি এগত্তর্ অ, মাত্তর্ তুমি ভস্ত অবা; ও দূরোর্ দেজ্‌‌ছানি, শুনো, তুমি যুদ্ধোত্তে যুক্কোল্ অ, মাত্তর্ তুমি ভস্ত অবা; অয়, যুদ্ধোত্তে যুক্কোল অ, মাত্তর্ তুমি ভস্ত ন-অবা।

¹⁰ তুমি পরিকল্পনা গরঅ, মাত্তর্ সিয়েনি সফল ন-অবঅ; সে পরিকল্পনাগানর্ কধা তুমি কবা, মাত্তর্ সিয়েন ন-ঠিগিবো, কিত্তে ‘গোজেনে আমা সমারে আঘে।’ ”

গোজেনরে দোরেয়ো

¹¹ লগেপ্রভু তা খেমতাবলা আঢ্‌‌‌তান মঅ উগুরে রাগেইনে মঅ সমারে কধা কলঅ। তে মরে উজিয়ার্ গুরি দিলো যেন মুই এ মানুচ্চুনোর্ পধেদি ন-আঢং। তে কলঅ,

¹² “এ মানুচ্চুনে যিয়েনিরে কুজুরোমি কন্ তুমি সিয়েনির কনগানরে কুজুরোমি ন-কোয়ো। তারা যিয়েন দরান্ তুমি সিয়েন ন-দোরেয়ো; সিয়েন দর্‌গরেপারা বিলিনে মনে ন-গোজ্য।‍

¹³ বেগত্তুন্ খেমতাবলা লগেপ্রভুরে পবিত্র বিলিনে মান; তারে দরঅ, তারে দর্‌‌‌‍গরেপারা বিলিনে মনে গরঅ।

¹⁴ সালে তে অবদে এক্কান পবিত্র আশ্রয়র জাগা, মাত্তর্ ইস্রায়েলীয়গুনোর্ দ্বিয়েন দেজত্তে তে এমন্ এক্কো পাত্তর্ অবঅ যেনে মান্‌জ্যে উজোত্ হান আর যিবে মান্‌জ্যর উজোত্ হেবার্ কারন ওই থায়। যিরূশালেম মানুচ্চুনোত্তে তে অবঅ এক্কো ফাল্ আর এক্কান্ জাল।

¹⁵ তারা ভিদিরে ভালোক্ জনে উজোত্ হেবাক্। তারা পড়ি যেইনে ভস্ত অবাক্; ফালত্ আক্‌সো যেইনে তারা ধরা পড়িবাক‌্।” ‍

¹⁶ তুই এ সাক্ষিগান রোক্ষ্যে গর্ আর মঅ শিষ্যগুনো ভিদিরে সিবে সীলমর্ গুরি রাগা।

¹⁷ মুই লগেপ্রভুত্তে বাজ্জেই থেম্, যিবে যাকোব-বংশগুনোত্তুন্ মুয়োন ফিরেই রাগেয়্যে; মুই তা উগুরে বিশ্বেজ্ গুরিম।

¹⁸ এইয়্যে চাহ্, মুই আর সেই পুয়োগুন যিগুনোরে লগেপ্রভু মরে দিয়্যে। বেগত্তুন্ খেমতাবলা লগেপ্রভু, যিবে সিয়োন মুড়োবোত্ বজত্তি গরে আমি তার আওজ্ মজিম্ চিহ্নো আর আমক্ অবার্ লক্ষণ ওইয়্যেই।

¹⁹ মান্‌জ্যে যেক্কে তমারে সেই মানুচ্চুনো ইদু যেবাত্তে কন্ যিগুনে মরা আর ভান্ন্যেই আত্মাগুনো লগে মিজেইনে ফুজু ফুজু আর বিড়্‌বিড়্‌ গরন্, সেক্কে তমার্ কি গোজেন ইদু যানা উজিত্ নয়? যিগুনে জেদা আগন্ তারার্ ওইনে কিত্তে মরাগুনো সমারে সল্লা গুরিবাত্তে যেবা?

²⁰ তমাত্তুন্ গোজেনর্ উগুম আর সাক্ষি ইদু যাহ্ পুরিবো। যুনি তারা গোজেন কধা মজিম্ কধা ন-কন্ সালে বুঝো পুড়িবোদে তারা ইদু কনঅ পহ্‌‌র জিনিস্‌চান নেই।‌

²¹ দুঘ্ আর পেট্‌‌পরা হেই হেই তারা দেজ ভিদিরে ঘুরিবাক্। পেট্‌‌পরার্ দুঘে তারা রাগ্ গুরিনে উগুরেদি রিনি চেইনে তারার্ রাজা আর তারার্ গোজেনরে অভিশাব্ দিবাক্।

²² সে পরেদি তারা পিত্‌‌‌‌থিমীগান ইন্দি রিনি চেইনে দেগিবাক্ বানা দুঘ্, আন্ধার আর দর্‌‌গরেপারা যন্ত্রণা। গুর্‌‌গুজ্যে আন্ধার ভিদিরে তারারে দূর্ গুরি দিয়্যে অবঅ।