যিশাইয় 43 - Chakma Bible

ইস্রায়েলর্ বানা এক্কো উদ্ধোরগুরিয়্যে

¹ ও যাকোব, যিবে তরে সৃট্টি গোজ্যে, ও ইস্রায়েল, যিবে তরে বানেয়্যে, সেই লগেপ্রভু ইক্কিনে এ কধাগান কত্তে, “তুই ন-দোরেচ্, কিত্তে মুই তরে উদ্ধোর্ গোজ্যং। মুই তঅ নাঙান্ ধুরিনে ডাক্যং, তুই মর্।

² তুই যেক্কে পানি উগুরেদি যেবে সেক্কে মুই তঅ লগে লগে থেম্। যেক্কে তুই গাঙ উগুরেদি যেবে, সেক্কে সিয়েনিয়ে তরে ন-ডুবেব; তুই যেক্কে আগুনো উগুরেদি যেবে, সেক্কে তুই পুড়ি ন-যেবে, আগুনো জ্বিলান্ তঅ কিয়্যেত্ ন-বাঁজিবো;

³ কিত্তে মুয়ই তর্ গোজেন লগেপ্রভু, তর্ উদ্ধোর গুরিয়্যে, ইস্রায়েলর সেই সুদ্ধো-সাংগ মানুচ্চো। মুই তর্ উদ্ধোরর্ মূল্য ইজেবে মিসর দেজ্‌চান দিম, আর তঅ বদলে কূশ আর সবা দেজ্‌চানরে দিম।‌

⁴ মুই তঅ বদলে অন্য মানুচ্চুনোরে দিম্ আর তঅ পরাণানর্ বদলে অন্য জাদ্‌তুনোরে দিম, কিত্তে তুই মঅ চোগেদি মূল্যবান আর সর্মান পেইয়্যে, আর মুই তরে কোচ্‌‌পাং।

⁵ তুই ন-দোরেচ্, কিত্তে মুই তঅ লগে লগে আগং। পূগেদিত্তুন্ মুই তঅ বংশবোরে আনিম আর পজিমেত্তুন্ তরে এগত্তর্ গুরিম।

⁶ মুই উত্তোরেদি দেজ্‌চানিরে কোম্, ‘তারারে ইরি দে,’ আর দোগিনে দেজ্‌‌চানিরে কোম্, ‘তারারে আক্‌সোই ন-রাগেয়ো‌‌।’ মুই তারারে কোম্, ‘তুমি দূরোত্তুন্ মঅ পুয়োগুনোরে আর পিত্‌‌‌থিমীর শেজ্ দুযিত্তুন্ মঅ ঝিগুনোরে আন্।‍‌‌‌‌‌

⁷ মঅ নাঙে যিগুনোরে ডাগা অয়, মুই যিগুনোরে মর্ বাঈনী গুরিবাত্তে বানেয়োং, যিগুনোরে মুই দাঙর্ গোজ্যং আর বানেয়োং, তুমি তারারে পত্তিজনরে আন।’ ”

⁸ যিগুনে চোগ্ থাগদেয়ো কান্ আর কান্ থাগদেয়ো বহ্‌‌রা তারা নিগিলি এজোদোক্।

⁹ বেক্ জাদ্‌তুনে একসমারে এগত্তর্ ওদোক্ আর মানুচ্চুনে এক জাগাত্ মিলোদোক্। তারা ভিদিরে কন্না আমা ইদু আগাম্ কধা কোই পারে আর পুরোণি বেপারানি কোই পারে? তারার্ কধানি যে ঠিগ্ সিয়েনি প্রমাণ গুরিবাত্তে তারা তারার্ সাক্ষিগুন্ আনদোক্ যেন সেই সাক্ষিগুনে সিয়েনি শুনিনে কোই পারন্, “ঠিগ্ কধা।” ‌‌‌‍‍‌‌‍‍

¹⁰ লগেপ্রভু ইস্রায়েলীয়গুনোরে কোইয়্যেদে, “তুমিই মর্ সাক্ষি আর মর্ বেঈ লোইয়্যে চাগর্, যেন তুমি হবর্ পঅ আর মঅ উগুরে বিশ্বেজ্ গুরি পার আর বুঝি পার যে, মুয়ই তে। মঅ আগেদি কনঅ গোজেন বানা ন-অয় আর মঅ পরেদিয়ো অন্য কনঅ গোজেন ন-থেবঅ।

¹¹ মুই, মুয়ই লগেপ্রভু, মুই বাদে আর কনঅ উদ্ধোরগুরিয়্যে নেই।

¹² মুয়ই ফগদাং গোজ্যং, উদ্ধোর্ গোজ্যং আর জানেই দুয়োং; সেক্কে তমা ইধু কনঅ দেবেদা ন-এলঅ। এ পৌইদ্যেনে তুমি মর্ সাক্ষি। মুই লগেপ্রভু এ কধাগান কোইয়োং, মুয়ই গোজেন।

¹³ অয়, পৌইল্যেত্তুন্ ধুরি মুয়ই সিবে। কনজনে মঅ আঢত্তুন্ রোক্ষ্যে গুরি ন-পারে। মুই কাম্ গুরিলে কনজনে সিয়েন বাদ্ দি ন-পারে।”

গোজেনর্ দোয়্যে আর ইস্রায়েলর অবিশ্বেজ্ গরানা

¹⁴ লগেপ্রভু, তমার্ উদ্ধোরগুরিয়্যে, ইস্রায়েলর্ সেই সুদ্ধো-সাংগ মানুচ্চো এ কধাগান কোইয়্যেদে, “মুই তমাত্তে বাবিলোত্ মানুচ্ পাদেম আর যে জাহাজ্‌চান নিইনে বাবিলীয়গুনে বাড়্‌‌বো গুরিদাক্ সিয়েনত্ গুরি ধেই যেইয়্যে মানুচ্চুনো ধোক্ক্যেন্ গুরি সে বাবিলীয়গুনোরে আনিম্। ‌

¹⁵ মুয়ই লগেপ্রভু, তমার্ সেই সুদ্ধো-সাংগ মানুচ্চো; মুয়ই ইস্রায়েলর সৃট্টিগুরিয়্যেবো আর তমা রাজাবো।”

¹⁶ লগেপ্রভু সাগর ভিদিরেদি পথ বানেয়্যে, সেই গভীন্ সাগর ভিদিরেদি পথ গোজ্যে।

¹⁷ তে রথ, ঘোড়া আর দরমর সৈন্যদল্লোরে নিগিলেই আন্যে। তারা এক সমারে সিয়েনত্ পোজ্যন্, আর্ উদি ন-পারন্। তারা চেরাগ বুদ্ধি ধোক্ক্যেন মুরি যেইয়োন্।

¹⁸ তে কত্তে, তুমি পুরোণি কিচ্চু মনত্ ন-তুল্য; পুরোণি কনকিজু ভিদিরে পড়ি ন-থেইয়ো।

¹⁹ চঅ, মুই এক্কান নুয়ো কাম গুরিবাত্তে যাঙর্। সিয়েন ইক্কিনে আরাম্ভ অবঅ আর সিয়েন তুমি হবর্ পেবা। মুই ধূল্যেচর চাগালা ভিদিরে পথ বানেম আর ধূল্যেচরত্ গাঙ বোজেই দিম।

²⁰ ঝার্‌বো য়েমান, শিয়েল আর উটপেখ্‌কুনে মরে বাঈনী গুরিবাক্, কিত্তে মঅ মানুচ্চুনোরে, মর্ বেঈ লোইয়্যে মানুচ্চুনোর হেবাত্তে মুই ধূল্যেচর চাগালার্ পানি যোগেই দিম আর ধূল্যেচরত্ গাঙ্ বোজেই দিম।‌‌

²¹ সেই মানুচ্চুনোরে মুই নিজোত্তে বানেয়োং যেন তারা মরে বাঈনী গুরি পারন্।

²² মাত্তর্ ও যাকোব, তুই মরে ন-ডাগচ্; ও ইস্রায়েল, তুই মরে নিইনে বল্‌পোজ্যে ওই যেইয়োচ্।‌‌‍

²³ পুজ্যে উৎসর্বত্তে তুই মইদু ভেড়া ন-আনচ্ আর তর্ কনঅ উৎসর্বলোই মরে সর্মান ন-দেগাজ্। মুই তঅ উগুরে শোজ্য-উৎসর্বর্ ভারান্ ন-দুয়োং; লোবান দিবাত্তে তরে বল্‌‌‌‍পোজ্যে ন-গরং।

²⁴ তুই কনঅ তুম্বাজ্ বচ্ মত্তে কিনি ন-আনচ্; তর্ য়েমান উৎসর্বর তেল্‌লোই তুই মরে হুজি ন-গরচ্। সিবের্ বদলে তুই তঅ পাপ ভারান্ মঅ উগুরে চাপি দুয়োচ্ আর তর্ বেক অন্যেয়ানিলোই মরে বল্‌পোজ্যে গোজ্যস্।‌‌‍‌‌‍

²⁵ “মুই, মুয়ই মর্ নিজোত্তে তঅ অন্যেয়ানি ফুজি ফেলাং; মুই তঅ পাপ্‌‌‌‍পানি আর ইদোত্ ন-তুলিম।‍

²⁶ তঅ বেপারান্ মরে ইদোত্ তুলি দে; এজঅ, আমি সিয়েন্দোই তর্কাতর্কি গুরিই। তুই নিজো তপ্পেদি কধা কঅ যেন তরে নিদ্দুযি বিলিনে পরমান্ গরা যায়।

²⁷ তর্ আগ বাব্‌পো পাপ গোজ্যে; তর্ তপ্পে যিগুনে কধা কোইয়োন তারা মঅ বিরুদ্ধে পাপ গোজ্যন্।‌‌‍‍

²⁸ সেনত্তে মুই তমা উবোসনা-ঘরর্ ধর্মগুরুগুনোরে অগমান গুরিম আর যাকোবরে ভস্তর্ অভিশাবর্ তলে গুরিম আর ইস্রায়েলরে ঠাট্টা-তামাজার্ মানুচ্ বানেম্।”