হোশেয় 2 - Chakma Bible

¹ তমা ভেইয়ুনোরে তুমি কবা অম্মি (যিয়েনর্ ভেদ্‌তান্ মঅ মানুচ্) আর বোনুনোরে কবা রুহামা (যিয়েনর্ ভেদ্‌‌তান্ দোয়্যের মানুচ্)।

ইস্রায়েলর সাজা আর উদ্ধোর্

² তমা মাবোরে গেইল্ দুয়ো, গেইল্ দুয়ো তারে, কিত্যে তে মর্ মোগ্ নয় আর মুইয়ো তার নেক্ নয়। তে তার্ চোগো টার্ মারানাত্তুন্ বেশ্যেগিরি আর তা বুগোত্তুন্ বেভিচের্ দূর গোরোক্।

³ আঃ ন-অলে মুই তারে লাংটা-বাংটা গুরি দিম আর তে তার্ জর্ম দিনোত্ যেবাবোত্যে লাংটা-বাংটা এলঅ সেবাবোত্যে গুরিম। মুই তারে ধূল্যেচর-চাগালা ধোক্ক্যেন গুরিম, উগুজ্যে ভূইয়ো ধোক্ক্যেন গুরি দিম আর পানি তিরেজে তারে মারে ফেলেম।

⁴ মুই তা পুয়ো-ছাগুনোরে দোয়্যে ন-গুরিম, কিত্যে তারা বেভিচারর্ পুয়ো-ছা।

⁵ তারার্ মাবো বেভিচের্ গোজ্যে; যে তারারে পেদত্ ধোজ্যে তে লাজ্ গরেপারা কাম্ গোজ্যে। তে কদঅ, মুই মঅ লাঙেগুনো পিজেদি যেইম্; তারা মরে হানা, পানি, পশম, মসীনা, তেল আর পানীয় দি থান্।

⁶ সেনত্তে মুই কাদাঝুপ্পোই তা পথ্‌‌‌তান‌ নাঢি দিম; মুই তা চেরোকিত্তে দেবাল্ তুলি দিম্ যেনে তে তার্ পথ্‌তান তোগেইনে ন-পায়।

⁷ তে তার্ লাঙেগুনো পিজেদি যেবঅ মাত্তর্ তারারে ধুরি ন-পারিবো; তে তারারে তোগেব মাত্তর্ ন-পেবঅ। সেক্কে তে কবঅ, মুই মর্ পত্তম্ নেক্কো ইধু ফিরি যেইম্, কিত্যে সেক্কে মুই ইত্তুন্ বেশ্ গমে এলুং।

⁸ তে স্বীগের্ ন-গুরিদো যে, মুয়ই তারে সেই শোজ্য, নূয়ো আংগুর-রস আর তেল দিদুং, তারে বোউত্ সনা আর রূবো দিদুং, যিয়েনি তে বাল দেবেদাত্তে বেবহার গোজ্যে।

⁹ সেনত্তে মর্ শোজ্য পাগিলে আর নূয়ো আংগুর-রস বানেলে মুই সিয়েন নেযেম। তার্ লাংটাগান ঢাগিবাত্তে মর্ সেই উলো কাবড়ান আর নাইলন্ কাবড়ান্ মুই ফিরেই নেযেম।

¹⁰ মুই ইক্কিনে তা লাঙেগুনো চোগো মুজুঙোত্ তার্ লাজেবার কামানি ফগদাং গুরিম; মঅ আঢত্তুন্ কনজনে তারে উদ্ধোর্ ন-গুরিবাক্।

¹¹ মুই তার বেক্ রঙ্গ-ফুত্তির্ অনুষ্ঠান, পরব্, আঙোস্যে, জিরেবার দিন-এক কধায় তার্ বেক ঠিগ্ গোজ্যে পরব্‌‌পুন বন্ধ গুরি দিম।

¹² যেদক্কানি আংগুর-লুদি আর ডোমোর্ গাজ পৌইদ্যেনে তে কোইয়্যে, তার পাওনা ইজেবে তা লাঙুনে দুয়োন, সিয়েনি মুই বর্‌‌বাত্ লাগেম; সিয়েনি মুই ঝারত্ ফেলেই দিম্বোই আর য়েমানুনে সিয়েনি হেই ফেলেবাক্।

¹³ যেদক্ দিন সং তে বাল দেবেদাগুনোর্ নাঙে আগর্‌বাট্টি জ্বালেয়্যে আর আন্দিক্ আর গহনা-গাটি দিইনে নিজোরে সাজেইনে তা লাঙুনে ইন্দি যেইনে মরে ভুলি যেয়্যেগোই সেদক্ দিনোত্তে মুই তারে সাজা দিম। মুই লগেপ্রভু এ কধাগান কঙর্।

¹⁴ পরেদি মুই তারে মিদে কধা কোইনে ধূল্যেচর-চাগালাত্ নেযেম আর তা সমারে কোচ্‌পানার কধা কোম।‌‌

¹⁵ মুই সিদু তার আংগুর খেত্‌‌‌তান তারে ফিরেই দিম আর আখোর্ কলগ্‌‌‌কানরে আজার দোর্ বানেম। তার গাবুজ্যে জিংকানি ধোক্ক্যেন গুরি তে সিদু গীদ্ গেইনে জোব্ দিবো যেবাবোত্যেগুরি তে দিয়্যে মিসরত্তুন্ নিগিলি এবার্ দিনোত্।

¹⁶ মুই লগেপ্রভু কঙর্, সেদিন্যে তে মরে মঅ নেক্কো বিলি ডাগিবো; মর্ প্রভু কোইনে আর ন-ডাগিবো।

¹⁷ তা মুয়োত্তুন্ মুই বাল দেবেদাগুনোর্ নাঙানি দূর্ গুরি দিম; তে আর বাল দেবেদাগুনোরে ন-ডাগিবো।

¹⁸ সেদিন্যে মুই তাত্তে য়েমান, পেগ্ আর বুগেদি আঢি বেড়েয়্যে প্রাণিগুনো লগে মিজেম। মুই দেজত্তুন্ ধনু, লাম্বাছুরি আর যুদ্ধো দূর্ গুরি দিম যেনে বেক্কুনে গমেডালে ঘুম যেই পারন্।

¹⁹ ও ইস্রায়েল, মুই তঅ লগে মিজেবাত্তে উমরত্তে থিদেবর্ গুরিম; সততা, ন্যায়বিচের, অমকদ কোচ্‌পানা আর দোয়্যেগান মুই সে মিজেনাগান পাক্কা গুরিম।‌‌‌

²⁰ মুই বিশ্বেজ্ গুরিনে সেই মিজেনাগান পাক্কা গুরিম আর সেক্কে তুই লগেপ্রভুরে গভীন গুরিনে জানি পারিবে।

²¹ “মুই লগেপ্রভু কঙর্, সেদিন্যে মুই তমারে সাড়া দিম। মুই আগাজ্‌‌‌‌‌চানরে উগুম দিম; আগাজ্‌‌‌‌‌চানে পিত্‌‌‌‌‌থিমীগানরে ঝড় দিবো;

²² পিত্‌‌‌‌‌থিমীগানে শোজ্য, নুয়ো আংগুর-রস আর তেল্ দিবো, আর সিয়েনির মাধ্যমে যিষ্রিয়েল, অত্তাৎ ইস্রায়েলে মরে সাড়া দিবো;

²³ মত্তেই মুই তারে দেজত্ বিজ ধোক্ক্যেন গুরি গেজেম্; মুই যিবেরে কোইয়োং, ‘মঅ দোয়্যের মানুচ্ নয়,’ তারে মুই দোয়্যে গুরিম। মুই যিগুনোরে কোইয়োং, ‘মঅ মানুচ্ নয়,’ তারারে মুই কোম, ‘তুমি মঅ মানুচ্’; আর তারা কবাক্, ‘তুয়ই আমা গোজেন।’ ”