ইষ্রা 1 - Chakma Bible

যিহূদীগুনে দেজত্ ফিরি এলাক্

¹ যিরমিয়রে দিইনে কোইয়্যে লগেপ্রভুর কধানি পূরোণ অবাত্যে পারস্যের রাজা কোরসর রাজাগিরির পত্তম্ বজরত্ লগেপ্রভু কোরসর মনত্ এমন আওজ্ দিলো যিয়েনত্যে তে তার্ বেক রেজ্যত্ মুুয়োদি আর লিগিনে এই ফগদাঙান্ গুরিলো:

² পারস্যের রাজা কোরসে এই কধাগান কোইয়্যেদে, স্বর্গর গোজেন লগেপ্রভু পিত্‌থিমীর পুরো রেজ্যগান্ মরে দিয়্যে আর যিহূদা দেজর্ যিরূশালেমত্ তাত্তেই এক্কান ঘর বানেবাত্যে মরে নেযা ওইয়্যে।

³ তা মানুচ্চুনো ভিদিরে অত্তাৎ তমা ভিদিরে যে চায় তে যিহূদা দেজর্ যিরূশালেমত্ যেইনে ইস্রায়েলর্ গোজেন লগেপ্রভুর ঘর বানোক্। কিত্যে তে যিরূশালেমত্ আঘে। যিগুনে সিয়েনত্ যেবাক্ তারার্ গোজেনে তারা সমারে থোক্।

⁴ গোজেনর্ যিদুক্কুন্ মানুচ্ এজঅ বাঁজি আগন তারা ‍যিয়োদোই বজত্তি গুরিদাক্ সাৎ তারা ভিদিরে যিগুনে যিরূশালেমত্ যেবাত্তে চায় তারার্ পাড়াল্যেগুনে যেনে তারার্ সনা-রূবো, জিনিসপাদি আর য়েমান দিইনে সাহায্য গরন্ আর যিরূশালেমত্ গোজেনর্ ঘরত্যে নিজের আওজে বক্‌শিজ্ দুয়োন।

⁵ ইয়েন্দোই যিহূদা আর বিন্যামীনর বংশ-নেতাগুনোর, ধর্মগুরুগুনোর আর লেবীয়গুনো ভিদিরে যিগুনো মনত্ গোজেনে দেগা দিলো তারা পত্তিজনে যিরূশালেমত্ লগেপ্রভুর ঘর বানেবাত্যে যেবাত্যে যুুক্কোল্ অলাক্ ।

⁶ তারার্ বেক পাড়াল্যেগুনে রুবোর্ পিলে, সনা, অন্য পযাপিরা, য়েমানপাল আর মংগা মংগা জিনিস দিইনে তারারে সাহায্য গুরিলাক্ আর গোজেনর্ ঘরত্যে নিজোর্ আওজে বক্‌‌‌শিজ্অ দিলাক্।

^7-8 ইয়েনিবাদে নবূখদ্‌‌‌নিৎসরে লগেপ্রভুর ঘরর্ যেদক্কানি জিনিস যিরূশালেমত্তুন্ নেযেইনে তার্ দেবেদাবোর্ মন্দিরোত্ থোইয়্যে রাজা কোরসে সিয়েনি ধনভান্ডালর্ রোক্ষ্যেগুরিয়্যে মিত্রদাতরে দিইনে নিগিলেই আনিলো। মিত্রদাৎ এ সিয়েনি যিহূদার শাজন্‌‌‌গুরিয়্যে শেশ্‌‌‌বসর ইদু গুণি দিলো।

⁹ সেই পযাপিরানির নাঙানি ইয়েনি: ত্রিশ্‌‌‌ছো সোনার গাবালা, এক আজার রূবোর্ গাবালা, ঊনোত্রিশ্‌‌‌চান ছুরি,

¹⁰ ত্রিশ্‌‌ছো সনার কদরা, নানান্ বাবোত্যে চের্‌‌‌শ দোশ্‌‌‌চো রূবোর্ কদরা আর এক আজার্ অন্য পযাপিরা।

¹¹ যিয়েনত্ বেক্কানিয়ে পাঁচ আজার চের্‌‌‌‌শ সনা আর রূবোর জিনিস এলঅ। বন্দী অবস্থায় বিদেশত্ বজত্তিগুরিয়্যে মানুচ্চুনে যেক্কেনে বাবিলত্তুন্ যিরূশালেমত্ এলাক্ সেক্কে শেশ্‌‌‌‌বসরর্ এই বেক পযাপিরানি লগে গুরিনে আনিলো।