যিহিষ্কেল 47 - Chakma Bibleউবোসনা-ঘরত্তুন্ নিগিলি এচ্চ্যে গাঙান্ 1 সে পরেদি তে মরে উবোসনা-ঘরত্ সোমেবার্ মুয়োনত্ তলাত্তুন পানি নিগিলিনে পূগেদি বেঈ যার্। উবোসনা-ঘরান পূগেদি মু এলঅ। সেই পানিগান উবোসনা-ঘরর্ দোগিণেদি তলাত্তুন্ পূজোবোর্ দোগিণেদি বেঈ যার্। 2 পরেদি তে উত্তোর্-গেদো ভিদিরেদি মরে নিগিলেই আনিলো আর বারেদি পথ্তানদি ঘুরেইনে পূগেদি মু বারেদি গেদো ইধু নেযেল; সেই গেদোর্ দোগিণেদি এক্কানা গুরি পানি বেঈ যার্। 3 মাবেদে দুড়ি আদত্ লোইনে তে মাবদে মাবদে এক আজার্ আত্ পূগেদি গেলঅ। সিয়েনত্ তে মরে টেঙ মুড়ি-ডুবেদে পানি ভিদিরেদি নেযেল। 4 সে পরেদি তে আর এক আজার্ আত্ মাবিনে মরে আদু সং পানি ভিদিরেদি নেযেল। সে পরেদি তে আর এক আজার্ আত্ মাবিনে কমর্ সং পানি ভিদিরেদি মরে নেযেল। 5 সে পরেদি তে আর এক আজার্ আত্ মাবিলো, মাত্তর্ পানি সেক্কে গাঙ্ ওই যানায় মুই পার্ ওই ন-পারিলুং, কিত্যে পানি বাড়ি যেইয়্যে আর সাজুরেদে ধোক্ক্যেন গভীন্ ওইয়্যে। সিয়েন্ এবাবোত্যে গাঙ্ ওইয়্যে যিয়েন্ কনজনে আঢিনে পার্ ওই ন-পারন্। 6 তে মরে কলঅ, “ও মান্জ্যর্ পুয়োবো, তুই কি ইয়েন দেগিলে?” সে পরেদি তে মরে গাঙ পারত্ ফিরেই নেযেল। 7 সিয়েনত্ লুমিনে মুই গাঙর্ দ্বিকিত্তেদি বোউত্ গাজপালা দেগিলুং। 8 তে মরে কলঅ, “এ পানিগান পূগেদি বেঈ যার্ আর অরাবার ভিদিরেদি ধূল্যে-সাগরত্ যেইনে লুম্মেগোই। যেক্কে সিয়েন যেইনে সাগরত্ পোজ্যে সেক্কে সিদুগোর্ পানিগান মিদে ওই যায়। 9 যিয়েনদি এ গাঙান্ বেঈ যেবঅ সিয়েনত্ নানান্ বাবোত্যে ঝাকবলা জেদা পরানবলা আর বোউত্ মাছ বজত্তি গুরিবাক্। এ পানিগান যিয়েনদি বেঈ যেবঅ সিদুগোর্ পানিগান মিদে গুরি তুলিবো; সেনত্তে যিয়েনদি গাঙান্ বেঈ যেবঅ সিয়েনর্ বেক্কানি বাঁজিবো। 10 জাল্যেগুন গাঙ পারত্ থিয়্যেবাক্; ঐন্-গদীত্তুন্ ঐন্-ইগ্লয়িম সং জাল মিলি দিবার্ জাগা অবঅ। ভূমধ্য-সাগরর মাছ ধোক্ক্যেন সিয়েনতঅ নানান্ বাবোত্যে বোউত্ মাছ পাহ্ যেবঅ। 11 মাত্তর্ পানি জাগা আর বিলো পানি মিদে ন-অবঅ; সিয়েনি নুনোত্তে থেবঅ। 12 গাঙর্ দ্বিপারত্ নানান্ বাবোত্যে গুলোগুলি গাজ্ জোর্মেব। সিগুনোর্ পাদানি শুগেই ন-যেবঅ, গুলোগুলি শেজ্ ন-অবঅ। পত্তি মাসত্ সিগুনোত্ গুলোগুলি ধুরিবো, কিত্যে উবোসনা-ঘরত্তুন্ সিয়েনত্ পানি বেঈ এবঅ। সিগুনোর্ গুলোগুলিগুন্ হেবাত্তে আর পাদানি গম্ অবাত্তে বেবহার গরা অবঅ।” ইস্রায়েল দেজর্ দুযি 13-14 সে পরেদি প্রভু লগেপ্রভু কোইয়্যেদে, তুমি সোম্বোত্তি ইজেবে ইস্রায়েলর্ বার গুট্টি ভিদিরে দেজ্চান এবাবোত্যেগুরি ভাগ গুরি দিবা। তুমি বেক্কুনে সং সং গুরিনে ভাগ গুরিবা মাত্তর্ যোষেফে দ্বিভাগ পেবঅ। এ দেজ্চান মুই তমা পুরোণি মানুচ্চুনোরে দিম্ বিলিনে শমক্ গোজ্যং আর এ দেজ্চান তমা সোম্বোত্তি অবঅ। 15 দেজর্ দুযিগান অবঅ ইয়েন: উত্তোরেদি দুযি অবঅ ভূমধ্য সাগরত্তুন্ লেবো-হমাৎ ছাড়িনে হিৎলোনর পথতানর্ সদাদ সং; 16 সিয়েনত্তুন্ দামেস্ক আর হমাতর্ দুযি ভিদিরে থেইয়্যে বরোথা আর সিব্রয়িম সং; সিয়েনত্তুন্ হৌরণর দুযির্ কায়কুরে হৎসর-হত্তীকোন সং। 17 এ দুযিগান যেবঅ ভুমধ্য সাগরত্তুন্ দামেস্কর্ উত্তোর্ দুযি কায় হৎসোর-ঐনন সং, অত্তাৎ হমাতর্ দুযি সং। ইয়েনই অবঅ উত্তোরেদি দুযিগান। 18 পূগেদি দুযিগান হৌরণ আর দামেস্কর ভিদিরেদি গিলিয়দ আর ইস্রায়েল দেজর্ ভিদিরেদি যর্দন গাঙ সং যেইনে ধূল্যে-সাগর সং যেবঅ। ইয়েনই অবঅ পূগেদি দুযিগান। 19 দোগিণেদি দুযিগান ধূল্যে-সাগরর্ তামরত্তুন্ কাদেশর্ মরীবৎ পানিগান সং যেইনে মিসরর্ শুগুনো গাঙ সং ভূমধ্য সাগর সং যেবঅ। ইয়েনই অবঅ দোগিণেদি দুযিগান। 20 পোজিমেদি দুযিগান অবঅ ভূমধ্য সাগর সং লেবো-হমাতর্ উই কিত্তেদি সং। ইয়েনই অবঅ পোজিমেদি দুযিগান। 21 “ইস্রায়েলর্ গুট্টিগুন অনুসারে তুমি নিজো ভিদিরে দেজ্চান ভাগ গুরি নেযেবা। 22 তমা ভিদিরে যিদুক্কুন বিদেশী তারার্ ঝি-পুয়োগুন নিইনে থিদেবর্ গুরি বজত্তি গত্তন্ তারাত্তে আর তমাত্তে দেজ্চান সোম্বোত্তি ইজেবে ভাগ গুরি দিবা। তারারে তুমি দেজত্ জোর্মেয়্যে ইস্রায়েলীয় ইজেবে ধুরিবা। তমা লগে তারায়ো ইস্রায়েলর্ গুট্টিগুনো ভিদিরে সোম্বোত্তি ইজেবে ভূইয়োর ভাগ পেবাক্। 23 যে গুট্টিগুনো ভিদিরে সেই বিদেশীগুন বজত্তি গুরিবাক্ সিয়েনত্ তুমি তারে ভূইয়োর অধিকার দিবা। মুই প্রভু লগেপ্রভু এ কধাগান কঙর্।” |
Copyright © 2021 Bangladesh Bible Society
Bangladesh Bible Society