যিহিষ্কেল 36 - Chakma Bibleইস্রায়েলর মুড়ো-মুড়িগুনো উগুরে আগাম্ কধা 1-2 পরেদি লগেপ্রভু মরে কলঅ, ও মান্জ্যর পুয়োবো, ইস্রায়েলর মুড়ো-মুড়ি ইধু আগাম্ কধা কঅ আর প্রভু লগেপ্রভুর এই কধানি তারারে শুনিবাত্তে কঅ, শত্রুবো তারা পৌইদ্যেনে কোইয়্যেদে, বাঃ! পুরোণ অজল্ জাগায়ানি আমা গজগত্ এচ্চ্যে। 3 সেনত্তে মুই প্রভু লগেপ্রভু কঙর্, তুমি যেনে অন্য জাদ্তুনোর গজগত্ এজ আর মানুচ্চুনোর ইংসে আর নিন্দের্ মানুচ্ অ সেনত্তে তারা চেরোকিত্তেত্তুন্ তমারে ভস্ত আর গিলি ফেল্যন্। 4 সেনত্তে ও ইস্রায়েলর মুড়ো-মুড়িগুন, তুমি মঅ কধা শুনো। ও দাঙর্ দাঙর্ আর চিগোন্ চিগোন্ মুড়োগুন, খাট্যং আর কলগ্কানি, মানুচ্ নেইয়্যে বেক্ ভস্তর্ জাগানি আর তমা চেরোকিত্তে অন্য জাদ্তুনে যিগুনোরে লুদেয়্যে আর আজি এজে পারা গোজ্যন্ সেই বেক ছাড়ি যেইয়্যে শঅরানি, 5 মুই প্রভু লগেপ্রভু তমারে কঙর্, মর্ মনর্ জ্বালায় মুই অন্য জাদ্তুনোর আর বেক ইদোমর বিরুদ্ধে কধা কোইয়োং, কিত্যে তারার মনর্ হুজি আর ইংসেলোই তারা মঅ দেজ্চানরে নিজোর গজগত্ আন্যন্ যেনে সিয়েন লুদেই পারন। মুই প্রভু লগেপ্রভু এ কধাগান কঙর্। 6 তুই ইস্রায়েল দেজ পৌইদ্যেনে আগাম্ কধা কঅ। তার দাঙর্ দাঙর্ আর চিগোন্ চিগোন্ মুড়োগুন, গাদ আর কলগ্কানিরে কঅ, প্রভু লগেপ্রভু কোইয়্যেদে, মর্ মনর্ জ্বালালোই রাগে মুই কধা কঙর্, কিত্যে তুমি অন্য জাদ ইত্তুন্ অগমান পেইয়ো। 7 সেনত্তে মুই শমক্ হেইনে কঙর্, তমা চেরোকিত্তে জাদ্তুনেয়ো অগমান ভুগিবাক্। 8 মাত্তর্ ও ইস্রায়েলর মুড়ো-মুড়িগুন্, তুমি তমার গাজ ডেলাগুন ছিদি দিইনে মর্ মানুচ্ ইস্রায়েলীয়গুনোরে বোউত্ গুলোগুলি দিবে, কিত্যে তারা যাদিমাদি ফিরি এবাক্। 9 মুই তমা তপ্পে আগং আর তমা ইন্দি মনযোগ দিম্; সেক্কে তমা উগুরে চাষ গরানা আর বীজি ফেলা অবঅ। 10 মুই তমা উগুরে গোদা ইস্রায়েল জাদর্ মানুচ্চুন বাড়েই দিম। শঅরানিত্ মানুচ্ বজত্তি গুরিবাক্ আর ভস্ত ওইয়্যে জাগায়ানি আরঅ তুলো অবঅ। 11 মুই তমা উগুরে মানুচ্ আর য়েমান বাড়েই দিম আর তারা ফলবান আহ্ জনেদি বোউত্ অবাক্। মুই তমা উগুরে আগ ধোক্ক্যেন মানুচ্ বজত্তি গোরেম্ আর আগত্তুন্অ বেশ্ তমারে বেশ্ ভালেদি দান গুরিম। সেক্কে তুমি হবর্ পেবা যে, মুয়ই লগেপ্রভু। 12 মুই তমা উগুরেদি মানুচ্চুনোরে, অত্তাৎ মর্ মানুচ্ ইস্রায়েলীয়গুনোরে আদা-উদো গোরেম্। তারা তমারে অধিকার গুরিবাক্ আর তুমি তারার্ অধিকারর্ জাগা অবা; তুমি আর কনদিন্অ তারারে পুয়োছা নেইয়্যে ন-গুরিবা। 13 “‘ও ইস্রায়েল দেজ্চান, মান্জ্যে তরে কন্, তুই মান্জ্যরে গিলি ফেলাচ্ আর নিজো জাদরে পুয়ো-ছা নেইয়্যে গরচ্। 14 মাত্তর্ মুই কঙর্, তুই মান্জ্যরে আর ন-গিলিবে বা তঅ জাদরে পুয়ো-ছা নেইয়্যে ন-গুরিবে। 15 জাদ্তুনোর্ ঠাট্টা-মশ্কারী আর তরে শুনিবাত্তে ন-দিম্ আর তারার অগমান গরানা আর তত্তুন্ সোজ্য গরা ন-পুরিবো। তত্তে তঅ জাদর্ মানুচ্চুনে আর উজোত্ ন-হেবাক্। মুই প্রভু লগেপ্রভু এ কধাগান কঙর্।’ ” 16 সে পরেদি লগেপ্রভু মরে কলঅ, 17 ও মান্জ্যর পুয়োবো, ইস্রায়েলীয়গুনে নিজো দেজত্ বজত্তি গুরিবার অক্তত্ তারার আচার-বেবহার আর কামেদি দেজ্চান অসিজি গোজ্যন্। মঅ চোগেদি তারার্ আচার-বেবহারানি এলদে মিলেগুনোর্ মাসিগো অসিজি ধোক্ক্যেন। 18 সেনত্তে মুই তারা উগুরে মর্ রাগ্কান ঢালি দিলুং, কিত্যে তারা দেজ ভিদিরে লো ঝোরেয়োন আর তারার মূত্তিগুন্দোই দেজ্চান অসিজি গোজ্যন্। 19 মুই নানান্ জাদ্ আর দেজ ভিদিরে তারারে ছিদি দুয়োং; তারার্ আচার-বেবহার আর কামানি অনুসারে মুই তারারে সাজা দুয়োং। 20 তারা জাদ ভিদিরে যিয়েনত্ যেইয়োন সিয়েনত্ মর্ পবিত্র নাঙান্ অপবিত্র গোজ্যন, কিত্যে মান্জ্যে তারা পৌইদ্যেনে কোইয়োন, ইগুনে লগেপ্রভুর মানুচ্, অদচ তাঁর দেজ্চান তারাত্তুন্ ছাড়ি দিয়্যে পোজ্যে। 21 মর্ নাঙানর্ পবিত্রতাগান্ রোক্ষ্যে গরানা ইন্দি মর্ মনযোগ এলঅ, কিত্যে ইস্রায়েল জাদে যিদুক্কুন্ জাদ ভিদিরে যেইয়্যে সিদু মর্ নাঙান্ অপবিত্র গোজ্যে। 22 সেনত্তে তুই ইস্রায়েলীয়গুনোরে কঅ, প্রভু লগেপ্রভু কোইয়্যেদে, ও ইস্রায়েলীয়গুন, মুই যে তমাত্তে এ কামান্ গুরিবাত্তে যাঙর্ সিয়েন নয়, মাত্তর্ মর্ সেই পবিত্র নাঙানর্ কারনে গুরিম। তুমি যিদুক্কুন জাদ ভিদিরে যেইয়ো সিদু এই নাঙান্ অপবিত্র গোজ্য। 23 যে নাঙান্ জাদ ভিদিরে অসর্মান গরা ওইয়্যে মর্ সেই মহৎ নাঙানর্ পবিত্রতাগান মুই দেগেম; তুমি তারা ভিদিরে সেই নাঙান্ অপবিত্র গোজ্য। যেক্কে মুই তারা চোগো মুজুঙোত্ তমা ভিদিরেদি নিজোর্ পবিত্রতাগান দেগেম্ সেক্কে জাদ্তুনে হবর্ পেবাক্ যে, মুয়ই লগেপ্রভু। 24 মুই জাদ ভিদিরেত্তুন্ তমারে নিগিলেই আনিম; বেক্ দেজ্চানিত্তুন্ মুই তমারে এগত্তর্ গুরিনে তমা নিজো দেজত্ ফিরেই আনিম। 25 মুই তমা উগুরে সাব্ পানি ছিদি দিম্, আর সেক্কে তুমি সিজি অবা; তমার্ বেক্ কজরানি আর মূত্তিগুনোত্তুন্ মুই তমারে সিজি গুরিম। 26 মুই তমা ভিদিরে নুয়ো রিবেং আর নুয়ো মন দিম; মুই তমার্ দরমর রিবেঙান্ দূর্ গুরিনে নরম রিবেং দিম। 27 তমা ভিদিরে মুই মর্ আত্মাগান থিদেবর্ গুরিম আর এমন গুরিম যেনে তুমি মর্ বেক সুদোমানি পালঅ। সেক্কে তুমি মর্ রীদি-সুদোমানি মানি চলদে মনযোগি অবা। 28 তমা পূরোণি মানুচ্চুনোরে যে দেজ্চান মুই দুয়োং সিয়েনত্ তুমি বজত্তি গুরিবা; তুমি মঅ মানুচ্ অবা আর মুই তমা গোজেন ওম্। 29 তমার্ বেক অসিজিগানত্তুন্ মুই তমারে রোক্ষ্যে গুরিম। মুই তমারে বোউত্ খেত্-খেত্তি দিম আর তমা দেজত্ মুই আর ভাদরাত্ ন-পাদেম। 30 মুই গাজ গুলোগুলিগুন আর খেদর্ ফসলানি বাড়েই দিম যেনে ভাদরাদর্ কারনে তুমি জাদ ভিদিরে আর অসর্মান ন-অ। 31 সেক্কে তমার্ ভান্ন্যেই আচার-বেবহার আর বজং কামানির্ কধা তমাত্তুন্ ইদোত্ উদিবো আর নিজোর্ পাপ আর জঘন্য কামানিত্তে নিজে নিজোরে ঈচ্ গুরিবা। 32 তুমি হবর্ পেবা যে, মুই তমাত্তে এ কামান গুরিবাত্তে ন-যাঙর্। ও ইস্রায়েল জাদ, তমা আচার-বেবহারত্তে তুমি লাজেবা আর সুদোমু অবা। 33 “‘মুই প্রভু লগেপ্রভু কঙর্, যেদিন্যে মুই বেক্ পাপত্তুন্ তমারে সাব্ গুরিম সেদিন্যে মুই শঅরানিত্ মানুচ্চুনোরে বজত্তি গোরেম্ আর ভস্ত ওইয়্যে জাগানি আরঅ বানা অবঅ। 34 মান্জ্যে যানা-এযানা গুরিবার অক্তত্ যে দেজ্চানরে ভস্ত ওই পড়ি থাগদে দেগিদাক্ সেই দেজত্ চাষ কাম চলিবো। 35 তারা কবাক্, এ দেজ্চান আঘে ভস্ত ওই পড়ি এলঅ, মাত্তর্ ইক্কিনে সিয়েন এদন বাগান ধোক্ক্যেন ওইয়্যে; তার শঅরানি ভস্ত, মানুচ্ নেইয়্যে আর ভাংগাচুরো ওই পোজ্যে এলঅ, মাত্তর্ ইক্কিনে সিয়েনি দেবাল-ঘিজ্যে আর বজত্তি গুরিবার জাগা ওইয়্যে। 36 সেক্কে তমা চেরোকিত্তে বাঁজি থেইয়্যে জাদ্তুনে হবর্ পেবাক যে, মুই লগেপ্রভু ভাঙা জাগানি আরঅ তুল্যং আর পড়ি থেইয়্যে জাগাত্ আরঅ গাজ লাগেয়োং। মুই লগেপ্রভু এ কধাগান কোইয়োং আর মুই সিয়েনই গুরিম।’” 37 সে পরেদি প্রভু লগেপ্রভু মরে কোইয়্যেদে, “মুই আর একবার ইস্রায়েল জাদরে মইধু কোজোলী গুরিবাত্তে কোম্ আর তারার্ কোজোলী মজিম্ মুই ভেড়া পাল ধোক্ক্যেন তারার মানুচ্চুনোরে গুণি ন-পুড়েইয়্যে গুরিম। 38 যিরূশালেমত্ ঠিগ্ পরবর্ সময়োত্ যেবাবোত্যে উৎসর্বর ভেড়ালোই ভরি যান্ সেবাবোত্যে ভস্ত ওই যেইয়্যে শঅরানি বোউত্ মানুজে ভরি যেবাক্। সেক্কে তারা হবর্ পেবাক্ যে, মুয়ই লগেপ্রভু।” |
Copyright © 2021 Bangladesh Bible Society
Bangladesh Bible Society