যিহিষ্কেল 23 - Chakma Bibleবেভিচারিণি দ্বিবোন 1 পরেদি লগেপ্রভু মরে কলঅ, 2 ও মান্জ্যর্ পুয়োবো, দ্বিবে মিলে এলাক্ যিগুনে একই মা। 3 কম্ বয়জত্তুন্ ধুরি মিসর দেজত্ তারা বেশ্যেগিরি গুরিদাক্। সে দেজত্ মানুচ্চুনে তারার্ বুগ্কুন ধুরিনে কির্বো গুরিনে তারার্ খাটি গাবুরো জিংকানিগান বর্বাত্ গোজ্যন্। 4 তারা ভিদিরে দাঙর্বো নাঙান এলঅ অহলা আর তা বোন্নো নাঙান এলঅ অহলীবা। পরেদি তারা মর্ অলাক্ আর ঝি-পুয়োর্ জর্ম দিলাক্। অহলা অলঅ শমরিয়াত্ আর অহলীবা অলঅ যিরূশালেমত্। 5-6 অহলা মর্ থাগদে সিনেলী গুরিলো। তা লাঙেগুনো উগুরে, অত্তাৎ আসিরিয়গুনো উগুরে তে জুড়্বোত্যে। ইগুনে এলাক্ য়েল্ কাবড় উজ্যে যোদ্ধা, শাজন্গুরিয়্যে আর সেনাপতি; বেক্কুনে দোল্ গাবুজ্যে আর ঘোড়াচালেয়্যে। 7 বেক্ সেরা সেরা আসিরিয়গুনো ইধু তে নিজোরে বেশ্যে ইজেবে দান গোজ্যে; যিগুনোরে তে কামনা গুরিদো তারার্ বেক মূত্তিগুন দিইনে তে নিজোরে অসিজি গোজ্যে। 8 মিসরত্ যে বেশ্যেগিরি তে আরাম্ভ গোজ্যে সিয়েন তে ছাড়ি ন-দে; সিদু তার কম্ বয়জত্ মান্জ্যে তা সমারে ঘুম যেইনে তার খাটি গাবুজ্যে জিংকানিগান বর্বাত্ গোজ্যন্ আর তারার্ কামনাগান তা উগুরে ঢালি দিয়্যে। 9 সেনত্তে মুই তারে তা লাঙুনো আঢত্, অত্তাৎ যিগুনোরে তে কামনা গুরিদো সেই আসিরিয়গুনো আঢত্ ইরি দিলুং। 10 তারা তারে লাংটা-বাংটা গুরিনে তা পুয়ো-ছাগুনোরে কাড়ি নিইনে লাম্বা ছুরিলোই তারে মারে ফেলেলাক্। তার সাজাগান পৌইদ্যেনে মিলেগুনে কুয়োকি গরা ধুরিলাক্। 11 তা বোন্নো অহলীবায়ো ইয়েনি বেক্কানি দেগিলো, তো তে তার্ পেরেত্যে আর বেশ্যেগিরিত্ তা বোন্নোত্তুন্ আরঅ বেশ্ ভান্ন্যেই অলঅ। 12 তার্অ আসিরিয়গুনো উগুরে কামনা অলঅ; তারা এলাক্ শাজন্গুরিয়্যে আর সেনাপতি; তারা দোল্ কাবড় উজ্যে যোদ্ধা আর ঘোড়াচালেয়্যে; তারা বেক্কুনে দোল্ গাবুজ্যে। 13 মুই দেগিলুং তেয়ো নিজোরে অসিজি গুরিলো; দ্বিজনে একই পধেদি গেলাক্। 14 মাত্তর্ অহলীবা তা বেশ্যেগিরিত্ আরঅ উজেই গেলঅ। তে দেবাল উগুরে রাঙা রঙয়র্ ছাবেয়্যে বাবিলীয় মরত্তুনোর্ ফোতুগুন্ দেগিলো। 15 কমরত্ তারার্ কমর্ বিজোনি, মাঢা উগুরে খবং; তারা বেক্কুন্ চাদে বাবিল দেজর্ সেনাপতিগুনো ধোক্ক্যেন্। 16 তারারে দেগানার্ লগে লগে তারা উগুরে তার কামনা জাগিলো আর তে বাবিলোত্ তারা ইধু মানুচ্ পাদেল। 17 সেক্কে বাবিলীয়গুনে তাইধু এইনে তা সমারে বিচ্ছোনত্ গেলাক্ আর সিনেলী গুরিনে তারে অসিজি গুরিলাক্। তারাল্লোই অসিজি অনার্ পরেদি তে তারারে ঈচ্ গরা ধুরিলো। 18 তে খুলোমেলাগুরিনে যেক্কে তার বেশ্যেগিরি চালা ধুরিলো আর তার্ লাংটা-বাংটাগান ফগদাং গুরিলো সেক্কে মুই তারে ঈচ্ গুরিলুং, যেবাবোত্যে মুই তা বোন্নোরে ঈচ্ গোজ্যং। 19 গাবুজ্যে কালত্ যেক্কে তে মিসরত্ বেশ্যে এলঅ সে দিনুনোর্ কধা ইদোত্ তুলিনে তে আরঅ বেশ্ বেভিচের্ গরা ধুরিলো। 20 সিদু তে এমন অমকদ পেরেত্যে মানুচ্চুনোরে আজা গুরিদো যিগুনে এলাক্ গাধা আর ঘোড়া ধোক্ক্যেন্ পেরেত্যে। 21 ও অহলীবা, তর্ গাবুজ্যেকালত্ মিসর মানুচ্চুনে তঅ বুক্কো ধুরিনে আদর্ গুরিনে তর্ গাবুরিগান বর্বাত্ গোজ্যন; ইক্কিনে তুই আরঅ সেই মানুচ্চুনো সমারে সিনেলী গুরিবাত্তে চাজ্। 22 সেনত্তে মুই প্রভু লগেপ্রভু কঙর্, তর্ যিদুক্কুন লাঙরে তুই ঈচ্ গোজ্যস্ মুই তারারে তঅ বিরুদ্ধে উচ্চোমি তুলি দিম আর চেরোকিত্তেত্তুন্ মুই তারারে তঅ বিরুদ্ধে আনিম্। 23 তারা অলাক্ বাবিলীয়গুন, বেক্ কল্দীয়গুন, পকোদ, শোয়া আর কোয়ার মানুচ্চুন আহ্ তারা সমারে বেক্ আসিরিয়গুন। তারা বেক্কুনে দোল্ দোল্ গাবুজ্যে; তারা বেক্কুনে শাজন্গুরিয়্যে, সেনাপতি, রথর কামগুরিয়্যে, দাঙর্ পোজিশন মানুচ্ আর ঘোড়াচালেয়্যে। 24 তারা আত্যের্, রথ, গাড়ি আর মান্জ্যর এক্কো দাঙর্ দল্লোই তঅ বিরুদ্ধে এবাক্। তারা চিগোন আর দাঙর্ ঢাল্লোই মাঢা রোক্ষ্যে গুরিবার তোক্ক্যে পিনিনে তরে ঘিরিবাক্। সাজা পেবাত্তে মুই তরে তারা আঢত্ তুলি দিম আর তারা তারার্ বিচেরর্ সুদোম্ মজিম তরে সাজা দিবাক্। 25 মর্ মনর্ জ্বালা মুই তঅ বিরুদ্ধে কামত্ লাগেম বিলিনে তারা অমকদ রাগ গুরিনে তল্লোই বেবহার গুরিবাক্। তারা তর্ নাগ-কান কাবি দিবাক্ আর তর্ বাদবাগি মানুচ্চুনোরে মারে ফেলেবাক্। তারা তঅ ঝি-পুয়োগুনোরে নেযেবাক্, আর তর্ বাদবাগি মানুচ্চুন আগুনোত্ পুড়ি মুরিবাক্। 26 তারা তর্ কাবড়-চুগোরানি খুলি ফেলেবাক্ আর তর্ দোল্ গহনানি নেযেবাক্। 27 যে বেভিচের্ আর বেশ্যেগিরি তুই মিসরত্ আরাম্ভ গোজ্যস্ সিয়েন মুই এবাবোত্যেগুরি বন্ধ গুরি দিম। সেক্কে তুই সে মানুচ্চুনো ইন্দি রিনি ন-চেবে আর মিসররে আর্ মনত্ ন-রাগেবে। 28 তুই যিগুনোরে ঈচ্ গরচ্, যিগুনোর ইন্দিত্তুন্ তুই ফিজ্যস্ তারা আঢত্ মুই তরে তুলি দিম। 29-30 তারা তরে ঈচ্ গুরিবাক্ আর তর্ দুঘোর্ ফলুন নেযেবাক্। তারা তরে লাংটা-বাংটা আর খালি গুরি থোই যেবাক্। তর্ বেশ্যেগিরির্ লাজানাগান সেক্কে ফগদাং অবঅ। তর্ বেভিচের্ আর বেশ্যেগিরির কারনে ইয়েনি তঅ উগুরে এবঅ, কিত্যে তুই জাদ্তুনো লগে বেভিচের্ গোজ্যস্, অত্তাৎ তারার্ মূত্তিগুন দিইনে নিজোরে অসিজি গোজ্যস্। 31 তুই তর্ বোন্নোর্ পধেদি যেইয়োচ্; সেনত্তে সিয়েনর্ গলস্চো মুই তঅ আঢত্ তুলি দিম। 32 “মুই প্রভু লগেপ্রভু কঙর্, তর্ বোন গলস্চোত্ তুই হেবে; গলস্চো দাঙর্ আর গভিন্। সিয়োত্ বেশ্ ধরে বিলিনে সিয়োত্তুন হেইনে তুই ঈচ্ গরা আর ঠাট্টা গরা হেইয়্যে মান্জ্য ধোক্ক্যেন অবে। 33 তুই দর্গরেপারা আর ভস্ত ওইয়্যে গলস্চত্তুন হেইনে, তর্ বোন শমরিয়ার গলস্চত্তুন হেইনে মাত্তল্ আর দুঘে ভরা অবে। 34 তুই সিবেত্ হেবে, লেই-লেই হেবে; তুই সিবে ভাঙিনে কট্টা কট্টা গুরিবে আর নিজো বুক্কো ফাদি ফেলেবে। ইয়েন অলঅ মর্ বিচেরর্ রায়। 35 তুই মরে ভুলি যেইয়োচ্ আর তঅ পিজেদি মরে ঠিলি দুয়োচ্ বিলিনে তত্তুন্ তর্ বেভিচের্ আর বেশ্যেগিরির ফল ভুগো পুরিবো। মুই প্রভু লগেপ্রভু এ কধাগান কঙর্।” 36 ইয়েনর্ পরেদি লগেপ্রভু মরে কলদে, ও মান্জ্যর পুয়োবো, তুই কি অহলা আর অহলীবার বিচের্ গুরিবাত্তে যুক্কোল্? সালে তুই তারার্ জঘন্য কামর্ কধানি তারারে জানা। 37 তারা বেভিচের্ গোজ্যন আর তারা আঢত্ লো আঘে। তারার্ মূত্তিগুন পূজো গুরিনে তারা বেভিচের্ গোজ্যন; এমন্ কি, মত্তে জর্ম দিয়্যে ঝি-পুয়োগুনোরে তারা মূত্তিগুনোর হানা ইজেবে আগুনোত্ পুড়িনে উৎসর্ব গোজ্যন্। 38 ইয়েনি বাদেয়ো সেই একই সময়োত্ তারা মর্ ঘরান অসিজি গোজ্যন্। তারা মর্ জিরেবার দিনুনোর সুদ্ধো-সাংগগান রোক্ষ্যে ন-গরন্। 39 সেই একই দিনোত্ তারা তারার্ মূত্তিগুন ইধু তারার্ ঝি-পুয়োগুনোরে জবাই গোজ্যন্ আর মঅ ঘরত্ সোমেইনে সিগুন অসিজি গোজ্যন্। তারা মঅ ঘর ভিদিরে এ কামানি গোজ্যন্। 40 ইয়েনিবাদে অহলা আর অহলীবা দূর দেজত্তুন্ মানুচ্চুনোরে আনিবাত্তে মানুচ্ পাদেল। সেই মানুচ্চুনে আজলে পর্ তারা নিজোত্তে গাদিলাক্, চোগোত্ কাজল্ গুলিলাক্ আর গয়না পিনিনে নিজোরে সাজেলাক্। 41 সে পরেদি তারা দোল্ বিচ্ছোনত্ বজিনে তা মুজুঙোত্ এক্কান টেবিল্ পাদিনে সিয়েন উগুরে মর্ আগর্বাট্টি আর তেলান্ রাগেলাক্। 42 তারার্ চেরোকিত্তে এলঅ চিদেচজ্জা নেইয়্যে, রঅ চাজ্যে মানুচ্চুনোর জোল্। তারা ভিদিরে এলাক্ চিগোন মনর্ মানুচ্ আর ধূল্যেচর-চাগালার মদখুরুন্। তারা সেই দ্বিবোন আঢত্ বালা পিনেলাক্ আর তারা মাঢাত্ দিলাক্ দোল্ মুকুট। 43 সেক্কে বেভিচের্ গুরিনে বল্পোজ্যে মিলেগুনো পৌইদ্যেনে মুই কলুং, ইক্কিনে সেই মানুচ্চুনে বেশ্যে ইজেবে তারে বেবহার গোরোদোক্ আর তেয়ো তারা লগে বেভিচের্ গোরোক্। 44 মান্জ্যে যেবাবোত্যে বেশ্যে লগে ঘুম যান সেবাবোত্যে গুরি তারা অহলা আর অহলীবা লগে, সেই কামুক মিলেবো সমারে ঘুমেলাক্। 45 মাত্তর্ গম্ মানুচ্চুনে বেভিচের্ আর লো ঝরানার সাজা সেই মিলেগুনোরে দিবাক্, কিত্তে তারা বেভিচারিনী আর তারা আঢত্ রোইয়্যেদে লো। 46 তুই তারা বিরুদ্ধে একদল মানুচ্ নেযা আর দর্গরেপারা আহ্ ডাগেদ আঢত্ তারারে তুলি দুয়ো। 47 সেই মানুচ্চুনে তারারে শিল্লোই ঢলা মারিনে মারে ফেলেবাক্ আর তলোয়ারলোই তারারে কট্টা কট্টা গুরিনে কাবিবাক্। তারা তারার্ ঝি-পুয়োগুনোরে মারে ফেলেবাক্ আর তারার্ ঘরানি পুড়ি দিবাক্। 48 “ও অহলা আর অহলীবা, এবাবোত্যেগুরি মুই দেজ ভিদিরে ভান্ন্যেই কামানি শেজ্ গুরি দিম যেনে বেক্ মিলেগুনে উজিয়ার্ ওই পারন আর তমা ধোক্ক্যেন ভান্ন্যেই কাম্ ন-গরন্। 49 তমার্ ভান্ন্যেই কামর্ ফল তমাত্তুন্ ভুগো পুরিবো আর মূত্তিপূজোর্ পাপর ফল ভুগো পুরিবো। সেক্কে তুমি হবর্ পেবা, মুয়ই প্রভু লগেপ্রভু।” |
Copyright © 2021 Bangladesh Bible Society
Bangladesh Bible Society