যিহিষ্কেল 12 - Chakma Bible

চিহ্নোর মাধ্যমে বন্দীদজার্ কধা কনা

¹ পরেদি লগেপ্রভুর এ কধাগান মইধু ফগদাং অলঅ,

² ও মান্‌‌জ্যর পুয়োবো, তুই এক্কো উল্লোমী জাদ ভিদিরে বজত্তি গরর্। তারার্ চোগ আঘে মাত্তর্ তারা ন-দেগন্, কান আঘে ন-শুনোন্, কিত্যে তারা এক্কো উল্লোমী জাদ্।

³ “সেনত্তে ও মান্‌‌‌জ্যর পুয়োবো, তুই যেন দূরোত্ বন্দী ওই যর্ সেবাবোত্যেগুরি তর্ পযাপিরানি বানি নেযা আর তারা চোগো মুজুঙোত্ দিনোত্ আদা মার্; তুই যিয়েনত্ আগচ্ সিয়েনত্তুন্ অন্য জাগাত্ যাহ্। তারা যে উল্লোমী জাদ্ অয়ত তারা সিয়েন বুঝি পারিবাক্।

⁴ দূরোত্ বন্দী ওই যেবাত্তে তর্ গুচ্চ্যেয়ে পযাপিরানি দিনোত্ তারা চোগো মুজুঙোত্ বারেদি নিগিলেবে। সে পরেদি সাজোন্যে অক্তত্ দূরোত্ বন্দী ওইনে যাইদ্যে ধোক্ক্যেন গুরি তারা চোগো মুজুঙোত্ আঢা মারিবে।

⁵ তারা চোগো মুজুঙোত্ দেবালত্ গাদ্ খুড়িনে তঅ পযাপিরানি সিবে ভিদিরেদি নিগিলেবে।

⁶ পযাপিরানি তারা চোগো মুজুঙোত্ কানাত্ তুলি নিবে আর আন্ধার ভিদিরে সিয়েনি নিগিলেবে। তঅ চোগ্‌কুন নাঢি রাগেবে যেনে তুই তঅ দেজর্ মাদিগান ন-দেগচ্, কিত্যে ইস্রায়েল জাদত্তে মুই তরে এক্কান চিহ্নো ধোক্ক্যেন গোজ্যং।”

⁷ মরে যিয়েনি উগুম গরা অলঅ সেবাবোত্যে মুই কাম্ গুরিলুং। দূরোত্ বন্দী ওই যাইদ্যে ধোক্ক্যেন গুরি মুই মর্ পযাপিরানি দিনোত্ নিগিলেই আনিলুং। সে পরেদি সাজোন্যে আঢ্‌‌তোই দেবাল গাত্তো খুড়িলুং। তারা চোগো মুজুঙোত্ আন্ধারত্ মর্ পযাপিরানি মুই কানা উগুরে লোইনে আঢা ধল্লুং।

⁸ বেন্যেমাদান্ লগেপ্রভু মরে কলঅ,

⁹ ও মান্‌‌‌জ্যর পুয়োবো, উল্লোমী ইস্রায়েল জাদে কি তরে পুযোর্ ন-গরে, তুই কি গরর্?

¹⁰ তুই তারারে কঅ, প্রভু লগেপ্রভু কোইয়্যেদে, এই চিহ্নোগান যিরূশালেমর শাজন্‌গুরিয়্যে আর সিদুগোর্ ইস্রায়েলীয়গুনোত্তে।

¹¹ তুই তারারে কঅ, তুই তারা ইধু এক্কান চিহ্নো। তুই যেবাবোত্যে গুরিলে, তারা উগুরেয়ো সেবাবোত্যে গরা অবঅ। তারা বন্দী ওইনে দূরো দেজত্ যেবাক্।

¹² তারা ভিদিরে শাজন্‌গুরিয়্যেবো আন্ধারত্ তার পযাপিরানি কানাত্ তুলিনে নিগিলিবো আর দেবালত্ গাঢ্ কুড়ো অবঅ যেনে তে সিবে ভিদিরেদি নিগিলিনে যেই পারে। তে তার্ চোগ্‌কুন নাঢিবো যেনে তে তা দেজর্ মাদিগান ন-দেগে।

¹³ মুই তাত্তে জাল্ পাদিম্ আর তে মঅ ফালত্ পড়িবো। মুই তারে বাবিলীয়গুনোর দেজত্ বাবিলোত্ নেযেম, মাত্তর্ তে সিয়েন রিনি ন-চেবঅ; সিয়োদোই তে মুরি যেবঅ।

¹⁴ মুই তার চেরোকিত্তে বেক্কুনোরে, অত্তাৎ তার কামগুরিয়্যেগুনোরে আর তার বেক্ সৈন্যদলুনোরে চেরোকিত্তে ছিদি দিম্ আর খুলো তলোয়ারলোই মুই তারারে লোড়েম্।

¹⁵ “মুই যেক্কে তারারে নানান্ জাদত্ আর দেজ ভিদিরে ছিদি দিম্ সেক্কে তারা হবর্ পেবাক্ যে, মুয়ই লগেপ্রভু।

¹⁶ মাত্তর্ তারা ভিদিরেত্তুন্ কিজু মান্‌জ্যরে মুই যুদ্ধোত্, ভাদরাদত্ আর ভানা আঢত্তুন্ বাঁজেম্, যেনে তারা যিদু যেদাক্ সাৎ সিদুগোর্ বেক জাদ্‌তুনো ইধু তারার্ বেক জঘন্য অভ্যাসর্ কধানি স্বিগের্ গরন। সেক্কে তারা হবর্ পেবাক্ যে, মুয়ই লগেপ্রভু।”

¹⁷ সে পরেদি লগেপ্রভু মরে আরঅ কোইয়্যেদে,

¹⁸ “ও মানজ্যর্ পুয়োবো, তুই দরে গির্‌গিরাদে গির্‌গিরাদে তঅ হানা আর পানিগান হা।

¹⁹ তুই দেজ মানুচ্চুনোরে কঅ, ইস্রায়েল দেজর্ যিরূশালেম আদাম্মেগুনো পৌইদ্যেনে প্রভু লগেপ্রভু কোইয়্যেদে, ‘তারা দোরে দোরে তারার্ হানাগানি হেবাক্ আর হতভম্ব ওইনে পানি হেবাক্, কিত্যে সিদুগোর্ আদাম্মেগুনোর অত্যেচারর্ কারনে তারার্ দেজ্‌চান খালি ওইনে পড়ি থেবঅ।

²⁰ মানুজে ভরা শঅরানি ভস্তর্ জাগা ওই থেবঅ আর দেজচান মানুচ্ নেইয়্যে অবঅ। সেক্কে তুমি হবর্ পেবা যে, মুয়ই লগেপ্রভু।’ ”

²¹ সে পরেদি লগেপ্রভু মরে কলঅ,

²² “ও মানজ্যর্ পুয়োবো, ইস্রায়েল দেজত্ ইয়েন কিবাবোত্যে দাগ কধা রোইয়্যে, ‘দিনুন্ কাদি যায় আর পত্তি দর্শনই বিফল অয়’?

²³ তারারে কঅ, প্রভু লগেপ্রভু কোইয়্যেদে, ‘মুই সেই মুয়ো কধাগান বাদ্ দি দিম; ইস্রায়েলত্ সেই কধাগান আর কনজন ন-কবাক্।’ সিয়েনর বদলে তারারে কঅ, ‘দিন এই যেইয়্যে, ইক্কিনে পত্তি দর্শন ফলিবো।

²⁴ ইস্রায়েল মানুচ্চুনো ভিদিরে মিজে দর্শন আর হুজি গুরিবার্ গণানা-ঝাড়ি দেনা আর ন-থেবঅ।

²⁵ সেক্কে মুই লগেপ্রভু যিয়েনি কোম্ সিয়েনি ফলিবো, দিরি ন-অবঅ। ও উল্লোমী জাদ্‌তো, মুই যিয়েনি কঙর্ সিয়েনি তমা সময়োত্ ফোলেই দিম্। মুই প্রভু লগেপ্রভু এ কধাগান কঙর্।’”

²⁶ পরেদি লগেপ্রভু মরে কলঅ,

²⁷ “ও মান্‌জ্যর্ পুয়োবো, ইস্রায়েলীয়গুনে কধন্দে, তুই যে দর্শনান্ দেখ্যচ্ সিয়েন ইক্কেত্তুন্ ধুরি বোউত্ বজরর্ কধা, আর যে আগাম্ কধা কর্ সিয়েন দুরোর্ আগাম্ কধা।

²⁸ সেনত্তে তুই তারারে কঅ, প্রভু লগেপ্রভু কোইয়্যেদে, ‘মর্ কনঅ কধা ফলিবাত্তে আর দেরি নেই; মুই যিয়েনি কোম্ সিয়েনি ফলিবো। মুই প্রভু লগেপ্রভু এ কধাগান কঙর্।’”