ইষ্টের 5 - Chakma Bibleরাজার ইদু ইষ্টেরর্ কোজোলি 1 ইষ্টেরে তিন দিনোর্ দিন্নোত্ রাণীর পোজাক্ উরিনে রাজার ঘর মুজুঙোত্ রাজঘর ভিদিরে দরবারত্ যেইনে থিয়্যেল। রাজা দোরান ইন্দি মু গুরিনে সে ঘর ভিদিরে সিংহাসনত্ বুয়োই এলঅ। 2 তে রাণী ইষ্টেররে দরবারত্ থিয়্যেই থাগদে দেগিনে তা উগুরে হুজি ওইনে তা আঢর্ সনার লুদিক্কোয়ো তাইন্দি বাবেই দিলো। সেক্কেনে ইষ্টেরে উজেই যেইনে সে লুদিক্কোর মাঢাবো ধুরিলো। 3 রাজা পুযোর্ গুরিলো, “রাণী ইষ্টের, কি বেপার? তুই কি চাজ্? যুনি রেজ্যর অদ্দেক্অ অয় সিয়েন্অ তরে দিয়্যে অবঅ।” 4 জোবত্ ইষ্টেরে কলঅ, “মহারাজ যুনি গম্ বিলিনে মনে গরচ্ সালে তত্তেই এচ্ছ্যে মুই যে হানাগান্ যুক্কোল্ গোজ্যং সিয়েনত্ মহারাজে আর হামনে যেনে আঝিল্ অন্।” 5 সেক্কে রাজা এ উগুমান দিলো, “ইষ্টেরর্ কধামজিম যেনে কাম্ অয় সেনত্তেই ইক্কিনে হামনরে আন।” সেনত্তে ইষ্টেরে যে হানাবো যুক্কোল্ গোজ্যে রাজা আর হামনে সিয়েনত্ গেলাক্। 6 আংগুর-রস খাদে খাদে রাজা ইষ্টেররে পুযোর্ গুরিলো, “তুই কি চাজ্? তরে সিয়েন্ দিয়্যে অবঅ। তর্ কোজোলিগান কি? যুনি রেজ্যর্ অদ্দেক্অ অয় সিয়েন্অ তরে দিয়্যে অবঅ।” 7 জোবত্ ইষ্টেরে কলঅ, “মঅ কোজোলিগান আর আওজ্চান ইয়েন্- 8 মহারাজে যুনি মরে দোয়্যের্ চোগেন্দি দেগচ্ আর মঅ কোজোলিগান্ রাগেবাত্তে চাজ্ আর মঅ আওজ্চান পূরেই দিবাত্তে চাজ্ সালে এজেত্তে কেল্যে মুই যে হানাগান্ যুক্কোল্ গুরিম্ সিয়েনত্ যেনে মহারাজে আর হামনে এজঅ। সেক্কে মুই মহারাজর প্রশ্নগানির্ জোব্পান দিম্।” মর্দখয় উগুরে হামনর রাগ 9 সেদিন্যে হামনে হুজি ওইনে হুজিয়ে রাজিয়ে বারেন্দি গেলঅ। মাত্তর্ তে যেক্কেনে রাজঘরর্ গেদোত্ মর্দখয়রে দেগিলো, আর দেলদে, মর্দখয় তারে দেগিনে উদিনে ন-থিয়্যেল বা আর কনঅ সর্মান্অ ন-দেগেল সেক্কে মর্দখয় উগুরে তার্ অমকদ রাগ অলঅ। 10 মাত্তর্ তো হামনে নিজোরে দোঙেইনে ঘরত্ গেলঅ। ঘরত্ যেইনে তে তার্ সমাজ্যেগুনোরে আর তা মোক্কো সেরশরে ডাগি আনিলো। 11 সে পরেন্দি তে তারার্ ইদু তার্ ধন-সম্পদর্ কধা, তা পূঅগুনোর্ কধা, যেদক্কানি উপায়ে রাজা তারে সর্মান দেগেয়্যে সিয়েনির কধা আর কেধোক্কেন্ গুরিনে তারে অন্য দাঙর্ পোজিশনর্ মানুচ্চুনোত্তুন্ আর অফিসারুনোত্তুন্ উগুরে তুল্যে সে কধানি বার্বো গুরিনে কুয়ো ধুরিলো। 12 হামনে কলঅ, “বানা সিয়েনি নয় রাণী ইষ্টেরে যে হানাগান্ দিয়্যে সিয়েনত্ মুই বাদে আর কনজনরে রাজার লগে বাত্যে ন-অয়। আরঅ তে এযেত্তে কেল্যেয়ো রাজার লগে মরে বাত্যেয়্যে। 13 মাত্তর্ যেক্কেনে সে যিহূদী মর্দখয়রে মুই রাজঘরর্ গেদোত্ বোই থাগদে দেগং সেক্কে ইয়েনিত্অ মত্তুন্ গম্ ন-লাগিদো।” 14 সেক্কে তা মোক্কো সেরশে আর তা সমাজ্যেগুনে তারে কলাক্, “তুই পঞ্চাশ আত্ অজল্ এক্কান্ ফাসি দিবার্ গাজ্ বানা আর বেন্যেমাদান্ রাজার অনুমতি লোইনে মর্দখয়রে সিয়েন উগুরে ফাসি দিবার বেবস্থা গর্। সে পরেন্দি হুজিয়ে রাজিয়ে রাজার লগে হানাত্ যাহ্।” এ কধাগান হামনর গম্ লাগিলো আর তে সেই ফাসি দিবার্ গাজ্চুয়ো বানেল। |
Copyright © 2021 Bangladesh Bible Society
Bangladesh Bible Society