ইষ্টের 3 - Chakma Bibleযিহূদীগুনোরে ভস্ত গুরিবাত্তে হামনর কুজুরোমি 1 এ ঘটনাগানর পরেন্দি রাজা অহশ্বেরশে অগাগীয় হম্মদাথার পূঅ হামনরে রেজ্যর অন্য দাঙর্ পোজিশনর্ মানুচ্চুনোত্তুন্ বেশ্ দাঙর্ পোজিশন্ দিইনে সর্মানিত গুরিলো। 2 রাজঘরর্ গেদোত্ থেইয়্যে চুগিদারুনে আদু পাদিনে হামনরে সর্মান দেগেদাক্, কিত্যে রাজা তা পৌইদ্যেনে সেধোক্কেন্ উগুম্ দিয়্যে। মাত্তর্ মর্দখয়ে আদুয়ো ন-পাদিদো বা তারে সর্মান্অ ন-দেগেদ। 3 সেক্কে রাজঘরর্ গেদোর্ চুগিদারুনে মর্দখয়রে কলাক্, “রাজার উগুম্ তুই কিত্যে ন-মানচ্?” 4 দিনকে দিন তারা তারে কলেয়ো তে সিয়েনি মানদে রাজী ন-অলঅ। সেনত্তেই তারা হামনরে সে কধাগান জানেলাক্। তারা দেগিবাত্তে চেলাক্ মর্দখয়র এ বেবহারান্ গ্রাজ্য গরা অবঅ নাহি, কিত্যে তে যে এক্কো যিহূদী সে কধাগান তে তারারে কোইয়্যে। 5 মর্দখয় আদুয়ো ন-পাদে আর তারে সর্মান্অ ন-দেগায় হবর্ পেইনে হামনে অমকদ রাগ্ গুরিলো। 6 মাত্তর্ মর্দখয়র জাদ পৌইদ্যেনে হবর্ পেইনে বানা মর্দখয়রে মারে ফেলেবাত্তে এক্কান্ মামুলি বেপার্ বিলিনে তে মনে গুরিলো। সিয়েনর বদলে তে এক্কান্ পধ তোগা ধুরিলো যেনে অহশ্বেরশর পুরো রেজ্যগান ভিদিরেত্তুন্ মর্দখয়র মানুচ্চুনোরে, অত্তাৎ যিহূদীগুনোরে ভস্ত গুরি ফেলেই পারে। 7 রাজা অহশ্বেরশর রাজাগিরর্ বার বজরর্ পত্তম্ মাজত্, অত্তাৎ নীষণ মাজত্ এক্কো দিন আর মাস বেঈ লবাত্তে মানুচ্চুনে হামনর মুজুঙোত্ পূর, অত্তাৎ চাম্বা চাহ্ ধুরিলাক্। সেক্কে বার মাজর্, অত্তাৎ অদর মাজ বেপারে চাম্বা উদিলো। 8 হামনে সেক্কে রাজা অহশ্বেরশরে কলঅ, “তর্ রেজ্যর্ পুরো জাগানর্ নানান্ জাদ ভিদিরে এক্কো জাদ ছিদি পোজ্যে। অন্য জাদ্তুনোত্তুন্ তারার্ সুদোমানি যুদো আর তারা রাজার সুদোমানি ন-মানন্। সেনত্তে তারারে বাঁজিবাত্তে দেনাগান্ রাজার পক্ষে গম্ ন-অবঅ। 9 রাজার যুনি গম্ বিলিনে মনে অয় সালে তারারে ভস্ত গুরি ফেলেবাত্তে এক্কান্ উগুম্ জারি গরা ওক্। সেক্কে রাজ-ভান্ডালত্ রাগেবাত্তে রাজার্ কাম্ পরিচালনাগুরিয়্যেগুনোর্ আঢত্ মুই তিনশঅ নব্বই টন রুবো দিম্।” 10 রাজা সেক্কেনে নিজো আঙুলোত্তুন্ দস্তক্ দিবার্ আংটিবো খুলিনে যিহূদীগুনোর শত্রু অগাগীয় হম্মদাতার পূঅ হামনরে দিলো। 11 রাজা হামনরে কলদে, “টেঙায়ো তর্ আর মানুচ্চুন্অ তর্; সেনত্তেই সেই টেঙাগুন্ আর মানুচ্চুনোরে নেযেইনে তর্ যিয়েন্ গম্ বিলিনে মনে অয় সিয়েনই গর্।” 12 সে পরেদি পত্তম মাজর্ তের দিনোত্ রাজার লিগিয়্যেগুনোরে ডাগা অলঅ। তারা পত্তি চাগালার্ অক্ষর আর পত্তি জাদর্ ভাষা মজিম্ হামনর বেক্ উগুমানি নানান্ রেজ্যত্ আর চাগালার্ শাজন্গুরিয়্যেগুনো ইদু আর নানান্ জাদর্ নেতাগুনো ইদু লিগিনে জানেলাক্। সিয়েনি রাজা অহশ্বেরশর নাঙে লেগা অলঅ আর রাজার নিজো আংটিবোলোই সীলমর্ গরা অলঅ। 13 রাজার পুরো চাগালাগানিত্ হবর্ বোইয়্যেগুনোরে দিইনে চিদি পাদা অলঅ। সে চিদিগানিত্ উগুম্ দিয়্যে অলঅ যেনে অদর নাঙে বার মাজর্ তের দিনোত্ যিহূদীগুনোর বেক্ পূঅগুন-বুড়োগুন-চিগোন গুরোগুন-মিলেগুনোরে, অত্তাৎ বেক্কুনোরে ভস্ত গরা অয়, অত্তাৎ মারে ফেলা অয়, এক্কুবারে শেজ্ গুরি দিয়্যে অয়। ইয়েনিবাদেয়ো তারার্ পযাপিরানি যেনে লুদো অয়। 14 আইন ইজেবে সে উগুমোর্ নকল কপিবো পত্তি চাগালাত্ পাধেইনে বেক্ জাদর্ মানুচ্চুনোরে জানা অলঅ যেনে সেই দিনোত্তে তারা যুক্কোল অন্। 15 রাজার উগুম্ পেইনে হবর্-বোইয়্যেগুনে যাদিমাদি নিগিলি গেলাক্ আর শূশনর্ তাম্বুলত্অ সেই উগুমান্ জানেই দিয়্যে অলঅ। সে পরেন্দি রাজা আর হামনে আংগুর-রস হেবাত্তে বজিলাক্ আর ইন্দি শূশন শঅর ভিদিরে কিজিক্-কাজাগ্ পড়ি গেলঅ। |
Copyright © 2021 Bangladesh Bible Society
Bangladesh Bible Society