দ্বি’লম্বর বিররণ 34 - Chakma Bible

মোশির মরণ

¹ ইয়েনর্ পরেন্দি মোশি মোয়াবর সং জাগাত্তুন যিরীহোর উগুদোন্দি পিস্‌গা মুড়োমুড়ি ভিদিরে বেগত্তুন উজু নবো মুড়োবোত্‌ উদিলো। সিয়োত্তুন লগেপ্রভু তারে গোদা দেজ্‌ছান দেগেল। তে তারে গিলিয়দত্তুন দান সং বেক জাগায়ান,

² নপ্তালির বেক জাগায়ান, ইফ্রয়িম আর মনঃশির জাগায়ান আর পোঝিমোন্দি সাগরান সং যিহূদার বেক জাগায়ান দেগেল।

³ ইয়েনবাদে তে তারে নেগেভ আর খেজুর-শঅর যিরীহো আর তার কায়-কুরে যর্দন গাঙর দোগিনোন্দি সং জাগাত্তুন সোয়ব সং বেক চাগালাগান্ দেগেল।

⁴ সে পরেন্দি লগেপ্রভু তারে কলঅ, “ইয়েনই সেই দেজ্‌চান যিয়েন অব্রাহাম, ইসহাক আর যাকোব ইদু শমক্ গুরি কোইয়োং, ‘দেজ্‌চান মুই তর বংশধরুনোরে দিম্‌।’ দেজ্‌চান মুই তরে নিজোর চোগেদি চেবার সুযোগ দিলুং, মাত্তর গাঙ্‌ পার ওইনে তর্‌ সিয়েনত্‌ যেই ন-পারিবো।”

⁵ লগেপ্রভু যিয়েন কোইয়্যে সে মজিম লগেপ্রভুর চাগর মোশি সেই মোয়াব দেজত্‌ মুরি গেলঅ।

⁶ মোয়াব দেজর বৈৎ-পিয়োর ইদু যে কিঝিঙান্‌ এলঅ সিয়েনত্‌ লগেপ্রভু তারে গোর্ দিলো, মাত্তর তার গোরান্ যে কুদু সিয়েন এচ্চ্যে সং কনজনে ন-জানন্‌।

⁷ মুরি যেবার সময়োত্‌ মোশির বয়স এলঅ একশঅ কুড়ি বজর। সেক্কেয়ো তার দেগিবার দৃষ্টিগান কুমি ন-যায় বা তার কিয়্যের্ জোরানঅ কুমি ন-যায়।

⁸ ইস্রায়েলীয়গুনে মোয়াবর সংজাগানত্‌ ত্রিশ দিন সং মোশিত্যে কানাকুদি গুরিলাক। সে পরেন্দি তারার কানা-কুদি আর আবিলেচ্‌-ফগদাঙর সময় শেজ্‌ অলঅ।

⁹ নূনর পূঅ যিহোশূয় উগুরে মোশি আঢ্ বাজেয়্যে বিলিনে তে জ্ঞানদান গুরিয়্যে পবিত্র আত্মালোই পরিপূরোণ ওইয়্যে। সেনত্যে ইস্রায়েলীয়গুনে তার কধামজিম যাহ্ ধোজ্যন্‌ আর মোশির মাধ্যমে লগেপ্রভু তারারে যে উগুমান দিয়্যে সিয়েনি পালন গরা ধোজ্যন্‌।

¹⁰ এচ্চ্যে সং ইস্রায়েলীয়গুনো ভিদিরে মোশি ধোক্ক্যেন আর কনঅ ভাববাদীর জর্ম ন-অন যিবে ইদু লগেপ্রভু দাংগু ধোক্ক্যেন মুজুঙো-মুজুঙি কধা কধঅ।

¹¹ লগেপ্রভু মোশিরে মিসর দেজত্‌ ফরৌণ আর তার কামগুরিয়্যে আর তার গোদা দেজ উগুরে যে বেক আমক্‌ অবার্‌ চিহ্নোগানি আর কাম গুরিবাত্তে পাধেই দিয়্যে সেধোক্ক্যেন কাম্‌ আর কনজনে ন-গরন্‌।

¹² বেক্‌ ইস্রায়েলীয়গুনোর চোগো মুজুঙোত্‌ মোশি যে দাঙর বলান্‌ দেগেইয়্যে বা যেদক্কানি দর্‌গরে পারা কাম গোজ্যে সিয়েনি আর কনঅ জনে কনঅ দিনঅ ন-গরন্‌।