দ্বি’লম্বর বিররণ 3 - Chakma Bibleবাশনর রাজা ওগরর্ উদি যানা 1 ইয়েনর্ পরেন্দি আমি ঘুরিনে বাশন দেজ ইন্দি যেবার্ পথ্তান্ ধুরিনে উজেই গেলং। আমা সমারে যুদ্ধো গুরিবাত্তে বাশনর রাজা ওগ তার্ বেক্ সৈন্যগুন নেযেইনে নিগিলিনে ইদ্রিয়ী শঅরত্ এলাক। 2 সেক্কে লগেপ্রভু মরে কলঅ, তুই তারে ন-দোরেচ্, কিত্যে তারে আর তার্ দেজ্ছান আহ্ সৈন্যগুন মুই তমা আদত্ তুলি দুয়োং। তুই হিষ্বোনত্ বজত্তি গুরিয়্যে ইমোরীয়গুনোর্ রাজা সীহোনর্ অবস্থা যিয়েন্ গোজ্যচ্ ইবের্ অবস্থায়ো সেধোক্ক্যেন গুরিবে। 3 এধোক্ক্যেনগুরি আমার গোজেন লগেপ্রভু বাশনর রাজাবো ওগ আর তার্ বেক্ সৈন্যগুনোরে আমা আদত্ দি দিলো। আমি তারার্ বেক্কুনোরে মারে ফেলেয়্যেই; কাররে বাঁজেই ন-রাগেই। 4 সে অক্তত্ আমি তার্ বেক্ আদামানি আর শঅরানি গজক্ গুরি নেযেয়্যেই। তার্ ষায়েট্টান শঅর বেক্কানি আমি গজক্ গুরি নেযেয়্যেই; এক্কান বাদ ন রাগেই। গোদা অর্গোব চাগালাগান, অত্তাৎ বাশন ভিদিরে ওগর গোদা রেজ্যগান আমি গজক্ গুরি নেযেয়্যেই। 5 এ বেক্ শঅরানি অজল্ অজল্ দেবাল্লোই ঘিজ্যে এলঅ আর সিয়েনত্ এলদে গেট্ আর গেদোর লাগাড়া। ভালোক্কানি দেবাল বাদে আদামঅ সিয়েনত্ এলঅ। 6 আমি সেই বেক্ আদাম আর শঅরানি এক্কুবারে শেজ্ গুরি দিয়্যেই। হিষ্বোনর রাজা সীহোন উগুরে আমি যেধোক্ক্যেন গোজ্যেই সেধোক্ক্যেন গুরি তারার্ মরদ, মিলে আর ঝি-পূঅ আর পত্তি আদাম আর শঅরানি আমি এক্কুবারে শেজ্ গুরি দিয়্যেই। 7 মাত্তর্ সিয়েনত্তুন্ বেক্ য়েমানপালুন আর লুদে আন্যে পযাপিরানি আমি নিজোত্তে আন্যেই। 8 সে অক্তত্ আমি অর্ণোন গাঙত্তুন্ হর্মোণ মুড়োবো সং যর্দন গাঙর্ পূগেন্দি চাগালাগান এ দ্বিজন ইমোরীয় রাজার্ আদত্তুন্ লোই নেযেয়োং। 9 সীদোনীয়গুনে হর্মোণরে সিরিয়োণ বিলি কন্ আর ইমোরীয়গুনে কন্দে সনীর। 10 সেই সংজাগানর্ বেক্ আদামানি আর শঅরানি, বেক্ গিলিয়দ চাগালাগান আর বাশনর রাজা ওগর রেজ্যর্ সল্খা আর ইদ্রিয়ী শঅর্ সং গোদা বাশন দেজ্ছান আমি গজক্ গুরি নেযেয়্যেই। 11 রফায়ীয়গুনোর্ বাদবাগি মানুচ্চুনো ভিদিরে বানা বাশনর রাজা ওগয়ই বাঁজি এলঅ। তার্ লুয়োর্ বানেয়্যে ঘুম্ যেবার্ খাট্টান এলদে লাম্বান্দি প্রমাণ গোজ্যে আত্তোই নয় আত্ আর পাদাজ্যে চের্ আত্। সিয়েন্ এজঅ অম্মোনীয়গুনোর্ রব্বা শঅরত্ আঘে। জাগা-জোমি ভাগ গরানা 12 আমার্ অধিকার্ গোজ্যে জাগাত্তুন্ মুই সেক্কেনে অর্ণোন গাঙর্ ইদু অরোয়র শঅরর্ বারেন্দি উত্তোর মিক্কে চাগালাগান আর গিলিয়দর্ মুড়ো-মুড়ি চাগালার্ অদ্দেক্ আর সে জাগানর্ বেক্ আদামানি আর শঅরানি রূবেণ আর গাদ-গুট্টির মানুচ্চুনোরে দিলুং। 13 গিলিয়দ দেজর্ বাদবাগি ভাগ্কান্ আর রাজা ওগরে পুরো বাশন রেজ্যগান মুই মনঃশি-গুট্টির অদ্দেক মান্জ্যরে দিলুং। বাশন ভিদিরে বেক্ অর্গোব চাগালাগান্ রফায়ীগুনোর দেজ্ বিলিনে কুয়ো অদঅ। 14 যায়ীর নাঙে মনঃশির এক্কো বংশধর গশূরীয় আর মাখাথীয়গুনোর দুঝি সং পুরো অর্গোব চাগালাগান্ কারি লোইনে নিজোর্ নাঙ্ মজিম সিয়েনর্ নাঙান্ রাগেয়্যে। সেনত্তেই ইক্কিনে বাশনরে হব্বোৎ-যায়ীর বিলিনে কুয়ো অদঅ। 15 মুই মাখীররে গিলিয়দ চাগালাগান দিলুং। 16 মাত্তর্ গিলিয়দত্তুন্ অর্ণোন কিঝিঙো সং মোধ্যে দুঝির চিহ্নোগান সং বেক্ জাগাগান্ আর সিয়েনত্তুন্ অম্মোনীয়গুনোর্ দুঝি যব্বোক গাঙান্ সং মুই রূবেণ আর গাদ-গুট্টির মানুচ্চুনোরে দিলুং। 17 পোজিমেন্দি তারার্ শেজ্ দুঝিগান এলদে অরাবার্ যর্দন গাঙর্ যে ভাগ্কান কিন্নেরৎত্তুন পিস্গা মুড়োবোর্ কামাগানর্ তলেন্দি অরাবার দোজ্যে সাগরর্, অত্তাৎ ধূল্যে-সাগর সং যেয়েগোই সে ভাগ্কান। 18 সে পরেন্দি মুই তারারে কলুং, তমার গোজেন লগেপ্রভু এ জাগায়ান তমারে গজক্ গুরিবাত্তে দিয়্যে। মাত্তর্ তমা ভিদিরে যিগুনোর্ কিয়্যেত্ গং আঘে সেই বেক্ মানুচ্চুনোরে যুদ্ধোত্তে যুক্কোল্ ওইনে ইস্রায়েলীয় ভেইয়ুনোর্ আগে আগে গাঙান্ পার্ ওইনে যাহ্ পুরিবো। 19 মাত্তর্ তমারে যেদক্কানি আদাম আর শঅর্ দিয়্যে অলঅ সিদু তমার্ মোক্কুন, ঝি-পূঅগুন আর য়েমানপালুন রাগেইনে যেই পারিবা। মুই হবর্ পাং তমার্ য়েমান ভালোক্কুন্। 20 লগেপ্রভু যেদকদিন সং তমা ধোক্ক্যেন গুরি তমার্ ভেইয়ুনোরেয়ো জিরেবার্ সুযোগ নঅ-দে আর যর্দনর্ উই পারত্ যে দেজ্ছান তমা গোজেন লগেপ্রভু তারারে দিবাত্তে যার্ সিয়েন্ তারা অধিকার্ ন-গুরিনে সেদকদিন সং তমাত্তুন্ যুদ্ধো গুরিনে যাহ্ পুরিবো। সে পরেন্দি এই যে জাগা-জোমিগানি তমারে দিয়্যে অলঅ ইয়েনত্ তুমি ফিরি এই পারিবা। 21 সে অক্তত্ মুই যিহোশূয়রে কলুং, তমা গোজেন্ লগেপ্রভু এ দ্বিজন রাজার্ অবস্থা কি গোজ্যে সিয়েন্ দঅ তুমি নিজো চোগেদি দেখ্য। তুমি যিয়েনত যর্ সে জাগানর্ বেক্ রেজ্যগানির্ অবস্থায়ো লগেপ্রভু সেধোক্ক্যেন গুরিবো। 22 তুমি তারারে ন-দোরেয়ো; তমা গোজেন্ লগেপ্রভু নিজে তমার্ ওইনে যুদ্ধো গুরিবো। 23 সে অক্তত্ মুই লগেপ্রভুরে কোজোলী গুরিনে কোইয়োং, 24 ও প্রভু লগেপ্রভু, তুই যে কত্তমান্ দাঙর্ আর বোলী সিয়েন্ তর্ চাগর্বোরে দেগেবাত্তে আরাম্ভ গোজ্যস্। স্বর্গত্ বা পিত্থিমীত কনঅ দেবেদা আগন্ নাহি, তুই যেদক্কানি কাম্ গোজ্যস্ সিয়েনি গুরি পারন্ আর তুই যে বল্ দেগেয়োচ্ সিয়েনি দেগেই পারন? 25 যর্দন পার্ ওই যেইনে সেই অমহদ দোল্ দেজ্ছান, অত্তাৎ সে মুড়োমুড়ির্ দেজ্ছান আর লেবাননান মরে চেবাত্তে দে। 26 মাত্তর্ তমাত্তে লগেপ্রভু মঅ উগুরে বেজার্ অনায়্ মঅ কধাগান্ তে ন-শুনিলো। তে কলদে, জদবদে ওইয়্যে। এ পৌইদ্যেনে মরে আর ন-কোইয়ো। 27 তুই পিস্গার মাদাবোত্ উদিনে উত্তোর-দোগিন্ আর পূগ-পোঝিমেন্দি চেই লঅ। যর্দন গাঙান্ পার্ ওইনে যেক্কে তমার্ যানা ন-অবঅ সেক্কে নিজোর্ চোগে দেজ্ছান একবার্ চেই নেযঅ। 28 যিহোশূয়রে কি গরা পুরিবো সিয়েন্ তুমি তারে কোই দুয়ো; তারে উচ্ছোমি আর সাহস দুয়ো, কিত্যে তেয়ো আগে আগে যেইনে মানুচ্চুনোরে পার্ গুরি নেযেব আর যে দেজ্ছান তুই চেবাত্তে যর্ সিয়েন্ তারারে দিইনে অধিকার্ গুরিবে। 29 সেনত্তে আমি বৈৎ-পিয়োরর উই পারন্দি কিঝিঙানত্ থেই গেলং। |
Copyright © 2021 Bangladesh Bible Society
Bangladesh Bible Society