দ্বি’লম্বর বিররণ 27 - Chakma Bibleএবল মুড়োবোর্ পূজো 1 মোশি ইস্রায়েলীয় বুড়ো নেতাগুনোরে সমারে নেযেইনে মানুচ্চুনোরে কলদে, “যেদক্কানি উগুম এচ্চ্যে মুই তমারে দুয়োঙর্ সিয়েনি তুমি পালেবা। 2 তুমি যর্দন গাঙান্ পার্ ওইনে তমার গোজেন লগেপ্রভুর দিয়্যে দেজত্ যেইনে কুদুক্কুন দাঙর্ দাঙর্ পাত্তর্ উজু গুরি নেযেবা আর সিগুন্ সিবিদি দিইনে লিবি দিবা, 3 আর সিগুনো উগুরে এ রীদি-সুদোমর্ বেক্ কধানি লিগিবা। তমার পুরোণি মানুচ্চুনোর গোজেন লগেপ্রভু তমা ইদু গোজ্যে তার এগেম্ মজিম দুধ আর মধুলোই ভোজ্যে যে দেজ্ছান তমারে দিবাত্তে যার্ তুমি সিয়েনত্ যানার পরেন্দি, 4 অত্তাৎ যর্দন গাঙান পার্ ওই যানার পরেন্দি মর্ এচ্চ্যের্ উগুম মজিম তুমি এবল মুড়োবো উগুরে সেই পাত্তরুন উজু গুরি নেযেইনে চিবিদিলোই লিবি দিবা। 5 তমার গোজেন লগেপ্রভুর নাঙে তুমি সিয়েনত্ এক্কো পাত্তরর্ পূজো বানেবা। পাত্তরুনো উগুরে তুমি কনঅ লুয়োর্ যন্ত্র বেবহার ন-গুরিবা। 6 তমার গোজেন লগেপ্রভুর এই পূজোবো তুমি গোত্তাল্ গোত্তাল্ পাত্তর্ দিইনে বানেবা আর সিগুনো উগুরে তুমি তমার গোজেন লগেপ্রভুর নাঙে পুজ্যে-উৎসর্বর অনুষ্ঠান গুরিবা। 7 সিয়েনত তুমি উদোলোলি-উৎসর্বরঅ অনুষ্ঠান গুরিবা আর সেই উৎসর্বর জিনিস্ছানি খেইনে তমার গোজেন লগেপ্রভুর মুজুঙোত্ ফুত্তি গুরিবা। 8 যে পাত্তরুন তুমি উজু গুরি নেযেবা সিগুনো উগুরে এই রীদি-সুদোমর্ বেক্ কধানি অমকদ দোলেদালে লিগিবা।” এবল মুড়োবোত্তুন অভিশাব্ ফগদাং পানা 9 ইয়েনর্ পরেন্দি মোশি লেবীয় ধর্মগুরুগুনোরে নেযেইনে বেক্ ইস্রায়েলীয়গুনোরে কলদে, “ও ইস্রায়েলীয়গুন্, তুমি অলর্ গুরি শুনো। এচ্চ্যে তুমি তমার গোজেন লগেপ্রভুর নিজোর মানুচ্ ওইয়ো। 10 তুমি তার বাধ্য ওইনে চলিবা। এচ্চ্যে মুই যেদক্কানি উগুম আর সুদোম তমারে দুয়োঙর্ সিয়েনি তুমি পালেবা।” 11 সেই দিনোদই মোশি মানুচ্চুনোরে এই উগুমান দিলো, 12 তুমি যর্দন গাঙান পার্ ওই যেবার্ পরেন্দি যেক্কে লগেপ্রভুর আশিদ্বাদ ফগদাঙ গরা অবঅ সেক্কে শিমিয়োন, লেবি, যিহূদা, ইষাখর, যোষেফ আর বিন্যামীন-গুট্টির মানুচ্চুনে গরিষীম মুড়োবো উগুরে থেবাক। 13 আর যেক্কে তার অভিশাপ্পান ফগদাং গরা অবঅ সেক্কে রূবেণ, গাদ, আশের, সবূলূন, দান আর নপ্তালি-গুট্টির মানুচ্চুনে এবল মুড়োবো উগুরে থেবাক। 14 লেবীয়গুনে সেক্কে বেক্ ইস্রায়েলীয়গুনো মুজুঙোত্ রঅ ছাড়িনে এ কধাগান কবাক: 15 সে মানুচ্চো অভিশাব্ পেইয়্যে, যে ছাঝি ফেলায় বা তক্তা বা পাত্তর্ খুরিনে কনঅ মূত্তি বানায় আর পূজোত্তে সিয়েনি গুমুরো জাগাত থিদেবর্ গরে। এ বেক্ মূত্তিগুন লগেপ্রভুর ঘিনাইদে জিনিস, কালিগরর্ আদর কাম্ বানা। সেক্কে বেক্কুনে কবাক, আমেন। 16 সে মানুচ্চো অভিশাবখেইয়্যে, যে মাবোরে বা বাবরে অসর্মান গরে। সেক্কে বেক্কুনে কবাক, আমেন। 17 সে মানুচ্চো অভিশাবখেইয়্যে, যে অন্য মান্জ্যর ভুইয়োর দুঝির-চিহ্নোগানি সোরেই দে। সেক্কে বেক্কুনে কবাক, আমেন। 18 সে মানুচ্চো অভিশাব খেইয়্যে, যে কান্মান্জ্যরে ভুল পদেন্দি নেযায়। সেক্কে বেক্কুনে কবাক, আমেন। 19 সে মানুচ্চো অভিশাব খেইয়্যে, যে বিদেশী বাসিন্দা, মা-বাপ নেইয়্যে আর রানিমিলেগুনো উগুরে অন্যেয় বিচের অবাত্তে দে। সেক্কে বেক্কুনে কবাক, আমেন। 20 সে মানুচ্চো অভিশাব খেইয়্যে, যে তার সাদাঙা মাবো লগে সিনেলী গরে, কিত্যে সেক্কে তা বাপ্পোরে তে অসর্মান গরে। সেক্কে বেক্কুনে কবাক, আমেন। 21 সে মানুচ্চো অভিশাব্ খেইয়্যে, যে য়েমান লগে কিয়্যেন্দি এগত্তর্ অয়। সেক্কে বেক্কুনে কবাক, আমেন। 22 সে মানুচ্চো অভিশাব্ খেইয়্যে, যে তার সাদাঙা বোন্নো লগে সিনেলী গরে-তে বাবর্ ঝি ওক্ বা মাবোর ঝি ওক্। সেক্কে বেক্কুনে কবাক, আমেন। 23 সে মানুচ্চো অভিশাব্ খেইয়্যে, যে তার শুড়িবো লগে সিনেলী গরে। সেক্কে বেক্কুনে কবাক, আমেন। 24 সে মানুচ্চো অভিশাব খেইয়্যে, যে কাররে গুমুরোত্ খুন গরে। সেক্কে বেক্কুনে কবাক, আমেন। 25 সে মানুচ্চো অভিশাব খেইয়্যে, যে নিদ্দুজি মান্জ্যরে খুন গুরিবাত্তে ঘুষ নেযায়। সেক্কে বেক্কুনে কবাক, আমেন। 26 সে মানুচ্চো অভিশাব্ খেইয়্যে, যে এই রীদি-সুদোমর্ কধানি পালন ন-গরে আর তার্ খেমতাগানরে অস্বীগের্ গরে। সেক্কে বেক্কুনে কবাক, আমেন। |
Copyright © 2021 Bangladesh Bible Society
Bangladesh Bible Society