দানিয়েল 10 - Chakma Bibleদানিয়েল ইধু আরঅ গাব্রিয়েল দূত 1 পারস্যের রাজা কোরসর রাজাগিরির তিন বজরত্ যিবেরে বেল্টশৎসর নাঙ্ দিয়্যে ওইয়্যে সেই দানিয়েল ইধু এক্কান বিষয় ফগদাং অলঅ। বিষয়ান সত্য আর সিয়েন এক দাঙর্ দুঘো পৌইদ্যেনে। এক্কান দর্শনর মাধ্যমে সেই বিষয়ান তারে বুঝা অলঅ। 2 সে সময় মুই দানিয়েল তিন সাপ্তা ধুরি আবিলেচ্ গোজ্যং। 3 সেই তিন সাপ্তা থুম্ ন-অনা সং কনঅ গম্ হানা মুই ন-হাং, য়েরা বা আংগুর-রস মুয়োত্ ন-দুয়োং আর তেলঅ ন-গুলোং। 4 পত্তম মাজর্ চোব্বিশ দিনোত্ মুই বড়্গাঙ্ টাইগ্রীস পারত্ থিয়্যেই এলুং। 5 এন্ সময়োত্ মুই রিনি চেইনে মসীনার কাবড় উজ্যে আর কমরত্ আজল্ সোনার কমর-বিজোনি দিয়্যে এক্কো মান্জ্যরে দেগিলুং। 6 তা কিয়্যেগান বৈদূর্যমণি ধোক্ক্যেন, মুয়োন কারেন ধোক্ক্যেন, চোগ্কুন জ্বোল্জোল্যে বম্বা ধোক্ক্যেন, আঢ্-টেঙানি পালিশ গোজ্যে পিদোল চোক্চোক্যে ধোক্ক্যেন আর তা রবো এগত্তর্ ওইয়্যে বোউত্ মান্জ্যর্ রঅ ধোক্ক্যেন। 7 মুই দানিয়েল গায় গায় সেই দর্শনান্ দেগিলুং; মঅ সমারে মানুচ্চুনে সিয়েনি ন-দেগিলাক্, মাত্তর্ তারা এদক্ দোরেলাক্ যে, তারা ধেই যেইনে পৌল্যে রলাক্। 8 সেনত্তে মুই গায় গায় সেই মহৎ দর্শনান দেগিলুং। মঅ ভিদিরে কনঅ বল্ ন-থেলঅ, মঅ মুয়োন মরা ধোক্ক্যেন সুদোমু ওই গেলঅ আর মুই বল্পোজ্যে ওই পড়িলুং। 9 সে পরেদি মুই সেই মানুচ্চোর কধা শুনিলুং আর তা কধানি শুনোনার লগে লগে মুই অজ্ঞান ওইনে মাদিত্ মাঢা নিগিরি পড়িলুং। 10 সেক্কে এক্কান আঢে মরে ধুরি মরে দ্বিআঢে আর আদু উগুরে ভর্ গুরি দিলো। 11 তে কলদে, “ও গোজেনর কোচ্পেইয়্যে দানিয়েল, মুই তরে যে কধাগান কবাত্তে যাঙর্ সিয়েনত্ গমেডালে মনযোগ দে। তুই উদিনে থিয়্যে, কিত্যে মরে ইক্কিনে তইধু পাধা ওইয়্যে।” তে মরে এ কধাগান কনার্ পরেদি মুই গির্গিরেদে গির্গিরেদে উদিনে থিয়্যেলুং। 12 তে কুয়ো ধুরিলো, “দানিয়েল, ন-দোরেচ্। পত্তম্ যেদিন্যে তুই দর্শনানর পৌইদ্যেনে বুঝিবাত্তে আর তর্ গোজেন মুজুঙোত্ মনান্ ভাঙিনে দুঘ্ স্বীগের্ গুরিবাত্তে মনান্ থির্ গোজ্যস সেদিন্যে তঅ কধা শুনো ওইয়্যে আর সেনত্তে মুই এচ্চ্যং। 13 মাত্তর্ পারস্য রেজ্যর আজল্লো এগোশ্ দিন সং মরে মানা গোজ্যে। সেক্কে মীখায়েল নাঙে আজল্ স্বর্গদূততুনোর এক্কো মরে সাহায্য গুরিবাত্তে এলঅ, কিত্যে মুই পারস্য রাজাগুনো ভিদিরে গায় গায় এলুং। 14 আগামিদি তঅ মানুচ্চুনো উগুরে যিয়েনি ঘুদিবো সিয়েনি তরে বুঝিবাত্তে মুই ইক্কিনে তইদু এচ্চ্যং, কিত্যে দর্শনর ভিদিরেদি যে সময়র্ কধা কুয়ো ওইয়্যে সিয়েনি এজঅ ন-এজে।” 15 তে যেক্কেনে মরে এ কধাগান কর্ সেক্কে মুই মাঢা নিগিজ্যে এলুং, মর্ মুয়োদি কনঅ কধা ন-এলঅ। 16 সেক্কে মান্জ্য ধোক্ক্যেন দেগদে সেই স্বর্গদূত, যিবে মঅ মুজুঙোত্ থিয়্যেই এলঅ, তে মঅ ঠুট্টোত্ বাঁজিলো, আর মুই মুয়োন খুলিনে তারে কলুং, “ও মর্ প্রভু, এ দর্শনানত্তে মুই মনত্ অমকদ দুঘ্ পাঙর্ আর মুই বল্পোজ্যে ওই পোজ্যং। 17 ও মর্ প্রভু, মুই তর্ চাগর্, মুই কিবাবোত্যেগুরি তঅ লগে কধা কোম্? মর্ বল্ নেই আর মঅ ভিদিরে নিজেস্অ নেই।” 18 সেক্কে মান্জ্য ধোক্ক্যেন দেগদে সেই স্বর্গদূত্তো আরঅ মরে ধুরিলো আর মরে বল্ দিলো। 19 তে কলদে, “ও গোজেনর কোচ্পেইয়্যে, তুই ন-দোরেচ্। তর্ ভালেদি ওক্। তুই সাহস গর্ আর খেমতাবলা অ।” তে মঅ লগে কধা কনার্ লগে লগে বল্ পেইনে কলুং, “ও মর্ প্রভু, কঅ, কিত্যে তুই মরে বল্ দুয়োচ্।” 20-21 সেক্কে তে কলঅ, তুই কি হবর্ পাজ্ মুই কিত্তে তইদু এচ্চ্যং? সত্য বোইবোত্ যিয়েনি লেগা আঘে সিয়েনি তরে জানেবাত্তে মুই এচ্চ্যং। পারস্যের আজল্লো বিরুদ্ধে যুদ্ধো গুরিবাত্তে মুই যাদিমাদি ফিরি যেইম্ আর মুই যানার্ পরেদি গ্রীসর আজল্লোয়ো যুদ্ধো গুরিবাত্তে এবঅ। তঅ মানুচ্চুনোর আজল্ সেই মীখায়েল বাদে আর কনজনে তারা বিরুদ্ধে মরে সাহায্য ন-গত্তন্। |
Copyright © 2021 Bangladesh Bible Society
Bangladesh Bible Society