প্রেরিত্ 28 - Chakma Bibleমাল্টা দ্বীপোত্ 1 আমি গমেডালে কুলোত্ লুমিনে কোই পারিলোং দ্বীপ্পোর্ নাঙান্ মাল্টা। 2 সেই দ্বীপোর্ মানুচ্চুনে আমা সমারে ভারী গম্ বেবহার গুরিলাক্। সেক্কে ঝড় পড়ের্ আর ঠান্ডা এলঅ বিলিনে তারা আগুন জ্বালেইনে আমারে বেক্কুনোরে ডাগিলাক্। 3 পৌলে এক বনা শুগুনো দার্বো থুবেইনে আগুনোত্ দিবার্ অক্তত্ এক্কো বিষ্বলা সাপ আগুনো গরমে সেই বনাবোত্তুন্ নিগিলিনে পৌল আঢ্তানত্ কামেড়ে ধুরিলো। 4 সাপ্পোরে পৌল আঢত্ ঢুলদে দেগিনে সেই দ্বীপোর্ মানুচ্চুনে কুয়ো কি গরা ধুরিলাক্, “এ মানুচ্চো ঘেচ্চেকগুরি খুনী, কারন সাগর আঢত্তুন্ রোক্ষ্যে পেলেয়ো গম্ দেবেদাবো তারে বাঁজিবাত্তে ন-দিলো।” 5 মাত্তর্ পৌলে যেক্কে আঢ্তান্ ঝাড়িনে সাপ্পো আগুনোত্ ফেলেই দিলো সেক্কে তার্ কনঅ ক্ষতি ন-অলঅ। 6 মানুচ্চুনে মনে গোজ্জ্যন্ তা কিয়্যেগান ফুলি উদিবো বা অদাঢত্ তে মুরি যেবঅ। মাত্তর্ ভালক্কন্ বাজ্জ্যেই থেইনেয়ো তার্ কিচ্চু ন-অলঅ দেগিনে তারা মনান্ বুদুলিনে কুয়ো ধুরিলাক্, “তে দেবেদা।” 7 সেই জাগান কায়কুরে পুব্লিয় নাঙে সেই দ্বীপো নেতাবোর এক্কান্ জমিদারি এলঅ। পুব্লিয় তা ঘরত্ আমারে ডাগিলো আর তিন দিন সং ভারী আদর্ দিইনে আমারে সেবা-যত্তন্ গুরিলো। 8 সেক্কে পুব্লিয় বাব্পো জ্বর্ আর সাং পিড়ে বিচ্চোনত্ পড়িনে ভুগের্। পৌলে ভিদিরে তাইধু যেইনে তবনা গুরিলো আর তা কিয়্যেত্ আঢ্ দিইনে তারে গম্ গুরিলো। 9 এ ঘটনাগানর্ পরেদি সেই দ্বীপোর্ বাদবাগি বেক্ পিড়েল্যেগুনে এইনে গম্ অলাক্। 10 তারা নানান্ বাবোত্যেগুরি আমারে সর্মান দেগেলাক্ আর যেরেদি জাহাজ্চান ছাড়িবার্ অক্তত্ আমা দরকারী বেক্ পযাপিরানি জাহাজত্ তুলি দিলাক্। রোমত্ পৌল 11 ইয়েনর্ তিন মাস পরেদি আমি এক্কান্ জাহাজত্ গুরি লদ্ দিলোং। জাহাজ্চান্ সেই দ্বীপোত্ জার্কাল্লো কাদেয়্যে। সিয়েন এলদে আলেক্জান্দ্রিয়া শঅরর্ জাহাজ আর তা মাঢাত্ যামা দেবেদার্ মূর্ত্তিবো নক্সা গোজ্যে এলঅ। 12 আমি সুরাকুষত্ জাহাজ্চান বানিনে সিধু তিন দিন থেলং। 13 সিয়েনত্তুন্ লদ্ দিইনে আমি রীগিয়ত্ লুমিলোং। তার্ কেল্যে দৌগিণো বৈইয়্যের্ বেলঅ আর সে পরেদি আমি পূতিয়লীত্ লুমিলোং। 14 আমি সিধু কয়েক্কো বিশ্বেজি ভেইয়োর্ দেগা পেলং। তারা সমারে সাপ্তামুলো কাদেবাত্যে তারা আমারে কোজোলি গুরিলাক্। এবাবোত্যেগুরি আমি রোমত্ এলং। 15 সিধুগোর্ বিশ্বেজি ভেইয়ুনে আমার্ এজানার্ হবরান্ শুন্ন্যন্। পধত্ আমা সমাজ্জ্যে অবাত্তে তারাত্তুন্ কেঅ কেঅ আপ্পিয়েরহাট, কেঅ কেঅ তিন-সরাই আদাম সং এচ্চ্যন্। এ মানুচ্চুনোরে দেগিনে পৌল গোজেনরে ভালেদি জানেল আর তে নিজে উচ্চোমি পেলঅ। 16 আমি রোমত্ লুমিলে পরেদি পৌলে জুদো ঘরত্ থেবার্ অনুমতি পেলঅ। এক্কো সৈন্য তারে চুগি দিদো। রোমত্ প্রচার 17 তিন দিন পরেদি পৌল সিধুগো যিহূদী নেতাগুনোরে ডাগিনে একসমারে এগত্তর্ গুরিলো। তারা এগত্তর্ অনার্ পরেদি পৌল তারারে কলঅ, “মঅ ভেইয়ুন, যুনিয়ো মুই আমা জাদর্ বিরুদ্ধে বা পূরোণি মানুচ্চুনোর সুদোম বিরুদ্ধে কিচ্চু ন-গরং, তো যিরূশালেমত্ মরে ধরা ওইয়্যে আর রোমীয়গুনো আঢত্ দিয়্যে ওইয়্যে। 18 রোমীয়গুনে মরে জেরা গুরিনে ইরি দিবাত্তে চেইয়োন, কারন মরেদে ধোক্ক্যেন্ কনঅ দুষ্ মুই ন-গরং। 19 মাত্তর্ যিহূদীগুনে ইয়েনত্ মানা গরানায় বাধ্য ওইনে মুই সম্রাট ইধু আবিত্তি গোজ্জ্যং। খালিক্ মুই মঅ নিজো মানুচ্চুনোরে কনঅ দুষ্ দিবাত্যে ন-এজং। 20 ইয়েনত্যে মুই তমা সমারে দেগা গুরিবাত্তে আর কধা কবাত্তে চেইয়োং। ইস্রায়েল জাদর্ যে আজা আঘে সেই আজাগানত্তে মরে এ শিগোলান্দোই বানা ওইয়্যে।” 21 সেক্কে যিহূদী নেতাগুনে কলাক্, “তঅ পৌইদ্যেনে যিহূদিয়াত্তুন্ আমি কনঅ চিধি ন-পেই। যে ভেইয়ুনে সিত্তুন্ এচ্চ্যন্ তারায়ো কেঅ তঅ পৌইদ্যেনে কিচ্চু ন-কন্ বা কনঅ বজং কধা ন-কন্। 22 মাত্তর্ আমি তঅ কধানি শুনিবাত্তে চেই, কারন আমি হবর্ পেই বেক্ জাগানিত্ মানুচ্চুনে সেই দলর্ বিরুদ্ধে কধা কন্।” 23 তারা পৌল সমারে এগত্তর্ অবাত্যে এক্কো দিন ঠিগ্ গুরিলাক্। পৌলে যিধু থেদঅ সিধু তারা বাদে আরঅ ভালোক্জনে এলাক্। সেক্কে পৌলে বেন্ন্যেত্তুন্ ধুরি সাজোন্যে অয় সং গোজেন রেজ্যর্ পৌইদ্যেনে তারারে জানেল আর বুঝেল। মোশির আইন-কানুন্ আর ভাববাদীগুনোর্ বোইয়ো ভিদিরেত্তুন্ যীশু পৌইদ্যেনে দেগেইনে তা পৌইদ্যেনে তারারে বিশ্বেজ্ গোরেবাত্তে চেষ্টা গুরিলো। 24 তে যিয়েন কোইয়্যে সিয়েনত্যে কেঅ কেঅ বিশ্বেজ্ গুরিলাক্, আরঅ কেঅ কেঅ বিশ্বেজ্ ন-গুরিলাক্। 25 পৌল কধালোই তারা ভিদিরে কধা মানা-মানি ন-অলঅ আর তারা সিয়েনত্তুন্ গেলাক্কোই। তারা যেবার্ আগেদি পৌলে কলঅ, পবিত্র আত্মাগানে ভাববাদী যিশাইয় মাধ্যমে তমা পূরোণি মানুচ্চুনো ইধু সত্য কধাগান কোইয়্যেদে যে, 26 এ মানুচ্চুনো ইধু যেইনে কঅ, তুমি শুনিবা মাত্তর্ ন-বুঝিবা; দেগিবা মাত্তর্ কনমতে হবর্ ন-পেবা। 27 এ বাবোত্যে মানুচ্চুনোর্ মনানি বাজে আর কানানি নাঢা যেইয়্যে, আর তারা তারার্ চোগ্কুন্অ নাঢি রাগেয়োন, যেন তারা চোগেদি ন-দেগন্, কানেদি ন-শুনোন্ আর মনানদি ন-বুঝোন্, আহ্ গম্ অবাত্তে মইধু ফিরি ন-এজন। 28-29 “ইয়েনত্যে তুমি মনত্ রাগঅ, গোজেনে মান্জ্যরে পাপত্তুন্ কিবাবোত্যেগুরি উদ্ধোর্ গরে সে কধাগান্ অযিহূদীগুনো ইধু কুয়ো ওইয়্যে, আর তারা সে কধাগান শুনিবাক্।” 30 পুরো দ্বিবজর্ সং পৌলে তা নিজোর্ ভাড়া ঘরত্ এলঅ আর যিগুনে তা সমারে দেগা গুরিবাত্যে এদাক্ তে তারারে বেক্কুনোরে গুজি লদঅ। 31 তে সাহচ্ গুরিনে গমেডালে গোজেন রেজ্য পৌইদ্যেনে প্রচার গুরিদো আর প্রভু যীশু খ্রীষ্ট পৌইদ্যেনে শিক্ষ্যে দিদো। |
Copyright © 2021 Bangladesh Bible Society
Bangladesh Bible Society