প্রেরিত্‌ 25 - Chakma Bible

আজল্ শাসনগুরিয়্যেবো মুজুঙোত্ পৌলর্ বিচের্

¹ সেই রেজ্যত্ এজানার্ তিন দিন পরেদি ফীষ্ট কৈসরিয়াত্তুন্ যিরূশালেমত্ গেলঅ।

² সেক্কে আজল্ ধর্মগুরুগুনে আর যিহূদী নেতাগুনে তাইধু যেইনে পৌল বিরুদ্ধে আবিত্তি জানেলাক্।

³ তারা ফীষ্টরে ভারী গুরি কোজোলি গুরিলাক্ যেন তে তারা উগুরে দোয়্যে গুরিনে পৌলরে যিরূশালেমত্ পাধায়। ইয়েনর্ কারণান্ ইয়েন, তারা পধত্ লুগি থেইনে পৌলরে খুন্ গুরিবার কুজুরোমি গোজ্জ্যন্।

⁴ সেক্কে ফীষ্ট কলঅ, “পৌলরে কৈসরিয়াত্ বানি থুয়ো ওইয়্যে আর মুই নিজে যাদিমাদি সিধু যাঙর্।

⁵ তমাত্তুন্ কয়েক্কো খেমতাবলা মানুচ্ মঅ লগে যাদোক্ আর যুনি সেই মানুচ্চো কনঅ দুষ্ গুরি থায় সালে সিয়েন দেগেই দেদোক্।”

⁶ ফীষ্ট তারা সমারে আট্ট্য-দশ দিন্ কাদেইনে কৈসরিয়াত্ ফিরি গেলঅ। তার্ কেল্যে তে বিচের-সভাত্ বৈইনে পৌলরে তা মুজুঙোত্ আনিবার্ উগুম্ দিলো।

⁷ যে যিহূদীগুনে যিরূশালেমত্তুন্ এচ্চ্যন্ পৌলে সিধু লুমিলে পরেদি তারা তা চেরোকিত্ত্যেদি থিয়্যেইনে তা বিরুদ্ধে নানান্ বাবোত্যে বজং দুষ্ দিলাক্, মাত্তর্ সিয়েনির কনঅ প্রমাণ দি ন-পারিলাক্।

⁸ সেক্কে পৌলে নিজোর্ পক্ষেদি এ কধাগান্ কলঅ, “মুই যিহূদীগুনোর্ রীতি-সুদোম বা উবোসনা-ঘর বা রোম-সম্রাটর্ বিরুদ্ধে কনঅ অন্যেয় ন-গরং।”

⁹ ফীষ্ট যিহূদীগুনোরে হুজী গুরিবাত্যে পৌলরে কলঅ, “এ বেক্‌ দুষ্‌চানির্ বিচের্ মুই যেন যিরূশালেমত্ গুরি পারং সেনত্তে তুই কি সিধু যেবাত্তে রাজী আঘচ্?”

¹⁰ সেক্কে পৌলে কলঅ, “মুই ইক্কিনে রোমীয় বিচের-সভার্ মুজুঙোত্ থিয়্যেই আঘং আর রোমীয় সরকার ইধু মর্ বিচের্ অনা উচিত্। তুই নিজে দঅ গমেদালে হবর্ পাচ্, মুই যিহূদীগুনো উগুরে কনঅ অন্যেয় ন-গরং।

¹¹ যিয়েন্ ওক্‌, যুনি মুই মরেদে ধোক্ক্যেন্ কনঅ দুষ্ গুরি থাং সালে মুই মুরিবাত্তেয়ো রাজী আঘং। মাত্তর্ এ যিহূদীগুনে মঅ বিরুদ্ধে যে দুষ্‌চানি দেদন্ সিয়েনি যুনি সত্য ন-অয় সালে ইগুনো আঢত্ মরে ইরি দিবার্ অধিকারান্ কনজনর্ নেই। মুই সম্রাট ইধু আবিত্তি গরঙর্।”

¹² ফীষ্ট তার্ সল্লাদিয়্যেগুনো লগে তেম্মাং গুরিনে কলঅ, “তুই সম্রাট ইধু যেক্কে আবিত্তি গোজ্জ্যস্ সেক্কে সম্রাট ইধু যেবে।”

ফীষ্ট আর রাজা আগ্রীপ্প

¹³ ইয়েনর্ কয়েক দিন পরেদি যিহূদীগুনোর রাজা আগ্রীপ্প আর তা মোক্কো বর্ণীকী ফীষ্টরে ভালেদি জানেবাত্তে কৈসরিয়াত্ এলাক্।

¹⁴ তারা ভালোক্ দিন সিধু এলাক্ বিলিনে ফীষ্ট পৌল পৌইদ্যেনে রাজারে জানেল। তে কলঅ, ফীলিক্সে এক্কো মান্‌জ্যরে ইধু বন্দী ইজেবে থোই যেয়্যে।

¹⁵ যেক্কে মুই যিরূশালেমত্ যেয়োং সেক্কে আজল্ ধর্মগুরুগুনে আর যিহূদী বুড়ো নেতাগুনে এ মানুচ্চো বিরুদ্ধে বোউত্ আবিত্তি জানেয়োন্ আর দুষী ইজেবে ইবেরে সাজা দিবাত্তে কোইয়োন।

¹⁶ মুই তারারে কলুং, কনঅ মান্‌জ্য বিরুদ্ধে যুনি কনঅ আবিত্তি গরা অয় সালে যিগুনে আবিত্তি গোজ্জ্যন্ তারা মুজুঙোত্ নিজোরে নিদ্দুজি বিলি প্রমাণ্ গুরিবার সুয়োগ ন-পানা সং তারে সাজা দিবার্ কধা রোমীয়গুনোর নুয়ো সুদোমত্ নেই।

¹⁷ “সেই যিহূদীগুনে মঅ সমারে এজানার্ পরেদি মুই দেরি ন-গুরিনে তার্ কেল্যে বিচের্ গুরিবাত্তে বুজিলুং আর সেই মানুচ্চোরে আনিবাত্যে উগুম গুরিলুং।

¹⁸ যে মানুচ্চুনে তারে দুষ্ দেদন্ তারা যেক্কে কধা কবাত্যে উদিনে থিয়্যেলাক্ সেক্কে মুই যেবাবোত্যে মনে গোজ্জ্যং সেবাবোত্যে কনঅ আবিত্তি তারা ন-গুরিলাক্,

¹⁹ বরং তারার্ ধর্ম পৌইদ্যেনে আর যীশু নাঙে এক্কো মরা মান্‌জ্য পৌইদ্যেনে তারে দুষী গুরিলাক্। পৌল নাঙে সেই মানুচ্চো দাবি গরেদে, সেই যীশু বাঁজি আঘে।

²⁰ ইয়েনি বেক্কানি পৌইদ্যেনে কেধোক্ক্যেন্ গুরি হবর্ লবং সিয়েনি বুঝি ন-পারিনে মুই পুযোর্ গুরিলুং, ইয়েনি বেক্কানির্ যেন বিচের্ গরা যায় সেনত্তে সেই মানুচ্চো যিরূশালেমত্ যেবাত্যে রাজি আঘে নাহি।

²¹ মাত্তর্ তে যেক্কে সম্রাট রায়য়ান্ বাজ্জ্যেবাত্তে মইধু আবিত্তি গুরিলো সেক্কে সম্রাট ইধু ন-পাদানা সং তারে চুগি দিবাত্তে মুই উগুম দুয়োং।”

²² সেক্কে আগ্রিপ্প ফীষ্টরে কলঅ, “মুই নিজে এ মানুচ্চোর্ কধানি শুনিবাত্তে চাং।” ফীষ্ট কলঅ, “এজেত্তে কেল্ল্যে শুনি পারিবে।”

আগ্রিপ্প মুজুঙোত্ পৌল

²³ তার্ কেল্যে রাজা আগ্রিপ্প আর বর্ণীকী আজল্ সেনাপতিগুনোরে আর শঅরর্ আজল্ আজল্ মানুচ্চুনোরে লোইনে সয়-সাগোজ্যে গুরি সভা-ঘরত্ সোমেলাক্। ফীষ্টর্ উগুমে পৌলরে সিধু আনা অলঅ।

²⁴ সেক্কে ফীষ্ট কলঅ, “রাজা আগ্রিপ্প আর যিগুনে ইধু আঘ, তুমি এ মানুচ্চোরে দেগর্। বেক্‌ যিহূদীগুনে যিরূশালেমত্ আর কৈসরিয়াত্ মইধু আবিত্তি গোজ্জ্যন্ আর রঅ ছাড়িনে কোইয়োন, এ মানুচ্চোর্ আর্ বাঁজি থানা উচিত্ নয়।

²⁵ মাত্তর্ মুই দেগিলুং, মরণর্ সাজা দেদে ধোক্ক্যেন্ কনঅ দুষ্ তে ন-গরে। মাত্তর্ তে নিজে যেক্কে সম্রাট ইধু আবিত্তি গোজ্জ্যে সেক্কে মুই তারে সম্রাট ইধু দিপাধানা ঠিগ্ গোল্লুং,

²⁶ মাত্তর্ দাঙর্ সম্রাট ইধু লেগেদে ধোক্ক্যেন্ এমন্ সঠিগ্ কিজু ন-পেলুং। সেনত্তে মুই তমা বেক্কুনো মুজুঙোত্, বিশেষ গুরি রাজা আগ্রিপ্প তঅ মুজুঙোত্ তারে আন্ন্যং যাতে তারে জেরা গুরিনে কিজু অন্তত: মুই লিগি পারং;

²⁷ কারন্ মুই মনে গরঙ্, কনঅ বন্দীরে চালান্ দিবার্ সময় তা দুষ্‌চানিয়ো জানানা উচিত্।”