প্রেরিত্ 22 - Chakma Bible1 “ভেইলগ্ আর বাব্লগ্, ইক্কিনে মুই মঅ নিজোর্ পক্ষে কধা কোম্, শুনো।” 2 মানুচ্চুনে তারে ইব্রীয় ভাষায় কধা কধে শুনিনে এক্কুবারে জুরো ওই গেলাক্। 3 মুই এক্কো যিহূদী। কিলিকিয়ার তার্ষ শঅরত্ মর্ জর্ম, মাত্তর্ মুই এ শঅরত্ দাঙর্ ওইয়োং। গমলীয়েলর্ টেংঅ কুরে বৈইনে মুই আমা পূরোণি মানুচ্চুনোর রীতি-সুদোম বেক্কানি শিক্ষ্যে পেইয়োং। গোজেন পৌইদ্যেনে এচ্চ্যে তুমি যেবাবোত্যেগুরি আওজ্ দেগর্ মুই নিজেয়ো সেবাবোত্যেগুরি আওজি এলুং। 4 যীশুর্ পধেদি যিগুনে আঢিদাক্ মুই তারারে অত্যেচার্ গুরিনে ভালোক্ জনরে মারে ফেলেদুং আর মরদ্ আর মিলেগুনোরে ধুরিনে জেলোত্ দিদুং। 5 এ কধাগান্ যে সত্য, সিয়েনর্ সাক্ষী দাঙর্ ধর্মগুরু আর দাঙর্ তেম্মাঙর্ বেক্কুন্ । এমন্ কি, মুই তারাত্তুন্ দামেস্ক শঅরর্ ধর্ম নেতাগুনোরে দিবাত্যে চিধি নেযেয়োং আর সেবাবোত্যে মানুচ্চুনোরে বন্দী ইজেবে যিরূশালেমত্ আনিনে সাজা দিবাত্যে সিধু যাঙর্। 6 সেক্কে বেলান্ প্রায় দিবুজ্যে। মুই দামেস্ক কায়কুরে লুমিলে পরেদি অদাঢত্ মঅ চেরোকিত্তেদি স্বর্গত্তুন্ এক্কান্ জোল্জোল্যে পহ্র গুরি পড়িলো। 7 মুই মাদিত্ পড়ি গেলুং আর শুনিলুং কন্না যেন মরে কত্তে, শৌল, শৌল, কিত্ত্যে তুই মঅ উগুরে অত্যেচার্ গরর্? 8 মুই পুযোর্ গুরিলুং, প্রভু তুই কন্না? তে কলঅ, মুই নাসরতর্ যীশু, যিবে উগুরে তুই অত্যেচার্ গরর্। 9 যিগুনে মঅ লগে এলাক্ সিগুনে সেই পহ্রান্ দেগিলাক্, মাত্তর্ যে মঅ লগে কধা কর্ তা কধানি তারা ন-বুঝিলাক্। 10 সেক্কে মুই কলুং, প্রভু, মুই কি গুরিম? প্রভু কলঅ, উঠ্, দামেস্কত্ যাহ্। তত্যে যিয়েন্ ঠিগ্ গুরি থুয়ো ওইয়্যে সিয়েন তরে সিধু কুয়ো অবঅ। 11 মঅ সমাজ্জ্যেগুনে আঢ্তানি ধুরিনে মরে দামেস্কত্ নেযেলাক্, কিয়া সেই জোল্জোল্যে পহ্রান্দোই মুই কান্ ওই যেইয়োং। 12 পরেদি অননিয় নাঙে এক্কো মানুচ্ মইধু এলঅ। তে মোশির্ রীতি-সুদোমানি ভোক্তি গুরিনে পালেদ, আর সিধুগোর্ বেক্ যিহূদীগুনে তারে ভারি সর্মান গুরিদাক্। 13 তে মঅ কায়কুরে এইনে থিয়্যেইনে কলঅ, ভেই শৌল, তর্ রিনি চেবার্ খেমতাগান্ ফিরি এজোক্। আর সেক্কেনে মুই তারে দেগিলুং। 14 সেক্কে অননিয় কলঅ, আমা পূরোণি মানুচ্চুনোর গোজেনে তরে বেঈ লোইয়্যে যেন তুই তার্ আওজ্চানি জানি পারচ্, আর সেই ন্যায়বলা মানুচ্চোরে, অত্তাৎ যীশু খ্রীষ্টরে দেগচ্ আর তা মুয়ো কধানি শুনোচ্। 15 তুই তার্ সাক্ষী অবে আর যিয়েন্ দেক্ক্যচ্ আর শুন্ন্যচ্ বেক্কানি মান্জ্য ইধু কবে। 16 ইক্কিনে তুই কিত্ত্যে দেরি গরর্? উদিনে বাপ্তিষ্ম লঅ আর পাপত্তুন্ উদ্ধোর্ পেবাত্যে যীশুরে ডাগিনে তর্ বেক্ পাপ্পানি সাব্ গুরি ফেলা। 17 যেরেদি মুই যিরূশালেমত্ ফিরি এইনে যেক্কে একদিন উবোসনা-ঘরত্ তবনা গরঙর্ সেক্কে মুই এক্কান্ দর্শন পেলুং। 18 সেই অবস্থায় মুই দেগিলুং প্রভু মঅ সমারে কধা কর্। তে মরে কলঅ, যাদি গর্, ইক্কিনে যিরূশালেমান ছাড়িনে যাগোই, কিয়া মঅ পৌইদ্যেনে তর্ সাক্ষ্যগানি মান্জ্যে মানি ন-লবাক্। 19 মুই কলুং, প্রভু, এ মানুচ্চুনে কোই পারন্, যিগুনে তঅ উগুরে বিশ্বেজ্ গুরিদাক্ তারারে পিদিনে জেলোত্ দিবাত্যে মুই এক সমাজ-ঘরত্তুন্ আরেক্ সমাজ-ঘরত যেদুং। 20 যেক্কে তর্ সাক্ষী স্তিফানরে খুন্ গরা অর্ সেক্কে মুই সিধু থিয়্যেইনে সায় দিলুং, আর যিগুনে তারে খুন্ গত্তন্ তারার্ কাবড়-চুগোড়ানি চুগি দোঙর্। 21 সেক্কে প্রভু মরে কলঅ, তুই যাহ্, মুই তরে দূরোত্ অযিহূদীগুনো ইধু পাধেম্। 22 মানুচ্চুনে এদক্কন্ সং পৌল কধা শুনোদন্, মাত্তর্ যেক্কে তে অযিহূদীগুনো কধা কলঅ সেক্কে মানুচ্চুনে রঅ ছাড়িনে কুয়ো ধুরিলাক্, “তারে পিত্থিমীত্তুন্ দূর্ গুরি দুয়ো; তে বাঁজি থেবার্ মত নয়।” 23 যেক্কে মানুচ্চুনে রঅ ছাড়দন্ আর কাবড়-চুগোড় মেলা মারিনে আগাজত্ ধুল্যে ছিদোদন্, 24 সেক্কে আজল্ সেনাপতিবো পৌলরে কেম্পত্ নেযেবার্ উগুম্ দিলো। কিত্ত্যে মানুচ্চুনে পৌল বিরুদ্ধে এবাবোত্যেগুরি রঅ ছাড়দন্ সিয়েন জানিবাত্তে তে তারে চাবুক্ মারিনে জেরা গুরিবাত্তে উগুম দিলো। 25 যেক্কে পৌলরে চাবুক্ মারিবাত্যে বানা অলঅ, সেক্কে যে সেনাপতিবো সিধু থিয়্যেই এলঅ পৌলে তারে কলঅ, “যিবেরে দুষী বিলিনে এজঅ ঠিগ্ গরা ন-অয় এবাবোত্যে এক্কো রোমীয়রে চাবুক্ মারানা কি তমা পক্ষে আইন মজিম্ কাম্ অর্?” 26 এ কধাগান্ শুনিনে সেই শত উগুরে সেনাপতিবো আজল্ সেনাপতিবো ইধু সেই হবরান্ দিইনে কলঅ, “তুই কি গুরিবাত্যে যর্? এ মানুচ্চো দঅ রোমীয়।” 27 সেক্কে আজল্ সেনাপতিবো পৌল ইধু যেইনে পুযোর্ গুরিলো, “মরে কঅ দে চাং, তুই কি রোমীয়?” পৌলে কলঅ, “অয়।” 28 আজল্ সেনাপতিবো কলঅ, “বোউত্ টেঙা-পৌইজ্যে দিইনে মুই রোমীয় অবার্ অধিকারান্ কিন্ন্যং।” পৌলে কলঅ, “মাত্তর্ মুই রোমীয় ওইনে জোর্মেয়োং।” 29 এ কধাগান্ শুনিনে যিগুনে তারে জেরা গুরিবাত্তে যাদন্ তারা সেক্কেনে গেলাক্কোই। যেক্কে আজল্ সেনাপতিবো বুঝি পারিলো, তে এক্কো রোমীয়রে বান্ন্যে সেক্কে তে দোরেল। দাঙর্ তেম্মাঙ ইধু পৌল 30 যিহূদীগুনে কিত্ত্যে পৌলরে দুষ্ দেদন্ সিয়েন গমেডালে জানিবাত্তে তার্ কেল্যে আজল্ সেনাপতিবো পৌলরে বান্যেগান্ খুলি দিলো আর আজল্ ধর্মগুরুগুনোরে আহ্ দাঙর্ তেম্মাঙর্ মানুচ্চুনোরে এক সমারে মিলিবার উগুম দিলো। সে পরেদি তে পৌলরে আনিনে তারা মুজুঙোত্ থিয়্যেবাত্যে দিলো। |
Copyright © 2021 Bangladesh Bible Society
Bangladesh Bible Society