প্রেরিত্ 21 - Chakma Bibleযিরূশালেম ইন্দি 1 ইফিষ মন্ডলীর নেতাগুনোত্তুন্ বিদেয় লোইনে আমি জাহাজত্ গুরি সোজা কো দ্বীপোত্ গেলং। তার্ কেল্যে আমি রোদঃ দ্বীপোত্ এলং। সে পরেদি সিয়োত্তুন পাতারা শঅরত্ গেলং। সিধু আমি ফৈনীকিয়া যেবাত্তে এক্কান্ জাহাজ্ পেলং। 2 সেক্কে আমি সেই জাহাজত্ উদিনে লদ্ দিলোং। 3 যেরেদি সাইপ্রাস দ্বীপ্পো দেগিনে সিবের্ দোগিণোদি ঘুরিনে আমি সিরিয়া দেজর্ সোর শঅরত্ যেইনে জাহাজত্তুন্ লামিলোং। সিধু আমার্ জাহাজর্ পযাপিরানি লামেবার্ কধা এলঅ। 4 সিধুগোর্ শিচ্চ্যগুনোরে তোগেই পেইনে আমি তারা সমারে সাত দিন সং থেলং। সেই শিচ্চ্যগুনে পবিত্র আত্মালোই পৌলরে কোজোলি গুরিলাক্ যেন তে যিরূশালেমত্ ন-যায়। 5 মাত্তর্ সেই দিনুন্ বিদি গেলে পরেদি আমি তারারে ফেলেইনে আমা পধ্থানদি লদ্ দিলোং। বেক্ শিচ্চ্যগুন আর তারা মোগ্কুন আহ্ ঝি-পুয়োগুনে আমা লগে লগে শঅর বারেদি এলাক্। যেরেদি সাগর পারত্ আমি আঢু পাড়িনে তবনা গুরিলোং। 6 সে পরেদি একজন আরেকজনত্তুন্ বিদেয় লোইনে আমি জাহাজত্ উদিলোং আর তারা ঘরত্ ফিরি গেলাক্। 7 সোরত্তুন্ লদ্ দিইনে আমি তলিমায়িত্ লুমিলোং। সিধু বিশ্বেজি ভেইয়ুনোরে ভালেদি জানেইনে তারা সমারে একদিন থেলং। 8 তার্ কেল্যে আমি লদ্ দিইনে কৈসরিয়াত্ লুমিলোং আর গম্ হবরর্ প্রচারক ফিলিপ ঘরত্ থেলং। ইবে অলদে যিরূশালেম মন্ডলীর সেই সাতজন্ সেবাগুরিয়্যেত্তুন্ একজন। 9 তার্ চের্বো গাবুজ্জ্যে ঝি এলাক্। সিগুনে মানুচ্চুনো ইধু ভাববাদী ইজেবে গোজেনর্ কধা কধাক্। 10 আমি সিধু বেশ্ কয়েকদিন থেবার্ পরেদি যিহূদিয়াত্তুন্ আগাব নাঙে এক্কো ভাববাদী এলঅ। 11 তে আমা ইধু এইনে পৌলর্ কমর্-বিজোনিগান্ খুলি নেযেল আর সিয়েন্দোই নিজো আঢ্-টেঙানি বানিইনে কলঅ, পবিত্র আত্মাগানে কোইয়্যেদে, যিরূশালেমর্ যিহূদীগুন এই কমর্-বিজোনির্ গিরোজ্সোরে এবাবোত্যেগুরি বানিবা আর অযিহূদীগুনো আঢত্ দিবা। 12 এ কধাগান্ শুনিনে সিধুগোর্ মানুচ্চুনে আর আমি পৌলরে গমেডালে কোজোলি গুরিলোং যেন তে যিরূশালেমত্ ন-যায়। 13 সেক্কে পৌলে কলঅ, “তুমি কানাকুদি গুরিনে মঅ মনানত্ দুঘ্ দুয়োর্ কিত্তে? প্রভু যীশুত্তে মুই যিরূশালেমত্ বানা বন্দী অবাত্তে নয়, মুরিবাত্তেয়ো যুক্কোল্ আগং।” 14 তারে থামেই ন-পারিনে আমি জুরো অলং আর যেরেদি কলং, “প্রভুর্ আওজ্ মজিম্ ওক্।” 15 ইয়েন পরেদি আমি পযাপিরানি গুচ্চ্যেইনে যিরূশালেমত্ গেলং। 16 কৈসরিয়ার্ কয়েক্কো শিচ্চ্য আমা সমারে গেলাক্ আর ম্নাসোন নাঙে সাইপ্রাস দ্বীপোর্ এক্কো মান্জ্য ঘরত্ নেযেলাক্। ইবে ঘরত্ আমার্ থেবার্ কধা এলঅ। ইতে অলদে পত্তম্ শিচ্চ্যগুনোত্তুন্ এক্কো। যিরূশালেমত্ 17 যিরূশালেমত্ লুমোনার্ পরেদি বিশ্বেজি ভেইয়ুনে হুজি ওইনে আমারে মানি ললাক্। 18 তার্ কেল্যে পৌলে আমা লগে যাকোবরে চেবাত্যে গেলঅ। সিধু মন্ডলীর্ বেক্ নেতাগুন এলাক্। 19 পৌলে তারারে ভালেদি জানেল আর তা প্রচারর্ মাধ্যমে গোজেনে কিবাবোত্যেগুরি অযিহূদীগুনো ইধু কাম্ গোজ্যে সিয়েনি এক্কান্ এক্কান্ গুরি কলঅ। 20 এ কধানি শুনিনে সেই নেতাগুনে গোজেনরে বাঈনী গুরিলাক্ আর পৌলরে কলাক্, “ভেই, তুই দঅ দেগর্, কদক্ আজার্ আজার্ যিহূদী যীশু উগুরে বিশ্বেজ্ গোজ্জ্যন্ আর তারা বেক্কুনে মোশির রীতি-সুদোম পালেবাত্তে ভারী আওজি। 21 তারা হবর্ পেইয়োন, অযিহূদীগুনো ভিদিরে যিদুক্কুন্ যিহূদী থান্ তারারে তুই মোশির রীতি-সুদোম বাদ দিইনে চলিবাত্তে শিক্ষ্যে দি থাচ্, অত্তাৎ তুই তারার্ পুয়োগুনোরে চুনুগুলো মাঢাবো কাবিবাত্তে আর যিহূদীগুনোর্ চলেদে সুদোম্ পালেবাত্তে মানা গুরি থাচ্। ইক্কিনে আমি কি গুরিই। 22 তারা দঅ ঘেচ্চেকগুরি শুনিবাক্ যে, তুই এচ্চ্যস্। 23 আমি ইক্কিনে তরে যিয়েনি কোই তুই সিয়েনই গর্। আমা ভিদিরে এমন্ চের্জন মানুচ্ আঘন্ যিগুনে এক্কান্ মানত্ গোজ্জ্যন্। 24 এ মানুচ্চুনোরে তুই তঅ সমারে নেযা আর তারা সমারে তুই নিজেয়ো সিজি অ আর তারার্ মাধাবো মুড়েবার্ টেঙাগুনো দে। সেক্কে বেক্কুনে কোই পারিবাক্, তঅ পৌইদ্যেনে তারা যে হবরান্ পেইয়োন সিয়েন মিজে আর তুই রীতি-সুদোম পালর্। 25 মাত্তর্ যে অযিহূদীগুনে বিশ্বেজি ওইয়োন্ তারাত্তে আমি যিয়েন ঠিগ্ গোজ্জ্যেই সে পৌইদ্যেনে তারা ইধু এ কধাগান লিগিনে জানেয়োং, মূত্তি মুজুঙোত্ উৎসর্ব গোজ্যে হানা তারা ন-হেবাক্, লো ন-হেবাক্, তদা চিবিনে মাজ্জ্যে কনঅ এ্যামানর্ য়েরা ন-হেবা আর কনঅ বাবোত্যে বেভিচের্ ন-গুরিবা।” 26 সেক্কে পৌলে সেই মানুচ্চুনোরে নেযেইনে তারা সমারে নিজোরেয়ো সিজি গুরিলো। তার্ কেল্যে তে উবোসনা ঘরত্ গেলঅ, আর তারার্ সিজি অবার্ কামান্ কক্কে থুম্ অবঅ আহ্ পত্তি জনত্তে কক্কে এ্যামান্ উৎসর্ব গরা অবঅ সিয়েন জানেই দিলো। পৌলে বন্দী অলঅ 27 সিজি অনার্ সেই সাত দিনো শেজত্ এশিয়া রেজ্যর্ কয়েক্কো যিহূদী পৌলরে উবোসনা-ঘরত্ দেগিলাক্। তারা সিধুগোর্ বেক্ মানুচ্চুনোরে ভেজেই দিলাক্ আর পৌলরে ধুরিলাক্। 28 যেরেদি তারা রঅ ছাড়িনে কুয়ো ধুরিলাক্, ইস্রায়েলীয়গুন, উজেই এজঅ। গোদা পিত্থিমীর্ মানুচ্চুনো ইধু আমা জাদ্ আর আমা রীতি-সুদোম আহ্ উবোসনা-ঘর বিরুদ্ধে যে মানুচ্চো শিক্ষ্যে দিইনে বেড়ায়, ইবে সেই মানুচ্চো। ইয়েন বাদে তে উবোসনা-ঘরত্ গ্রীক্কুনোরে আনিনে এই পবিত্র জাগায়ান্ অপবিত্র গোজ্জ্যে। 29 তারা এ কধাগান্ কলাক্ কিয়া তারা আগে ইফিষীয় ত্রফিমরে পৌল সমারে শঅরত্ দেক্ক্যন্। সেনত্তে তারা মনে গোজ্জ্যন্, পৌলে ত্রফিমরে উবোসনা-ঘরত্-অ আন্ন্যে। 30 সেক্কে পুরো শঅরত্ উত্তেজিত ওই উদিলাক্। মানুচ্চুনে একসমারে ধাবা এইনে পৌলরে ধুরিনে উবোসনা-ঘরত্তুন্ টানিনে নিগিলেই আনিলাক্ আর সমারে সমারে উবোসনা-ঘরর্ দোরানি নাঢি দিলাক্। 31 মানুচ্চুনে পৌলরে মারে ফেলেবার্ চেষ্টা গোজ্জ্যন, এমন সময়োত্ রোমীয় সৈন্যগুনোর্ আজল্ সেনাপতিবো ইধু হবর্ গেল, গোদা যিরূশালেম শঅরত্ এক্কান্ রঅ রঅ ছঅ ছঅ পড়ি গেলঅ। 32 সেই আজল্ সেনাপতিবো সেক্কে কয়েক্কো অফিসার আর সৈন্যগুনোরে লোইনে ধাবা ধাবা ঝাগঅ ইধু গেলঅ। মানুচ্চুনে আজল্ সেনাপতিবো আর সৈন্যগুনোরে দেগিনে পৌলরে মারানা থামেলাক্। 33 সেক্কে আজল্ সেনাপতিবো এইনে পৌলরে বন্দী গুরিলো আর দ্বিয়েন শিগোল্লোই তারে বানিবার্ উগুম্ দিলো। সে পরেদি তে পুযোর্ গুরিলো, মানুচ্চো কন্না? 34 সেক্কে মানুচ্চুনো ভিদিরেত্তুন্ কয়েকজনে রঅ ছাড়িনে এক বাবোত্যে কধা কলাক্, আরঅ কয়েকজনে অন্য বাবোত্যে কধা কলাক্। সেক্কে আজল্ সেনাপতিবো জোলত্তে আজল্ বেপারান্ কোই ন-পারিনে পৌলরে কেম্পত্ নেযেবার্ উগুম দিলো। 35 পৌলে সিড়ি সং লুমোনার্ পরেদি মানুচ্চুনো আঢত্তুন্ বাঁজিবাত্তে সৈন্যগুনে তারে বুয়োই নেযা পড়িলো। 36 মানুচ্চুনে তা পিযে পিযে রঅ ছাড়িনে কুয়ো ধুরিলাক্, “তারে মারে ফেলঅ।” মানুচ্চুনো ইধু পৌলর্ কধা 37 সৈন্যগুনে পৌলরে লোইনে কেম্পত্ সোমেবাত্তে যেবাক্ এমন্ সময়োত্ পৌলে আজল্ সেনাপতিবোরে কলঅ, “তরে কি কিজু কোই পারিম্?” আজল্ সেনাপতিবো কলঅ, “তরে দেগঙত্তে গ্রীক ভাষা জানস্! 38 মিসর্ দেজর্ যে মানুচ্চো কয়েক দিন আগে উল্লোমি আরাম্ভ গুরিনে চের্ আজার্ খুনী বিদ্রোহীরে ধূল্যেচরত্ নেযেয়্যে, তুই কি সালে সেই মানুচ্চো নয়?” 39 সেক্কে পৌলে জোব্ দিলো, “মুই যিহূদী, কিলিকিয়া রেজ্যর্ তার্ষ শঅরর্ মানুচ্। মুই যে সেই শঅরর্ মানুচ্ নয়। দোয়্যে গুরিনে মরে মানুচ্চুনো ইধু কধা কবাত্তে দে।” 40 আজল্ সেনাপতিবোর্ অনুমতি পেইনে পৌলে সিড়ি উগুরে থিয়্যেল আর আঢ্ তুলিনে মানুচ্চুনোরে জুরো অবাত্তে ইজিরে দিলো। মানুচ্চুনে জুরো অলে পরেদি পৌলে ইব্রীয় কধাদি তারারে কলঅ, |
Copyright © 2021 Bangladesh Bible Society
Bangladesh Bible Society