২ শমূয়েল 4 - Chakma Bibleঈশ্বোশতে খুন অলঅ 1 অব্নের হিব্রোণত্ মুরি যেইয়্যে শুনিনে শৌলর্ পূঅ ঈশ্বোশৎ সাহস আরেই ফেলেল আর ইস্রায়েলীয়গুনেয়ো বেক্কুনে দোরেলাক্। 2 শৌলর পূঅবোর্ পক্ষেন্দি এলাক্ দ্বিজন নেতা এলাক্। তারার্ এক্কোর্ নাঙ্ অলদে বানা আর অন্যজনর নাঙ্ রেখব। তারা অলাক্ বিন্যামীন-গুট্টির্ বেরোতীয় রিম্মোণর পূঅ। বেরোত্রে বিন্যামীন চাগালার্ এক্কো ভাগ্ বিলিনে ধরা অদঅ, 3 কিত্যে বেরোতর্ মানুচ্চুনে গিত্তয়িমত্ ধেই যেইনে এবঅ সং সিদু বিদেশী ইজেবে বজত্তি গত্তন্। 4 শৌল পূঅ যোনাথনর এক্কো পূঅ এলঅ। তার দ্বিয়েন টেঙ্ এলদে লুলো। যিষ্রিয়েলত্তুন্ যেক্কে শৌল আর যোনাথনর মরানার হবরান্ এচ্চ্যে সেক্কে তা বয়সচান এলদে পাজ্ বজর। হবর্ শুনিনে পূঅবোর্ ওঝা বুড়িবো তারে করত্ তুলি নেযেইনে যাদিমাদি গুরিনে ধেই যেবার্ সলাবোত্ পূঅবো পড়ি যেইনে তা টেঙান্ লুলো ওই যেইয়্যে। পূঅবোর্ নাঙান্ এলদে মফীবোশৎ। 5 বেরোতীয় রিম্মোণর পূঅ রেখব আর বানা একদিন্যে দিবুজ্যে অক্তত্ ঈশ্বোশতর জিরেবার্ সলাবোত্ তা ঘরত্ যেইনে লুমিলাক্। 6-8 গম নেযেবার ছলনা গুরিনে তারা ঘরঅ ভিদিরে সমিলাক্। সেক্কে ঈশ্বোশৎ তা ঘরত্ খাট্তান উগুরে পড়িনে জিরের্। রেখব আর বানা তা ঘরত্ সোমেইনে তা বুগোত্ আঘাত্ গুরিনে তারে মারে ফেলেলাক্, সে পরেন্দি তা মাঢাবো কাবি নেযেইনে ধেই গেলাক্। তারা গোদা রেত্তো অরাবার পথ্তান্ ধুরিনে হিব্রোণত্ দায়ূদো ইদু সিবে নেযেলাক্। তারা তারে কলাক্, “তঅ শত্রু শৌল, যে তর্ পরাণান নেযেবার চেট্ট্যা গোজ্যে, এইয়্যে তার পূঅ ঈশ্বোশতর মাঢাবো। এচ্চ্যে লগেপ্রভু আমা গিরোজ্ মহারাজর পক্ষেন্দি শৌল আর তা পূঅবো উগুরে হেনা সুজিলো।” 9 জোবত্ দায়ূদে বেরোতীয় রিম্মোণর পূঅ রেখব আর তা ভেই বানারে কলঅ, “যিবে বেক্ দজাত্তুন্ মরে উদ্ধোর্ গোজ্যে সে জেদা লগেপ্রভুর নাঙে কঙর্, 10 যে মানুচ্চো গম্ হবর্ আন্যে ভাবিনে মরে শৌল মরাণার হবরান্ দিয়্যে মুই তারে ধুরিনে সিক্লগত্ মারে ফেলেয়োং। তা হবরানত্তে সিয়েনই অলঅ তারে দিয়্যে মর্ বকশিষছান্। 11 সালে যিগুনে এক্কো নিদ্দুজী মান্জ্যরে তা নিজোর্ ঘরত্ তা নিজোর্ বিচ্ছোন উগুরে খুন গোজ্যেন্, মুই সেই পাজি মানুচ্চুনোরে আরঅ যে কত্তমান্ বেশ্ সাজা দিম্। সেনত্তে মুই তমা আঢত্তুন্ তার্ লো ঝড়ানার্ হেনাগান দাবি গুরিম আর পিত্তিমীর্ উগুরেত্তুন্ তমারে তুলি দিম্।” 12 ইয়েন কোইনে দায়ূদে তা মানুচ্চুনোরে উগুম দেনার পরেন্দি তারা যেইনে তারারে মারে ফেলেলাক্। তারা তারার্ আত্-টেঙানি কাবি ফেলেইনে কিয়্যেগানি বিব্রোণর পুয়োর্বো পারত্ টাঙেই দিলাক্। মাত্তর্ তারা ঈশ্বোশতর মাঢাবো নেযেইনে হিব্রোণত্ অব্নেরর গোরানত্ গারেলাক্। |
Copyright © 2021 Bangladesh Bible Society
Bangladesh Bible Society