২ শমূয়েল 2 - Chakma Bibleদায়ূদে যিহূদা-গুট্টির রাজা অলঅ 1 পরেন্দি দায়ূদে লগেপ্রভুর ইদু পুযোর্ গুরিলো, “মুই কি যিহূদা চাগালার্ কনঅ এক্কান্ শঅরত্ যেম্?” লগেপ্রভু কলঅ, “অয়, যাহ্।” দায়ূদে পুযোর্ গুরিলো, “মুই কুদু যেম্?” জোবত্ লগেপ্রভু কলঅ, “হিব্রোণত যাহ্।” 2 সেক্কে দায়ূদে তার্ দ্বিবে মোগোরে, অত্তাৎ যিষ্রিয়েলর অহীনোয়ম আর কর্মিলোর নাবলর্ রানিমিলে অবীগলরে লোইনে হিব্রোণত গেলঅ। 3 যিদুক্কুন্ মানুচ্ তা সমারে থেদাক্ তে ঘোর্বো সুমুত্তো তারারেয়ো নেযেল। তারা হিব্রোণর আদামানিত্ বজত্তি গরা ধুরিলাক্। 4 সেক্কে যিহূদার মানুচ্চুনে হিব্রোণত্ এইনে দায়ূদোরে যিহূদা-গুট্টির্ মানুচ্চুনোর্ রাজা ইজেবে অভিষেগ্ গুরিলাক্। মানুচ্চুনে দায়ূদোরে এ হবরান্ দিলাক্, যাবেশ-গিলিয়দর মানুচ্চুনে শৌলরে কবর্ দুয়োন্। 5 সেক্কে তে মানুচ্ পাদেইনে যাবেশ-গিলিয়দর মানুচ্চুনোরে এ কধাগান কলঅ, “তুমি যে তমার গিরোজ্ শৌলরে গোর্ দিইনে তা উগুরে বিশ্বেজ্চান্ দেগেয়ো সেনত্যেই লগেপ্রভু যেনে তমারে বর্ দে। 6 তে যেনে ইক্কিনে তার অমকদ কোচ্পানা আর বিশ্বেজ্ তমারে দেগায়, আহ্ তমার্ সেই কামানিত্যে মুইয়ো তমা লগে গম্ বেবহার গুরিম। 7 সেনত্যেই ইক্কিনে তুমি দরমর অহ্ আর বুগোত্ সাহস রাগঅ। তমা গিরোজ্ শৌলে মুরি যেইয়্যে আর যিহূদা-গুট্টির মানুচ্চুনে মরে তারা উগুরে রাজা ইজেবে অভিষেগ্ গোজ্যন্।” শৌল আহ্ দায়ূদো মানুচ্চুনোর ভিদিরে যুদ্ধো 8 এ সময়ান ভিদিরে শৌল সৈন্যদলর সেনাপতি নেরের পূঅ অব্নের শৌল পূঅ ঈশ্বোশতরে যর্দন গাঙর্ উইকুলে মহনয়িমত্ নেযেয়োন। 9 তে ঈশ্বোশতরে গিলিয়দ, অশূর, যিষ্রিয়েল, ইফ্রয়িম, বিন্যামীন, এন্ কি, পুরো ইস্রায়েল দেজ্চান উগুরে রাজা বানেয়োন। 10 শৌলর পূঅ ঈশ্বোশৎ চল্লিশ বজর বয়জত্ ইস্রায়েল দেজর্ রাজা ওইয়্যে আর দ্বিবজর রাজাগিরি গোজ্যে। মাত্তর্ যিহূদা-গুট্টির মানুচ্চুনে দায়ূদোর অধীনোত্ এলাক্। 11 দায়ূদ হিব্রোণত্তুন্ যিহূদা-গুট্টিগুনো উগুরে সাড়ে সাত বজর রাজাগিরি গোজ্যে। 12 একদিন্যে নেরের পূঅ অব্নের শৌলর পূঅ ঈশ্বোশতর মানুচ্চুনোরে লোইনে মহনয়িমত্তুন্ গিবিয়োনত্ গেলঅ। 13 সেক্কে সরূয়ার পূঅ যোয়াব আর দায়ূদোর মানুচ্চুনে নিগিলি এলাক্। গিবিয়োনর পুয়োবো ইদু এ দ্বিবে দলে মুজুঙো-মুজুঙি অলাক্। এক্কো দলে বুজিলো এপারত্ আর অন্য দল্লো বুজিলো পূয়োর্বোর্ উই পারত্। 14 সেক্কে অব্নের যোয়াবরে কলঅ, “দ্বিবে দলর কুদুক্কুন গাবুজ্যে উদিনে আমা লগে যুদ্ধো গোত্তোক্।” যোয়াবে কলঅ, “ঠিগ্ আঘে, সিয়েনই ওক্।” 15 বিন্যামীন-গুট্টির আর শৌল পূঅ ঈশ্বোশতর পক্ষত্তুন্ বারজনরে আর দায়ূদোর পক্ষত্তুন্ বারজনরে যুদ্ধো গুরিবাত্তে বেঈ নেযা অলঅ। 16 সেক্কে দ্বিবে দলর মানুচ্চুনে বেক্কুনে একজন আরেকজনর মাধাবোত্ ধুরিনে বুগোত্ ছুরি ফুদেই দিলো আর লগে লগে মাদিত্ পড়িনে মুরি গেলাক্। সেনত্যে গিবিয়োনর সেই জাগায়ানর নাঙান্ দিয়্যে অলঅ হিল্কৎ-হৎসূরীম (যিয়েনর্ ভেদ্তান্ “ছুরিগানর্ মাঠ”)। 17 সেদিন্যে এক্কান জদবদে যুদ্ধো অলঅ আর সেক্কে অব্নের আহ্ ইস্রায়েলর মানুচ্চুনে দায়ূদো ইদু উদিই গেলাক্। 18 যোয়াব, অবীশয় আর অসাহেল নাঙে সরূয়ার তিন্নো পূঅ সিদু এলাক্। অসাহেলে ঝার্বো উরিঙো ধোক্ক্যেন্ জদবদে ধাবা দি পারিদো। 19 তে অব্নেরর্ পিজেন্দি লোড়েল আর ডেনে-বাঙে ন- যেইনে উজুগুরি তা পুনে পুনে গেলঅ। 20 অব্নের পিজেন্দি ফিরিনে তারে পুযোর্ গুরিলো, “তুই কি অসাহেল?” অসাহেল কলঅ, অয়, ঠিগ্ কোইয়োচ্। 21 সেক্কে অব্নের তারে কলঅ, “তুই ডেনে বা বাঙেন্দি ফিরিনে কনঅ গাবুজ্যেরে ওদেই দিইনে তা যুদ্ধোর্ পোজাক্কানি নেযা।” মাত্তর্ অসাহেলে তা পিজেন্দি লোড়ে লোড়ে গেলঅ। 22 অব্নের অসাহেলরে আরঅ কলঅ, “মহ্ অ, মরে ন-লোড়েস্। মুই তরে মারে ফেলেবাত্তে ন-চাং। মারিলে মুই কেজান্ গুরি তঅ ভেই যোয়াবরে মুয়োন্ দেগেম?” 23 অসাহেলে তো ফিরিবাত্তে রাজী ন-অলঅ। সেক্কে অব্নের তা সেল্লোর পিজেন্দিগান অসাহেলর পেদঅ ভিদিরে এনগুরিনে ফুদেই দিলো, সেল্লো তার পিঠতান্ ফুরি নিগিলিলো। অসাহেল সিয়োদোই পড়িনে মুরি গেলঅ। অসাহেলে যে জাগানত্ পড়িনে মুরি গেলঅ যিদুক্কুন্ মানুচ্ সে জাগানত্ এচ্ছোন্ তারা বেক্কুনে সিয়েনত্ থিয়্যেই রলাক্, 24 মাত্তর্ যোয়াব আর অবীশয়ে অব্নেরর পিজে পিজে লোড়েই নেযেলাক্। এধোক্ক্যেনগুরি তারা গিবিয়োনর ধূল্যেচরর-চাগালার ভিদিরেন্দি যেবার পদথ্ গীহোর মুজুঙোত্ অম্মা মুড়োবোর ইদু লুমিলাক্। সেক্কে বেলান্ ডুবেল্লোই। 25 অব্নেরর পিচ্চোন্দি সেক্কে বিন্যামীন-গুট্টির মানুচ্চুনে এগত্তর্ ওইয়োন। তারা এক দল ওইনে এক্কো মুড়ো উগুরে যেইনে থিয়্যেলাক্। 26 সেক্কে অব্নের যোয়াবরে ডাগিনে কলঅ, “লাম্বা ছুরিগানে কি জিংকানিবর্ কাবি কাবি থেবঅ? যেরেন্দি যিয়েনি তিদে ওই উদিবো সিয়েনি কি তুই বুঝি ন-পারর্? কক্কে তুই তঅ মানুচ্চুনোরে তারা ভেইয়ূনোর্ পিজেন্দি লড়ানা বন্ধ গুরিবাত্তে উগুম্ দিবে?” 27 যোয়াবে কলঅ, “গোজেনর্ নাঙে কঙর্, তুই কধা ন-কলেয়ো বেন্যেমাদান্ মানুচ্চুনে তারার্ ভেইয়ূনোরে লড়ানা বন্ধ গুরিদাক্।” 28 ইয়েন্ কোইনে তে তূরী বাজেল। সেক্কে বেক্ মানুচ্চুনে থামেলাক্। তারা আর্ ইস্রায়েলীয়গুনোর্ পিজেন্দি ন-লোড়েলাক্ আর যুদ্ধোয়ো ন-গুরিলাক্। 29 অব্নের আর তা মানুচ্চুনে গদা রেত্তো অরাবা সংজাগানর্ ভিদিরেন্দি আঢি যেইনে যর্দন গাঙান্ পার অলাক্। সে পরেন্দি বিথ্রোণর ভিদিরেন্দি আঢি যেইনে তারা মহনয়িমত্ যেইনে লুমিলাক্। 30 যোয়াবে অব্নেরর পিজেন্দি লড়ানা বাদ দিইনে ফিরি গেলঅ। তে তা মানুচ্চুনোরে এগত্তর্ গরানার পরেন্দি দেগা গেলদে অসাহেলে নেই আর দায়ূদোর ঊনেশজন মানুচ্অ নেই। 31 মাত্তর্ যে বিন্যামীনীয়গুনে অব্নেরর সমারে এলাক্ দায়ূদোর মানুচ্চুনে তারার্ তিনশ ষায়েটজনরে মারে ফেলেয়োন। 32 তারা অসাহেলরে তুলি নেযেইনে বৈৎলেহমত্ গেলাক্ আর তা বাবর্ গোর্বোত্ তারে গারেলাক্। সে পরেন্দি যোয়াবে আর তা মানুচ্চুনে গদা রেত্তো আঢিনে বেন্যেমাদান্ হিব্রোণত যেইনে লুমিলাক্। |
Copyright © 2021 Bangladesh Bible Society
Bangladesh Bible Society