২ শমূয়েল 19 - Chakma Bible1 পরেন্দি যোয়াবরে হবর্ দিয়্যে অলঅ, অবশালোমত্তে রাজা কানের্ আর আবিলেচ্ গরের্। 2 এ কধাগান শুনিনে সে জিত্যেদে দিন্নো সৈন্যগুনোর এক্কো আবিলেচর্ দিন অলঅ, কিত্যে সেদিন্যে সৈন্যগুনে শুনিলাক্, রাজা তা পূঅবোত্তে আবিলেচ্ গরের্। 3 যুদ্ধোত্তুন্ ধেই যেইয়্যে মানুচ্চুনে যেধোক্ক্যেন্ লাজে জুরো গুরিনে ফিরি এজন্ সেধোক্ক্যেন গুরিই দায়ূদো সৈন্যগুনে সেদিন্যে জুরো গুরিনে শঅরত্ যেইনে সোমেলাক্। 4 রাজা তা মুয়োন্ ঢাগিনে ইয়েন কোইনে গুজুরি গুজুরি কানা ধুরিলো, “হায়, মঅ পূঅবো অবশালোম! হায়, অবশালোম, মঅ পূঅবো, মঅ পূঅবো!” 5 সেক্কে যোয়াবে ঘর ভিদিরে যেইনে রাজারে কলঅ, “যিগুনে তঅ জিংকানিগান, তঅ ঝি-পূঅগুনোর জিংকানিগান আর তঅ মোক্কো আর দ্বিতীয় ঘর মোক্কুনোরে রোক্ষ্যে গোজ্যন্ তুই এচ্চ্যে তর্ সে মানুচ্চুনোরে অগমান গুরিলে। 6 যিগুনে তরে ঘিনেন্ তারারে তুই কোচ্পেইয়োচ্, আর যিগুনে তরে কোচ্পেইয়োন তারারে তুই ঘিনেয়োচ্। এচ্চ্যে তুই গমেডালে বুঝে দিলেদে, সেনাপতিগুনে আর তারার্ মানুচ্চুনে তইদু কিচ্ছু নয়। মুই দেগঙর্, আমি বেক্কুনে মুরি যেইনে যুনি অবশালোমে বাঁজি থেদঅ সালে তুই হুজি অদে। 7 ইক্কিনে তুই বারেন্দি যেইনে তঅ মানুচ্চুনোরে উচ্চোমি তুলি দে। মুই লগেপ্রভুরে সাক্ষী রাগেইনে কঙর্, তুই যুনি সৈন্যগুনো ইদু ন-যাচ্ সালে এচ্চ্যে রেদোত্ এক্কো মানুচ্অ তঅ সমারে ন-থেবাক্। তর্ চিগোনত্তুন্ ধুরি এচ্চ্যে সং তঅ উগুরে যেদক্কানি অমংগল ঘোট্যে সিয়েনিত্তুন্ ইয়েনই অবঅ দাঙর্ ফারাদযা।” 8 সেক্কে রাজা উদিনে শঅরর্ গেদো ইদু যেইনে বুজিলো। মানুচ্চুনে যেক্কে হবর্ পেলাক্, রাজা গেদো ইদু বোস্যে সেক্কে বেক্কুনে তাইদু এলাক্। ইন্দি অবশালোমর্ পক্ষেন্দি ইস্রায়েলীয় সৈন্যগুনে যে যার্ ঘরত্ ধেই যেয়োন্। দায়ূদে যিরূশালেমত্ ফিরি এলঅ 9 ইস্রায়েলর পুরো গুট্টিগুনো ভিদিরে মানুচ্চুনে তর্কাতর্কি গুরিনে কুয়ো ধুরিলাক্, “রাজা শত্রুগুনোর আঢত্তুন্ আমারে রোক্ষ্যে গোজ্যে; পলেষ্টীয়গুনো আঢত্তুন্ তেয়ই আমারে উদ্ধোর্ গোজ্যে। মাত্তর্ ইক্কিনে তে অবশালোমত্তেই দেজত্তুন্ ধেই গেলঅ। 10 যিবেরে আমি আমা উগুরে রাজাগিরি গুরিবাত্তে অভিষেগ্ গোজ্যেই সেই অবশালোমে যুদ্ধোত্ মুরি যেইয়্যে। সালে রাজারে ফিরেই আনিবাত্তে তুমি কন কিজু ন-কর্ কিত্তে?” 11 গোদা ইস্রায়েল দেজত্ যিয়েনি কুয়ো কি অর্ সিয়েনি রাজার কানত্ যেইনে লুমিলো। সেনত্তে রাজা দায়ূদে ধর্মগুরু সাদোক আর অবিয়াথর ইদু এ কধাগান কোই পাদেল, তুমি যিহূদার বুড়ো নেতাগুনোরে এ কধাগান পুযোর্ গরঅ, কিত্তে তুই রাজারে তা রাজঘরত্ ফিরেই আনদে দেরি অর্? 12 তুমি দঅ তা ভেই, তার্ নিজোর এক য়েরা। সালে রাজারে ফিরেই আনদে কিত্তেই তুমি পিজেন্দি পড়ি রোইয়ো? 13 তুমি মর্ ওইনে অমাসারে এ কধাগান কঅ, তুইয়ো কি মর্ এক য়েরা নয়? ইক্কেত্তুন্ ধুরি যোয়াবর জাগানত্ তুই যুনি মঅ সৈন্যদলর সেনাপতি ন-অচ্ সালে গোজেনে যেনে মরে সাজা দে, আর সিয়েন জদবদে গুরিনেই দে। 14 এধোক্ক্যেনগুরি দায়ূদে যিহূদার বেক্ মানুচ্চুনোর মনানি বানা এক্কো মান্জ্যর মন ধোক্ক্যেন্ জিদি নিলো। তারা রাজারে এ কধাগান কোই পাদেলাক্, “তুই আর তর্ বেক্ মানুচ্চুনে ফিরি এলাক্।” 15 সেক্কে রাজা ফিরিবার পদথ্ যর্দন গাঙ্ সং লুমিলোগি। যিহূদার মানুচ্চুনে রাজার লগে দেগা গুরিনে তারে যর্দন গাঙান্ পার্ গুরি অানিবাত্তে গিল্গলত্ এলাক্। 16 বহুরীম আদামর বিন্যামীন-গুট্টির গেরার পূঅ শিমিয়ি দেরি ন-গুরিনে যিহূদার মানুচ্চুনোর লগে রাজা দায়ূদো ইদু দেগা গুরিবাত্তে এলাক্। 17 তা লগে এলাক্ বিন্যামীন-গুট্টির এক আজার মানুচ্ আর শৌল গিরির্ চাগর সীবঃ আর তার পন্দরজন পূঅ আর কুড়িজন চাগর্। রাজা যর্দন গাঙান্ পার অবার্ আগেন্দি তারা যাদিমাদি গুরিনে যর্দন গাঙর্ ইদু যেইনে লুমিলাক্। 18 রাজার গিরির্ বেক্কুনোরে অানিবাত্তে আর রাজার অাওজ মজিম্ কাম গুরিবাত্তে তারা আঢিনে পার্ অইদে পথ্তানন্দি যেইনে গাঙান্ পার্ অলাক্। রাজা যেক্কে যর্দন গাঙান্ পার্ অবঅ ঠিগ্ সেই সলাবোত্ গেরার পূঅ শিমিয়ি এইনে রাজা মুজুঙোত্ অাদু পাড়ি পড়িনে কলঅ, 19 “মঅ গিরোজ্সো যেনে মঅ দুষ্চান ন-ধরে। মঅ গিরোজ্সো মহারাজে যেদিন্যে যিরূশালেমান ফেলেই যার্ সেদিন্যে তঅ চাগর্ মুই যে অন্যেয়ান গোজ্যং সিয়েন যেনে তুই মনত্ ন-রাগাচ্। মহারাজে যেনে তা মনত্তুন্ সিয়েনি দূর্ গুরি দে। 20 মুই হবর্ পাং, মুই পাপ গোজ্যং। সেনত্তে এচ্চ্যে যোষেফর্ বংশ ভিদিরে মুয়ই বেক্কুনোত্তুন আঘে মঅ গিরোজ্ মহারাজর লগে দেগা গুরিবাত্তে ইদু এচ্যং।” 21 সেক্কে সরূয়ার পূঅ অবীশয় কলদে, “লগেপ্রভুর অভিষেগ্ গোজ্যে মানুচ্চোরে শিমিয়ি গেইল্ দিয়্যে বিলিনে কি তারে মারে ফেলানা উজিত্ নয়?” 22 জোবত্ দায়ূদে কলঅ, “ও সরূয়ার পূঅগুন, এ পৌইদ্যেনে তমা লগে মর্ কি সম্পর্ক? এচ্চ্যে কিত্তে তুমি মঅ উল্লোমি গরর্? এচ্চ্যে কি ইস্রায়েলত্ কাররে মারে ফেলানা উজিত্? মুই কি এ কধাগান হবর্ ন-পাং, এচ্চ্যেয়ো মুই ইস্রায়েলীয়গুনোর রাজা?” 23 সে পরেন্দি রাজা এগেম্ গুরিনে শিমিয়নরে কলঅ, “তরে মারে ন-ফেলেবং।” 24 এ পরেন্দি শৌল নাদিন্ মফীবোশতে রাজার লগে দেগা গুরিবাত্তে এলঅ। রাজা যেবার পরেত্তুন্ ধুরি তার গমেডালে ফিরি এজানার দিন্নো সং তে নিজো টেঙানি যত্তন্ ন-গরে, দাড়িগানি নঅ-কাবে আর কাবড়-চুগোরানিয়ো নঅ-ধয়। 25 রাজা যিরূশালেমত্ ফিরি এজানার পরেন্দি মফীবোশতে তা লগে দেগা গুরিবাত্তে এলঅ। সেক্কে রাজা তারে পুযোর্ গুরিলো, “মফীবোশৎ, তুই মঅ লগে কিত্তে ন-গেলে?” 26 তে কলঅ, “মঅ গিরোজ্ মহারাজ, তঅ চাগর্ মুই আদুর্, সেনত্তেই কোইয়োঙে, ‘মঅ গাধাবো উগুরে গদি চাবিনে মুই তা উগুরে উদিনে রাজা লগে যেম্।’ মাত্তর্ মঅ চাগর্ সীবঃ মঅ লগে বেইমানি গোজ্যে। 27 মঅ গিরোজ মহারাজ মুজুঙোত্ তে মঅ বন্নাম্ গোজ্যে। মঅ গিরোজ্ মহারাজে গোজেনরর্ এক্কো দূতো ধোক্ক্যেন্; সেনত্তেই মঅ উগুরে তর্ যিয়েন্ হুজি সিয়েনই গর্। 28 মঅ আজুর্ গুট্টিগুনে মঅ গিরোজ মহারাজ মুজুঙোত্ মরাণা উজিত্, মাত্তর্ তো তর্ যে মানুচ্চুনে তঅ টেবিলোত্ হেবাত্তে বোইনে তুই তর্ এ চাগর্বোরেয়ো তারা ভিদিরে এক্কান জাগা দুয়োচ্। সালে মহারাজ ইদু আর কোজোলি গুরিবার মর্ কি অধিকার আঘে?” 29 রাজা তারে কলঅ, “তর্ আর কিচ্ছু কবার্ দরকার নেই। তুই আর সীবঃ ভূইয়ানি ভাগ গুরি নেযঅ।” 30 মফীবোশতে রাজারে কলঅ, “তেয়ই বেক্কানি নেযোক্। মঅ গিরোজ্ মহারাজে গমেডালে ঘরত্ ফিরি এচ্যে সিয়েনই মুই হুজি।” 31 রাজা যিরূশালেমত্ ফিরি এবার্ আগেন্দি গিলিয়দীয় বর্সিল্লয় রোগলীমত্তুন্ এইনে রাজারে বিদেয় দিবাত্তে তা লগে যর্দনর্ পারত্ এচ্যে। 32 বর্সিল্লয় অমকদ বুড়ো ওইয়্যে; তা বয়সচান এলদে আশি বজর। রাজা যেক্কে মহনয়িমত্ এলঅ সেক্কে তেয়ই তাত্তে হানা-দানার বেবস্থা গোজ্যে, কিত্যে তে খুব থাগোয়্যে মানুচ্ এলঅ। 33 রাজা বর্সিল্লয়রে কলঅ, “মঅ লগে পার্ ওই এইনে যিরূশালেমত্ মইদু থাক্কি। মুয়ই তরে পালেম্।” 34 মাত্তর্ জোবত্ বর্সিল্লয় রাজারে কলঅ, “মুই আহ্ কয় বজর্ বা বাঁজিম্, মুই রাজার লগে যিরূশালেমত্ যেম্? 35 মর্ বয়স ইক্কিনে আশি বজর। কুবোন্ গম্ আহ্ কুবোন বজং সিয়েন কি ইক্কিনে আর্ মুই কোই পারং? তঅ চাগর্ মুই ইক্কিনে যিয়েনি হাং সিয়েনি সুয়োত্ কি মুই বুঝি পারং? গান গেইয়্যেগুনোর গানুন্ কি মুই এজঅ শুনোং? তঅ এ চাগরবো কিত্তে মঅ গিরোজ মহারাজর্ এক্কো অালাদা ঝামেলা ওই থেবঅ? 36 মহারাজ কিত্তে মরে এবাবোত্যেগুরি প্রাইজ্ দিবে? না, না, মুই বানা তঅ লগে যর্দন গাঙান্ পার্ ওই যেম্, 37 সে পরেন্দি মরে ফিরি যেবাত্তে দে যেনে মুই নিজো ঘরত্ মঅ মা-বাব গোরুনোর্ কায়-কুরে মুরি পারং। এইয়্যে চাহ্, তঅ চাগর্ কিম্হম; তেয়ই তঅ সমারে যর্দন গাঙান্ পার ওই যোক্। তুই যিয়েন গম্ বিলি মনে গরচ্ তা উগুরে তুই সিয়েনই গুরিবে।” 38 রাজা কলদে, “ঠিগ্ আঘে, কিম্হম মঅ সমারে গাঙান্ পার্ ওই যেবঅ, আর তুই যিয়েন চর্ মুই তা উগুরে সিয়েনই গুরিম। ইয়েনবাদে তুই মত্তুন্ যিয়েন্ চাজ্ তত্তেই মুই সিয়েনই গুরিম।” 39 এ পরেন্দি বেক্ মানুচ্চুনে গাঙান্ পার্ ওই গেলাক্, সে পরেন্দি রাজা গাঙান্ পার্ ওই গেলঅ। রাজা বর্সিল্লয়রে চুমিনে বর্ দিলো আর বর্সিল্লয়ে আরঅ গাঙান্ পার্ ওইনে নিজো ঘরত্ ফিরি গেলঅ। 40 এবাবোত্যেগুরিনে যিহূদার বেক্ মানুচ্চুনে আর ইস্রায়েলর কিজু মানুচ্ রাজারে গাঙান্ পার্ গোরেইনে অানিলাক্। সে পরেন্দি রাজা গিল্গলত্ গেলঅ আর কিম্হমেয়ো তা সমারে গেলঅ। 41 ইস্রায়েলর বাদ্বাগি মানুচ্চুনে রাজার ইদু এইনে কলাক্, “কিত্তে আমা ভেই যিহূদার মানুচ্চুনে তরে চুর্ গুরি অানিলাক্? তারা তরে, তঅ গিরির্ আর তঅ লগে বেক্ থাগোয়্যে মানুচ্চুনোরে গাঙান্ পার্ গোরেইনে কিত্তেই অানিলাক্?” 42 জোবত্ যিহূদার বেক্ মানুচ্চুনে ইস্রায়েলর মানুচ্চুনোরে কলাক্, “রাজার লগে আমার সদর্ কুদুম্মো আঘে বিলিনে আমি সিয়েন গোজ্যেই। তুমি কিত্তে এদক্ রাগ্ গরর্? আমি কি রাজার কনঅ হানাত্তুন্ কিজু হেইয়্যেই? না কি তে আমারে কিজু ভেদ দিয়্যেদে?” 43 জোবত্ ইস্রায়েলর মানুচ্চুনে যিহূদার মানুচ্চুনোরে কলাক্, “আমি দশ গুট্টি বিলি রাজা দায়ূদো উগুরে তমাত্তুন বেশ্ আমার অধিকার অাঘে। সেনত্তেই তুমি কিত্তে আমারে এধোক্ক্যেনগুরি ঈচ্ গরর্? আমা রাজারে ফিরেই আনিবার কধা কি আমি পোইল্যে ন-কোই?” মাত্তর্ ইস্রায়েলর মানুচ্চুনোত্তুন্ বেশ্ যিহূদার মানুচ্চুনোর কধানি কোচ্কোচ্যে বিলিনে মনে অলঅ। |
Copyright © 2021 Bangladesh Bible Society
Bangladesh Bible Society