২ শমূয়েল 17 - Chakma Bible1 অহীথোফল অবশালোমরে আরঅ কলঅ, “মরে এচ্যে রেদোত্ বার আজার মানুচ্ নেযেইনে দায়ূদো পিজেন্দি লোড়েবাত্তে ইরি দে। 2 যেক্কে তে বল্পোজ্যে আর অাঢি নবাজ্যে থেবঅ সেক্কে মুই তারে আক্রমণ গুরিম। মুই তারে এন্ দর্বুক্ লাগেই দিম্, তা লগে মানুচ্চুনে ধেই যেবাক্। সেক্কে মুই বানা রাজারে মারে ফেলেম, 3 আর বেক্ মানুচ্চুনোরে তইদু ফিরেই আনিম। তুই যিবের্ মরণান চঅর্ তে বাদে আর বেক্ মানুচ্চুন যেক্কে ফিরি এবাক্ সেক্কে সুগ্-শান্দি অবঅ।” 4 অবশালোম আর ইস্রায়েলর বেক্ বুড়ো নেতাগুনো ইদু এ বুদ্ধিগান গম্ বিলিনে মনে গুরিলাক্। 5 মাত্তর্ অবশালোমে কলঅ, “অর্কীয় হূশয়রে ডাক, তার কি কবার্ আঘে সিয়েনি আমি শুনিই।” 6 হূশয় এজানার পরেন্দি অবশালোমে তারে কলঅ, “অহীথোফলে আমারে এ বুদ্ধিগান দিয়্যে। তে যিয়েনি কোইয়্যে সিয়েনি কি আমি গুরিবোং? যুনি সিয়েনি ন-অয়, তঅ মনজক্কাগান্ কি?” 7 হূশয় অবশালোমরে কলঅ, এবারত্ অহীথোফলে যে বুদ্ধিগান দিয়্যে সিয়েন গম্ নয়। 8 তুই দঅ হবর্ পাজ্, তঅ বাপ্পো আর তা মানুচ্চুনে যোদ্ধা। তারা ছঅ কাড়ি নেযেয়্যে ঝার্বো ভালুগো ধোক্ক্যেন্ দর্গরেপারা। সিয়েন বাদেয়ো তঅ বাপ্পো এক্কো জদবদে যোদ্ধা; তে তার সৈন্যদলুনো ভিদিরে রেত্ ন-কাদেদ। 9 তে ইক্কিনে কনঅ গাদত্ বা অন্য কনঅ জাগাত্ পৌল্যেই আঘে। যুদ্ধোর্ আরম্ভত্ যুনি তঅ সৈন্যগুনোর কয়েকজনে মুরি যান্ সালে যিগুনে সে কধাগান শুনিবাক্ তারা কবাক্, অবশালোমর্ পক্ষেন্দি সৈন্যদলর ভালোক্কুনোরে মারে ফেলা ওইয়্যে। 10 সেক্কে বেগত্তুন্ বোলী আর সিংহ ধোক্ক্যেন্ সাহসী যে সৈন্যবোয়ো দরে গির্গিরেব, কিত্যে ইস্রায়েলর বেক্কুনে হবর্ পান্, তঅ বাপ্পো এক্কো যোদ্ধা আর তা লগে যিগুনে আগন্ তারায়ো বোলী। 11 “সেনত্তেই মুই তরে এ বুদ্ধিগান দুয়োঙর্: দানত্তুন্ বের্-শেবা সং সাগর পারর গুণি ন-পুরেইয়্যে ধূল্যেকণা ধোক্ক্যেন্ বেক্ ইস্রায়েলীয়গুন তইদু এগত্তর্ ওদোক্ আর তারারে লোইনে তুই নিজেই যুদ্ধোত্ যাহ্। 12 সেক্কে যিয়োদোই তে থেদঅ সাৎ সিয়োদোই আমি তারে আক্রমণ গুরিবোং আর মাদিত্ শিরোপানি পড়েদে ধোক্ক্যেন্ গুরি আমি তা উগুরে পড়িবোং। তে বা তা মানুচ্চুনোরে কাররে আমি বাঁজেই ন-রাগেবং। 13 তে যুনি কনঅ শঅরত্ যেইনে সমে সালে আমি বেক্ ইস্রায়েলীয়গুনে সিয়েনত্ দুড়ি লোই যেবং আর শঅরানরে টানিনে এনগুরি কলগ ভিদিরে ফেলেবং, শঅরর্ পাত্তরর্ এক্কো কট্টায়ো সিয়েনত্ পড়ি ন-থেবঅ।” 14 অবশালোম আর ইস্রায়েলর বেক্ মানুচ্চুনে কলাক্, “অহীথোফলর সল্লাগানিত্তুন্ অর্কীয় হূশয়র সল্লাগানি গম্।” আজলে অবশালোমর্ উগুরে ভস্তগান্ অানিবাত্তে লগেপ্রভু অহীথোফলর গম্ সল্লাগানরে বিফল গুরি দিবো বিলিনে ঠিগ্ গুরি রাগেয়্যে। 15 হূশয় ধর্মগুরু সাদোক আর অবিয়াথররে কলঅ, “অবশালোম আর ইস্রায়েলর বুড়ো নেতাগুনোরে অহীথোফলে এ সল্লাগান দিয়্যে, মাত্তর্ মুই তারার্ এ বুদ্ধিগানি দুয়োং। 16 তুমি ইক্কিনে দায়ূদো ইদু হবর্ পাদেইনে এ কধাগান কঅ, ‘ধূল্যেচর-চাগালাত্ যে জাগায়ান আঢিনে গাঙান্ পার উয়ো যায় সিয়েনত্ এচ্ছ্যে রেত্তো ন-কাদেবা; গাঙান্ পার ওই যাহ্ পুরিবো। সিয়েন ন-অলে রাজা আর তা সমারে বেক্ মানুচ্চুনে মারা পড়িবাক্।’” 17 সে অক্তত্ যোনাথন আর অহীমাসে ঐন্-রোগেলত্ এলাক্। এক্কো চাগরানিয়ে তারারে হবরানি জানেদ আর তারা যেইনে রাজা দায়ূদোরে সে হবরান দিদাক্, কিত্যে শঅরত্ যানা-এজানার রিক্সান তারা নেযেই ন-পারিদাক্। 18 মাত্তর্ এক্কো গাবুজ্যে তারারে দেগিলো আর অবশালোমরে যেইনে হবরান দিলো। সেনত্তেই তারা যাদিমাদি আঢি গেলাক্ আর বহুরীমোত্ এক্কো মান্জ্যর্ ঘরত্ গেলাক্। তা উদোনত্ এক্কো কূয়ো এলঅ। তারা সে কূয়োবোত্ লামিলাক্। 19 সে মানুচ্চোর মোক্কো এক্কো ঢাগনি দিইনে কূয়োবোর্ মুয়োন ঢাগি দিলো আর তা উগুরে সোজ্য ছিদি রাগেল। কনজনে এ ঘটনাগানর্ কিজু হবর্ ন-পেলাক্। 20 অবশালোমর্ মানুচ্চুনে সে ঘরানত্ এইনে মিলেবোরে পুযোর্ গুরিলাক্, “অহীমাস আর যোনাথনে কুদু?” জোবত্ মিলেবো কলঅ, “তারা পানি গঙারান্ পার্ ওই যেইয়োন।” সে মানুচ্চুনে তোগেইনে কাররে ন-পেলাক্, সেনত্তেই তারা যিরূশালেমত্ ফিরি গেলাক্। 21 মানুচ্চুনে আঢি যানার পরেন্দি সে দ্বিজনে কূয়োবোত্তুন্ উদি এইনে রাজা দায়ূদোরে হবর্ দিবাত্তে গেলাক্। তারা তারে কলাক্, “তুই ইক্কিনে নিগিলি অায় আর গাঙান্ পার ওই যাহ্; অহীথোফলে তঅ বিরুদ্ধে এ বুদ্ধিগান দিয়্যে।” 22 সেনত্তেই দায়ূদে আর তা সমারে বেক্ মানুচ্চুনে নিগিলিলাক্ আর যর্দন গাঙান্ পার ওই গেলাক্। বেন্যে পহর্ অবার আগেন্দি তারা বেক্কুনে যর্দন গাঙান্ পার্ ওই গেলাক্, একজনেয়ো বাগি ন-রলাক্। 23 অহীথোফলে যেক্কে দেগিলো, তা সল্লা মজিম্ কাম গরা ন-অলঅ সেক্কে তে তা গাধাবো উগুরে গদিবো চাবিনে তা নিজো আদাম ঘরত্ গেলঅ। তা ঘরর্ বেক্কানি বেবস্থা গুরিনে তে গত্তনাত্ ধুরি বানিনে মুরিলো। তা বাব গোরবোত্ তারে গোর্ দিয়্যে অলঅ। 24 দায়ূদে মহনয়িমত্ গেলঅ আর ইন্দি অবশালোমে ইস্রায়েলর বেক্ মানুচ্চুন লোইনে যর্দন গাঙান্ পার্ ওই গেলঅ। 25 অবশালোম তা সৈন্যদলুনোর উগুরে যোয়াবর বদলে অমাসারে নেযেল। অমাসা অলদে যিথ্র নাঙে এক্কো ইস্রায়েলর পূঅ। যিথ্র নাহশর পূঅ অবীগলরে ললঅ। অবীগলে অলদে যোয়াবর মা সরূয়ার বোন। 26 অবশালোমে আর ইস্রায়েলীয়গুনে গিলিয়দ চাগালাত্ যেইনে তাম্বুল টাঙেলাক্। 27-28 দায়ূদ মহনয়িমত্ যানার পরেন্দি অম্মোনীয়গুনোর রব্বা শঅরর্ নাহশর পূঅ শোবি, লোদবারর্ অম্মীয়েলর পূঅ মাখীর আর রোগলীমোর গিলিয়দীয় বর্সিল্লয় দায়ূদ আর তা সমারে মানুচ্চুনোত্তে বিচ্ছোন, গাবালা আহ্ মাদি পিলে অানিলাক্। দায়ূদ আর তা মানুচ্চুনে হেবাত্তে তারা গম, যেদেনাবিজি, মোয়দ্যা, ভাজা শজ্য, সুমি, মসুর ডেল্, কলাই, 29 মধু, দই, গোরু দুধোর পনীর আহ্ ভেড়া আনিলাক্। তারা মনে গোজ্যন্দে, ধূল্যেচর-চাগালাত্ সে মানুচ্চুনোর পেট পুরের্ আহ্ পানি তিরেজে পেইয়্যে আর তারা বল্পোজ্যে ওইয়োন। |
Copyright © 2021 Bangladesh Bible Society
Bangladesh Bible Society