২ শমূয়েল 15 - Chakma Bibleঅবশালোমর্ কুজুরোমি 1 যেরেন্দি অবশালোমে নিজোত্তে রথ আর ঘোড়া যুক্কোল্ গুরিলো আর তা আগে আগে যেবাত্তে পঞ্চাশজন মানুচ্ নেযেল। 2 অবশালোমে বেন্যেপোত্যে উদিনে শঅর গেদো ইন্দি যেবার্ পদথ্ একডাগেন্দি থিয়্যেদ। কনজনে যেক্কে কনঅ আবিত্তিলোই রাজা ইদু বিচেরত্তে এদাক্ অবশালোমে তারে ডাগিনে পুযোর্ গুরিদো, “তুই কন্ আদামর্ মানুচ্?” জোবত্ মানুচ্চো কদঅ, “তঅ চাগর্ মুই ইস্রায়েলর অমুক গুট্টির্ মানুচ্।” 3 সেক্কে অবশালোমে তারে কদঅ, “চাহ্, তঅ আবিত্তিগান ন্যায্য আর ঠিগ্, মাত্তর্ তঅ কধাগান শুনিবাত্তে রাজার কনঅ মানুচ্ নেই।” 4 সে পরেন্দি তে আরঅ কদঅ, হায়, মরে যুনি দেজর্ বিচেরক্ ইজেবে নেযা অদঅ! সালে যিগুনে মইদু আবিত্তিলোই এদাক্ মুই তারাত্তে বেক্কুনোর পক্ষেন্দি গমবিচের্ গুরিদুং। 5 ইয়েনি বাদেয়ো যুনি কনজনে তারে সালাম গুরিবাত্তে তা মুজুঙোত্ যেদাক্ সালে তে আত্ বাড়েইনে তারে চুমিদো। 6 ইস্রায়েলীয়গুনোর যিদুক্কুন মানুচ্ রাজা ইদু বিচেরত্তে এদাক্ অবশালোমে তারার্ লগে এধোক্ক্যেন্ বেবহার গুরিদো। এধোক্ক্যেনগুরিনে তে ইস্রায়েলীয়গুনোর মনানি জয় গুরিলো। 7 চের্ বজর্ পরেন্দি অবশালোমে রাজারে কলঅ, “মুই লগেপ্রভু ইদু যে মান্যেগান গোজ্যং সিয়েন্ ছিড়েবাত্তে মরে হিব্রোণত্ যেবাত্তে দে। 8 তঅ চাগর্ মুই অরামর গশূরত্ থেবার্ সময়োত্ মানত্ গুরি কোইয়োং, ‘লগেপ্রভু যুনি মরে যিরূশালেমত্ ফিরেই নেযায় সালে মুই হিব্রোণত্ যেইনে লগেপ্রভুর নাঙে উৎসর্ব গুরিম।’” 9 রাজা তারে কলঅ, “গমেডালে যাহ্।” সেক্কে অবশালোমে হিব্রোণত্ গেলঅ। 10 অবশালোমে ইস্রায়েলর বেক্ গুট্টিগুনোর ইদু এ কধাগান কোইনে গুমুরোত্ মানুচ্ পাদেল, “তুমি যে তূরীর রঅবো শুনিবা এম্নে কবাদে, ‘অবশালোমে হিব্রোণত্ রাজা অলঅ।’” 11 যিরূশালেমত্তুন্ দ্বিশত মানুচ্ অবশালোম লগে গেলাক্। গর্বা ইজেবে তারারে ডাগিনে নেযা ওইয়্যে অার তারা কনঅ কিজু ন-জানিনেই উজু মনে তা লগে গেলাক্। 12 উৎসর্ব গুরিবার্ অক্তত্ অবশালোমে দায়ূদোর গীলোনীয় মন্ত্রী অহীথোফলরে তা আদাম গীলোত্তুন্ ডাগিনে আনিলো। কুজুরোমিগান বেশ্ দাঙর্ ওই উদিলো, কিত্যে অবশালোম পক্ষেন্দি মানুচ্চুন্ বেজত্তুন বেশ্ বাড়া ধুরিলাক্। দায়ূদে ধেই গেলঅ 13 যেরেন্দি এক্কো মানুচ্ দায়ূদো ইদু এইনে কলঅ, “ইস্রায়েলীয়গুনোর মনান্ অবশালোমর্ ইন্দি গেলঅ।” 14 যিরূশালেমত্ দায়ূদোর যিদুক্কুন্ চাগর্ তা লগে এলাক্ তে তারারে কলঅ, “আঢ, আমি ধেই যেই। সিয়েন ন-অলে আমি কনজনে অবশালোম আঢত্তুন্ রোক্ষ্যে ন-পেবং। আমাত্তুন্ ইক্কিনে নিগিলা পুরিবো, দগেনলে তে যাদিমাদি এইনে আমারে অমকদ দযাত্ ফেলেব আর শঅরর্ বেক্কুনোরে শেজ্ গুরি দিবো।” 15 রাজার কামগুরিয়্যেগুনে তারে কলাক্, “আমা গিরোজ্ মহারাজর যিয়েন অাওজ্ আমি সিয়েনই গুরিবাত্তে যুক্কোল্ আগিই।” 16 সেক্কে রাজা আঢা মারিলো আর তা ঘরর্ বেক্কুনে তা পুনে পুনে গেলাক্। রাজঘরান্ দেগাশুনো গুরিবাত্তে তে দশজন দ্বিতীয় ঘর মোগোরে থোই গেলঅ। 17 রাজা আর তা লগে বেক্ মানুচ্চুনে যাদে যাদে শঅরর্ থুম্ ধুজিত্ যেইনে থামেলাক্। 18 দায়ূদোর বেক্ মানুচ্চুনে তা মুজুঙেন্দি উজেই গেলাক্। তারা এলাক্কে করেথীয়, পলেথীয় আর ছয়শ গাতীয় মানুচ্ যিগুনে আগে গাৎত্তুন্ রাজার লগে এচ্ছোন্। 19 রাজা সেক্কে গাতীয় ইত্তয়রে কলঅ, “আমা লগে কিত্তে তুই যর্? তুই ফিরি যেইনে রাজা অবশালোমর্ লগে থাগ্। তুই দঅ বিদেশী; তঅ নিজোর্ দেজত্তুন্ তুই নিগিলি এচ্ছোস্। 20 তুই দঅ বানা সেদিন্যে এচ্ছোস্। আর এচ্ছ্যে কি তরে আমা লগে ঘুরি বেড়েবাত্তে মর্ নেযানা উজিত? মুই নিজে হবর্ ন-পাং মুই কুদু যাঙর্। তুই ফিরি যাহ্ আর তঅ দেজর্ মানুচ্চুনোরেয়ো লগে নেযা। ন-ফুরেইয়্যে কোচ্পানা আর বিশ্বেজ্ তমার্ সমাজ্যে ওক্।” 21 মাত্তর্ ইত্তয় রাজারে কলঅ, “জেদা লগেপ্রভুর নাঙে কঙর্ আর মঅ গিরোজ্ মহারাজার্ নাঙে কঙর্, মঅ গিরোজ্ মহারাজে যিয়েনত্ থেবঅ সিয়েনত্ তঅ চাগর্ মুইয়ো থেম্, সেক্কে মুই বাঁজি থাং বা মুরি যাং।” 22 এ কধাগান শুনিনে দায়ূদ ইত্তয়রে কলঅ, “সালে উজেই যঅ।” সেক্কে গাতীয় ইত্তয় তার বেক্ মানুচ্চুন আর তা সমারে বেক্ পরিবারুন্ লোইনে উজেই গেলঅ। 23 দায়ূদোর বেক্ মানুচ্চুন যেক্কে যাদন্ সেক্কে দেজর্ বেক্ মানুচ্চুনে গুজুরি গুজুরি কানা ধুরিলাক্। রাজা আর তার বেক্ মানুচ্চুনে কিদ্রোণ কলক্কান পার্ ওইনে ধূল্যেচর্ ইন্দি উজেই গেলাক্। 24 রাজা যেক্কে শঅরত্তুন্ নিগিলি যার্ সেক্কে ধর্মগুরু সাদোক আর বেক্ লেবীয়গুনেয়ো তা সমারে এলাক্। লেবীয়গুনে গোজেনর্ সাক্ষ্য-সুন্দুক্কো বুয়োই নেযাদন্। শঅরত্তুন্ বেক্ মানুচ্চুন্ নিগিলি ন-যানা সং লেবীয়গুনে গোজেনর সুন্দুক্কো লামেই রাগেলাক্ আর ধর্মগুরু অবিয়াথরেয়ো তারা সমারে গেলঅ। 25 বেক্ মানুচ্চুন নিগিলি যানার পরেন্দি রাজা সাদোকরে কলঅ, “গোজেনর সুন্দুক্কো শঅরত্ ফিরেই নেযা। লগেপ্রভু যুনি মরে কোচপানার্ চোগেন্দি দেগে সালে তে মরে ফিরেই আনিবো আর এ সুন্দুক্কো আর তার থেবার জাগাগান আরঅ মরে চেবাত্তে দিবো। 26 মাত্তর্ যুনি তে কয়, ‘মুই তঅ উগুরে হুজি নয়,’ সালে তে যিয়েন গম্ মনে গরে সিয়েনই মঅ উগুরে গোরোক্।” 27 সে পরেন্দি রাজা ধর্মগুরু সাদোকরে কলঅ, “তুই দঅ বেক্কানি দেগর্। তঅ পূঅ অহীমাস আর অবিয়াথরর্ পূঅ যোনাথনরে লগে গুরিনে তুই গমেডালে শঅরত্ ফিরি যাহ্। 28 যেদক্ষন সং মরে জানিবাত্তে তমাত্তুন্ হবর্ ন-এজে সেদক্ষণ সং মুই ধূল্যেচর-চাগালার্ ভিদিরে গাঙর্ যে জাগায়ান্ আঢিনে পার্ উয়ো যায় সিয়েনত্ বাজ্জেই থেইম্।” 29 সেনত্তেই সাদোক আর অবিয়াথরে গোজেন সুন্দুক্কো লোইনে যিরূশালেমত্ ফিরি গেলাক্ আর সিয়োদোই থেলাক্। 30 ইন্দি দায়ূদে কানদে কানদে জৈতুন মুড়োবো উগুরে উদো ধুরিলো। তে মাঢাবো ঢাগিনে জদা ছাড়া আঢের্। মানুচ্চুনেয়ো বেক্কুনে তা লগে মাধাগুন ঢাগিনে কানদে কানদে উগুরে উদো ধুরিলাক্। 31 সেক্কে দায়ূদোরে কন্না কলঅ, “অবশালোম লগে কুজুরোমিগুরিয়্যে গুনোর ভিদিরে অহীথোফলেয়ো আঘে।” এ কধাগান শুনিনে দায়ূদ ইয়েন কোইনে তবনা গুরিলো, “ও লগেপ্রভু, তুই অহীথোফলর্ সল্লাগানরে ফোলেই ন-দিচ্।” 32 মানুচ্চুনে মুড়ো উগুরে যে জাগায়ানত্ গোজেনরে পুজিদাক্ দায়ূদে সিদু আঝিল্ অলে পরেন্দি অর্কীয় হূশয় তা লগে দেগা গুরিবাত্তে এলঅ। তা পোজাক্কানি ফাদা আর মাধাবোত্ মাদি এলঅ। 33 দায়ূদে তারে কলঅ, “তুই মঅ লগে গেলে মঅ ভারান্ বাড়িবো। 34 তুই শঅরত্ ফিরি যেইনে যুনি অবশালোমরে কচ্, ‘মুই তঅ চাগর্ ওই থেম্; মুই যেধোক্ক্যেন্ আগেন্দি তঅ বাব চাগর্ এলুং সেধোক্ক্যেন ইক্কিনে তঅ চাগর্ ওম,’ সালে তুই অহীথোফলর দিয়্যে সল্লাগানরে বর্বাদ্ গুরি দিইনে মরে বল্ দি পারিবে। 35 ধর্মগুরু সাদোকে আর অবিয়াথরে সিদু তঅ সমারে থেবাক্। রাজঘরত্ তুই যিয়েনি শুনিবে সিয়েনি তারারে জানেবে। 36 সাদোকর পূঅ অহীমাস আর অবিয়াথরর্ পূঅ যোনাথনেয়ো সিয়েনত্ তারা সমারে এলঅ। কিজু শুনোনার পরেন্দি তারার্ মাধ্যমে সিয়েনি মরে জানেবে।” 37 দায়ূদো সমাজ্যে হূশয় যেক্কে যিরূশালেমত্ সুমিলো সেক্কে অবশালোমেয়ো সিয়েনত্ লুমিলো। |
Copyright © 2021 Bangladesh Bible Society
Bangladesh Bible Society